1, 2. Ndiakalenga kayi dinene didi Bantemu ba Yehowa nadi? Utu umvua mushindu kayi bua diakalenga edi?

BANTU ba bungi batu basanka bikole patubu babapesha difutu bua bualu kampanda bua mushinga budibu benze. Tshilejilu, batu bapeshe bamue difutu dia pa buadi bua mudibu benze malu ne tshisumi bua kukeba ditalala pankatshi pa bisumbu bibidi bidi kabiyi bipetangana. Kadi ndiakalengapu kayi ditudi nadi tuetu bua mudi Nzambi mututume bua kuikala baleji mpala bende ne bua kuambuluisha bantu bua kuakaja malanda a ditalala pankatshi pabu ne mufuki wabu.

² Bu mutudi Bantemu ba Yehowa, tudi ne diakalenga dinene edi. Nzambi ne Kristo mbatuambile bua kulomba bantu bua ‘balengejangane ne Nzambi.’ (2 Kol. 5:20) Yehowa udi ukuata netu mudimu bua kukoka bantu kudiye. Ke mushindu udi bantu miliyo ya bungi mu matunga mapite pa 235 bafike ku didia malanda mimpe ne Nzambi ne bapete ditekemena dia kupeta muoyo wa kashidi. (Tito 2:11) Tudi tubikila ne tshisumi tshionso ‘muntu yonso udi musue kuangata mâyi a muoyo tshianana.’ (Buak. 22:17) Bu mutudi banange mudimu wa mushinga udibu batupeshe eu ne tuwenza ne mitalu, tudi bakumbane bua kubikidibua ne: bena “tshisumi bua midimu mimpe.” (Tito 2:14) Tumonayi mpindieu mushindu udi tshisumi tshietu bua midimu mimpe tshituambuluisha bua kukoka bantu kudi Yehowa. Umue mushindu utudi tuenza nanku, mpatudi tuenza mudimu wa diyisha.

3. “Lukunukunu lua Yehowa” ludi lutujadikila tshinyi?

³ Yeshaya 9:7 udi wakula bua tshikala bumfumu bua Muana wa Nzambi ne bua kuenza wamba ne: “lukunukunu lua Yehowa wa misumba neluenze bualu ebu.” Mêyi aa adi aleja mudi Tatuetu wa mu diulu uditatshisha bua lupandu lua bantu. Tshilejilu tshia mudi Yehowa ne tshisumi tshidi tshileja patoke ne: tudi ne bua kuenza mudimu udi Nzambi mutupeshe wa kuikala bamanyishi ba Bukalenge ne muoyo mujima ne disanka ne tshisumi. Dijinga dietu dikole dia kuambuluisha bantu bua kumanyabu Nzambi didi dileja mudi Yehowa muikale ne tshisumi. Bu  mutudi benzejanganyi ba mudimu ne Nzambi, tudiku badisuike bua kuyisha bantu lumu luimpe ne muetu muonso bilondeshile nsombelu wetu anyi?​—1 Kol. 3:9.

4.. Mmunyi muvua Yezu mushiye tshilejilu tshia dinanukila ne tshisumi mu mudimu wa buambi?

⁴ Tuakule kabidi bua tshisumi tshia Yezu. Mmutushile tshilejilu tshimpe tshia dinanukila ne tshisumi mu mudimu wa buambi. Nansha muvuabu bamukengesha, wakashala anu ne tshisumi mu mudimu wa kuyisha too ne ku ndekelu kua muoyo wende pa buloba. (Yone 18:36, 37) Tshisumi tshia Yezu bua kuambuluisha bantu bua kumanyabu Yehowa tshivua tshienda tshivula pavua tshikondo tshia kulambulaye muoyo wende tshienda tshisemena.

