1, 2. a) Muaku wa mu tshiena Ebelu uvuabu bakudimune ne: “butumbi” udi umvuija tshinyi? b) Nnkonko kayi ituandamuna mu tshiena-bualu etshi?

PATUBU bakula bua muaku “butumbi,” ntshinyi tshitu tshikuluila mu lungenyi? Utu wela meji bua buimpe bua bifukibua bia Nzambi anyi? (Mus. 19:1) Utuku wela meji bua butumbi ne lumu bitubu bapesha bantu batu ne bubanji bua bungi, meji a bungi ne badi benza malu kampanda a pa buawu anyi? Muaku wa mu tshiena Ebelu uvuabu bakudimune ne: “butumbi” udi umvuija bujitu. Mu bikondo bia kale pavuabu benza makuta ne mabue a mushinga, makuta avua alua ne mushinga wa bungi bilondeshile bujitu buawu. Ke bualu kayi muaku udibu bakudimune ne: “butumbi” udi mua kuleja tshintu tshidi ne mushinga wa bungi anyi tshidi tshikemesha bikole.

² Nansha mutudi tuetu mua kukema bua bukole budi nabu muntu kampanda, muanzu wende anyi lumu, ntshinyi tshitu Nzambi yeye umona kudi bantu? Bushuwa, Bible utu wakula bua butumbi butu Nzambi upesha bantu. Tshilejilu, Nsumuinu 22:4 udi wamba ne: ‘Difutu dia kudipuekesha ne dia ditshina dietu dia Yehowa didi bubanji, butumbi ne muoyo.’ Muyidi Yakobo wakafunda pende ne: “Dipuekeshayi ku mêsu kua Yehowa ne yeye neanubandishe.” (Yak. 4:10) Mbutumbi kayi budi Yehowa upesha bantu? Ntshinyi tshidi mua kutupangisha bua kubupeta? Mmunyi mutudi mua kuambuluisha bantu bakuabu bua kupeta butumbi ebu?

3-5. Yehowa udi utulombola bua kupeta butumbi kayi?

³ Mufundi wa Misambu wakaleja muvua Yehowa mua kumukuata ku tshianza tshiende tshia balume ne kumulombola bua kupetaye butumbi bulelela. (Bala Musambu wa 73:23, 24.) Mmunyi mudi Yehowa wenza bualu ebu? Yehowa udi ulombola batendeledi bende badi badipuekesha bua kupetabu butumbi padiye ubapeshabu mu mishindu ya bungi. Udi ubambuluisha bua kumvuabu bimpe disua diende. (1 Kol. 2:7) Udi upesha bantu badi bateleja  dîyi diende ne baditumikila lumu lua kuikala nende mu malanda mimpe.​—Yak. 4:8.

⁴ Yehowa udi kabidi utupesha mudimu wa lumu padiye utuanyishila bua kuyisha lumu luimpe. (2 Kol. 4:1, 7) Mudimu eu udi utupetesha butumbi. Yehowa udi ulaya bantu badi ne diakalenga dia kuyisha bua kumutumbisha ne bua kuambuluisha bantu bakuabu ne: “Badi bantumbisha nembatumbishe.” (1 Sam. 2:30) Udi utumbisha bantu aba padiye ubapesha dîna dimpe, mmumue ne: ubanyisha. Bena Kristo bakuabu badi kabidi bakula bimpe bua bualu buabu.​—Nsu. 11:16; 22:1.

⁵ Mmalu kayi adi mindile aba badi ‘bindile Yehowa ne balamate njila yende’? Udi ulaya ne: ‘Yeye [Yehowa] neanubandishe bua nuenu kupiana buloba. Pabutulabu bantu babi, nuenu nenumone muanda eu.’ (Mus. 37:34) Bantu aba mbatekemene ne muoyo mujima butumbi bua pa buabu, mmumue ne: kupeta muoyo wa tshiendelele.​—Mus. 37:29.

