1, 2. Tshivua tshiambuluishe Bantemu ba Yehowa 230 bua kupanduka ku luendu lua lufu ku ndekelu kua Mvita mibidi ya buloba bujima ntshinyi?

PAVUA bukokeshi bua bena Nazi bukuluke ku ndekelu kua Mvita mibidi ya buloba bujima, bakatuma dîyi bua kushipa binunu bia bena buloko bavua bashale ne muoyo mu tumponya. Bavua ne bua kupatula bena buloko ba mu Sachsenhausen bua kuya nabu ku bitudilu bia mazuwa, kubabueja mu matu ne pashishe kuenza bua badine mu mâyi. Bualu ebu buvua dimue dia ku mayele divuabu balue kubikila ne: luendu lua lufu.

² Bena buloko 33 000 bavua ne bua kumbuka mu buloko bua mu Sachsenhausen ne kuenda kilometre 250 bua kufika ku tshitudilu tshia mu Lübeck mu Allemagne. Munkatshi muabu muvua Bantemu ba Yehowa 230 ba mu matunga asambombo bavuabu bambile bua kuya nabu. Buonso buabu bavua batshioke bua nzala ne masama. Bana betu aba bavua mua kupanduka mu luendu elu mushindu kayi? Umue wa kudibu wakamba ne: “Tuakatungunuka ne kukankamijangana umue ne mukuabu bua kutungunuka ne luendu.” Ku diambuluisha dia “bukole budi bupite bua pa tshibidilu” bua kudi Nzambi, dinanga diabu kudi umue ne mukuabu diakabambuluisha bua kupanduka ku tshifufu.​—2 Kol. 4:7.

3. Bua tshinyi tudi ne bua kukankamijangana?

³ Lelu, katuena tuenza luendu lua lufu lua buena alu to, kadi tudi tupeta ntatu ya bungi. Panyima pa dijadika dia Bukalenge bua Nzambi mu 1914, bakipata Satana mu diulu ne kumukupa pa buloba muikale ne “tshiji tshikole, mumanye ne: udi ne tshikondo tshîpi.” (Buak. 12:7-9, 12) Bu mudi bulongolodi ebu buenda busemena ku Armagedone, Satana udi wenza mudimu ne ntatu ne dikengeshibua bua kutekesha ditabuja dietu. Pa kumbusha malu aa, kudi kabidi tunyinganyinga tua ku dituku ne ku dituku. (Yobo 14:1; Muam. 2:23) Imue misangu padi ntatu yetu ivula, idi mua kututshiokesha bikole mu mushindu udi mua kupangisha bukole buetu bua mu nyuma ne mu lungenyi bua kutuambuluisha bua kutantamena ditekeshibua mu mikolo.  Tuangate tshilejilu tshia muanetu wa balume kampanda uvua muambuluishe bantu ba bungi mu nyuma munkatshi mua bidimu bia bungi. Mu bidimu biende bia ndekelu, yeye ne mukajende kabavua kabidi ne makanda a mubidi mimpe to, wakatuadija kudiumvua mutekeshibue mu mikolo. Anu bu muanetu wa balume au, buonso buetu tudi dijinga ne “bukole budi bupite bua pa tshibidilu” bua kudi Yehowa ne dikankamija dia kudi bantu bakuabu.

4. Bituikala basue bua kukankamija bantu, mmubelu kayi wa mupostolo Paulo utudi ne bua kuvuluka?

⁴ Bituikala basue kukankamija bantu bakuabu, tudi ne bua kuvuluka didimuija divua mupostolo Paulo mupeshe bena Kristo ba mu Ebelu. Wakamba ne: “Tutabalelanganayi muntu ne muntu bua kusakangana ku dinanga ne ku bienzedi bimpe, katuyi tulekela kudisangisha kuetu pamue bu mudi tshilele tshia bakuabu, kadi tuikale tukankamijangana, tutamba kuenza nunku nangananga bu munudi numona dituku dienda disemena pabuipi.” (Eb. 10:24, 25) Mmushindu kayi utudi mua kutumikila mibelu idi mu mvese eyi?

