Kudi bualu budi bujadika ne: tshiambilu etshi tshidi tshiakula bua bana ba Nzambi ba mu nyuma. Mbualu kayi abu?

Mvese wa kumpala wa kuyidibu batele udi wamba ne: ‘Bansongalume ba bantu ba Nzambi bakamona bana bakaji ba bantu ba tshianana ne: mbalengele; bakasungula bonso bakasuabu bu bakaji babu.’​—Gen. 6:2.

Tshiambilu tshia ne: “bansongalume ba bantu ba Nzambi” ne tshia ne: “bana balume ba Nzambi” bidi mu Mifundu ya tshiena Ebelu mu Genese 6:2, 4; Yobo 1:6; 2:1; 38:7 ne mu Musambu wa 89:6. Mvese eyi idi ileja tshinyi bua “bana balume ba Nzambi”?

Bidi bimueneka patoke ne: bansongalume ba bantu ba Nzambi badibu babikila mu Yobo 1:6 ne: “bana balume ba Nzambi” mbifukibua bia mu nyuma bivua bidisangishe kumpala kua Nzambi. Munkatshi muabu muvua Satana uvua ‘utambakana eku ne eku pa buloba.’ (Yobo 1:7; 2:1, 2) Bia muomumue, tudi tubala mu Yobo 38:4-7 bua ‘bana balume ba Nzambi’ bavua ‘bele mbila bua disanka diabu’ pavua Nzambi ‘muladike dibue dia ku ditumba’ dia buloba. Bavua ne bua kuikala banjelu, bualu kabavua banji kufuka bantu to. “Bana balume” ba Nzambi badibu batele mu Musambu wa 89:6 mbifukibua bia mu diulu bidi ne Nzambi, ki mbantu to.

Kadi “bansongalume ba bantu ba Nzambi” badibu batele mu muyuki udi mu Genese 6:2, 4 mbanganyi? Mu diumvuangana ne bijadiki bia mu Bible bitukadi batele, mbikumbane bua tuetu kuamba ne: muyuki eu udi wakula bua bana balume ba Nzambi ba mu nyuma bavua balue pa buloba.

Bamue batu babenga kuitaba ne: banjelu bavua bapete dijinga dia kusangila ne bakaji. Mêyi a Yezu adi mu Matayi 22:30 adi aleja ne: dibaka ne disangila dia mulume ne mukaji kabitu mu diulu to. Kadi musangu kampanda, banjelu bakavuala mubidi wa bantu, kudiabu ne kunuabu nabu. (Gen. 18:1-8; 19:1-3) Nunku, mbikumbane bua tuetu kuamba ne: bua mubidi uvuabu bangate au, bavua mua kusangila ne bakaji.

Kudi bijadiki mu Bible bidi bileja ne: bamue banjelu bavua benze nanku. Yuda mvese 6 ne wa 7 udi ufuanyikija bubi buvua bena Sodoma bavua balonde majinga a mubidi adi kaayi a ku tshilelelu benze ne bua “banjelu bavua kabayi balame muaba wabu wa ku ntuadijilu, kadi balekele muaba wabu wa kusomba.” Bualu budi bupetangana budi ne: banjelu abu ne bena mu Sodoma bavua ‘badifile ku masandi makole ne balonde majinga a mubidi adi kaayi a ku tshilelelu.’ Mêyi makuabu adi mafuanangane ne aa adi mu 1 Petelo 3:19, 20 adi aleja diumvuangana didi pankatshi pa banjelu bavua kabayi batumikila abu ne “matuku a Nowa.” (2 Pet. 2:4, 5) Nunku, tudi mua kufuanyikija njila uvuabu balonde kudi banjelu bavua babenga kutumikila ba mu tshikondo tshia Noa ne bubi bua bena mu Sodoma ne Amola.

Bualu ebu budi bumvuika patudi tumanya ne: “bansongalume ba bantu ba Nzambi” badibu batele mu Genese 6:2, 4 bavua banjelu bavua bavuale mubidi wa bantu ne basangile ne bakaji.

Mupostolo Petelo udi uleja mudi nyuma eyi mikale eyi ivua “mibenge kutumikila kale pavua Nzambi muindile ne lutulu mu matuku a Nowa.” (1 Pet. 3:20) Bushuwa, Petelo uvua wakula bua banjelu bavua batomboke ne baye ku luseke lua Satana. Yuda udi wakula bua banjelu bavua “kabayi balame muaba wabu wa ku ntuadijilu, kadi balekele muaba wabu wa kusomba” uleja ne: Nzambi “mmubalame mu nkanu ya kashidi mu mîdima mikole bua dilumbuluisha dia dituku dinene.”​—Yuda 6.

Mmu mushindu kayi muvua banjelu babenge kutumikila mu matuku a Noa? Kumpala kua Mvula wa kabutu, banjelu babi aba bakangata mubidi wa bantu, bualu buvua Nzambi kayi mulongolole buabu. (Gen. 6:2, 4) Kabidi, banjelu bavua basangile ne bakaji abu bavua benza bualu buvua kabuyi bua ku tshifukilu. Nzambi kavua mufuke banjelu bua basangile ne bakaji to. (Gen. 5:2) Pakumbana tshikondo, Nzambi neabutule banjelu babi bavua babenge kutumikila aba. Bua mpindieu anu mudi Yuda wamba, badi mu “mîdima mikole” anyi mu buloko bua mu nyuma.

Ndîba kayi ne mmushindu kayi uvua Yezu muyishe “nyuma ivua mu buloko” eyi? Petelo udi wamba ne: bualu ebu buakenzeka panyima pa Yezu mumane “kuvuijibua ne muoyo mu nyuma.” (1 Pet. 3:18, 19) Manya kabidi ne: Petelo udi wamba ne: Yezu ‘wakaya kuyisha.’ Bu mudiye wamba ne: “wakaya,” bidi bileja ne: diyisha dikavua dienzeka kumpala kua yeye kufunda mukanda wende wa kumpala. Nunku bidi bimueneka ne: katupa kakese panyima pa Yezu mumane kubika, wakayisha nyuma mibi bua dinyoka diakanyine didiyi ne bua kupeta. Kadivua diyisha divua mua kuyipetesha ditekemena to. Divua diyisha dia dilumbuluisha. (Yona 1:1, 2) Pavua Yezu mushale ne ditabuja ne lulamatu too ne ku lufu ne pashishe kumubishabu, bualu buvua buleja muvua Diabolo kayi ne bukokeshi kudiye, Yezu wakafila tshijadiki tshivua tshileja ne: uvua mumanyishe muvua nyuma eyi mikumbanyine kabutu.​—Yone 14:30; 16:8-11.

Mu matuku atshidi alua, Yezu neasuike Satana ne banjelu bende ne kubimansha mu tshina tshidi katshiyi ne ndekelu. (Luka 8:30, 31; Buak. 20:1-3) Too ne tshikondo atshi, banjelu bavua babenge kutumikila aba badi mu mîdima mikole ne nebikale ne bua kubutudibua bushuwa.​—Buak. 20:7-10.