6, 7. Bua tshinyi bantu ba bungi kabavua basue kuitabuja Yezu?

⁶ Tshidi mua kutupangisha bua kupeta butumbi budi Yehowa musue kutupesha ntshinyi? Bualu bumue, nkuangata ne mushinga wa bungi mmuenenu wa bantu badi kabayi bamanye Nzambi. Tumone tshivua mupostolo Yone mufunde bua bamue bantu bavua ne bumfumu mu matuku a Yezu. Wakamba ne: “Bakokeshi ba bungi bavua bamuitabuje bushuwa, kadi kabavua bamuitaba patoke to, bavua batshina bua Bafalese kabalu kubipata mu nsunagoga; bualu bavua banange butumbi bua kudi bantu kupita butumbi bua kudi Nzambi.” (Yone 12:42, 43) Kabivua bimpe bua bakokeshi abu kuangata ne mushinga wa bungi lungenyi luvua nalu bafalese to.

⁷ Yezu ukavua muleje patoke bua tshinyi bantu ba bungi kabavua mua kumuitaba ne kumuitabuja. (Bala Yone 5:39-44.) Tshisamba tshia Isalele tshivua tshindile dilua dia Masiya kukavua bidimu bia bungi. Pakatuadija Yezu kuyisha, bamue bantu bavua mua kuikala bajingulule mêyi a muprofete Danyele avua aleja ne: tshikondo tshijadika tshivua Kristo ne bua kumueneka tshikavua tshikumbane. Ndambu wa ngondo kumpala pavua Yone mubatiji uyisha, bantu ba bungi bavua bamba ne: “Yeye udi mua kuikala Kristo anyi?” (Luka 3:15) Mpindieu Masiya avuabu bindile bikole ukavua munkatshi muabu ulongesha. Kadi bantu bavua bamanye Mikenji abu bakabenga kumuitaba. Yezu wakaleja tshivua bantu abu kabayi bamuitabile pakabebejaye ne: “Mmunyi munudi mua kuitabuja panudi nutumbishangana nuenu nkayenu kanuyi nukeba butumbi budi bufuma kudi Nzambi umuepele?”

8, 9. Fila tshilejilu tshia nzembu bua kuleja mudi butumbi bua kudi bantu mua kubuitshidija butumbi bua kudi Nzambi.

⁸ Tudi mua kumvua bimpe mudi butumbi bua kudi bantu mua kulua ne mushinga wa bungi kupita butumbi budi bufuma kudi Yehowa patudi tufuanyikija butumbi ne bukenke. Tshibuashibuashi tshitu tshiuwule tente ne bukenke. Udiku uvuluka musangu wa ndekelu uuvua mutangile mu diulu butuku pavua kuulu kutoke ne mumone muvuadi ne mitoto bungi kabuyi kubala anyi? “Butumbi bua mitoto” buvua mua kuikala bukukemeshe bikole. (1 Kol. 15:40, 41) Kadi mu bimue bimenga mudi nzembu idi ikenkesha bikole ne ipangisha bantu bua kumona bukenke bua mitoto. Bua tshinyi? Mbualu nzembu idi mu njila, mu bipalu bia ndundu ne ku nzubu minene itu ikenka bikole ne mimpe kupita bukenke bua mitoto anyi? Tòo. Bidi bienzeka nanku bualu bukenke bua mu tshimenga budi pabuipi ne bantu ne budi bubapangisha bua kumona bukenke bua bifukibua bia Yehowa. Nunku, bua kumona buimpe bua kuulu butuku, mbimpe kujima nzembu anyi kuya kule ne tshimenga tshidi ne nzembu.