5. ‘Kutabalelangana muntu ne muntu’ kudi kumvuija tshinyi? Bidi bikengela tshinyi bua kuenza nunku?

⁵ ‘Kutabalelangana muntu ne muntu’ kudi kumvuija “kuangata majinga a bantu bakuabu ne mushinga, kubelela meji.” Tudiku mua kutabalela majinga a bantu bakuabu bikala diyukidilangana dietu nabu dimanyina anu pa kuelangana muoyo patupu ku nzubu wa Bukalenge peshi pa diyukidilangana nabu anu miyuki ya patupu anyi? Nansha kakese. Bushuwa tudi ne bua kuikala ne budimu bua ‘kutangila anu malu etu’ ne kubenga ‘kubuelakana mu malu a bakuabu.’ (1 Tes. 4:11; 1 Tim. 5:13) Nansha nanku, tuetu basue kukankamija bena Kristo netu, tudi ne bua kubamanya bimpe, kumanya nsombelu wabu, ngikadilu yabu, ditabuja diabu, malu mimpe atubu benza ne butekete buabu. Badi ne bua kutumona bu balunda babu ne kujadikabu mutudi babanange. Bua kuenza nunku bidi bikengela kupitshisha dîba pamue nabu, ki nganu padibu bapeta ntatu ne batekeshibua mu mikolo to, kadi nansha mu bikondo bikuabu.​—Lomo 12:13.

6. Ntshinyi tshidi mua kuambuluisha mukulu bua ‘kutabalela’ mikoko idiye ulama?

⁶ Badi balomba bakulu mu tshisumbu bua ‘kulama tshisumbu tshia mikoko ya Nzambi tshidi mu bianza biabu’ ku budisuile ne muoyo mujima. (1 Pet. 5:1-3) Badiku mua kukumbaja mudimu wabu wa kulama mikoko bimpe bobu kabayi bamanye bimpe mikoko idibu balama anyi? (Bala Nsumuinu 27:23.) Bakulu bobu badikebela dîba dia kuyukila ne bena Kristo nabu, ne basanka padibu basomba nabu, mikoko neyikale pabuipi bua kubalomba diambuluisha padibi bikengela. Bana betu ba balume ne ba bakaji nebikale kabidi mua kubaleja mudibu badiumvua menemene ne malu adibu nawu, ebi nebiambuluishe bakulu bua ‘kutabalela’ mikoko idibu balama ne kubapesha diambuluisha didi dikengela.

7. Mmunyi mutudi ne bua kuangata mêyi a ‘tshiakulakula’ adi bantu badi batekeshibue mu mikolo bakula?

⁷ Pavua Paulo ufundila bena mu tshisumbu tshia Tesalonika mukanda, wakamba ne: ‘Nuambuluishe badi batekete.’ (Bala 1 Tesalonike 5:14.) “Badi babungame” mbatekete mu mushindu kampanda, ke mudi kabidi aba badi batekeshibue mu mikolo. Nsumuinu 24:10 udi wamba ne: ‘Biwateketa palua dituku dia dikenga, bukole buebe budi bukepa.’ Mêyi adi muntu udi mutekeshibue mu mikolo bikole wamba adi mua kulua mêyi a “tshiakulakula.” (Yobo 6:2, 3, MMV) Patudi ‘tutabalela’ bantu ba nunku, tudi ne bua kuvuluka ne: malu adibu bamba kaena anu mua kuikala aleja menemene tshidibu mu muoyo wabu to. Rachelle wakadimuenena bualu ebu pavua mamuende mupete tunyinganyinga tukole. Rachelle udi wamba ne: “Misangu ya bungi mamu uvua wamba mêyi avua atonda bikole. Misangu ya bungi ivuaye wamba mêyi aa, mvua nteta kuvuluka tshitu mamu menemene, ngikadilu yende bu mudi dinanga, bulenga ne dikala mupeshanganyi wa bintu. Ngakamona ne: bantu badi ne tunyinganyinga tukole batu bamba malu a bungi atu kaayi ne mutu to. Bualu bubi menemene budi muntu mua kuenza, nkumupingajila pende mêyi mabi anyi  kumuenzela pende bualu kampanda bubi.” Nsumuinu 19:11 udi wamba ne: ‘Lungenyi luimpe lua muntu ludi lukanda tshiji, ne butumbi buende nkulekelela muntu bubi.’

