“BINTU bionso ebi mbia tshinyi?” Ke muakebeja George Naish ufunkuna mushiki wa bintu bivua muaba uvuabu balamina bintu bia Mvita ya kumpala ya buloba bujima mu Saskatoon mu provense wa Saskatchewan mu ditunga dia Canada bivua bule bua metre 18. Bakamuandamuna ne: mmitshi ivuabu benza nayi mudimu bua kuibaka bibumba munkatshi mua Mvita ya kumpala ya buloba bujima. Muanetu Naish wakamba pashishe ne: “Lungenyi luakanduila ne: tuvua mua kuenza mudimu ne mitshi eyi bua kuibaka antene ya bisanji, eu ke musangu wa kumpala utuakapeta lungenyi lua kuasa bisanji mu miaba kampanda bua mudimu wetu wa kuyisha.” Tshidimu tshijima tshimane kupita mumue ne: mu 1924, bakasa tshisanji tshia CHUC ne kutuadijatshi kuenza mudimu. Bua mu Canada tshivua tshisanji tshia kumpala tshia malu a Nzambi tshivuabu base.

Bu muvua Canada muikale ditunga dinene, uvua muaba uvua mukumbana bua kuyishila lumu luimpe ku tudiomba. Muanetu Florence Johnson uvua wenza mudimu ku kadiomba ka mu tshimenga tshia Saskatoon wakamba ne: “Ndi nsanka bikole bua tshisanji tshietu bualu bulelela mbufike kudi bantu ba bungi batuvua katuyi mua kufika miaba ivuabu. Bu mutshivua tshisanji etshi tshipiatshipia ne tshimpe, bantu bavua ne disanka dia bungi bua kumvua malu onso avuabu bamanyisha.” Mu 1926, Balongi ba Bible (ke muvuabu babikila Bantemu ba Yehowa tshikondo atshi) bakavua ne tudiomba tuabu mu bimenga binayi bia mu Canada. *

Mmalu kayi avua bantu bumvua ku tudiomba etu? Bena misambu ba mu tshisumbu tshia muaba uvua tshisanji bavua pa tshibidilu benza tusumbu bua kuimba misambu ne biamu bia kuimba nabi. Bushuwa bana betu bavua kabidi benza miyuki ne balombola diyukidilangana dia malu a mu Bible. Muanetu Amy Jones uvua pende mubuele mu diyukidilangana edi udi uvuluka wamba ne: “Mu mudimu wa buambi, pamvua ndimanyisha kudi bantu, bantu bavua bamba imue misangu ne: ‘ang, eyowa, mvua mumvue dîyi diebe ku tshisanji.’”

Mu Halifax, Provense wa Nouvelle-Écosse, Balongi ba Bible bavua benza ndongamu yabu ya ku tudiomba mu mushindu wa pa buawu bishilangane ne bivua tudiomba tukuabu tuenza mu tshikondo atshi. Bavua bafila tshiena-bualu kampanda ne balomba bateleji bua bababikile ku telefone ne babele nkonko yabu bua malu adibu bumvue. Muanetu kampanda wakafunda ne: “Mandamuna avuabu bafila mu ndongamu eu avua akemesha  bikole. Katuvua ne mushindu wa kuandamuna bateleji bonso to, bualu bantu bavua batubikila bavua ba bungi be.”

Anu bu mu tshikondo tshia mupostolo Paulo, bamue bantu bavua bitaba mukenji wa Balongi ba Bible ne bakuabu bawubenga. (Bien. 17:1-5) Bamue bateleji bavua basue bikole mukenji wa mu Bible. Tshilejilu, pavua Hector Marshall muteleje Balongi ba Bible bakula bua mukanda wa Études des Écritures ku tudiomba, wakalomba Volime isambombo ya mukanda eu. Wakalua kufunda ne: “Mvua ngela meji ne: mikanda eyi neyingambuluishe bua kulongesha mu kalasa ka Dia lumingu.” Kadi pakajikija Hector kubala volime wa kumpala, wakangata dipangadika dia kumbuka mu tshitendelelu tshiabu. Wakalua mumanyishi wa lumu luimpe wa tshisumi, wakenzela Yehowa mudimu ne lulamatu too pakafuaye mu 1998. Dituku diakalonda dituku divuabu benze muyuki uvua ne tshiena-bualu tshia ne: “Bukalenge bua Nzambi nditekemena dia bukua bantu,” Colonele John MacDonald wa ku Est kua tshimenga tshia Nouvelle-Écosse wakambila muanetu mukuabu wa mu tshimenga atshi ne: “Malaba mushale, bantu ba mu tshidiila tshia Cape Breton bavua bateleje mukenji wa mu Bible uvuabu katshia kabayi banji kuteleja mu tshidiila etshi.”

Ku lukuabu luseke, bamfumu ba bitendelelelu bavua bafiike munda. Bamue bena Katolike ba mu Halifax bakakana bua kupula tshisanji tshivua tshipitshisha ndongamu ya Balongi ba Bible. Mbulamatadi muenzeja kudi bamfumu ba bitendelelu wakamanyisha mu 1928 ne: kavua kabidi ne bua kupesha Balongi ba Bible mikanda mipiamipia ya kubanyishila nayi dienza dia mudimu ku bisanji biabu to. Pakamona bana betu bualu ebu, bakabanya trakte uvua ne tshiena-bualu tshia ne: Nnganyi udi mfumu wa kapepe aka? (Angl.) bua kuleja muvuabu kabayi banyisha tshivuabu babenzele. Nansha nanku, mbulamatadi wakabenga kupesha kabidi Balongi ba Bible mikanda ya tudiomba tuabu.

Bualu ebu buvuaku butekeshe kasumbu kakese ka batendeledi ba Yehowa ba mu Canada bua kulekela tshisumi tshiabu tshia mudimu wa diyisha anyi? Isabel Wainwright wakamba ne: “Kumpala, biakamueneka bu ne: baluishi bavua batshimune. Kadi mvua mumanye ne: bu Yehowa musue bua tuetu kutungunuka ne kuyisha ku bisanji kavua mua kuanyishila mbulamatadi bua kukanga bisanji bietu to. Ebi bivua bimvuija ne: tuvua ne bua kukeba mishindu mikuabu mimpe ya kuyisha lumu luimpe lua Bukalenge.” Pamutu pa kunanga kuyisha anu ku bisanji, Balongi ba Bible ba mu Canada bakatuadija kudifila ku ditangila bantu ku nzubu yabu. Kadi tshikondo atshi, tshisanji tshivua tshiambuluishe bikole bua bantu kutelejabu ‘mukenji uvuabu katshia kabayi banji kuteleja.’​—Mu bintu bietu bia kale bia mu Canada.