5. Mmushindu kayi uvua Yezu muenze malu avua apetangana ne tshilejilu tshiende tshia mutshi wa tumuma tua mfigi?

⁵ Tshilejilu, ku ndekelu kua tshidimu tshia 32, Yezu wakafila tshilejilu tshia muntu uvua ne mutshi wa mfigi mu budimi buende bua mvinyo uvua kawuyi ukuama bimuma munkatshi mua bidimu bisatu. Pakambilabu tshidime bua kuwukosa, wakalomba bua kuanji kuwulekela bua bawufukishe. (Bala Luka 13:6-9.) Anu bayidi bakese ke bavua bu mamuma a Yezu a mudimu wende wa diyisha. Kadi anu mudibu baleje mu tshilejilu tshia tshidime au, Yezu wakenza mudimu ne tshikondo tshîpi tshivua tshimushadile, mmumue ne: ngondo isambombo, bua kuvudija mudimu wa kuyisha mu Yudaya ne mu Peleya. Matuku makese kumpala kua lufu lua Yezu, wakadila bua bena mu tshisamba tshiabu bavua bateleje kadi ‘kabayi ne tshivuabu benze.’​—Mat. 13:15; Luka 19:41.

6. Tudi ne bua kuvudija mudimu wetu wa kuyisha bantu bua tshinyi?

⁶ Patudi tumona mutukadi basemene bikole ku nshikidilu, kabienaku ne mushinga bua tuetu kuvudija mudimu wetu wa kuyisha anyi? (Bala Danyele 2:41-45.) Tudi ne diakalenga dinene dia kuikala Bantemu ba Yehowa. Tudi tshisamba tshimue pa buloba tshidi tshipetesha bantu ditekemena dilelela bua kujikija ntatu idi bantu nayi. Mufundi wa tshikandakanda kampanda wakamba matuku adi panshi aa mudibi bikole bua kuandamuna lukonko lua ne: “Bua tshinyi malu mabi adi afikila bantu bimpe?” Tuetu bena Kristo ke badi ne mudimu ne diakalenga dia kupesha bantu badi basue kututeleja mandamuna adi Bible ufila bua nkonko ya buena eyi. Mbikumbane bua tuetu kuikala ‘ne nyuma usaba munda muetu’ patudi tukumbaja mudimu udi Nzambi mutupeshe eu. (Lomo 12:11) Bu mudi Nzambi utuambuluisha, patudi tuyisha lumu luimpe ne tshisumi, tudi mua kuambuluisha bantu bakuabu bua kumanyabu Yehowa ne kumunanga.

7, 8. Mmunyi mudi lungenyi lua kudifila lutumbisha Yehowa?

⁷ Anu mudi tshilejilu tshia mupostolo Paulo tshileja, mudimu wetu udi mua kutufikisha ku “dipangila dia tulu butuku” ne ku “bikondo bia dipangila biakudia.” (2 Kol. 6:5) Biambilu ebu bidi bileja tshidi kudipangisha amue malu kumvuija ne bidi mua kutuvuluija bampanda-njila bavua bateke mudimu wabu wa kuyisha pa muaba wa kumpala mu nsombelu wabu eku badikumbajila nkayabu majinga abu. Tuela kabidi meji bua mudi bamisionere betu badi badifila ne muoyo mujima ‘badipongolole bu mulambu wa bia kunua’ bua kuambuluisha bantu mu matunga menyi. (Filip. 2:17) Netuambe tshinyi bua bakulu badi benza mudimu mukole, badipangisha biakudia anyi balala tshitabela bua kulama mikoko ya Yehowa? Tudi kabidi ne bakulakaje ne babedi badi badienzeja bua kubuela mu bisangilu bia bena Kristo ne benza mudimu wa buambi. Mioyo yetu mmiuwule tente ne dianyisha patudi tuela meji bua mushindu udi batendeledi ba Nzambi bonso aba badifila ne muoyo mujima. Kudienzeja kua nunku kudi kusaka bakuabu bua kuanyisha mudimu wetu.

⁸ Mu mukanda uvua mubadi kampanda uvua kayi Ntemu mufundile bena tshikandakanda tshia Boston Target ba mu Lincolnshire, mu Royaume-Uni wakamba ne: “Bantu kabatshiena bitabuja bitendelelu . . . Ntshinyi tshitu balombodi ba bitendelelu aba benza dituku dionso? Kabatu baya kukeba bantu bu muvua Kristo wenza to . . . Tshitendelelu tshimue tshitu tshimueneka bu tshidi tshienza nunku ntshia Bantemu ba Yehowa, badi baya kukeba bantu ne mbadifile ne muoyo mujima bua  kuyisha bulelela.” Mu bulongolodi ebu mudi bantu ne lungenyi lua kutangila anu malu abu, lungenyi luetu lua kudifila bua bantu bakuabu ludi lutumbisha Yehowa Nzambi.​—Lomo 12:1.

