Mukalenge wa mu Sulia uvua wenda ukeba muprofete wa Nzambi Elisha ne wakatuma bantu bua bamulonde ku Dotana, tshimenga tshivua pa mikuna tshivua ne lumbu. Butuku, mukalenge wa Sulia wakatuma tubalu, makalu a mvita ne tshiluilu tshia mvita ku Dotana. Patshiatshia, tshiluilu tshiende tshikavua tshinyunguluke tshimenga.​—2 Bak. 6:13, 14.

Pavua mulami wa bintu wa Elisha mubike ne mupatuke pambelu, wakamona bantu bavua balue bua kukuata muprofete. Wakela dîyi ne: ‘Aka, mukalenge wanyi, netuenze tshinyi?’ Elisha wakamuambila ne: ‘Kutshinyi nansha; bualu bua badi netu badi bapita badi nabu bungi.’ Pashishe muprofete wakalomba Yehowa ne: ‘Ndi nkusengelela ne: utabeja mêsu ende bua yeye amone.’ Muyuki udi utungunuka ne: ‘Yehowa wakatabeja mêsu a nsongalume, wakamona mikuna miuwule tente ne tubalu ne makalu a kapia binyunguluke Elisha.’ (2 Bak. 6:15-17) Bualu ebu ne malu makuabu avua mafikile Elisha mu nsombelu wende adi atulongesha tshinyi?

Elisha uvua mutukije pavuaye kumpala kua tshiluilu tshia bena Sulia bualu uvua mueyemene Yehowa ne uvua mumone bukole buvua nabu Nzambi bua kumukuba. Lelu katuena tutekemena bua kutuenzelabu bishima to, kadi tudi bamanye ne: Yehowa udi ukuba bantu bende mu tshibungi. Mu ngumvuilu kampanda, tudi petu banyunguluka kudi tubalu tua kapia ne makalu a kapia. Tuetu ‘babimone’ ne mêsu etu a ditabuja ne tuetu beyemene Nzambi, ‘netusombe talalaa’ ne netumone mudi Yehowa utubenesha. (Mus. 4:8) Tumonayi malu mimpe atudi mua kupetela ku malu makuabu avua mafikile Elisha mu nsombelu wende.

Umue musangu pavua Elisha udima, muprofete Eliya wakalua kudiye ne kumukupilaye tshilamba tshiende tshia mudimu tshia pa mutu pambidi. Elisha uvua mumanye tshivua bualu ebu bumvuija. Wakenza difesto, kulayaye tatuende ne mamuende ne kumbukaye kuabu bua kuya kuenzela Eliya mudimu. (1 Bak. 19:16, 19-21) Bu muvua Elisha muitabe bua kuenzela Nzambi mudimu ne muoyo wende mujima, wakalua tshiamu tshia mudimu tshia Yehowa ne ndekelu wa bionso kuenzaye mudimu bu muprofete pa muaba wa Eliya.

 Elisha wakenzela Eliya mudimu pamuapa munkatshi mua bidimu bisambombo. Mu bidimu abi, Elisha ke uvua ‘wela mâyi ku bianza bia Eliya.’ (2 Bak. 3:11) Tshikondo atshi, bantu bavua ne tshibidilu tshia kudia ne bianza, kabayi ne nsomo, tuele anyi bintu bikuabu bia kudia nabi to. Pavuabu bajikija kudia, muena mudimu uvua wela mfumuende mâyi ku bianza bua yeye kubiowa. Nunku, imue ya ku midimu ya Elisha ivua pamuapa midimu mishadile. Nansha nanku, wakamona kuikala mulami wa bintu wa Eliya bu diakalenga.