8. Mbanganyi batudi ne bua ‘kujadikila’ nangananga ne: tudi babanange? Bua tshinyi?

⁸ Mmunyi mutudi mua ‘kutabalela’ muntu udi mutekeshibue ku muoyo bua bundu ne wela meji ne: kakuena tshikuabu tshia kuenza bua bilema bivuaye muenze ku kale, nansha yeye ukadi mutuadije kuenza malu bua kulongolola tshilema atshi? Paulo wakafunda bua muntu kampanda wa mu tshisumbu tshia mu Kolinto uvua muenze bubi ne munyingalale ne: “Nudi ne bua kumufuila luse ne muoyo umue, ne kumukolesha bua dibungama kadilu kupita muntu wa nunku bukole. Nunku, ndi nnusengelela bua numujadikile dinanga dienu.” (2 Kol. 2:7, 8) Bilondeshile diksionere kampanda, muaku udibu bakudimune ne: “kujadika” udi umvuija “kuitaba, kushindika, kuitaba bilondeshile mikenji.” Katuena anu mua kuamba ne: muntu mmumvue bimpe mutudi bamunange ne tuditatshisha bua bualu buende to. Udi ne bua kumuenena ngikadilu eyi ku lungenyi luetu ne malu atudi tuenza.

9. “Kusakangana ku dinanga ne ku bienzedi bimpe” kudi kumvuija tshinyi?

⁹ Paulo wakafunda ne: “Tutabalelanganayi muntu ne muntu bua kusakangana ku dinanga ne ku bienzedi bimpe.” Tudi ne bua kusaka bena Kristo netu bua kuleja dinanga ne kuikala ne bienzedi bimpe. Patu mudilu ukeba kujima, tudi mua kukumbaja nkunyi ne kuwusonsola. (2 Tim. 1:6) Bia muomumue, tudi mua kusaka bana betu bua kunanga Nzambi ne bantu nabu. Bidi bikengela kubela kalumbandi bua kubasaka ku bienzedi bimpe.

10, 11. a) Mbanganyi batu dijinga ne kubela kalumbandi? b) Fila tshilejilu tshidi tshileja mudi kalumbandi mua kuambuluisha muntu udi “musesuke mu njila.”

¹⁰ Tuetu bonso tutu tujinga bua batuele kalumbandi patutu bimpe anyi patutu batekeshibue mu mikolo. Mukulu kampanda wakamba ne: “Tatuanyi kavua mungambile musangu nansha umue ne: ndi muenze bualu kampanda bimpe to. Nunku ngakakola tshiyi ndiangata ne mushinga. . . . Nansha munkadi ne bidimu 50, ntu nsanka patu balunda banyi bangambila ne: ndi ngenza mudimu wanyi wa bukulu bimpe. . . . Bualu ebu mbundongeshe  ne: mbimpe kukolesha bantu bakuabu, ne ke tshintu ngenza.” Kalumbandi katu kakolesha bantu bonso, kusangisha ne bampanda-njila, bakulakaje ne aba badi batekeshibue mu mikolo.​—Lomo 12:10.

