1. Bantu ba bungi batu ne lungenyi kayi bua bidi bitangila budikadidi?

KUKADI bidimu bu 2 500 mpindieu, mufundi kampanda muena Greke wakafunda ne: “Kakutu muntu nansha umue utu musue ne muoyo mujima bua kulua mupika to.” Bantu ba bungi lelu batu bitaba mêyi ende aa. Patubu bakula bua bupika, tutu tumona mu lungenyi luetu bantu batubu bakengesha ne benzeja midimu mikole; badi benza mudimu eu ne badifila kabiyi bua diakalenga diabu buobu, kadi bua masanka a badi babakuate ku bupika.

2, 3. a) Mmuaba kayi udi nawu bantu badi bitabe bua kuikala bapika ba Kristo? b) Nnkonko kayi idi itangila balami ituakonkonona?

² Kadi Yezu wakaleja ne: bayidi bende bavua ne bua kuikala bena mudimu ba bakuabu anyi bapika babu. Bupika bua bena Kristo balelela kabuena bubapuekeshisha milongo anyi bubatonda to. Kadi budi bubapetesha lumu ne kanemu ne badi kabidi babeyemena. Tshilejilu, tumone tshivua Yezu muambe bua “mupika” kampanda matuku makese kumpala kua lufu luende. Kristo ukavua mulaye ne: uvua ne bua kupesha “mupika wa lulamatu udi mudimuke” midimu ya kuenza.​—Mat. 24:45-47.

³ Mbikumbane mudibu babikila kabidi mupika eu ne: “mulami wa bintu” mu mukanda mukuabu udi wakula bua bualu bumue bumue ebu. (Bala Luka 12:42-44.) Bena Kristo ba bungi ba lulamatu badi ne muoyo lelu kabatu bena mu kasumbu ka mulami wa bintu udi ne lulamatu to. Kadi, Bible udi uleja ne: bonso badi benzela Nzambi mudimu badi ne mudimu wa kulama bintu. Mmidimu kayi idibu babapeshe? Badi ne bua kuyimona mushindu kayi? Bua kuandamuna nkonko eyi, tukonkononayi midimu ivua nayi balami mu bikondo bia kale.

4, 5. Mmidimu kayi ivua nayi balami ba bintu ba kale? Fila bilejilu.

⁴ Mu bikondo bia kale, misangu ya bungi bavua bapesha  mupika uvuabu beyemena mudimu wa kutangila bionso bia mu nzubu ne mishinga ya mfumuende. Nunku, balami bavua ne bukokeshi bunene ne mudimu wa kutangila bintu, makuta ne kutangila bapika bakuabu. Tshilejilu tshia Eliezê uvuabu bapeshe bujitu bua kutangila bintu bia bungi bia Abalahama tshidi tshijadika bualu ebu. Eliezê ke uvua Abalahama mua kuikala mutume ku Mesopotamia bua kusunguila muanende Isaka mukaji. Tshivua mudimu munene ne wa mushinga mukole.​—Gen. 13:2; 15:2; 24:2-4.

⁵ Jozefe uvua munkana wa Abalahama uvua utangila bintu bionso bia Potifâ. (Gen. 39:1, 2) Pakapita matuku, Jozefe wakapeta pende mulami uvua utangila biende bintu uvuabu basungule bua kuikala ‘mulami wa nzubu wa Jozefe.’ Mulami au wakalongolola bua kuakidila bana babu ne Jozefe dikumi. Jozefe wakamutumina dîyi bua alongolole malu bua lupanza lua argent luvua bu luiba. Bidi bimueneka patoke ne: bavua beyemena bikole balami ba bintu.​—Gen. 43:19-25; 44:1-12.

