Angela, * muanetu wa bakaji utshidi mujike udi ne bidimu 30 ne pa mutu udi ne bualu kampanda budi bumutonde. Mmuindile bakulu. Nebamuambilaku tshinyi? Angela uvua mupumbishe bimue bia ku bisangilu, kadi mmupungile bua mudimu uvuaye muenze dituku dijima wa kuambuluisha bantu bakulakaje. Pa kumbusha ntatu ya dituku dionso, udi kabidi uditatshisha bikole bua mamuende udi usama.

Bu wewe mua kuya bua kukumbula Angela, mmushindu kayi uwikala mua kukankamija ‘mutshima wa muntu udi mupundile’ eu? (Yel. 31:25) Kadi mmunyi muudi mua kudilongolola kumpala bua kuenza dikumbula dia bulami didi dikolesha muntu?

Imue misangu tuetu bonso tutu tutshioka bua midimu yetu ya bianza anyi bua majitu atudi nawu mu tshisumbu. Tshilejilu, muprofete Danyele wakadiumvua ‘mupungile’ pavuaye mupete tshikena kumona tshivuaye kayi mujingulule. (Dan. 8:27) Muanjelu Gabaliele wakamuambuluisha pavuaye mumumuenekele. Mutumibue wa Nzambi eu wakapesha Danyele lungenyi lua kujingulula nalu malu, kumujadikilaye ne: Yehowa uvua mumvue masambila ende ne kumuambilaye ne: utshivua anu muntu “munangibue bikole.” (Dan. 9:21-23) Pakaluabu kupetangana musangu mukuabu, mêyi mimpe avua muanjelu mukuabu muambe akakolesha muprofete uvua mupungile eu.​—Dan. 10:19.

Bia muomumue, kumpala kua kukumbula muena Kristo netu udi mua kuikala mutshioke peshi mutekeshibue mu mikolo, keba dîba dia kuela meji bua nsombelu idiye nayi. Nntatu kayi idiye nayi? Mmunyi mudi ntatu eyi mua kuikala imutshiokesha? Nngikadilu kayi mimpe idiye uleja mu nsombelu eu? Tangila  tshidi Richard udi mukulu kukadi bidimu 20 wamba: “Ntu ntamba kutabalela makanda a mubidi a bana betu bena Kristo. Pantu nkonkonona bimpe nsombelu idibu nayi kumpala kua kubakumbula, bitu bilua bipepele bua meme kupeta mishindu ya kubakankamija bilondeshile majinga abu.” Mukulu mukuabu yeye uya kukufila kua muena Kristo nebe kampanda, kanuenaku mua kuanji kukonkonona pamue nsombelu wa muanetu au anyi?

Udi mua kumona ne: bitu pamuapa bikole bua wewe kuambila bakuabu muudi udiumvua. Tshilejilu, bidi mua kukolela muena Kristo bua kuambilaye bakulu badi balue kumukumbula malu ende patoke. Kadi ntshinyi tshinudi mua kuenza bua kuakulaye mudilekelele? Kutua mimuemue ne muoyo mujima ne kumuambila mêyi adi akolesha kudi mua kupatula bipeta bimpe. Michael udi mukulu kukadi bidimu 40 utu misangu ya bungi utuadija kukumbula bantu ne mêyi a ne: “Diakalenga ditambe bunene didi nadi mukulu ndia kukumbula bena Kristo nende ku nzubu yabu ne kubamanya bimpe. Nunku, mvua muindile ne muoyo kuulu kuulu bua kumonangana nebe lelu.”

Udi mua kumona ne: mbimpe bua kuenza disambila ne muoyo mujima kumpala kua kutuadija muyuki. Mu masambila avua mupostolo Paulo wenza, uvua wakula bua ditabuja, dinanga ne dinanukila bivua nabi bena Kristo nende. (1 Tes. 1:2, 3) Paudi wambila muena Kristo nebe muudi udiumvua bua ngikadilu mimpe idiye nayi, udi bushuwa ulongolola muoyo webe ne wende bua nuyukile malu adi akolesha. Mêyi ebe adi kabidi mua kumuambuluisha. Ray udi mukulu kukadi bidimu bia bungi udi wamba ne: “Bimue bikondo tuetu bonso tutu tupua muoyo malu mimpe atutu tuenza. Nunku padi muntu utuvuluijawu, bitu bitukolesha.”

