Udiku witaba ne: Yezu uvua Mulongeshi mutambe bunene wa katshia ne katshia anyi? Pamuapa ukadi mutete kuidikija imue mishindu ivuaye ukuata nayi mudimu bua kulongesha bu mudi, kuela nkonko ne kufila bilejilu. Kadi ukadiku mumone ne: misangu ya bungi uvua uleja ngenyi ivua mishilangane mu malu avuaye ulongesha anyi?

Bantu ba bungi batu benza mudimu ne ngenyi idi mishilangane patubu bakula. Udi pebe mua kuyamba njila ya bungi kuyi mumanye. Tshilejilu, udi mua kuamba ne: “Bavua bambe ne: bimuma bionso mbibobe, kadi ebi bitshidi bibishi.” Peshi ne: “Kumpala muana eu uvua ne bundu, kadi mpindieu ukadi uyukila ne bantu.”

Mu bilejilu bia buena ebi, udi wanji wamba bualu; pashishe ulua kuleja dishilangana pa kuenza mudimu ne biambilu bu mudi: kadi anyi ku lukuabu luseke. Peshi udi mua kuleja dishilangana pa kukumbajija bualu bukuabu. Paudi wakula mushindu eu, bidi biumvuika bimpe ne bidi mua kuambuluisha bakuabu bua kumvua tshiudi wamba.

Nansha mudi dishilangana dia ngenyi kadiyi mu imue miakulu anyi bibidilu bia bantu, mbimpe tumanye mushinga wadi. Bua tshinyi? Bualu mbenze nadi mudimu bikole mu Dîyi dia Nzambi. Misangu ya bungi Yezu uvua wenza mudimu ne dishilangana dia ngenyi. Vuluka muvuaye muambe ne: “Bantu batu batemesha muendu, ki mbua kuwuteka muinshi mua tshibondo tshia kupima natshi bintu to, kadi mbua kuwuteka pa tshitekelu tshia muendu.” ‘Tshiena mulue bua kushipa Mikenji, kadi mbua kuyikumbaja.’ “Nuakumvua tshivuabu bambe ne: ‘Kuena ne bua kuenda masandi.’ Kadi meme ndi nnuambila ne: muntu yonso udi utungunuka ne kutangila mukaji . . . ” ‘Bavua bambe ne: “Dîsu ku dîsu, dinu ku dinu.” Kadi ndi nnuambila ne: Kanukokianganyi ne muntu mubi; kadi muntu yeye mukutape dipi ku ditama dia balume, umutekele ditama dikuabu.’​—Mat. 5:15, 17, 27, 28, 38, 39.

Kudi dishilangana dia ngenyi dia muomumue mu mikanda mikuabu ya mu Bible. Didi mua kukuambuluisha bua kumvua lungenyi kampanda bimpe anyi kushindika mushindu kampanda muimpe wa kuenza bualu. Biwikala muledi, elangana meji bua dishilangana dia ngenyi edi: “Nuenu batatu, kanufikishi bana benu munda, kadi nutungunuke ne kubakolesha ne mibelu ne didimuija bia Yehowa.” (Ef. 6:4) Bu mupostolo Paulo mufunde patupu ne: tatu (anyi mamu) udi ne bua kukolesha muana ne mibelu ya Nzambi, bualu ebu buvua mua kuikala buimpe ne bulelela. Kadi lungenyi elu ludi lumvuika bimpe padiku dishilangana dia ngenyi dia ‘kubenga kubafikisha munda kadi kutungunuka ne kubakolesha ne mibelu ne didimuija bia Yehowa.’

Paulo wakalua kufunda kabidi mu nshapita eu ne: ‘Katuena tuluangana ne mashi ne mubidi, kadi tudi tuluangana ne bisumbu bia nyuma mibi bidi mu miaba ya mu diulu.’ (Ef. 6:12) Dishilangana dia ngenyi edi didi pamuapa mua kukuambuluisha bua kumanya ne: udi mu mvita mikole. Ki nya uluangana ne bantu to, kadi nya uluangana ne bisumbu bia nyuma mibi.

Anu mu mukanda wa Efeso eu, neupete mvese ya bungi idi Paulo mukuate mudimu ne dishilangana dia ngenyi. Kuela meji bua mvese eyi kudi mua kutuambuluisha bua kumvua bimpe menemene tshivua Paulo musue kuamba ne kudi mua kuleja patoke tshitudi ne bua kuenza.

Udi mua kumona ne: mbimpe kukonkonona tablo udi mu tshiena-bualu etshi mudibu baleje dishilangana dia ngenyi ditudi tupeta mu Efeso nshapita 4 ne 5. Paudi ubala dishilangana dia ngenyi dionso, ela meji ku nsombelu webe. Diebeje ne: ‘Mu bulelela, ndungenyi kayi luntu nalu? Ntshinyi tshintu ngenza mu nsombelu eu peshi wa muomumue nende? Nduseke kayi lua dishilangana dia ngenyi ludi bakuabu mua kuela meji ne: ke lundi?’ Dishilangana dia ngenyi kampanda diodi dikuambuluisha bua kumona muaba uudi mua kuakaja malu, dienzeja bua kutumikila biudi ulonga. Enza bua dishilangana dia ngenyi adi dikuambuluishe.

Peshi udi mua kuenza mudimu ne tablo eu mu ntendelelu wenu wa mu dîku. Tshia kumpala muena mu dîku yonso udi mua kubala dishilangana dia ngenyi dionso didi mu tablo. Pashishe, umue wa kunudi udi mua kutela malu adi mu tshitupa tshia kumpala tshia dishilangana dia ngenyi, ulekela bua bakuabu batete kuvuluka lungenyi ludi mu tshitupa tshibidi tshia dishilangana dia lungenyi ludiye mutele. Kuenza nunku kudi mua kunufikisha ku diyukidilangana dimpe mu dîku bua mushindu uudi mua kutumikila bimpe tshitupa tshibidi. Eyowa, kukonkonona dishilangana dia ngenyi mushindu eu kudi mua kuambuluisha bana ne bakulumpe bua kuikala ne ngikadilu ya buena Kristo mu dîku ne miaba mikuabu.

Paudi wenda umanya mushinga udi nawu dishilangana dia ngenyi, newikale uyijingulula bipepele mu Bible, ne udi mua kumona ne: idi ikuambuluisha bikole mu mudimu wa buena Kristo. Tshilejilu, udi mua kuambila muntu ne: “Bantu ba bungi batu bamba ne: muntu yonso utu ne anyima utu kayi ufua, kadi tangila tshidi Dîyi dia Nzambi diamba.” Peshi udi mua kuebeja mulongi wa Bible panudi nulonga ne: “Bantu ba bungi ba muaba utudi batu bitaba ne: Nzambi ne Yezu, mmuntu umue; kadi tudi bamone ne: Bible udi wamba tshinyi? Wewe udi wela meji kayi?”

Bulelela, mu Bible mutu dishilangana dia ngenyi ya bungi ya mushinga didi mua kutuambuluisha bua kuendela mu njila wa Nzambi. Tudi mua kukuata mudimu ne dishilangana dia ngenyi bua kuambuluisha bantu bakuabu bua kumanyabu bulelela bua mu Bible.