Lelu, bena Kristo ba bungi batu pabu benza midimu mishilashilangane ya pa buayi. Padibu benza midimu eyi, ditabuja ne dijinga diabu dia kufila makanda abu a mubidi ne muabu muonso ke bidi bibasaka bua kuenzela Yehowa mudimu. Imue ya ku midimu eyi idi ibalomba bua kushiya nzubu yabu bua kuenza mudimu ku Betele, mu midimu ya luibaku, ne mu midimu mikuabu idi bantu ba bungi bamona bu mishadile. Muena Kristo nansha umue kena ne bua kupepeja midimu eyi anyi kuyimona bu mishadile to, bualu Yehowa udi uyangata ne mushinga wa bungi.​—Eb. 6:10.

Kumpala kua Nzambi ‘kuya ne Eliya mu diulu mu mvunde,’ wakambila muprofete eu bua kumbuka ku Gilegala bua kuya ku Betele. Eliya wakambila Elisha bua ashale, kadi Elisha wakamuambila ne: “Tshiena nkulekela.” Pakatungunukabu ne luendu, Eliya wakalomba kabidi Elisha misangu ibidi bua kupingana, kadi yeye wakabenga. (2 Bak. 2:1-6) Anu bu muvua Luta mulamate Naomi, ke muvua Elisha mulamate pende Eliya. (Luta 1:8, 16, 17) Bua tshinyi? Pamuapa bualu Elisha uvua munange diakalenga divua Nzambi mumupeshe dia kuenzela Eliya mudimu.

Elisha mmutushile tshilejilu tshimpe. Bobu batupeshe mudimu kampanda mu bulongolodi bua Nzambi, netuwangate ne mushinga wa bungi tuetu bamanye ne: Yehowa ke utudi tuenzela mudimu. Kakuena diakalenga dikuabu dinene kupita edi to.​—Mus. 65:4; 84:10.

Pavua bantu babidi aba batungunuka ne luendu luabu, Eliya wakambila Elisha ne: ‘Ulombe tshindi mua kukuenzela diambedi tshiyi muanji kubandishibua kuudi.’ Anu bu muvua dilomba divua Solomo muenze bidimu bia bungi kumpala dimanyine pa malu a mu nyuma, ke muvua kabidi dia Elisha. Wakalomba bua ‘bitupa bibidi bia nyuma wa Eliya bilue kudiye.’ (1 Bak. 3:5, 9; 2 Bak. 2:9) Mu Isalele, muanabute wa muntu ke uvua ne bua kupeta bitupa bibidi bia bumpianyi bua tatuende. (Dut. 21:15-17) Nunku, Elisha uvua pamuapa ulomba bua ikale mupianyi wa bintu bia Eliya bia mu nyuma. Elisha uvua pamuapa musue kabidi bua ikale ne dikima bu dia Eliya uvua ne “lukunukunu lua bungi bualu bua Yehowa.”​—1 Bak. 19:13, 14.

Mmushindu kayi uvua Eliya muandamune dilomba dia mulami wende wa bintu? Muprofete wakamba ne: ‘Wewe wakulomba bualu bukole, kadi biwantangila pangabandishibua kuudi, bualu nebuenjibue bu mu dîyi diebe; kadi biwikala kuyi untangila, bualu kabuena buenjibua.’ (2 Bak. 2:10) Bidi bimueneka ne: diandamuna dia Eliya divua ne mumvuija abidi. Dia kumpala, anu Nzambi ke uvua mua kuamba bikala Elisha mua kupeta tshivuaye mulombe. Dibidi, bu Elisha mupete tshivuaye ukeba uvua ne bua kutungunuka ne kuikala mudisuike bua kushala ne Eliya nansha bualu kayi mua kumufikila.

Mmushindu kayi uvua Nzambi mumone dilomba dia Elisha dia kupeta bitupa bibidi bia nyuma wa Eliya? Tudi tubala mu muyuki eu ne: ‘Pakatshidibu benda bayikila, monayi, dikalu dia kapia ne tubalu tua kapia biakamueneka, biakabapandulula, ne Eliya wakabandishibua mu diulu mu mvunde. Elisha wakamumona.’ * Etshi tshivua diandamuna dia Yehowa ku dilomba dia Elisha. Elisha wakamona Eliya umbushibua kudiye, kupetaye bitupa bibidi bia nyuma wa Eliya ne kuluaye mupianyi wa bintu bia mu nyuma bia muprofete.​—2 Bak. 2:11-14.