6. Mmidimu kayi ya bulami idibu benza kudi bakulu?

⁶ Bidimu nkama ya bungi pashishe, mupostolo Paulo wakafunda ne: bakulu bena Kristo bavua ne bua kuikala ‘balami ba bintu bia Nzambi.’ (Tito 1:7) Bu mudibu basungule bakulu bua kutangila “tshisumbu tshia mikoko ya Nzambi,” badi balombola ne bafila buludiki mu bisumbu. (1 Pet. 5:1, 2) Bushuwa, badi benza midimu mishilangane. Tshilejilu, bakulu ba bungi lelu batu benza mudimu mu tshisumbu anu tshimue. Batangidi bena ngendu batu benza mudimu mu bisumbu bia bungi. Bena mu Komite wa filiale batu batangila bobu bisumbu bionso bidi mu ditunga. Nansha nanku, buonso buabu badi ne bua kukumbaja midimu yabu ne lulamatu ne badi ne bua “kubadila Nzambi malu.”​—Eb. 13:17.

7. Ntshinyi tshidi tshileja ne: bena Kristo bonso mbalami ba bintu mu mushindu kampanda?

⁷ Kadi netuambe tshinyi bua bena Kristo ba lulamatu ba bungi badi kabayi bakulu? Mupostolo Petelo wakafundila bena Kristo bonso mu tshibungi wamba ne: “Bilondeshile mudi muntu yonso mupete tshipedi, nukuate natshi mudimu bua kuambuluishangana bu balami bimpe ba ngasa wa Nzambi udi mumueneshibue mu mishindu ya bungi.” (1 Pet. 1:1; 4:10) Nzambi mmupeshe yonso wa kutudi bua ngasa wende bipedi, mapa, meji ne mamanya bitudi mua kuenza nabi mudimu bua kuambuluisha bena Kristo netu. Nunku, mutendeledi wa Nzambi yonso mmulami, ne mudimu wende wa bulami udi umupetesha lumu, badi bamueyemena ne udi upeta bujitu kampanda.

8. Mbumue bua ku malu manene kayi butudi ne bua kuvuluka?

⁸ Tuakule mpindieu bua malu manene asatu aditu ne bua kuelela meji tuetu bu balami ba bintu. Dia kumpala: Tuetu bonso tudi bantu ba Nzambi ne, netumubadile malu. Paulo wakafunda ne: “Kanuena badikadile, bualu bavua banusumbe ku mushinga mukole,” mmumue ne: ku mashi a mulambu wa Kristo. (1 Kol. 6:19, 20) Bu mutudi bantu ba Yehowa, tudi benzejibue bua kutumikila mikenji yende bualu kayena ne bujitu. (Lomo 14:8; 1 Yone 5:3) Tudi kabidi tulua bapika ba Kristo. Anu bu balami ba bintu ba kale, tudi ne budikadidi, kadi ki mbua kuenza tshionso tshitudi basue to. Tudi ne bua kukumbaja majitu etu anu mu mushindu udibu batulongeshe. Nansha tuetu ne majitu kayi mu tshisumbu, tudi anu bena mudimu ba Nzambi ne ba Kristo.

9. Mmushindu kayi uvua Yezu mumvuije malanda adi pankatshi pa mfumu ne mupika?

⁹ Yezu udi utuambuluisha bua kumvua malanda adi pankatshi pa mfumu ne mupika. Umue musangu wakambila bayidi bende bua mupika kampanda uvua mupingane kumbelu pakajikijaye mudimu uvuaye muenze dituku dijima. Mfumu uvuaku muambe ne: “Luaku apa mpindieu usombe ku mêsa bua kudia” anyi? Tòo.  Wakamuambila ne: “Ndongoluela tshintu tshia meme kudia dilolo, suika kalamba ka mudimu, ungenzele mudimu too ne pangajikija kudia ne kunua.” Ndilongesha kayi divua Yezu mupatule muaba eu? Wakamba ne: “Nunku nuenu penu, panuenza malu onso avuabu banuambile bua kuenza, nuambe ne: ‘Tudi bapika ba tshianana. Tudi benze anu tshituvua ne bua kuenza.’”​—Luka 17:7-10.

