1. Mmushindu kayi udi tshivua munyemi kampanda wa lubilu muenze tshileja mutudi mua kudisuika bua kubenga kuteketa mu maboko?

KATSHIA anu pavua Mary Decker ne bidimu dikumi ne pa mutu, uvua mumanyike bu munyemi wa lubilu munene bua pa buloba bujima. Yeye ke uvuabu batekemene bua kuangata medayi a or mu lubilu luvuabu ne bua kunyema bua metre 3 000 mu manaya avuabu benze mu tshidimu tshia 1984. Kadi, kakafika ku mushonyi wa ndekelu to. Wakadikuma ku mukolo wa munyemi mukuabu ne kudishindaye. Bu muvuaye mutshibuke, bakamupatula mu tshinayilu. Nansha nanku, Mary wakatungunuka anu ne manaya a mbilu, bualu tshidimu tshimue katshiyi tshianji kukumbana, mmumue ne: mu 1985 wakanyema kabidi ne kupatuka wa kumpala mu lubilu luvuabu benze ne bantu bakaji nende.

2. Mmu mushindu kayi udi bena Kristo mu lubilu? Ntshinyi tshitudi ne bua kuipatshila?

² Bu mutudi bena Kristo, tudi mu lubilu lua mu tshimfuanyi. Tudi ne bua kuipatshila bua kupeta difutu. Bua kupeta difutu, kabiena bikengela tuikale ne lubilu lukole lupite bakuabu to. Abi kabiena biumvuija ne: tudi ne bua kuikala tuanji kuimana ndambu anyi kuikala ne ditanaji mu lubilu luetu to. Kadi tudi ne bua kuikala ne dinanukila bua kupeta difutu anu bu mudibi bua banyemi ba lubilu. Mupostolo Paulo wakenza mudimu ne tshilejilu tshia banyemi ba lubilu mu mukanda uvuaye mufundile bena Kristo ba mu Kolinto, tshimenga tshivua tshimanyike bua manaya. Wakafunda ne: “Kanuena bamanye ne: banyemi ba lubilu padibu mu lubilu, bonso badi banyema, kadi anu umue ke udi upeta difutu anyi? Nanku, nyemayi mu mushindu wa kudipeta.”​—1 Kol. 9:24.

3. Mmushindu kayi udibi mua kuenzeka bua banyemi ba lubilu bonso bapete difutu dia muoyo wa tshiendelele?

³ Bible udi utuambila bua kunyema lubilu lua mu tshimfuanyi elu. (Bala 1 Kolinto 9:25-27.) Difutu ditudi tupeta mmuoyo wa tshiendelele mu diulu bua bena Kristo bela  manyi ne pa buloba bua bena Kristo bakuabu. Bishilangane ne banyemi ba lubilu, lubilu luetu ludi lupetesha muntu yonso udi ulunyema ne utantamena too ne ku ndekelu difutu. (Mat. 24:13) Banyemi ba lubilu elu badi mua kupangila difutu anu bobu bapangile bua kunyema bilondeshile mikenji ya lubilu anyi kabayi bafike ku mushonyi wa ndekelu. Kabidi, elu ke lubilu lumuepele ludi lupetesha difutu dia muoyo wa tshiendelele.

4. Ntshinyi tshidi tshienza bua lubilu luetu bua kupeta muoyo wa tshiendelele luikale lukole?

⁴ Ki mbipepele bua kufika ku mushonyi wa ndekelu to. Bitu bikengela kudipangisha amue malu ne kuikala ne bimue bipatshila. Yezu Kristo ke muntu umuepele utu mufike ku mushonyi wa ndekelu kayi mulenduke musangu nansha umue. Kadi muyidi wende Yakobo wakafunda ne: bayidi ba Kristo ‘bonso batu balenduka misangu ya bungi.’ (Yak. 3:2) Mbulelela. Yonso wa kutudi udi ne biende bilema bituye wenza ne bitu bakuabu bamuenzela. Nunku imue misangu tudi mua kulenduka, tuteketa mu mikole ne tupanga bukole bua kutungunuka. Tudi mene mua kudishinda, kadi tudi tujuka ne tutungunuka ne lubilu luetu. Bamue bavua bakuluke bibi ne bivua bikengela bua babambuluishe bua kujuka ne kutungunukabu ne lubilu bua kufika ku mushonyi wa ndekelu. Nunku, bua tshikondo kampanda bidi mua kuenzeka ne: tulenduke anyi tudishinde pamuapa misangu ya bungi.​—1 Bak. 8:46.