Elisha wakambula tshilamba tshia Eliya tshia mudimu tshia pa mutu tshivua tshimate ne yeye kutshivuala. Tshilamba etshi tshiakatuadija kuleja ne: Elisha uvua muprofete wa Nzambi. Tshijadiki tshikuabu tshivua tshileja ne: bavua bamupesha mudimu eu tshiakamueneka pavuaye mulue kuenza tshishima tshia kupandulula mâyi a musulu wa Yadene.

Kakuyi mpata tshivua Elisha mumone pavua Eliya mubande muulu mu mvunde tshivua tshimulongeshe malu a bungi. Tuamba eku tuela eku, muntu katu umona dikalu dia kapia ne tubalu tua kapia dituku dionso to. Bivua tshijadiki tshia muvua Yehowa muitabe dilomba dia Elisha. Patu Nzambi wandamuna masambila etu, katutu tumona mu tshikena kumona dikalu dia mvita dia kapia ne tubalu tua kapia to. Kadi tudi mua kujingulula ne: Nzambi udi wenza mudimu ne bukole  bua bungi bua kutujadikila ne: disua diende ndikumbane. Patudi tumona ne: Yehowa udi ubenesha tshitupa tshia bulongolodi buende tshia pa buloba, tudi anu bu badi ‘bamona’ mudi tshidiendelandela tshiende tshia mu diulu tshienda.​—Yeh. 10:9-13.

Kudi malu a bungi avua Elisha mumone avua mamujadikile ne: Yehowa udi ne bukole bua bungi. Nyuma muimpe wa Nzambi wakambuluisha muprofete bua kuenza bishima 16, mmumue ne: misangu ibidi kupita kupita bivua Eliya muenze. * Musangu muibidi uvua Elisha mumone tubalu tua kapia ne makalu a mvita a kapia, uvua musangu uvuabu bapete lutatu ku Dotana utudi batele mu mêyi a mbangilu.

Nansha muvuabu banyunguluke Elisha kudi baluishi bende ku Dotana, kavua mulubakane to. Bua tshinyi? Bualu uvua ne ditabuja dikole kudi Yehowa. Tuetu petu tudi mua kupeta ditabuja dia nunku. Nunku, tulombayi Nzambi nyuma muimpe bua tuikale ne ditabuja ne ngikadilu mikuabu ya dimuma dia nyuma.​—Luka 11:13; Gal. 5:22, 23.

Bualu buvua buenzeke ku Dotana buvua kabidi busake Elisha bua kueyemenaye Yehowa ne biluilu biende bidiye utukuba nabi bidi kabiyi bimueneka. Muprofete wakamona ne: Nzambi uvua mutume biluilu bia banjelu bua kunyunguluka tshimenga ne basalayi bavua batshinyunguluke. Nzambi wakasungila Elisha ne muena mudimu wende mu tshishima pavuaye mufofomije mêsu a baluishi babu. (2 Bak. 6:17-23) Mu tshikondo tshikole atshi, nansha mu nsombelu mikuabu, Elisha wakaleja ditabuja ne kueyemenaye Yehowa ne muoyo mujima.

Anu bu Elisha, tueyemenayi Yehowa Nzambi. (Nsu. 3:5, 6) Tuetu benze nunku, ‘Nzambi neatufuile luse, neatuvudijile disanka.’ (Mus. 67:1) Bushuwa, katuena banyunguluka kudi makalu ne tubalu tua kapia biena dîna to. Kadi mu tshikondo tshia “dikenga dinene” Yehowa neatukube bu bana ba muntu ba pa buloba bujima. (Mat. 24:21; Buak. 7:9, 14) Too ne tshikondo atshi, tuikalayi anu bavuluke ne: “Nzambi udi tshinyemenu tshietu.”​—Mus. 62:8.