Mvua muledibue mu tshidimu tshia 1956 ne disama dia mujilu wa mu muongo uvua kawuyi mudikange bimpe to. Disama edi divua dinyange buongo buanyi, tshivua mua kuenda ne divua dinkebele masama makuabu a bungi manene.

Matuku makese kumpala kua meme kuledibua, muntu mukuabu ne mukajende bavua bamisionere ba Bantemu ba Yehowa bakatuadija kulonga Bible ne baledi banyi. Pantshivua muana, kuvua anu bamanyishi bakese ba pale pale mu tshimenga tshietu tshia Usakos, mu Namibie. Nunku bu muvuaku kakuyi tshisumbu, malu a kulonga mu bisangilu, tuvua tualonga mu dîku. Pamvua ne bidimu muanda mutekete, bakampanda bua kungenzelabu njila wa menyi mu mubidi wanyi bua ngikala nsukula. Pamvua ne bidimu 14, ngakatuadija kupaluka tshiseki. Bu muvua tulasa tubandile tuvua koku pabuipi tuikale ntanta, ne muvuabi bikengela bua baledi banyi bikale bantabalela bikole, tshivua mua kujikija tulasa tuanyi to.

Kadi ngakangata dipangadika dia kukolesha malanda anyi ne Yehowa. Tshikondo atshi kakuvua kuanji kuikala mikanda yetu ya bungi mu muakulu wanyi wa ku dibele wa Afrikaans to. Nunku ngakalonga bua kubala Anglais bua kulonga mikanda yetu ya bungi. Ngakalua muambi wa lumu luimpe ne meme kutambula ne bidimu 19. Mu bidimu binayi biakalonda, ngakapeta masama makole a bungi ne makuabu a mu lungenyi. Kupita apu, mu musoko wetu, kutshina kua bantu kuvua kumpangisha bua kuyisha bantu ne tshisumi.

Pamvua ne bidimu makumi abidi ne pa mutu, tuakumuka mu Namibie, kuya mu Afrique du Sud ne ngakabuela mu bisangilu bia tshisumbu bua musangu wanyi wa kumpala. Bivua bimpe be! Kadi, bavua ne bua kumpanda kabidi, bua musangu eu, bavua ne bua kumpanda muongu.

Panyima pa matuku, ngakumvua mutangidi wa tshijengu wakula bua bumpanga-njila. Malu akambaye akandenga ku muoyo. Mvua mumvue ne: makanda anyi a mubidi kaavua akumbana bua kuenza mudimu eu to, kadi ngakamona muvua Yehowa muntabalele mu nsombelu ya bungi mikole. Nunku ngakuwuja formilere wa bumpanda-njila bua kashidi. Kadi bua masama amvua nawu, bakulu bakelakana bua kuitaba dilomba dianyi.

Kadi, mvua mudisuike bua kuenza mudimu wa buambi ne muanyi muonso. Ngakakumbaja mêba avuabu balombe bampanda-njila bua kuenza munkatshi mua ngondo isambombo ku diambuluisha dia mamuanyi ne dia bantu bakuabu. Bualu ebu buakaleja mumvua mudisuike bua kuenza mudimu wa bumpanda-njila ne kuleja kabidi ne: masama kaavua mua kumpangisha to. Ngakuwuja kabidi formilere, bua musangu eu bakangitabila. Mu dia 1 ngondo wa 9 mu 1988, ngakalua mpanda-njila wa pa tshibidilu.

Ndi mumone mudi Yehowa mungambuluishe misangu ne misangu nansha mu mudimu wanyi wa bumpanda-njila. Kulongesha bantu bapiabapia bulelela pamutu pa kuimanyina pa masama anyi nkungambuluishe mu lungenyi, kabidi ne bua kukolesha malanda anyi ne Yehowa. Ndi mupete disanka dia bungi bua mundi muambuluishe bantu ba bungi bua kudilambula ne kutambula.

Ntshidi anu nsama. Kadi Yehowa udi ungambuila ‘bujitu buanyi ku dituku ku dituku.’ (Mus. 68:19) Katu anu ungambuluisha mua kupita bimpe ne nsombelu wanyi patupu to, kadi utu umpetesha disanka dia kuikala ne muoyo.