YEZU uvua muambe ne: kakuvua mua kushala dibue dia ku ntempelo wa Yehowa pa mutu pa dikuabu to. Mulayi eu wakakumbana pavua tshiluilu tshia bena Lomo tshilombola kudi Titus tshibutule Yelushalema mu 70. (Mat. 24:2) Pakapita matuku, amperere Julien wakalongolola bua kuibakulula ntempelo.

Bavua babikila Julien ne: amperere wa ndekelu wa mu Lomo uvua kayi witabuja Kristo. Muana wa muanabu ne Constantin munene eu wakalonga tulasa tuvuabu babikila ne: tua bena Kristo. Kadi pakamutekabu amperere mu 361, wakabenga patoke malu avuaye mulonge ne buena Kristo bubi bua mu tshikondo tshiende, kubengaye malu a Nzambi. Mikanda ya malu a kale idi imubikila ne: “mutontolodi.”

Julien uvua mukine buena Kristo bikole. Bumue bualu buvua bumusake bua kuenza nunku buvua mua kuikala ne: pavuaye ne bidimu bisambombo, wakamona baleji-mpala ba bukua buena Kristo bashipa tatuende ne balela bende. Bilondeshile bena malu a kale a bitendelelu, Julien wakakankamija bena Yuda bua kuibakulula ntempelo wabu wela meji ne: bualu ebu buvua mua kuleja ne: Yezu uvua muprofete wa dishima. *

Julien uvua mulongolole bua kuibakulula ntempelo, katuena mua kuelesha mpata to. Bena malu a kale badi bakokangana bua kumanya bikalaye uvua bushuwa mutuadije kuibakulula ntempelo ne bikalaye muenze nanku, tshivua mua kuikala tshimanyike mudimu eu ntshinyi? Kadi kudi bualu bumue budi bulelela. Bakashipa Julien kayi muanji kuenza bidimu bibidi mu bukalenge ne bualu buvuaye mulongolole buakimana.