“DÎYI dia Nzambi didi ne muoyo ne bukole.” (Eb. 4:12) Mupostolo Paulo uvua mufunde mêyi aa bua kuleja bukole budi nabu dîyi dia Nzambi bua kulenga mioyo ne kukudimuna nsombelu wa bantu.

Kadi bantu bakabuejakaja bukole budi nabu mêyi a mu Bible pavua butontolodi bukavuabu balaye bubuele mu tshisumbu panyima pa lufu lua bapostolo. (2 Pet. 2:1-3) Pakapita matuku, bamfumu ba bitendelelu bakatuadija kupesha Dîyi dia Nzambi bukole buvua nabu manga. Mulongeshi Harry Gamble wakafunda bua “dikuata mudimu ne mifundu ya bena Kristo mu malu a manga.” Wakaleja ne: mu bidimu bia 200, Origène uvua munene wa Ekeleziya wakamba ne: “Kumvua mêyi a tshijila kudi kuambuluisha muntu mu mushindu kampanda. Bikala mêyi mikale ne bukole mu malu a majimbu, kadi mêyi malelela a Nzambi a mu Bible adi mua kuikala wowu ne bukole bua mushindu kayi?” John Chrysostom uvua ne muoyo ku ndekelu kua bidimu bia 300 wakafunda ne: “Diabolo kena mua kusemena pabuipi ne nzubu udibu batekele Evanjeliyo to.” Wakamba kabidi mudi bamue bantu balembeleja miaku ya mu Evanjeliyo mu nshingu bu tshijimba kampanda. Mulongeshi Gamble wakaleja kabidi muvua Augustin (muena Katolike uvua mulonge tulasa tua malu a Nzambi) muambe “muvuabi bianyishibue bua muntu uvua usama mutu kutekaye Evanjeliyo wa Yone muinshi mua musamu wende padiye ulala.” Nunku, bavua benza mudimu ne mifundu ya mu Bible bua malu a majimbu. Utu wangata Bible bu tshijimba peshi buanga bua kudilama nabu budi mua kukukuba bua kabakuenzedi bibi anyi?

Pamuapa mushindu mukuabu wa dienza mudimu bibi ne Bible udi mutangalake ntshilele tshia kukosa mukanda. Kukosa mukanda ntshinyi? Kudi kumvuija kukangula ku mpukapuka mukanda kampanda, nangananga Bible ne kubala mêyi a kumpala adi mêsu atuishila muitabuje ne: mêyi au neakupeshe buludiki buudi nabu dijinga. Tshilejilu, bilondeshile mulongeshi Gamble, pavua Augustin mumvue dîyi dia muana difumina mu nzubu wa muena mutumba diamba ne: “Angata ubale, angata ubale,” wakangata bualu abu bu dîyi dituma kudi Nzambi bua kubulula Bible ne kubala mêyi a kumpala uvua mêsu ende atuishila.

Ukadiku mumvue bakula bua bantu bavua dîba divuabu mu nsombelu mukole basambile Nzambi ne babulule Bible ku mpukapuka, bitabuja ne: mvese wa kumpala uvua ne bua kubambuluisha bua kutantamena lutatu anyi? Nansha bobu benze bualu ebu bikale ne meji mimpe, eu ki mmushindu muimpe udi bena Kristo ne bua kukeba buludiki bua mu Bible to.

Yezu Kristo wakajadikila bayidi bende ne: uvua ne bua kubatumina “muambuluishi, nyuma muimpe.” Wakatungunuka wamba ne: “Yeye neanulongeshe malu onso ne neanuvuluije malu onso amvua munuambile.” (Yone 14:26) Kadi, tshilele tshia kukosa mukanda katshiena tshilomba kuikala ne dimanya dia Bible to.

Tshilele tshia kukosa mukanda ne bilele bikuabu bibi bidi bantu benza nabi mudimu ne Bible mbitangalake. Kadi Dîyi dia Nzambi didi dikandika kutempa kua mbuku. (Lew. 19:26; Dut. 18:9-12; Bien. 19:19) “Dîyi dia Nzambi didi ne muoyo ne bukole,” kadi tudi ne bua kuikala bamanye mua kuenza nadi mudimu. Dimanya dijalame dia Bible ke didi diakaja nsombelu wa bantu, kadi ki ndikuata mudimu bibi ne Bible to. Kupeta dimanya dia mushindu eu nkuambuluishe bantu ba bungi bua kuikala ne bikadilu bia tshitembu, kulekela nsombelu udi mua kubateka mu njiwu, kukolesha malanda a bena mu dîku ne kulengeja malanda a muntu ne Muena Bible.