5, 6. a) Mmushindu kayi udiku ‘kakuyi tshilenduishi’ kudi muena Kristo? Ntshinyi tshidi mua kumuambuluisha bua ‘kujuka’? b) Bua tshinyi bamue bantu kabatu bapingana mu njila bobu balenduke?

⁵ Pamuapa ukadi mukuate mudimu ne muaku “kulenduka” ne “kudishinda” mu mushindu wa muomumue bua kuleja malanda a muntu ne Nzambi. Miaku ibidi ya mu Bible eyi idi mua kuikala ne diumvuija dia muomumue, kadi ki mmisangu yonso to. Tshilejilu, tangila tshidi Nsumuinu 24:16 wamba: ‘Muntu muakane udi upona misangu muanda mutekete, udi ubika kabidi; kadi bantu babi badi balenduka mu dikenga.’

⁶ Yehowa kakuitaba bua bantu badi bamueyemene kulendukabu anyi kudishinda, mmumue ne: kupeta ntatu anyi kupingana tshianyima mu ntendelelu wabu bibapangisha bua kumuenzela kabidi mudimu to. Tudi bajadike ne: Yehowa neatuambuluishe bua ‘kubika’ anyi kujuka bua tuetu kutungunuka ne kumuenzela mudimu ne muoyo mujima. Bualu  ebu budi bukolesha muntu yonso udi munange Yehowa bikole mu muoyo wende. Kadi bantu babi kabena ne dijinga dia kujuka to. Kabatu bakeba diambuluisha dia nyuma wa Nzambi ne dia kudi bantu bende to, anyi mene badi babenga diambuluisha didibu babapesha. Kadi bua bantu badi ‘banange mikenji ya Yehowa,’ kakuena tshilenduishi tshidi mua kubapangisha bua kutungunukabu ne lubilu bua kupeta muoyo to.​—Bala Musambu wa 119:165.

7, 8. Mmunyi mudi muntu mua ‘kupona’ kadi Nzambi anu umuanyisha?

⁷ Bamue bantu badi benza mibi mikese pamuapa misangu ya bungi bua butekete kampanda. Kadi badi anu bantu bakane ku mêsu kua Yehowa bobu batungunuke ne ‘kubika’ mmumue ne: kunyingalala ne muoyo mujima ne kudienzeja bua kuenza malu makane. Tudi mua kujadika bualu ebu ku tshivua Nzambi muenzele bena Isalele. (Yesh. 41:9, 10) Pamutu pa Nsumuinu 24:16 utukadi batele kuakula mu mushindu mubi bua ‘kudishinda’ kuetu, udi wakula mu mushindu muimpe bua ‘dibika’ dietu ku diambuluisha dia Nzambi wetu udi ne luse. (Bala Yeshaya 55:7.) Bu mudi Yehowa Nzambi ne Yezu Kristo batueyemene, badi batukolesha ne bulenga bua tuetu ‘kubika.’​—Mus. 86:5; Yone 5:19.

⁸ Nansha munyemi wa lubilu mulenduke anyi mudishinde, udi mua kupeta dîba dia kujuka ne kujikija lubilu luende yeye muenze malu ne mitalu. Mu lubilu luetu bua kupeta muoyo wa tshiendelele, katuena bamanye “dituku ne dîba” diajika lubilu elu to. (Mat. 24:36) Kadi tuetu katuyi tudishinde bikole, netupete mushindu wa kushala mu njila ne kujikija bimpe lubilu luetu. Nunku, tudi ne bua kuenza tshinyi bua kubenga kulenduka?

9. Mmalu kayi manene atu alenduisha atuakonkonona?

⁹ Tukonkononayi malu manene atanu adi mua kulenduisha muntu aa: butekete budi nabu muntu, majinga a mubidi, malu mabi adi bena Kristo netu batuenzela, dikenga anyi buluishi ne bilema bia bakuabu. Kadi umanye ne: bituikala balenduke, Yehowa udi netu lutulu lua bungi. Kena utuangata diakamue bu bantu badi kabayi ne lulamatu to.

