KUKADI bidimu, pavua Rúbia, muanetu wa bakaji udi mpindieu ne bidimu 30 muenze luendu bua kuya kutangila Sandra, mpanda-njila uvua wenza mudimu mu tshisumbu tshikese tshia ku Sud kua Brésil. Pakafika Rúbia, bualu kampanda buakenzeka buvua bumukemeshe bikole ne bushintulule nsombelu wende. Mbualu kayi abu? Rúbia nkayende atulondele.

“Tuakaya ne Sandra bua kukumbula mamu mukuabu uvuaye ulongesha Bible. Patuvua tulonga, mamu au wakamuambila ne: ‘Sandra, kudi bana ba bakaji bakuabu basatu ba muaba undi ngenzela mudimu badi basue kulonga Bible, kadi ndi mubambile bua kuindila tshiabu tshikondo. Ndi mumanye ne: udi ne bia bungi bia kuenza tshidimu etshi.’ Tshivua mua kuitaba bimvua ngumvua bamba to. Bindija bantu badi basue  kumanya Yehowa, pabi mu tshietu tshisumbu mbikole bua kupeta muntu nansha umue wa kulonga nende Bible. Anu patutshivua kumbelu kua mulongi wa Bible au, ngakapeta dijinga dia kuambuluisha bantu ba mu katshimenga kabu aku. Matuku makese pashishe, ngakumbuka mu tshimenga tshinene mumvua musombele ne kuya mu katshimenga muvua Sandra mpanda-njila.”

Ntshinyi tshiakenzeka pakafika Rúbia? Udi wamba ne: “Mu ngondo ibidi yakalonda difika dianyi, nkamvua ndonga Bible ne bantu 15; anu bu Sandra, nkamvua ngindija panyi bantu bakuabu bavua basue kulonga Bible.”

Diego, muanetu wa balume utshidi ukumbajilaku bidimu 20 wakaya kukumbula bana betu ba balume bampanda-njila bavua benzela mudimu mu Prudentópolis, katshimenga kakese ka ku Sud kua Brésil. Malu akamonaye pavuaye mufike akamulenga bikole ne kumusaka bua kuakaja mudimu wende wa kuyisha. Udi wamba ne: “Pamvua mu tshisumbu tshietu, mvua nyisha mêba makese ngondo yonso. Kadi, pangakaya kukumbula bampanda-njila abu ne kumvua malu avuabu bandondele, tshivua ne tshikuabu tshia kuenza to, kadi ngakafuanyikija disanka divuabu nadi mu mudimu wa buambi ne lulengu lumvua meme nalu. Pangakamona muvuabu ne disanka, ngakajinga bua ngikale panyi ne nsombelu bu wabu.” Pakapingana Diego, wakangata mudimu wa bumpanda-njila.

Anu bu Diego, utuku Ntemu utshidi nsonga udi wambila bantu lumu luimpe ne ubuela mu bisangilu kadi muikale mumone ne: udi wenza mudimu wa buambi anu bua kuenza kuyi ne disanka anyi? Bikalabi nanku, udiku mua kushintulula nsombelu webe mu mushindu udi mua kukuambuluisha bua kulabula disanka didi difumina ku diya kuenzela mudimu muaba udibu dijinga ne bamanyishi ba Bukalenge anyi? Bushuwa, bidi mua kuikala bikole bua wewe kulekela nsombelu muimpe. Pabi ke tshidi bansonga ba bungi basungule bua kuenza. Mbadienzeje bua kuakaja malu avuabu balongolole bua kuenza ne majinga abu bua kuvudija mudimu udibu benzela Yehowa. Tshilejilu tshikuabu tshitudi tukonkonona ntshia Bruno.

Bruno udi mpindieu ne bidimu 28 uvua mulongele kukadi bidimu mu tshilongelu tshinene tshia malu a mizike  ne uvua ne dijinga dia kulua mulombodi wa tshisumbu tshia bimbi ba mizike. Nunku, wakalubuluka bimpe mu tulasa tuende ne misangu ya bungi bavua bamubikila bua kulombola tshisumbu tshia bimbi ba mizike. Uvua mutekemene bua kupeta mudimu muimpe. Bruno udi wamba ne: “Nansha nanku mvua ngumvua anu ne: ndi mupangile tshintu kampanda mu nsombelu wanyi. Nkavua mudilambule kudi Yehowa, kadi mvua mumanye ne: tshivua ndifila kudiye ne muoyo mujima to, bualu ebu buvua buntatshisha. Meme kuambila Yehowa mu disambila mumvua ndiumvua ne kuambila kabidi bana betu ba mu tshisumbu bakadi bamonamona malu. Pangakela meji bikole, ngakangata dipangadika dia kuteka mudimu wa kuyisha kumpala kua mizike, meme kulekela kulonga mizike ne kuitaba lutatu ludi lufumina ku diya kuenza mudimu muaba udibu dijinga ne bamanyishi ba lumu luimpe.” Wakapatula bipeta kayi?

