MU NGONDO muibidi, bampanda-njila 122 bakavua baye mu South Lansing, New York bua kubuela mu Kalasa ka Gilada ka 17. Mu bantu bavua ne bua kulua bamisionere muvua Lowell Turner, William (Bill) Kasten, Richard Kelsey, ne Ramon Templeton. Lowell ne Bill bavua bafumine mu Michigan, Richard mufimine mu Iowa ne Ramon mufumine mu Californie; bakalua balunda.

Pakapita ngondo itanu, bakasanka bikole pakabamanyishabu ne: muanetu Nathan Knorr wa mu Kasumbu Kaludiki uvua ulua bua kuyukila ne balongi. Bana betu banayi aba bavua basue bua kuya kuenza mudimu mu ditunga dimue kuoku mushindu. Kuvuaku malu a bobu kulonga bua mudimu wa bumisionere uvuabu ne bua kuenza anyi? Eyowa, avuaku.

Disanka diabu divua dienda divula pavua muanetu Knorr uyukila ne balongi bonso ne pakatuadijaye kubambila miaba ivuabu ne bua kubatuma. Bantu ba kumpala bakabikilabu ku tshiakuidi bavua bana betu banayi aba bavua ne dilubakana kadi ne disanka. Bakabambila ne: bavua ne bua kuya kuenza mudimu muaba umue. Kadi mmuaba kayi? Biakakemesha balongi babu pakamanyishabu ne: bavua ne bua kuya bonso banayi mu Allemagne. Bakabakumina bikashi bikole.

Bantemu ba Yehowa buloba bujima bavua bakema pavuabu bumvue muvua bena Kristo nabu ba mu Allemagne bashale ne lulamatu katshia ku 1933 too ne mu bukokeshi bua Hitler. Balongi ba bungi badi bavuluka muvuabu balongolola bilamba ne babifila ku Tshibambalu kampanda tshia mu Amérique bua tshibitumine bana betu ba ku mputu panyima pa Mvita mibidi ya buloba bujima. Bena Kristo ba mu Allemagne mbashiye tshilejilu tshimpe bualu bavua ne ditabuja dikole, badisuike bua kuenzela Nzambi mudimu, bikale ne dikima ne beyemene Yehowa. Lowell udi uvuluka muakelaye meji wamba ne: ‘Mpindieu netumanye bimpe menemene bana betu ba balume ne ba bakaji, muntu ne muntu.’ Kakuyi mpata, bu muvua bana betu aba ne disanka, bakaya bua kubikila balela ne balunda babu ku telefone dilolo adi.

Mu dia 27 ngondo wa 7 mu 1951, mazuwa a Homeland akumbuka ku dilobo dia ku musulu wa ku Est kua New York. Bana betu banayi aba bakatuadija luendu luabu lua matuku 11 batangile mu Allemagne. Muanetu Albert Schroeder umue wa ku balongeshi ba mu Kalasa ka Gilada, wakalua pashishe  muena mu Kasumbu Kaludiki uvua mubalongeshe imue miaku ya mu tshiena Allemagne. Pamuapa bu muvua bana betu aba benze luendu mu mazuwa ne bena Allemagne ba bungi, bavua mua kulonga bia bungi. Kadi bidi bimueneka ne: bantu bavuabu benza nabu luendu bavua bakula mu tumiakulu tushilangane tua mu Allemagne. Biakababuelakana.

Mu dibidi dia matuku 7 ngondo wa 8 mu dinda panyima pa bobu bamane kutantamena ntatu ya pa mâyi, bana betu aba bakafika mu Hamburg mu Allemagne. Bakamona miaba yonso muvua mvita ikavua mijike kukadi bidimu bisambombo minyangakaje bintu. Bu muvuabi bibabungamije, bakangata diakamue kawulu batangile ku Wiesbaden, muaba uvua Betele.