10. Ntshinyi tshidi tshileja ne: Yehowa udi wanyisha mushindu utudi tudienzeja bua kumuenzela mudimu?

¹⁰ Tumanye ne: Yehowa udi wanyisha didifila dietu bua kumuenzela mudimu. Bible udi utujadikila ne: “Nzambi ki mmupange buakane bua kupuaye mudimu wenu muoyo ne dinanga dinuvua baleje bua dîna diende.” (Eb. 6:10) Yehowa katu utulomba malu atudi katuyi mua kukumbaja to. Kabidi, malu onso atuye utulomba bua kuenza adi bua diakalenga dietu ne kaatu mapite bujitu to. Nunku, bilondeshile lusumuinu lua Yezu, mupika kena mua kudisankisha, uteka malu ende pa muaba wa kumpala to. Bualu bua mushinga budi ne: patudi tudilambula kudi Nzambi, tudi tusungula bua kuteka disua diende pa muaba wa kumpala mu nsombelu wetu. Kutuku witaba bualu ebu anyi?

11, 12. Bu mutudi balami, nngikadilu kayi utudi ne bua kuikala nende? Nyepi itudi ne bua kuepuka?

¹¹ Dîyi dibidi didi ne: Bu mutudi balami, tuetu bonso tudi tutumikila mikenji ya muomumue. Bushuwa, batu bapesha anu bantu bakese amue majitu mu tshisumbu tshia bena Kristo. Kadi, majitu a bungi atu kudi bantu bonso. Tshilejilu, bu mutudi bayidi ba Kristo ne Bantemu ba Yehowa, badi batulomba bua kunangangana. Yezu wakamba mudi dinanga dikale tshimanyinu tshia bena Kristo balelela. (Yone 13:35) Kadi katuena tunanga anu bena Kristo netu nkayabu to. Tudi tudienzeja bua kunanga too ne bantu badi kabayi bana betu ba mu ditabuja. Ebu mbualu budi yonso wa kutudi mua kuenza ne budiye ne bua kuenza.

¹² Tudi ne bua kuikala kabidi ne ngikadilu mimpe. Tudi basue kuepuka ngikadilu ne dienza malu adi Dîyi dia Nzambi dikandike. Paulo wakafunda ne: “Bena tshiendenda anyi batendeledi ba mpingu anyi bena masandi anyi balume badibu balala nabu bu bakaji anyi balume badi balala ne balume, anyi bivi anyi bena lukuka anyi bakuatshiki ba maluvu anyi bapendianganyi anyi banyengianganyi ba bintu kabakupiana Bukalenge bua Nzambi to.” (1 Kol. 6:9, 10) Bushuwa, bidi bikengela kudienzeja bua kuenza malu bilondeshile mikenji miakane ya Nzambi. Didienzeja edi didi ne mushinga bualu didi ditupetesha masanka a bungi bu mudi: kuikala ne makanda a mubidi mimpe, malanda mimpe ne bantu bakuabu ne kuanyishibua kudi Nzambi.​—Bala Yeshaya 48:17, 18.

13, 14. Bena Kristo bonso badi ne mudimu kayi? Tudi ne bua kuwumona mushindu kayi?

¹³ Vuluka kabidi ne: mulami uvua ne mudimu wa kuenza. Ke mudibi kabidi buetu tuetu. Mbatupeshe dipa dia mushinga mukole, mmumue ne: dimanya dia bulelela. Nzambi mmusue bua tupeshe bantu bakuabu dimanya edi. (Mat. 28:19, 20) Paulo wakafunda ne: “Muntu atumone tuetu bu bena mudimu ba Kristo ne balami ba malu masokoka a tshijila a Nzambi.” (1 Kol. 4:1) Paulo wakaleja ne: mudimu wa bulami bua bintu eu uvua ulomba kulama bimpe “malu masokoka a tshijila” ne kuamanyisha bakuabu ne lulamatu anu muvua Mfumu Yezu Kristo muleje.​—1 Kol. 9:16.