⁹ Bia muomumue, butumbi budi kabuyi buimpe buobu buikale pabuipi ne mioyo yetu, budi mua kutupangisha bua kuanyisha  ne kukeba butumbi bua kashidi budi Yehowa musue kutupesha. Bantu ba bungi badi babenga kuitaba lumu luimpe lua Bukalenge bualu batu batshina malu adi bantu badibu bamanyangane nabu anyi bena mu dîku diabu mua kubamba. Kadi dijinga dia kupeta butumbi didiku mua kunyanga too ne batendeledi ba Nzambi badi badilambule kudiye anyi? Fuanyikija ne: badi balomba muanetu wa balume kampanda utshidi nsonga bua kuyisha muaba udibu bamumanye bimpe, kadi kabayi bamumanye bu Ntemu wa Yehowa to. Neabengaku bua kuyisha bua buôwa anyi? Fuanyikija kabidi ne: muntu mmusue kuenzela Yehowa mudimu bikole kadi bakuabu badi bamuseka bua bipatshila bidiye nabi. Neatelejaku bantu badi kabayi bangata mudimu wa Yehowa ne mushinga aba anyi? Peshi fuanyikija ne: muntu kampanda mmuenze bubi bunene. Neabusokokaku bualu udi utshina bua kujimija majitu adiye nawu mu tshisumbu anyi bualu ki mmusue kuela bena mu dîku diende ne balunda bende mâyi ku makasa anyi? Bua tshilejilu tshia ndekelu etshi, bikalaye musue bua kulongolola malanda ende ne Yehowa, “abikile bakulu ba mu tshisumbu” bua bamuambuluishe.​—Bala Yakobo 5:14-16.

10. a) Mmunyi mudi kutamba kuditatshisha bua mudi bakuabu batumona mua kunyanga meji etu? b) Tuetu benze malu ne budipuekeshi, netuikale ne dishindika kayi?

¹⁰ Uvua mua kuikala udimona ne: udi uya kumpala mu buena Kristo, kadi muena Kristo nebe kampanda udi anu ulua kukubela. Mibelu yende mimpe idi mua kukuambuluisha wewe muikale kuyi udibingisha bua lutambishi, bua dijinga dia kudileja muntu muimpe anyi ujinga bua kudibingisha bua tshiudi muenze. Peshi fuanyikijabi ne: udi wenza mudimu ne muena Kristo nebe. Neujingaku anu bua kumanya wapeta butumbi bua ngenyi mimpe ne mudimu mukole uudi wenza anyi? Umue wa ku nsombelu eyi yeye mukutulukile, ikala mujadike ne: ‘Udi ne mutshima mupuekele neapete bunême’ anyi butumbi.​—Nsu. 29:23.

11. Tudi ne bua kudiumvua mushindu kayi padibu batuela kalumbandi? Bua tshinyi?

¹¹ Bakulu ne bantu badi ‘bajinga’ mudimu wa nunku badi pabu ne bua kuikala badimuke bua kubenga kukeba butumbi bua kudi bantu. (1 Tim. 3:1; 1 Tes. 2:6) Ntshinyi tshidi muanetu wa balume mua kuenza padibu bamuela kalumbandi bua mudiye muenze mudimu kampanda bimpe? Pamuapa kena mua kuditumbisha bu muvua mukalenge Shaula muenze to. (1 Sam. 15:12) Kadi udi ne bua kuitaba ne: mmuenze mudimu eu bimpe anu bua ngasa wa Yehowa, ne kabidi ne: neenze midimu mikuabu bimpe mu matuku adi alua kumpala yeye utungunuka ne kueyemena diambuluisha dia kudi Nzambi. (1 Pet. 4:11) Mushindu ututu tudiumvua munda dîba ditubu batutumbisha udi uleja butumbi bututu tukeba.​—Nsu. 27:21.

12. Tshivua tshipangishe bamue bena Yuda bua kuteleja Yezu ntshinyi?

¹² Tshintu tshikuabu tshidi mua kutupangisha bua kupeta butumbi bua kudi Nzambi, mmajinga etu. Majinga mabi adi mua kutupangisha bua kumvua bulelela bimpe. (Bala Yone 8:43-47.) Yezu wakambila bamue bena Yuda ne: kabavua bamuteleja bualu ‘bavua basue kukumbaja majinga a tatu wabu Diabolo.’