¹¹ Padi ‘bantu badi bashindame mu nyuma bakeba bua kupingaja muntu udi musesuke mu njila,’ mibelu mimpe ne diela kalumbandi bidi mua kusaka muntu udi muenze bibi bua kupingana mu njila muimpe. (Gal. 6:1) Bualu ebu ke buvua bufikile muanetu wa bakaji mukuabu diende Miriam. Udi wamba ne: “Ndi mvuluka mumvua mupitshile mu tshikondo kampanda tshikole pavua balunda banyi balekele bulongolodi ne musangu au tatuanyi mutuadije kusama disama dia mashi apatuka mu buongo. Biakambungamija bikole. Pamvua njinga kutantamena tunyinganyinga tuanyi, ngakatuadija kupatuka ne nsongalume kampanda uvua kayi Ntemu.” Bualu ebu buakamufikisha ku didiumvua ne: Yehowa kavua mumunange, ne wakajinga kulekela bulongolodi. Pakamuvuluija mukulu kampanda mudimu muimpe uvuaye wenza kumpala, wakadiumvua mukoleshibue. Wakalekela mukulu eu umuleja muvua Yehowa mumunange. Bualu ebu buakamusaka bua kunangaye pende Yehowa. Wakakosa bulunda buende ne nsongalume au ne kutungunukaye ne kuenzela Yehowa mudimu.

12. Mbipeta kayi bidi mua kumueneka tuetu tusaka muntu bua kuenza bualu kampanda pa kumufuisha bundu, kumupepeja anyi kumufikisha ku didiumvua mupile?

¹² Kufuisha muntu bundu pa kumufuanyikija mu mushindu mubi ne bakuabu, kumupepeja pa kumuelela mikenji mikole anyi kuenza bua adiumvue mupile bua mudiye kayi muenze bualu kampanda mu mushindu muimpe kudi mua kusaka muntu bua enze mudimu ne tshisumi, kadi nebikale anu bua tshitupa tshîpi. Ku lukuabu luseke, kuela muena Kristo netu kalumbandi ne kumuvuluija mudiye munange Nzambi kudi mua kupatula bipeta bimpe biashala matuku a bungi.​—Bala Filipoyi 2:1-4.

13. Kukankamija bakuabu kudi kulomba tshinyi? (Tangila tshimfuanyi tshidi mu dibeji dia 18.)

¹³ Tudi ne bua ‘kukankamijangana, tutamba kuenza nunku nangananga bu mutudi tumona dituku dienda disemena pabuipi.’ Kukankamija bakuabu kudi kulomba kubasaka bua batungunuke ne kuya kumpala bua kuenzela Nzambi mudimu. Anu mutudi mua kufuanyikija kusaka muntu ku dinanga ne ku bienzedi bimpe ne disonsola mudilu udi ukeba kujima, ke mutudi mua kufuanyikija kukankamija bantu ne diela petrole mu mudilu bua utungunuke ne kutema anyi bua uvule. Kukankamija bantu kudi kulomba kukolesha ne kukankamija bantu badi batekeshibue. Patudi tupeta mpunga wa kukankamija muntu wa nunku, tudi ne bua kuamba mêyi mimpe ne mu mushindu muimpe. (Nsu. 12:18) Tudi kabidi ne bua “kuikala ne lukasa ku diteleja ne lujoko ku diakula.” (Yak. 1:19) Tuetu tuteleja ne muoyo mujima, netupete mushindu wa kumanya malu adi matekeshe muena Kristo netu mu mikolo ne kumuambila mêyi adi mua kumuambuluisha bua kutantamena nsombelu mikole ayi.

