1. Leja dishilangana didi pankatshi pa mushindu utu bantu bamona bupika ne ebu budi Lomo 12:11 utulomba bua kuikala.

BUPIKA bua bena Kristo mbushilangane bikole ne mushindu utu bantu ba bungi bela meji bua bupika. Buabu bobu, mupika mmuntu udibu benzeja malu ne tshikisu, bakengesha ne benzela malu ne kansungasunga. Kadi Dîyi dia Nzambi difundisha ku nyuma didi diakula bua bupika budi bulomba kudifila ne muoyo mujima bua kuenzela Mfumu muimpe mudimu. Nunku Pavua mupostolo Paulo mudimuije bena Kristo ba bidimu lukama bia kumpala bua ‘kuenzela Yehowa mudimu bu bapika,’ uvua ubakankamija bua kuenza mudimu wa tshijila basaka kudi dinanga dia Nzambi. (Lomo 12:11) Kuikala mupika wa nunku kudi kulomba tshinyi? Mmunyi mutudi mua kubenga kulua bapika ba Satana ne ba bulongolodi buende? Ndifutu kayi ditudi tupeta patudi tuenzela Yehowa mudimu ne lulamatu bu bapika?

2. a) Ntshinyi tshivua mua kusaka mupika muena Isalele bua kubenga mpunga wa kupeta budikadidi? b) Kutubula ditshi dia muntu uvua musue kutungunuka ne kuikala mupika kuvua ne diumvuija kayi?

² Mikenji ivua Nzambi mupeshe bena Isalele idi itulongesha mushindu wa bupika udi Yehowa utulomba bua kuikala. Bavua bapesha mupika muena Ebelu budikadidi mu tshidimu tshia muanda mutekete tshia mudimu wende. (Ekes. 21:2) Kadi, Yehowa uvua mulongolole malu mu mushindu wa dikema bua mupika uvua munange mfumuende ne muoyo mujima ne musue bua kutungunuka ne kumuenzela mudimu. Mfumu uvua ne bua kuya ne mupika ku tshiibi anyi ku tshipanda tshia tshiibi ne kutubula ditshi diende ne tshiamu tshia kutubula natshi. (Ekes. 21:5, 6) Kutubula ditshi kuvua ne diumvuija kampanda. Bilondeshile tshiena Ebelu, ditumikila ndileja kudi muaku udi upetangana ne kuteleja ne kumvua. Muntu uvua musue kushala mupika uvua ne bua kutungunuka ne kuenzela mfumuende mudimu ne umutumikila. Bualu ebu budi butuambuluisha bua kumvua tshidi didilambula dietu kudi Yehowa diumvuija, mbuena kuamba ne: kutumikila  Nzambi ne muoyo mujima basaka kudi dinanga.

3. Tshidi tshitusaka bua kudilambula kudi Nzambi ntshinyi?

³ Patuvua badifile bua kutambula batismo, tukavua bangate dipangadika dia kuenzela Yehowa mudimu ne kuikala bapika bende. Dijinga dietu dia kutumikila Yehowa ne kuenza disua diende ke divua ditusake bua kudilambula kudiye. Muntu nansha umue kavua mutuenzeje bua kuenza nunku to. Nansha bana batu batambula anu pakadibu badilambule kudi Yehowa pa nkayabu kabiyi bua kusankisha baledi babu to. Didilambula dia bena Kristo ndimanyine pa dinanga ditudi nadi kudi Yehowa Mfumu wetu wa mu diulu. Mupostolo Yone wakafunda ne: “Dinanga dia Nzambi didi diumvuija ne: tutumikile mikenji yende.”​—1 Yone 5:3.

4. Bua kulua “bapika ba buakane” bidi bikengela tshinyi?

⁴ Tudi ne dianyisha kudi Yehowa bua mudiye muenze bua tuikale bapika bende. Ditabuja dietu mu mulambu wa Kristo udi upikula didi dituambuluisha bua kumbuka ku bupika bua bubi. Nansha mututshidi bena mibi, tudi bitabe bua kulua ku bukokeshi bua Yehowa ne Yezu. Paulo wakumvuija patoke bualu ebu mu umue wa ku mikanda yende mifundisha ku nyuma wamba ne: “Nudimone bu bafue bulelela pa bidi bitangila bubi, kadi bikale ne muoyo pa bidi bitangila Nzambi mu Kristo Yezu.” Pashishe wakadimuija wamba ne: “Kanuena bamanye ne: nuenu nutungunuka ne kudifila kudi muntu bua kumutumikila bu bapika, nudi bapika ba muntu unudi nutumikila au, bapika ba bubi bua kufua peshi bapika ba ditumikila bua kupeta buakane anyi? Tudi tuela Nzambi tuasakidila bualu kumpala nuvua bapika ba bubi, kadi nuakatumikila ne muoyo mujima tshilejilu tshia dilongesha divuabu banupeshe. Eyowa, bu muvuabu banupikule ku bubi, nuakalua bapika ba buakane.” (Lomo 6:11, 16-18) Mona ne: mupostolo udi wakula bua ‘kutumikila ne muoyo mujima.’ Bushuwa, kudilambula kudi Yehowa kudi kutuvuija “bapika ba buakane.”