9. Ntshinyi tshidi mua kutusaka bua kuikala anu ne tshisumi bua midimu mimpe mu mudimu wetu wa kuyisha?

⁹ Kadi ntshinyi tshitudi mua kuenza tuetu bamone ne: tshisumi tshietu mu mudimu wa buambi tshidi tshienda tshikepela? Kuela meji bua malu adi Yehowa ukumbaja ku diambuluisha dia mudimu wetu wa kuyisha nekutuambuluishe. (Bala Lomo 10:13-15.) Bua bantu kusungidibuabu mbimpe babikile dîna dia Yehowa ne ditabuja, kadi bantu kabakuenza nanku tuetu katuyi babayishe to. Kumanya bualu ebu nekutusake bua kuikala anu ne tshisumi bua midimu mimpe ne kuikala ne mitalu mu dimanyisha lumu luimpe lua Bukalenge.

10. Bua tshinyi tudi mua kuamba ne: bikadilu bietu bimpe bidi bikoka bantu kudi Yehowa?

¹⁰ Nansha mudi tshisumi tshikale ne mushinga wa bungi mu mudimu wa kuyisha, tshiotshi nkayatshi ki ntshikumbane bua kukoka bantu kudi Nzambi to. Tshintu tshibidi tshia mu midimu mimpe tshidi mua kukoka bantu kudi Nzambi mbikadilu bimpe bia buena Kristo. Paulo wakaleja mudibi ne mushinga bua kuikala ne bikadilu bimpe pakafundaye ne: “Katuena tulenduisha muntu mu bualu nansha bumue, bua mudimu wetu kawubandibu.” (2 Kol. 6:3) Ngakuilu wetu ne bikadilu bietu bimpe bidi bilengeja dilongesha dia Nzambi ne bikoka bantu bakuabu mu ntendelelu wa Yehowa. (Tito 2:10) Bushuwa, misangu ya bungi tutu tumvua bipeta bimpe bitu bipatuka patu bantu bimpe bamona bikadilu bietu bia buena Kristo.

11. Bua tshinyi tudi ne bua kuela meji bikole bua tshidi bikadilu bietu mua kuenzela bantu bakuabu?

¹¹ Nansha mutudi bamanye ne: malu atudi tuenza adi mua kusaka bantu bua kuenza malu makane, tumanya kabidi ne: adi mua kubasaka bua kuenza malu mabi. Nunku, nansha tuetu ku mudimu, ku nzubu anyi mu tulasa, tuenze bua kubenga kupesha muntu nansha umue mpunga wa kumbandaye mudimu wetu ne bikadilu  bietu. Tuetu bikala tuenza mibi ku bukole, bipeta bituapeta nebikale bibi menemene. (Eb. 10:26, 27) Lungenyi elu ludi ne bua kutusaka bua kuela meji bikole bua malu atudi tuenza ne tshidi nsombelu wetu mua kuenzela bantu bakuabu. Bu mudi bikadilu bimpe bienda bijimina mu bulongolodi ebu, bantu bimpe nebikale anu ‘bajingulula ditapuluka didi pankatshi pa badi bakuatshila Nzambi mudimu ne badi kabayi bamukuatshila mudimu.’ (Mal. 3:18) Bulelela, bikadilu bimpe bia buena Kristo bidi biambuluisha bantu bua kulengejangana ne Nzambi.

12-14. Mmunyi mudi mushindu utudi tutantamena mateta a ditabuja ushintulula mushindu udi bantu bakuabu bamona mudimu wetu? Fila tshilejilu.