Mu disatu mu dinda bakapetangana bua musangu wa kumpala ne Ntemu wa mu Allemagne diende Hans. Wakabambula mu mashinyi kumbukila ku gare too ne ku Betele kuakabafilaye mu bianza bia muanetu wa bakaji kampanda ukavua mukulakaje uvua kayi mumanye Anglais. Kadi muanetu eu uvua wela meji ne: bavua mua kupetangana ku muakulu yeye muakule ne dîyi dikole. Nansha muvuaye ubandisha dîyi, bivua anu bikole bua yeye ne bana betu ba balume banayi aba kumvuanganabu. Ndekelu wa bionso muanetu Erich Frost wa ku Betele wakalua ne kubela muoyo mu Anglais ne disanka. Malu akalongoloka.

Ku ndekelu kua ngondo wa 8, bana betu banayi abu bakabuela mu mpungilu wabu wa kumpala mu ditunga dia Allemagne uvua muenzekele mu Francfort-sur-Main uvua ne tshiena-bualu ne: “Ntendelelu mukezuke.” Bantu bakadisangisha mu mpungilu eu 47 432 ne bu muvua bantu batambule 2 373, biakakolesha tshisumi tshia bamisionere abu ne dijinga diabu dia kuyisha. Kadi matuku makese pashishe, muanetu Knorr wakabambila ne: bavua ne bua kusomba ku Betele bua kuenzaku mudimu.

Bu muvua Ramon ne dijinga dia kuenza mudimu wa bumisionere, ukavua mubenge dibikila dia kuya kuenza mudimu ku Betele wa mu États-Unis. Richard ne Bill bobu kabavua banji kuela meji bua kuya kuenza mudimu dimue dituku ku Betele to. Kadi disanka diakapetabu bua mudimu uvuabu benza divua dibajadikile menemene ne: Yehowa mmumanye tshidi tshimpe buabu. Mbimpe bua kulonda  buludiki bua Yehowa pamutu pa kueyemena majinga etu. Muntu udi mumanye bualu ebu neikale ne disanka bua kuenzela Yehowa mudimu muaba wonso udibu bamutuma ne kuenza mudimu wonso udibu bamupesha.

Bantu ba bungi ba mu dîku dia Betele wa Allemagne bakumvua disanka dia kuikala ne bena mu Amérique munkatshi muabu bualu bavua ne bua kubambuluisha bua kuakula Anglais. Kadi dimue dituku pavuabu mu nzubu wa tshidiilu, bualu kampanda buvuabu kabayi belele meji buakenzeka. Muanetu Frost wakamba mu mushindu muimpe mu tshiena Allemagne bualu kampanda buvua bumueneka bua mushinga. Bantu ba bungi bakashala bapuwe, binamine anu mu malongo. Kadi nansha muvua bana betu banayi abu kabayi bumvua bivuabu bamba, bakatuadija kujingulula ne: bualu abu buvua bubatangila. Pakamba muanetu Frost ne dîyi dikole mu tshiena Allemagne ne: “VERBOTEN!” mmumue ne: “Nkukandikibue,” wamba wambulula ne ubandisha dîyi bua kushindika, biakabatonda. Bavua benze tshinyi tshivua tshikebeshe bualu ebu?

Pakajikijabu kudia, bantu bonso bakaya mu nzubu yabu. Pashishe, muanetu mukuabu wakabambila ne: “Bua nuenu kutuambuluisha, nudi ne bua kumanya tshiena Allemagne. Ke bualu kayi muanetu Frost mmuambe ne: too ne panuamanya kuakula tshiena Allemagne, kuakula nenu mu Anglais NKUKANDIKIBUE.”

Bena mu dîku dia Betele bakatumikila mubelu eu ne lukasa. Bualu ebu buakambuluisha bana betu banayi abu bua kulonga tshiena Allemagne ne mbubalongeshe ne: mubelu mufila kudi muanetu udi mutunange nansha wowu umueneka mukole bua kutumikila, udi anu bua diakalenga dietu. Mubelu wa muanetu Frost wakaleja muvuaye uditatshisha bua diakalenga dia bulongolodi bua Yehowa ne muvuaye munange bena Kristo nende. * Kakuyi mpata, bana betu aba bakalua kumunanga bikole.