¹⁴ Kabidi, kuyisha bulelela mbualu bua mushinga mukole butudi ne bua kuenza. Kadi bena Kristo bonso kabatu mu nsombelu wa muomumue to. Bonso kabena mua kuyisha mushindu wa muomumue nansha. Yehowa mmumanye bualu ebu. Tshidi ne mushinga nkuenza tshionso tshitudi bakumbane bua kuenza. Patudi tuenza nunku, tudi tuleja Nzambi ne bantu netu dinanga didi kadiyi ne lubombo.

15-17. a) Bua tshinyi mbimpe mulami ikale ne lulamatu? b) Mmunyi muvua Yezu muleje bubi bua dibenga kuikala ne lulamatu?

¹⁵ Dîyi disatu didi dipetangana ne abidi a kumpala; didi ne: Tudi ne bua kuikala ne lulamatu ne kuikala bantu ba kueyemena. Mulami wa bintu kampanda udi mua kuikala ne ngikadilu ya bungi mimpe ne mamanya a bungi, kadi malu aa kaakuikala ne mushinga pikalaye kavua ukumbaja mudimu wa mfumuende anyi kayi mumulamate. Lulamatu ludi ne mushinga bua muntu kuikalaye mulami wa bintu muimpe. Tuvulukayi muakafunda Paulo wamba ne: “Tshidibu batekemene kudi balami nkubasangana bikale ne lulamatu.”​—1 Kol. 4:2.

¹⁶ Tudi ne bua kuikala bashindike ne: tuetu ne lulamatu netupete difutu. Tuetu katuyi nalu netujimije bitudi nabi. Bualu ebu budi bumuenekela mu lusumuinu lua Yezu lua ntalanta. Bapika bavua ne lulamatu ‘bakenduluka mushinga’ ne makuta a mfumuabu, bakabela kalumbandi ne kupetabu masanka a bungi. Mupika uvua kayi muende mushinga ne bintu bivua mfumuende mumupeshe bakamuamba muvuaye mupika “mubi,” “muena lulengu” ne “wa tshianana.” Bakamunyenga ntalanta uvuabu bamupeshe ne kukupabu mupika eu pambelu.​—Bala Matayi 25:14-18, 23, 26, 28-30.

¹⁷ Musangu kampanda, Yezu wakaleja bipeta bibi bidi bifumina ku dibenga kuikala ne lulamatu. Wakamba ne: “Muntu mubanji mukuabu uvua ne mulami wa bintu biende, ne bakamufunda kudiye muvuaye unyangakaja bintu biende. Ke yeye kumubikila, kumuambila ne: ‘Mbualu kayi ebu bundi ngumvua buebe wewe? Mpesha mukanda wa mushindu uudi ulama bintu, bualu kuakulama kabidi bintu bia mu nzubu muanyi nansha.’” (Luka 16:1, 2) Bu muvua mulami eu munyangakaje bintu bia mfumuende, mfumu wakamuipata. Ndilongesha dinene kutudi. Katuena  basue kupangila lulamatu mu malu adiye utulomba bua kuenza to.

18. Bua tshinyi katuena ne bua kudifuanyikija ne bakuabu?

¹⁸ Muntu yonso wa kutudi udi mua kudikonka ne: ‘Bulami buanyi budi mushindu kayi?’ Lutatu ludi mua kujuka patudi tudifuanyikija ne bantu bakuabu. Bible udi utubela ne: “Muntu yonso akonkonone bienzedi biende, pashishe neapete tshidiye mua kuditumbishila bua bualu buende nkayende, kayi udifuanyikija ne muntu mukuabu.” (Gal. 6:4) Pamutu pa kufuanyikija mudimu wetu ne udi bakuabu benza, mbimpe kuela meji bimpe pa bitudi tuetu bine mua kukokesha mua kuenza. Kuenza nunku nekutuambuluishe ku luseke lumue bua kubenga kuditambisha, ne ku lukuabu bua kubenga kuteketa ku muoyo. Patudi tulonga tshidi mudimu wetu nkayetu, netufike ku ditaba ne: nsombelu itu ishintuluka. Pamuapa bua tusamasama, bukulakaja, anyi bua majitu makuabu, katuena mua kuenza mudimu anu bu mutuvua ne tshibidilu tshia kuwenza to. Ku luseke lukuabu, tudi mua kuikala bakumbane bua kuenza malu mapite pa atudi tuenza lelu. Bikalabi nanku, katuenaku mua kuvudija mudimu wetu anyi?