10, 11. Mbutekete kayi buvua Davidi uluangana nabu?

¹⁰ Tudi mua kufuanyikija butekete budi nabu muntu ne mabue adi mu njila udi bantu banyemena lubilu. Patudi tukonkonona malu avua mafikile mukalenge Davidi ne mupostolo Petelo, tudi mua kumona mateketa abidi atu kudi bantu aa: kupanga kudikanda ne ditshina dia bantu.

¹¹ Mukalenge Davidi uvua ne butekete bua kupanga kudikanda buvua bupatuke patoke mu tshilumbu tshivua tshimufikile ne Betasheba. Nansha pavua Nabala mupende Davidi, wakajinga bua kuenza malu mu tshiputuku. Bushuwa, didikanda dia Davidi diakakepa, kadi kakateketa mu mikolo bua kuenza malu avua asankisha Yehowa to. Bantu bakuabu bakamuambuluisha bua kuikala ne nkatshinkatshi mu malu a mu nyuma.​—1 Sam. 25:5-13, 32, 33; 2 Sam. 12:1-13.

12. Nansha muvua Petelo mulenduke, ntshinyi tshiakamuambuluisha bua kutungunuka ne lubilu luende?

¹² Nsombelu wa Petelo udi uleja muvuaye ne ditshina dia bantu, ne imue misangu dimupambuisha bibi menemene; kadi nansha nanku wakashala mulamate anu Yehowa ne Yezu. Tshilejilu, wakavila Mfumuende patoke, kabiyi nansha musangu umue, kadi misangu isatu mijima. (Luka 22:54-62) Panyima pa matuku, Petelo wakapanga bua kuenza malu bu muena Kristo, bualu wakamona bantu ba bisamba bia bende bavua bitabuje Yezu bu bashadile kudi bena Kristo bena Yuda bavua batengula. Kadi mupostolo Paulo yeye uvua umona malu mu mushindu muimpe, bualu kansungasunga kakavua ne muaba mu tshisumbu to. Petelo uvua ne lungenyi lubi. Kumpala kua tshienzedi tshia Petelo etshi kunyangatshi malanda avua pankatshi pa bena Kristo, Paulo wakamubela diakamue mpala ne mpala. (Gal. 2:11-14) Petelo uvuaku mulekele lutambishi lumufikisha ku dilekela lubilu luende bua kupeta muoyo anyi? Tòo. Wakangata ne mushinga wa bungi mubelu wa Paulo, kuwutumikilaye ne kutungunuka ne lubilu luende.

13. Mmushindu kayi udi butekete bua mubidi mua kulenduisha muntu?

 ¹³ Imue misangu butekete budi nabu muntu mmakanda ende a mubidi. Bualu ebu budi mua kuikala kabidi tshilenduishi. Budi mua kunyanga lubilu luetu lua mu nyuma ne mene kutulenduisha ne kututshiokesha. Tshilejilu, muanetu wa bakaji mukuabu wa mu Japon wakakenga ne disama kampanda dikole bidimu 17 panyima pa batismo wende. Uvua uditatshisha bikole bua makanda ende a mubidi, kumufikishabi too ne ku diteketa mu nyuma. Mu bungi bua matuku wakalekela kubuela mu bisangilu. Bakulu babidi bakaya kumutangila. Bu muvuabu bamukoleshe ne mêyi mimpe, wakatuadijilula kuya mu bisangilu. Udi wamba ne: “Ngakapuekesha binsonji bua bungi bua disanka dimvua nadi bua muvua bana betu bansankidile.” Muanetu wa bakaji eu udi mpindieu utungunuka ne lubilu luende.

14, 15. Mbualu kayi bua mushinga butudi ne bua kuenza padi majinga mabi atuluila? Fila tshilejilu.