13, 14. a) Ntshinyi tshidi bakebuludi baleje bua buongo bua muntu ne bua mitoyi idi muntu mua kumvua? b) Tshidi tshienza ne: tutume ntema kudi muntu utudi basue kuteleja ntshinyi?

¹³ Tutu tujinga anu kumvua malu atutu basue. (2 Pet. 3:5) Yehowa mmutupeshe mushindu wa kubenga kutuma ntema ku mutoyi utudi katuyi basue. Anji shala mupuwe ne tuma ntema ku mitoyi idi yenzeka iudi mua kumvua mpindieu. Pamuapa kuvua mua kuikala mumvue mitoyi ya bungi eyi kumpala to. Bua tshinyi? Nansha mudi buongo buetu ne mushindu wa kumvua mitoyi mishilangane idi yenzeka, buvua bukuambuluishe bua kutuma ntema anu ku bualu bumue. Kadi mbikole bua buongo kuenzabu  nunku patudi tuteleja malu adi bantu bakuabu bakula. Bakebuludi mbafike ku dimona ne: udi mua kutuma ntema anu kudi muntu umuepele. Mbuena kuamba ne: padi bantu babidi bakuambila bualu musangu umue, udi ne bua kusungula uudi musue kuteleja. Bena Yuda bavua basue kukumbaja majinga a tatuabu Diabolo kabakateleja Yezu to.

¹⁴ Bible udi wamba ne: “meji” ne ‘bupote’ bitu bijinga anu bua tubiteleje. (Nsu. 9:1-5, 13-17) Tudi ne bua kuenza disungula. Netuteleje nganyi? Netuteleje utudi basue kusankisha. Mikoko ya Yezu idi yumvua dîyi diende ne imulonda. (Yone 10:16, 27) Idi “ku luseke lua bulelela.” (Yone 18:37) “Ki mmimanye dîyi dia benyi to.” (Yone 10:5) Bantu badi ne budipuekeshi aba badi bapeta butumbi.​—Nsu. 3:13, 16; 8:1, 18.

15. Mmushindu kayi uvua makenga a Paulo “umvuija butumbi” bua bantu bakuabu?

¹⁵ Patudi tunanukila ne kuenza disua dia Yehowa, tudi tuambuluisha bantu bakuabu bua bapete butumbi. Paulo wakafundila bena mu tshisumbu tshia Efeso ne: “Ndi nnulomba bua kanuteketshi bua makenga andi nkenga bua bualu buenu, bualu adi umvuija butumbi buenu nuenu.” (Ef. 3:13) Mmu mushindu kayi muvua makenga a Paulo “umvuija butumbi” bua bena mu Efeso? Mushindu uvua Paulo mudiakaje bua kutungunuka ne kuyisha bena mu Efeso nansha muvuaye mu ntatu wakabaleja ne: mudimu uvuabu basungule wa kuikala bena Kristo uvua wa mushinga wa bungi. Bu Paulo mutekete mu mikolo pavuaye mu ntatu, bena Kristo nende bavua mua kuela meji ne: malanda abu ne Yehowa, mudimu wabu wa kuyisha ne ditekemena divuabu nadi kabivua ne mushinga to. Bu muvua Paulo mutantamene ntatu, wakaleja bena Kristo nende ne: kuikala muena Kristo kudi kulomba kudienzeja.