Tudi mua kulongela malu a bungi mimpe kudi balunda badi batshina Nzambi, bualu ebu budi mua kutuambuluisha bua kulua balunda bimpe ba Yehowa. Bana betu banayi aba bavua balongele malu a bungi kudi bana betu ba balume ne ba bakaji ba mu Allemagne bungi kabuyi kubala. Kadi bavua kabidi balongele amue malu kudi umue ne mukuabu. Richard udi wamba ne: “Lowell uvua mumanye ndambu wa tshiena Allemagne ne utshiakula, kadi tuetu bakuabu tuvua tutata natshi. Bu muvuaye kabidi mukulumpe kutudi, yeye ke uvua utuambuluisha  bua muakulu au ne utuludika.” Ramon udi uvuluka wamba ne: “Mvua ne disanka dia bungi pavua muanetu wa balume wa mu Suisse mutupeshe kazubu kende patuvua bayamu mu dikisha dietu dia kumpala panyima pa tuetu bamane kuenza tshidimu tshijima mu Allemagne. Tuvua mua kuenza mbingu ibidi katuyi tutata kabidi ne tshiena Allemagne. Nunku tshivua kabidi ntekemena bualu kampanda kudi Lowell to. Wakatusumisha bua tuetu kuikala tubala ne tukonkonona mifundu mu dinda dionso mu tshiena Allemagne. Nansha muvuabi bintonda, Lowell uvua anu musuminyine. Tuakalonga bualu bua mushinga. Mbimpe kulonda buludiki bua bantu badi baditatshisha bua diakalenga diebe nansha musue anyi kuyi musue. Ngikadilu eu wakatuambuluisha mu bidimu bia bungi ne mmutuambuluishe bua kukokela bulongolodi bua Nzambi.”

Balunda banayi aba bakalonga kabidi bua kuanyisha ngikadilu mimpe ivua nayi yonso wa kudibu anu mudi Filipoyi 2:3 wamba ne: “Ne didipuekesha, nuangate bakuabu bu banupite nuenu.” Nunku, bana betu basatu bavua anu balomba Bill bua kuenza midimu ivuaye mua kukumbaja bimpe kubapita bobu. Lowell udi uvuluka wamba ne: “Pavua lutatu kampanda lukole mua kupita nalu lumueneka, Bill uvua utuambuluisha. Uvua ne tshipedi tshia kumanya mua kupita ne nsombelu mikole mu mushindu utuvua tumona ne: mmukumbane, kadi tuetu katuyi ne dikima ne tshipedi tshia kuenza nanku.”

Bana betu aba bakasela ku muntu ku muntu. Bavua balunda bualu bavua banange Yehowa ne banange mudimu wa pa buawu. Nunku, bavua basue bua kusela bakaji bavua bateka mudimu wa Yehowa pa muaba wa kumpala. Mudimu wa pa buawu uvua mubalongeshe ne: kufila kudi kupetesha masanka kupita kuangata, ne bavua balonge kabidi ne: muntu udi ne bua kuteka malu a Bukalenge pa muaba wa kumpala kupita malu adiye ujinga. Nunku bakasungula bana betu ba bakaji bakavua batuadije kuenza mudimu wa pa buawu. Bakenza mabaka anayi mimpe a disanka.

Bua mulume ne mukajende kuikala balunda anyi kunenga mu dibaka diabu, badi ne bua kuikala mu malanda mimpe ne Yehowa. (Muam. 4:12) Nansha muvua Bill ne Ramon balue kufuisha bakaji babu, yonso wa kudibu uvua mupete disanka ne diambuluisha bidi bifumina kudi mukaji wa lulamatu. Lowell ne Richard batshidi anu babambuluisha kudi bakaji babu. Bill wakaselulula wakasungula mukaji muimpe uvua mua kumuambuluisha bua kushala mu mudimu wa pa buawu.