Bruno wakaya mu tshimenga tshia Guapiara (tshidi ne bantu batue ku 7 000) tshidi mu kilometre 260 kumbukila mu tshimenga tshia São Paulo. Uvua mushintulule nsombelu wende bikole. Udi wamba ne: “Ngakaya kusombela mu kazubu kakese muvua kamuyi frigo, TV, nansha Enternete. Nansha nanku, mu lupangu muvua bintu bimvua katshia tshiyi muanji kupeta bu mudi kabudimi ne mitshi ya bimuma.” Pavua Bruno wenza mudimu mu tshisumbu tshikese atshi, uvua wambula biakudia, mâyi ne mikanda mu tshibuta musangu umue ku lumingu bua kuya kuyisha mu misoko ya kule; uvua uya ne moto. Bantu ba bungi ba muaba au kabavua banji kumvua lumu luimpe to. Bruno udi wamba ne: “Mvua ndongesha bantu 18 bajima. Pamvua mmona mudi bantu bamvua ndongesha bashintulula nsombelu wabu, mvua ngumvua disanka dia bungi. Nunku ngakamona ne: ndi mupete tshintu tshimvua mupangile mu nsombelu wanyi, mmumue ne: kumvua disanka didi difumina ku diteka malu a Bukalenge pa muaba wa kumpala. Tshivua mua kupeta disanka edi bu meme muipatshile bintu bia ku mubidi to.” Nkuepi kuvua Bruno upetela makuta a kudiambuluisha nawu pavuaye mu Guapiara? Udi wamba ne disanka dionso ne: “Mvua ndongesha bantu bua kuimba guidare.” Bruno utshivua anu kangimba ka nanku nanku.

Mariana ukadi ne bidimu bipatshila ku 30 wakadimona mu nsombelu wa buena wa Bruno. Uvua ndumbulula, kadi nansha muvuaye wenza mudimu wa makuta eu, kavua anu ne disanka dilelela to. Udi wamba ne: “Mvua ndiumvua anu bu mvua ‘ngipata lupepele.’”  (Muam. 1:17) Bena Kristo ba bungi bakamukankamija bua kulua mpanda-njila. Pakela Mariana meji bua bualu ebu pamue ne balunda bende Bianca, Caroline, ne Juliana, bakangata dipangadika dia kuya kuambuluisha mu tshisumbu tshia mu Barra do Bugres. Tshimenga etshi tshivua mu mutantshi wa kilometre binunu bia bungi pabuipi ne ditunga dia Bolivie. Tshiakenzeka ntshinyi?

Mariana udi wamba ne: “Mvua ne meji a kusombamu ngondo isatu. Kadi pakajika ngondo eyi, mvua ndonga Bible ne bantu 15. Bushuwa, bivua bikengela kuambuluisha balongi aba bikole bua kuyabu kumpala mu bulelela. Nunku, tshivua mupete dikima dia kubambila ne: nkavua nya to. Mvua muenzejibue bua kushala.” Ke tshiakenzabu bonso banayi. Mudimu mupiamupia wa Mariana uvuaku mumupeteshe nsombelu muimpe anyi? Udi wamba ne: “Mushindu udi Yehowa mukuate nanyi mudimu bua kuambuluisha bantu bua kuakaja nsombelu wabu mmungenze disanka. Kumanya ne: ndi mpindieu nkuata mudimu ne dîba ne makanda anyi bua kuenza bualu bua mushinga mukole ndibenesha kundi.” Caroline udi uleja mudibu bonso banayi badiumvua wamba ne: “Pandi ndala butuku, ntu ngumvua disanka bualu ndi mudifile ne muoyo umue bua kukeba malu a Bukalenge. Nsombelu wanyi mmuimanyine anu pa mushindu wa kuambuluisha balongi banyi ba Bible. Bidi bingenza disanka bua kubamona baya kumpala. Ndi mumone mudi mêyi a ne: ‘Teta, ulabule, umvue ne: Yehowa udi muakane’ malelela.”​—Mus. 34:8.

Yehowa udi ne disanka padiye umona mudi bansonga ba bungi balume ne bakaji mu buloba bujima ‘badifila ne disanka’ bua kuyisha lumu luimpe lua Bukalenge mu miaba ya kule. (Mus. 110:3; Nsu. 27:11) Bana betu bonso badi badifila ne muoyo mujima nunku badi bapeta masanka a kudi Yehowa.​—Nsu. 10:22.