19. Bobu kabayi batupesha majitu kampanda, bua tshinyi katuena ne bua kuteketa mu mikolo?

¹⁹ Bualu bukuabu butudi ne bua kuelela meji mmajitu atudi nawu anyi atudi tujinga bua kuikala nawu. Tshilejilu: muanetu wa balume kampanda udi mua kujinga bua kuikala pende mukulu anyi bua kuenzaye pende mudimu mu mpuilu ne mpungilu. Kudienzeja bua kukumbaja ngikadilu milomba bua midimu eyi nkuimpe, kadi katuena ne bua kuteketa mu mikolo bikalabu kabayi batupeshayi dîba ditudi bayindile to. Bua malu atudi katuyi mua kumvua, tudi mua kulua kupeta amue majitu matuku a bungi pashishe bishilangane ne mutuvua batekemene. Tuvuluke ne: Mose uvua umueneka bu mukumbane bua kupatula bena Isalele mu Ejipitu, kadi uvua ne bua kuanji kuindila bidimu 40. Mu bidimu ebi wakapeta ngikadilu ivuaye nayi dijinga bua kulombola tshisamba tshia bena mutu mukole ne batomboki.​—Bien. 7:22-25, 30-34.

20. Ndilongesha kayi ditudi mua kupeta bua tshivua tshifikile Yonatana?

²⁰ Imue misangu katuena anu mua kufika ku dipeta mudimu kampanda mu bulongolodi to. Ke muvuabi bua Yonatana. Yeye ke uvua muana wa Shaula uvua mua kupiana nkuasa wa bukalenge mu Isalele. Kadi Nzambi wakasungula Davidi bua kuikalaye mukalenge nansha muvuaye muana mukese kudi Yonatana. Tshiakenzaye ntshinyi bua disungula edi? Yeye e kuitaba ne kutua Davidi nyama ku mikolo nansha muvuabi mua kumufikisha ku lufu. Wakambila Davidi ne: ‘Wewe newikale mukalenge wa Isalele, ne meme nengikale muibidi’ panyima pebe. (1 Sam. 23:17) Ndilongesha kayi didi muaba eu? Yonatana wakitaba nsombelu wende ne bishilangane ne tatuende, kavua mumvuile Davidi mukawu to. Pamutu pa kumvuila bakuabu lubabu bua midimu idibu benza, yonso wa kutudi udi ne bua kutangila ne muoyo mujima mushindu udiye ukumbaja midimu idiye nayi. Tumanyayi ne: mu bulongolodi bupiabupia, Yehowa neenze bua dijinga dionso dimpe didi nadi muntu wende dikumbane.

21. Mmushindu kayi utudi mua kuangata mudimu wetu wa bulami?

²¹ Tukuatayi mu lungenyi ne: bu mutudi balami ba kueyemena, katuena ku bupika budi butuyobesha, batunuishila mâyi ku lusona ne tudila to. Buetu bupika mbulenga. Tudi ba muabi bua kuikala ne muaba wa lumu, mbatupeshe mudimu wa kuenza wikala kawuyi mua kuenzeka kabidi wa kuamba lumu luimpe mu matuku aa a ku nshikidilu wa bulongolodi ebu. Patudi tuenda tuenza mudimu eu, tudi ne budikadidi bunene pa bidi bitangila mushindu utudi tukumbaja midimu yetu. Bua nanku, tuikalayi balami ba bintu ba lulamatu. Nunku tuanyishayi muabi utudi nawu wa kuenzela Eu udi mutambe bunene mu diulu ne pa buloba mudimu.