Panyima pa bidimu, midimu yakabapeshabu yakenza bua baye miaba mishilashilangane bu mudi mu Allemagne, mu Autriche, mu Luxembourg, mu Canada ne mu États-Unis. Ke bualu kayi, balunda banayi aba kabatshivua kabidi kaba kamue dîba dionso bu muvuabu mua kuikala basue to. Nansha muvuabu miaba mishilangane, bavua anu babikilangana ne bafundilangana; pavua umue wa kudibu upeta disanka, bonso bavua basanka, pavuaye upeta lutatu bonso bavua babanyangana lutatu alu. (Lomo 12:15) Balunda ba nunku ndibenesha ne tudi ne bua kuikala ne dianyisha kudibu. Badi dipa dia mushinga mukole dia kudi Yehowa. (Nsu. 17:17) Balunda bimpe ba nunku mbakese mu bulongolodi ebu. Kadi muena Kristo mulelela yonso udi mua kubapeta ba bungi. Bu  mutudi Bantemu ba Yehowa, tudi tudia bulunda ne bena Kristo netu ba pa buloba bujima ne kupita bionso ne Yehowa Nzambi ne Yezu Kristo.

Anu bu mudibi mua kufikila yonso wa kutudi, balunda banayi aba mbapetangane ne ntatu kampanda bu mudi: difuisha muena dibaka, lutatu lua ditantamena disama dikole, kuditatshisha bua baledi bakadi bakulakaje, lutatu lua dikolesha bana eku bikale mu mudimu wa pa buawu, lutatu ludi lumueneka padi muntu witaba midimu mipiamipia idibu bamupesha mu bulongolodi ne ntatu ya bukulakaje. Kadi mbamanye kabidi ne: balunda batudi nabu pabuipi ne badi kule badi bambuluisha bantu badi banange Yehowa bua kutantamena lutatu luonso.

Bidi bienza disanka bua muvua Lowell mudilambule kudi Yehowa ne bidimu 18, Ramon ne bidimu 12, Bill ne bidimu 11, ne Richard pende ne bidimu 10 ne bua muvuabu batuadije mudimu wa pa buawu bikale ne bidimu pankatshi pa 17 ne 21. Bakenza anu mudi Muambi 12:1 mubakankamije wamba ne: “Uvuluke Mufuki webe mu matuku a bunsongalume buebe.”

Biwikala nsonga muena Kristo mulume, koku mushindu itaba dilomba dia Yehowa dia kuenza mudimu wa pa buawu. Anu bu bana betu banayi bavua balunda abu, udi mua kupeta masanka ku diambuluisha dia ngasa wa Yehowa wewe muenze mudimu bu mudi wa kulua mutangidi wa tshijengu, wa distrike, anyi wa zone; kuenza mudimu ku Betele, nansha kulua muena mu Komite wa filiale; kulua mulongeshi mu Kalasa ka Mudimu wa Bukalenge, mu Kalasa ka bampanda-njila ne kuenza miyuki mu mpuilu ne mu mpungilu. Bana betu aba bavua ne disanka bua kumanya ne: mbambuluishe bantu ba bungi mu mudimu wabu. Mbenze bionso ebi bualu bavua bitabe dibikila dia Yehowa bua kumuenzela mudimu ne muoyo mujima patshivuabu bansonga.​—Kolos. 3:23.

Lelu, Lowell, Richard ne Ramon badi benza kabidi mudimu muaba umue mu Betele wa mu Selters mu Allemagne. Bia dibungama, Bill wakafua mu 2010 pavuaye mpanda-njila wa pa buende mu États-Unis. Lufu luende luakanyungusha bulunda bua pa buabu buvua bana betu aba badie munkatshi mua bidimu bitue ku 60. Kadi Yehowa Nzambi wetu, kena upua balunda bende muoyo to. Tudi batuishibue ne: mu Bukalenge buende, bulunda bua muena Kristo yonso budi bushipa kudi lufu nebualukile kabidi.

Matuku makese kumpala kua Bill kufua, wakafundila balunda bende basatu abu ne: “Mu bidimu bionso 60 bia bulunda buetu, tshiena mvuluka bualu bubi nansha bumue butuvua benzelangane to. Ntu anu ngangata bulunda buetu ne mushinga wa bungi.” Bu muvuabu batekemene ne: bulunda buabu buvua ne bua kutungunuka bua kashidi mu bulongolodi bupiabupia, bakamuandamuna ne lukasa luonso ne: “Tutshidi anu ku ntuadijilu kua bulunda buetu.”