¹² Pavua Paulo mufundile bena mu Kolinto, wakaleja ne: uvua mupete makenga, ntatu, mututshibue ne muedibue mu maloko. (Bala 2 Kolinto 6:4, 5.) Tuetu bapete ntatu idi iteta ditabuja dietu, dinanukila dietu nediambuluishe bantu badi batumona bua kuitaba bulelela. Tshilejilu, kukadi bidimu bia bungi, bakajinga bua kujimija Bantemu ba Yehowa bonso ba mu tshimenga kampanda tshia mu Angola. Bakakuata Bantemu babidi ne bantu 30 bavua banyisha bulelela bavua babuela mu bisangilu bietu. Pashishe bantu ba muaba au bakalua kumona muvua baluishi bakuma bantu bavua kabayi ne bualu abu too ne pavua mashi apatuka. Bakakuma too ne bantu bakaji ne bana batekete ne tshikisu. Baluishi abu bavua bajinga kukuatshisha bantu bavua bamona buôwa bua kabikadi bateleja Bantemu ba Yehowa to. Kadi panyima pa bamane kubatuta munkatshi mua bantu nunku, bantu ba bungi ba muaba au bakalua kudi Bantemu abu ne kubalomba bua bikale baya kubalongesha Bible ku nzubu yabu. Katupa kakese pashishe, mudimu wa kuyisha Bukalenge wakadiunda, kuya kumpala bikole, ne kupatula bipeta bimpe bia bungi.

¹³ Tshilejilu etshi tshidi tshileja tshidi didisuika dietu bua kutumikila mikenji ya mu Bible mua kuenzela bantu bakuabu. Tudi mua kuela meji bua bungi bua bantu bavua balengejangane ne Nzambi bua muvua Petelo ne bapostolo bakuabu benze malu ne dikima. (Bien. 5:17-29) Buetu tuetu, balongi betu, bena mudimu netu anyi bena mu dîku dietu badi mua kuitaba bulelela bobu bamone mutudi tulamata ku malu adi makane.

¹⁴ Mu bikondo bionso, kudi anu bamue bana betu batu bakengeshibua. Tshilejilu, mu Arménie, bana betu batue ku 40 mbedibue mu buloko bualu mbabenge bua kubuela mu mvita ne mu malu a tshididi, ne bana betu bakuabu ba bungi badi pabu mua kuedibua mu maloko mu matuku adi alua. Mu ditunga dia Érythrée, mbele batendeledi ba Yehowa 55 mu buloko ne bamue ba kudibu badi ne bidimu bipite pa 60. Mu Corée du Sud, mbele Bantemu batue ku 700 mu buloko bua ditabuja diabu. Nsombelu udi nanku kukadi bidimu bitue ku 60. Tuikalayi tusambila bua ditabuja dia bana betu badibu bakengesha mu matunga mashilashilangane ditumbishishe Nzambi ne diambuluishe bantu badi banange buakane bua kushalabu balamate ntendelelu mulelela.​—Mus. 76:8-10.

15. Fila tshilejilu tshidi tshileja mudi kuenza malu ne bululame mua kukoka bantu bakuabu bua kuitababu bulelela.

¹⁵ Bu mutudi tuenza malu ne bululame, bidi mua kuambuluisha kabidi bantu bua kuitaba bulelela. (Bala 2 Kolinto 6:4, 7.) Tshilejilu, mona bualu buakenzeka: Pavua muanetu wa bakaji mukuabu wela makuta mu kashete katubu bela makuta a njila ka mu mashinyi, muntu kampanda uvuabu bamanyangane nende wakamuambila ne: kabivua anu ne mushinga bua kufutaye makuta to, bualu muaba uvuabu babuelele mu mashinyi ne uvuabu ne bua kutulukila uvua pabuipi. Muanetu wa bakaji wakamuleja ne: bivua bimpe bua kufuta makuta au nansha bua muaba muîpi. Pakambaye nunku, mulunda wende eu wakatuluka. Ke muendeshi wa mashinyi kukudimuka ne kuebeja muanetu wa bakaji eu ne: “Udi Ntemu wa Yehowa anyi?” Muanetu eu wakandamuna ne: “Eyowa, bua tshinyi udi ungebeja nanku?” Muendeshi wa mashinyi kumuandamunaye ne: “Mvua mumvue panuvua nuyukila bua kufuta makuta, ne ndi mumanye ne: Bantemu ba Yehowa badi munkatshi mua bantu bakese batu benza nanku ne batu ne bululame mu malu onso.” Ngondo mikese pashishe, muntu kampanda wakasemena kudi muanetu wa bakaji au mu bisangilu ne  kumuebejaye ne: “Udiku mummanye anyi? Meme ke muendeshi wa mashinyi unuvua bayukile nende bua bualu bua kufuta makuta a mashinyi. Pangakamona bikadilu biebe bimpe, ngakangata dipangadika dia kutuadija kulonga Bible ne Bantemu ba Yehowa.” Lumu lutudi nalu lua kuikala bantu bena bululame ludi lutuvuija bamanyishi ba kueyemena.