¹⁴ Majinga a mubidi mmalenduishe bantu ba bungi. Patudi ne majinga a nunku, tudi ne bua kuenza malu a mushinga bua kushala bakezuke mu lungenyi, mu bikadilu ne mu nyuma. Vuluka mubelu wa Yezu wa ‘kuimansha’ mu ngumvuilu wa mu tshimfuanyi tshintu kayi tshionso tshidi mua kutulenduisha, nansha dîsu anyi tshianza tshietu. Mu bintu bia kuimansha ebi, kamuenaku meji mabi a masandi ne bienzedi bidi bifikishe bamue bantu ku dimanyika lubilu luabu anyi?​—Bala Matayi 5:29, 30.

¹⁵ Muanetu wa balume kampanda udi mukolele mu dîku dia bena Kristo udi uvuluka bualu kampanda buvuaye muluangane nabu bikole pa bidi bitangila dijinga dia kuenda masandi ne balume nende. Wakamba ne: “Mvua anu ndiumvua bibi. Bivua bienze anu bu ne: tshivua mukumbane bua kuenza midimu ivuabu bampesha.” Pavuaye ne bidimu 20 wakalua mpanda-njila wa pa tshibidilu ne musadidi wa mudimu mu tshisumbu. Pashishe wakalenduka bibi menemene, kumupeshabu manyoka a mu Bible ne kumuambuluishabu kudi bakulu. Disambila, dilonga dia Dîyi dia Nzambi ne dijinga dia kuambuluisha bantu bakuabu biakamuambuluisha bua kujuka ne kutungunukaye ne lubilu luende lua mu nyuma. Panyima pa bidimu, wakamba ne: “Imue misangu ntshitu anu ngumvua majinga au, kadi tshitu ngalekela ampita bukole to. Ndi mufike ku dimona ne: Yehowa kakukulekela bua utetshibue ne diteta didi dikupite makanda to. Nunku ndi mutuishibue ne: Nzambi mmumone ne: ndi mua kuatantamena.” Muanetu eu udi wamba kabidi ne: “Majinga onso amvua nduangana nawu neajike mu bulongolodi bupiabupia. Ke tshindi njinga. Kadi bua mpindieu, ndi ntungunuka ne kuluangana nawu.” Muanetu eu mmudisuike bua kutungunuka ne lubilu luende.

16, 17. a) Ntshinyi tshivua tshiambuluishe muanetu wa balume mukuabu uvua mumone ne: mbamuenzele malu mu mushindu mubi? b) Bua tuetu kubenga kulenduka, tudi ne bua kutangila nganyi?

¹⁶ Malu mabi adi bena Kristo netu batuenzela adi pawu mua kuikala bilenduishi. Mu ditunga dia France, muanetu kampanda uvua mukulu kumpala wakela meji ne: bavua bamuenzele malu mabi, ne wakafiika munda bikole. Bua bualu abu, wakalekela kubuela mu bisangilu ne kuyisha. Bakulu babidi bakaya kumutangila ne kumutelejabu bimpe, kabayi bamukosa ku mêyi pavuaye ubalondela malu ende mu mushindu uvuaye uamona. Bakamukankamija bua kutekaye bujitu buende pambidi pa Yehowa ne kumulejabu ne: bualu bua mushinga buvuaye ne bua kuenza, nkusankisha Nzambi. Wakitaba mibelu yabu ne kutuadijilulaye lubilu ne lukasa, kubangishaye kuenza midimu ya mu tshisumbu.

¹⁷ Bena Kristo bonso badi ne bua kutangila Yezu Kristo udibu bateke Mutu wa tshisumbu, pamutu pa kutangila kudi bantu bena mibi. Bu mudi Yezu ne mêsu “bu ludimi lua kapia,” udi umona bualu buonso bimpe ne umona malu a bungi kupita mutudi mua kuamona. (Buak. 1:13-16) Tshilejilu, mmumanye ne: bualu butudi mua kumona bu bubi butuenzela, tudi mua kuikala babumvue bibi. Yezu neakumbaje majinga a tshisumbu bimpe menemene ne mu tshikondo tshiakanyine. Nunku, katuena ne bua kulekela bienzedi kampanda anyi mapangadika a bena Kristo netu alua atulenduisha to.