16. Ndutatu kayi luvua Paulo mupete mu Luseta?

¹⁶ Anji ela meji bua muvua tshisumi ne ditantamena ntatu bia Paulo biambuluishe bantu. Bienzedi 14:19, 20 udi wamba ne: “Kadi bena Yuda bakalua bafumine ku Antiyokiya ne ku Ikoniyo, bakakoka bantu ku luseke luabu, kuasabu Paulo mabue, kumupulumunabu too ne pambelu pa tshimenga [tshia Luseta], bela meji ne: mmufue. Kadi pakamunguila bayidi, wakajuka, kubuelaye mu tshimenga. Dituku diakalonda wakaya ne Bânaba ku Dêbe.” Fuanyikija muntu uvuabu balekele bu mufue wenza luendu lua kilometre mitue ku 100 dituku didi dilonda lua makasa!

17, 18. a) Mmu mushindu kayi uvua Timote mulonde bimpe menemene makenga avua Paulo mupete mu Luseta? b) Mmunyi muvua ditantamena ntatu dia Paulo diambuluishe Timote?

¹⁷ Timote uvuaku umue wa ku “bayidi” bavua bambuluishe Paulo anyi? Muyuki udi mu mukanda wa Bienzedi kawena uleja patoke to, kadi bidi mua kuikala nanku. Tangila tshivua Paulo mufundile Timote mu  mukanda wende muibidi: “Kadi wewe, udi mulonde bimpe menemene dilongesha dianyi, nsombelu wanyi, . . . bia buena bimvua mupete ku Antiyokiya [kuvuabu bamuele pambelu pa tshimenga], ku Ikoniyo [kuvuabu bakeba kumuasa mabue] ne ku Luseta [kuvuabu bamuase mabue]. Mvua mutantamene dikengeshibua, ne Mukalenge uvua mumpandishe ku malu au onso.”​—2 Tim. 3:10, 11; Bien. 13:50; 14:5, 19.

¹⁸ Timote ‘wakalonda bimpe menemene’ malu au ne uvua mumanye bimpe muvua Paulo muatantamene. Malu aa akambuluisha Timote bikole. Pakapingana Paulo mu Luseta, wakasangana Timote muikale muena Kristo wa tshitembu ne bantu “bavua bakula bimpe bua bualu buende.” (Bien. 16:1, 2) Pakapita matuku, Timote wakakumbana bua kuambula majitu manene.​—Filip. 2:19, 20; 1 Tim. 1:3.

19. Dinanukila dietu mu makenga didi mua kuambuluisha bantu bakuabu mushindu kayi?

¹⁹ Dinanukila dietu mu dienza disua dia Nzambi didi padi mua kuambuluisha bantu bakuabu nangananga bansonga, bantu ba bungi nebikale mua kuya kumpala ne kulua batendeledi ba Nzambi ba mushinga mukole. Bena Kristo batshidi bana kabatu anu bamona malu atudi tuenza ne balonga mushinga wa kulongesha ne dimanya ditudi nadi mu mudimu wa buambi patupu to, kadi bidi kabidi bibambuluisha padibu bamona mushindu utudi tutantamena ntatu. Paulo ‘wakatungunuka ne kutantamena malu onso’ bua bantu bonso badi bashala ne lulamatu ‘bapete lupandu ne butumbi bua tshiendelele.’​—2 Tim. 2:10.

20. Bua tshinyi tudi ne bua kutungunuka ne kukeba butumbi budi bufumina kudi Nzambi?

²⁰ Nunku, katuenaku ne bua kutungunuka ne ‘kukeba butumbi budi bufuma kudi Nzambi umuepele’ anyi? (Yone 5:44; 7:18) Ke tshitudi ne bua kuenza. (Bala Lomo 2:6, 7.) Yehowa udi ufila “muoyo wa tshiendelele kudi badi bakeba butumbi.” Kusakidila apu, ‘dinanukila dietu mu mudimu muimpe’ didi disaka bantu bakuabu bua kushala ne lulamatu ne kupeta muoyo wa kashidi. Nunku, kulekedi tshintu nansha tshimue tshikupangisha bua kupeta butumbi budi Nzambi ufila.