14. Mmunyi muvuabu bambuluishe muanetu kampanda uvua mutekeshibue?

¹⁴ Tumone muvua mukulu kampanda uvua umvuilangana muambuluishe muanetu kampanda wa balume ukavua mulekele kuyisha  munkatshi mua bidimu bia bungi. Pavua mukulu eu mumuteleje, wakamona ne: muanetu eu utshivua munange Yehowa bikole. Uvua ulonga Tshibumba tshia Nsentedi tshionso ne tshisumi ne uvua udienzeja bua kubuela mu bisangilu bionso. Kadi bienzedi bia bamue bantu ba mu tshisumbu tshiabu biakamufikisha ku didiumvua bibi menemene ne mutekeshibue mu mikolo. Mukulu wakamuteleja ne muoyo mujima kayi umukosa ku mêyi ne wakaleja muvuaye utabalela muanetu eu ne dîku diende. Ku kakese ku kakese muanetu eu wakalua kumona ne: uvua mulekele malu mabi a kale amupangisha bua kuenzela Nzambi uvuaye munange mudimu. Mukulu eu wakalomba muanetu wa balume eu bua kuyishabu nende. Muanetu eu wakatuadijilula kuyisha ne kuluaye kabidi mukulu mu tshisumbu bua diambuluisha dia mukulu eu.

15. Tshilejilu tshia Yehowa tshidi tshitulongesha tshinyi bua bidi bitangila kukankamija bantu badi batekeshibue?

¹⁵ Muntu udi mutekeshibue mu mikolo kena mua kumvua bimpe anyi kukoleshibua diakamue padibu bamupesha diambuluisha to. Bidi mua kutulomba bua kutungunuka ne kumuambuluisha. Bilondeshile nkudimuinu kampanda, Paulo wakamba ne: ‘Tungunukayi ne kuambuluisha badi batekete, ikalayi ne lutulu kudi bantu bonso.’ (1 Tes. 5:14, An American Translation) Pamutu pa kulekela ne lukasa bantu badi batekete, ‘tutungunukayi ne kubambuluisha’ mu mushindu kampanda, ne tutungunuke ne kubakolesha. Ku kale, Yehowa wakenzela batendeledi bende bavua batekeshibue mu mikolo malu ne lutulu. Tshilejilu, Nzambi wakenzela Eliya malu ne bulenga ne uvua utabalela majinga ende. Yehowa wakapesha muprofete eu bivuaye nabi dijinga bua kutungunukaye ne mudimu wende. (1 Bak. 19:1-18) Bu muvua Davidi munyingalale ne muoyo mujima, Yehowa wakamufuila luse ne bulenga buonso. (Mus. 51:7, 17) Nzambi wakambuluisha kabidi mufundi wa Musambu wa 73 ukavua pabuipi ne kulekela dimuenzela mudimu. (Mus. 73:13, 16, 17) Yehowa udi utuenzela malu mimpe ne bulenga nangananga patudi batekeshibue mu mikolo. (Ekes. 34:6) Luse luende ludi ‘lupialupia ku dinda ku dinda,’ ne ‘kaluena lupanga’ anyi kaluena ne ndekelu. (Muad. 3:22, 23) Yehowa mmutekemene bua tumuidikije ne tuenzele bantu badi batekeshibue malu ne bulenga.

16, 17. Bu mudi nshikidilu wa bulongolodi ebu wenda usemena pabuipi, ntshinyi tshitudi mua kudisuika bua kuenza? Bua tshinyi?

¹⁶ Mu bena buloko 33 000 bavuabu bumbuke nabu mu buloko bua Sachsenhausen, bantu binunu bia bungi bakafua. Kadi Bantemu ba Yehowa bonso 230 bavuabu bumbuke nabu mu buloko bakapanda. Dikankamijangana ne diambuluisha divuabu bapete kudi umue ne mukuabu biakenza bua luendu lua lufu alu lulue luendu lua lupandu kudibu.

¹⁷ Lelu, tudi mu “njila udi ufikisha ku muoyo.” (Mat. 7:14) Mu katupa kîpi emu, batendeledi ba Yehowa bonso nebende mu buobumue bua kubuela mu bulongolodi bupiabupia budi ne buakane. (2 Pet. 3:13) Tuikalayi badisuike bua kuambuluishangana muntu ne muntu mu njila udi ufikisha ku muoyo wa tshiendelele.