Anu bu Paulo, udi mua kufila ‘kupa kua nyuma’ wewe mumueleshishe meji nansha ne mvese umuepele wa mu Bible. (Lomo 1:11) Tshilejilu, muanetu kampanda udi mutekete mu mikolo udi mua kudimona kayi ne mushinga anu bu mufundi wa Misambu wakadifuanyikija  ne ‘mulondo wa tshiseba wa mvinyo pa muishi wa kapia’ udi mubondakane. (Mus. 119:83, 176) Wewe mumane kuleja mu tshikoso tshidi tshiambilu etshi tshiumvuija, udi mua kushala mushindike ne: muanenu au ‘ki mmupue muoyo’ mikenji ya Nzambi to.

Bia muomumue, tshilejilu tshia drakma umue uvua mujimine tshidi mua kulenga muoyo wa muanetu wa bakaji ukadi mulekele malu a mu nyuma anyi udi wenda uteketa ku kakese ku kakese? (Luka 15:8-10) Drakma umue uvua mujimine au udi mua kuikala disanga dimue dia ku masanga a or adi enza shene wa mu nshingu. Panudi nukonkonona tshilejilu etshi, bidi mua kumuambuluisha bua kumona ne: udi pende ne mushinga mu tshisumbu tshia bena Kristo. Panyima pa nuenu bamane kukonkonona bualu ebu, udi mua kuleja mudi Yehowa umutabalela bikole bu umue wa mu bana bende ba mikoko.

Bana betu bena Kristo batu misangu ya bungi basue kuleja mmuenenu wabu bilondeshile Bible. Nunku kuakudi nkayebe to. Panyima pa wewe mumane kubala mvese udi upetangana ne nsombelu wabu, udi mua kupatula muaku anyi tshiambilu ne kubalomba bua bumvuije. Tshilejilu, panyima pa bamane kubala 2 Kolinto 4:16, mukulu udi mua kuebeja ne: “Ukadiku mudimuene nkayebe mushindu utu Yehowa ukuvuija mupiamupia anyi?” Lukonko elu ludi mua kunufikisha ku “dikankamijangana” bimpe.​—Lomo 1:12.

Udi kabidi mua kukolesha muena Kristo nebe panudi nuakula nende bua muntu kampanda wa mu Bible uvua pende mupete bualu budi mua kuikala bufuanangane ne buende. Muntu udi ne dibungama udi pamuapa mua kuikala ne nsombelu mufuanangane ne wa Hana peshi wa Epafodito bavua umue musangu ne tunyinganyinga kadi bikale anu ne mushinga ku mêsu kua Nzambi. (1 Sam. 1:9-11, 20; Filip. 2:25-30) Kanuenaku mua kukonkonona bimue bia ku bilejilu bimpe bia mu Bible pikalabi bikengela kuenza nanku anyi?

Udi mua kuleja muudi uditatshisha ne muoyo mujima bua bana benu paudi utungunuka ne kubapinganyina bua kubakumbula. (Bien. 15:36) Udi mua kumona panudi nujikija kuyukila ne: mbimpe bua kupeshangana dîba kampanda bua kuyisha nende. Patu Bernard udi mukulu kukadi matuku a bungi uya kutangila kabidi muanetu kampanda ukavuaye mukumbule, utu mua kumukokela ku luseke ne kumuebeja bua mubelu kampanda uvuaye mumupeshe ne: “Anji ngambila, bivua biende bimpe anyi?” Wewe uditatshisha mushindu eu, neumanye bikalabi bikengela kumuambuluisha kabidi.

Kupita bionso, bana betu bena Kristo mbasue kudiumvua ne: badi babatabalela, babumvuila ne mbabanange. (1 Tes. 5:11) Nunku kumpala kua kuenza dikumbula dia bulami, keba dîba dia kuelangana meji bua nsombelu wa muena Kristo nebe. Teka bualu ebu mu disambila. Sungula mvese idi ipetangana ne bualu ebu. Pashishe neupete mêyi mimpe bua kukolesha ‘mutshima wa muntu udi mupungile.’