16. Bua tshinyi ngikadilu bu mudi muoyo mule, dinanga ne bulenga itu ilenga mioyo ya bantu? Fila tshilejilu.

¹⁶ Tudi kabidi tuambuluisha mu mudimu wa dikoka bantu kudi Yehowa patudi tuleja ngikadilu bu mudi muoyo mule, dinanga ne bulenga. Bamue bantu badi batumona badi mua kujinga bua kulonga bua kumanya Yehowa, malu adiye mulongolole, ne kumanya bantu bende. Ngikadilu ne bienzedi bia bena Kristo balelela mbishilangane bikole menemene ne dileja patupu ku mêsu dia bamue batendeledi mudibu balamate Nzambi, bualu ndubombo. Bamue bamfumu ba bitendelelu mbalue babanji bua dishima bena kuitabuja babu, benza mudimu ne makuta adibu bapeta bua kusumba mpangu minene ne mashinyi, ne bakuabu bafika too ne ku diashila mbua yabu nzubu mikale ne biamu bidi bifila mashika anyi luya. Bushuwa, bantu ba bungi batu badiamba mudibu bayidi ba Kristo kabatu ne lungenyi lua ‘kufila tshianana’ to. (Mat. 10:8) Kadi anu bu bakuidi ba dishima ba mu Isalele wa kale, badi “bayisha anu bua difutu” ne malu a bungi adibu balongesha kaena mu Bible to. (Mika 3:11) Bikadilu bia lubombo bia nunku kabiena bifikisha bantu ku dilengejangana ne Nzambi to.

17, 18. a) Mmushindu kayi utudi tutumbisha Yehowa patudi tuleja ngikadilu ya buena yende mu nsombelu wetu? b) Tshidi tshikusaka bua kutungunuka ne kuenza midimu mimpe ntshinyi?

¹⁷ Ku lukuabu luseke, malongesha malelela a bena Kristo ne malu mimpe adibu benzela bantu bakuabu bitu bilenga mioyo ya bantu. Tshilejilu, mukaji mukamba mukuabu ukavua mukulakaje wakipata muanetu wa balume mukuabu uvua mpanda-njila pavuaye uyisha ku nzubu ne ku nzubu. Mamu eu wakamba ne: uvua pa tshibandilu mu tshikuku ukeba bua kushintulula ampule pavua muanetu eu mukokole ku tshiibi. Ke muanetu eu kumuambilaye ne: “Ki mbimpe wewe kuenza mudimu eu nkayebe to.” Muanetu wa balume wakamushintuluila ampule ne pashishe kutungunukaye ne njila wende. Pakumvua muana wa mamu eu wa balume bualu buvua buenzeke, wakakema bikole, ke kuyaye wenda ukeba muanetu eu bua kumuela tuasakidila. Bualu ebu buakamufikisha ku ditaba bua kulonga Bible.

¹⁸ Bua tshinyi udi mudisuike bua kutungunuka ne kuenza midimu mimpe? Pamuapa mbualu udi mumanye ne: patudi tuleja tshisumi mu mudimu wetu ne tuenza malu adi umvuangana ne disua dia Nzambi, tudi tutumbisha Yehowa ne tudi mua kuambuluisha bantu bakuabu bua kusungidibua. (Bala 1 Kolinto 10:31-33.) Kuikala ne tshisumi bua midimu mimpe patudi tuyisha lumu luimpe ne kuenza malu adi Nzambi musue kudi kufumina ku dijinga dikole dia kuleja mutudi banange Nzambi ne bantu netu. (Mat. 22:37-39) Tuetu bikale ne tshisumi bua midimu mimpe, netuikale ne disanka ne netupete malu mimpe a bungi bituadijila ku mpindieu. Netuikale kabidi bindile ne muoyo kuulu kuulu dîba dikala bantu bonso mua kuleja tshisumi bua ntendelelu mulelela bua kutumbisha Mufuki wetu Yehowa.