18. Mmunyi mutudi mua kutantamena ntatu ne nsombelu mikole?

¹⁸ Bintu bikuabu bibidi bidi bilenduisha ndikenga  anyi buluishi ne bilema bidi bantu bakuabu benza mu tshisumbu. Yezu wakamba mu lusumuinu luende lua mukunyi wa maminu ne: “dikenga anyi buluishi” bua dîyi dia Nzambi bivua ne bua kulenduisha bamue bantu. Nansha buluishi bobu bufumina mu dîku, kudi bena mutumba peshi kudi mbulamatadi, budi mua kutamba kulenga muntu udi “kayi ne miji munda muende,” udi kayi mu malanda makole ne Nzambi. (Mat. 13:21) Kadi, tuetu batungunuke ne kuikala ne mutshima muimpe, ntete ya Bukalenge neyituambuluishe bua kuikala ne miji mikole ya ditabuja. Tuetu bapete ntatu, tudienzeje bua kuelangana meji bikole mu disambila bua malu onso a butumbi. (Bala Filipoyi 4:6-9.) Ku diambuluisha dia bukole bua Yehowa, netutantamene ntatu ne katuakulekela nsombelu mikole itulenduisha to.

19. Ntshinyi tshitudi mua kuenza bua kubenga kulekela malu mabi adi bakuabu batuenzela atulenduisha?

¹⁹ Bia dibungama, bamue bantu mu bungi bua bidimu mbalekele bilema bia bantu bakuabu bibafikisha ku dilekela lubilu luabu. Mmuenenu mishilangane mu malu adi atangila kondo ka muoyo mmilue bilenduishi kudibu. (1 Kol. 8:12, 13) Muntu yeye mutuenzele bibi, netudiundishaku bualu ebu anyi? Bible udi udimuija bena Kristo bua kubenga kulumbuluishangana, bua kufuilangana luse ne bua kubenga kuimanyina bikole pa manême etu. (Luka 6:37) Paudi utuilangana ne tshilenduishi, diebeje ne: ‘Ndiku ndumbuluisha bakuabu bilondeshile malu andi meme musue anyi? Bu mundi mumanye ne: bana betu mbena mibi, nendekelaku bilema bia muntu mukuabu bingumbusha mu lubilu lundi nyema bua kupeta muoyo anyi?’ Dinanga dietu bua Yehowa didi mua kutuambuluisha bua kudisuika bua kubenga kulekela tshintu nansha tshimue tshidi muntu mukuabu wenza tshitupangisha bua kufika ku mushonyi wa ndekelu.

20, 21. Udi mudisuike bua kuenza tshinyi mu lubilu luebe bua kupeta muoyo?

²⁰ Udiku mudisuike bua ‘kunyema lubilu kufika ku ndekelu’ anyi? (2 Tim. 4:7, 8) Bidi bikengela kuikala kudilongela. Bible ne mikanda yetu bikuambuluishe bua kuenza makebulula, kuelangana meji ne kumanya malu manene adi mua kutulenduisha. Lomba Nzambi nyuma wende bua akupeshe bukole budi bukengedibua. Uvuluke ne: muntu nansha umue udi unyema lubilu bua kupeta muoyo kakuwupangila anu bualu mmulenduke anyi mukuluke misangu kampanda to. Udi mua kujuka ne kutungunuka ne lubilu. Udi nansha mua kumona tshilenduishi tshinene bu tshintu tshia kudiata kupita, ne kupeta malongesha a mushinga ku lutatu luonso ludiye upeta bua ditabuja diende.

²¹ Bible udi uleja mudi kunyema lubilu bua kupeta muoyo kuikala bu kuenza bualu kampanda, kadi ki nkuvunga maboko to. Kakuena bu kusomba mu mashinyi adi mambule bantu bua kubafikisha ku ditshimuna to. Tudi ne bua kunyema nkayetu lubilu bua kupeta muoyo. Patudi tuenza nanku, “ditalala dinene” dia kudi Yehowa nedikale anu bu lupepele ludi luenda lutusaka kumpala. (Mus. 119:165) Tudi ne bua kuikala bajadike ne: udi utungunuka ne kubenesha bantu mpindieu, ne neabeneshe bua kashidi bantu bonso badi bajikija lubilu luabu.​—Yak. 1:12.