5. Mmvita kayi itudi nayi bonso munda muetu? Bua tshinyi?

⁵ Nansha nanku, bua kukumbaja tshitudi badilambuile, tudi ne bua kutantamena ntatu. Tudi tuluangana mvita ibidi. Ya kumpala, nya buena ivua Paulo mupete. Wakafunda ne: “Ndi nsanka bua mikenji ya Nzambi bilondeshile tshindi munda muanyi, kadi ndi mmona mu mubidi wanyi mukenji mukuabu uluangana ne mukenji wa mu meji anyi, uya nanyi ku bupika bua mukenji wa bubi udi mu bitupa bia mubidi wanyi.” (Lomo 7:22, 23) Tuetu petu tudi bapiane bubi mu mubidi wetu. Nunku tudi ne bua kutungunuka ne kuluangana ne majinga etu a mubidi. Mupostolo Petelo udi utukankamija wamba ne: “Nuikale bu bantu badi ne budikadidi, kadi kanuyi nuangata budikadidi buenu bu tshibuikilu bua kuenza malu mabi to, kadi bu bapika ba Nzambi.”​—1 Pet. 2:16.

6, 7. Mmunyi mudi Satana wenza bua bulongolodi ebu bumueneke buimpe?

⁶ Kudi mvita mibidi itudi ne bua kutungunuka ne kuluangana ne bulongolodi ebu budi ku bukokeshi bua bademon. Satana udi mukokeshi wa bulongolodi ebu udi utukupa mikete ne tshipatshila tshia kunyanga muoyo wetu mutoke kudi Yehowa ne Yezu. Udi ukeba kutubueja mu bupika padiye utusaka bua kulonda buenzeji buende bubi. (Bala Efeso 6:11, 12.) Umue mushindu udi Satana wenza nunku, mpadiye uvuija bulongolodi buende bu tshintu tshimpe ne tshidi tshikoka. Mupostolo Yone udi utudimuija ne: “Muntu yeye munange buloba, dinanga dia Tatu kadiena munda muende; bualu bintu bionso bidi pa buloba​—majinga a mubidi, majinga a mêsu, ne didileja bua bintu bia mu nsombelu—​kabiena bifuma kudi Tatu, kadi bidi bifuma pa buloba.”​—1 Yone 2:15, 16.

⁷ Dijinga dia kuikala ne bintu bia bungi bia ku mubidi nditangalake. Satana udi usaka bantu ku ditaba ne: makuta ke adi apetesha disanka. Nzubu minene ya dipana dia bintu idi yenda ivula. Madisuisha adi atumbisha nsombelu wa kuikala ne bintu bia bungi ne kuikala ne masanka. Kumpanyi ya malu a ngendu idi ipesha bantu  mushindu wa kuenza ngendu bua kuya mu matunga makuabu pamue ne bantu badi ne lungenyi lua mu bulongolodi ebu. Malu adi matunyunguluke adi amueneka mimpe kutudi, kadi atu anu mimpe bilondeshile mmuenenu wa bulongolodi ebu.

8, 9. Nnjiwu kayi minene idiku? Bua tshinyi?

⁸ Petelo wakafila didimuija pavuaye muakule bua bena Kristo ba mu bidimu lukama bia kumpala bavua bitabe lungenyi lua pa buloba wamba ne: “Buabu bobu kusankisha mubidi nansha munda munya kudi kubasankisha. Badi matoba ne bilema, badi basanka mu malongesha abu a dishima padibu benza nenu bibilu bia disanka. Bualu badi bakula bua malu adi umvuika bu a mushinga, kadi mikale a tshianana. Badi benza mudimu ne majinga a mubidi ne bienzedi bibi bia dikamakama bua kukoka bantu batshidi banyemenaku benji ba malu mabi. Badi babalaya budikadidi pabu bobu bine bikale bapika ba dinyanguka. Bualu muntu udibu bapite bukole kudi mukuabu, mmupika wa muntu au.”​—2 Pet. 2:13, 18, 19.

⁹ Kusankisha “majinga a mêsu” kakutu kupetesha muntu budikadidi to. Kadi, kudi kumuvuija mupika wa Satana Diabolo, mukokeshi wa bulongolodi ebu udi kayi umueneka. (1 Yone 5:19) Kudi njiwu minene ya kuikala mupika wa bintu bia ku mubidi, bualu bitu bikole bua kusuluka ku bupika ebu.

10, 11. Mbanganyi lelu badi Satana utamba kuluisha? Mmunyi mudi tulasa tua mu bulongolodi ebu tubakebela lutatu?

¹⁰ Satana utu kabidi ukuata lelu bantu badi kabayi ne dimanya dia bungi anu muvuaye muenze mu budimi bua Edene. Bansonga ke batuye utamba kubunda. Satana katu usanka patu nsonga, anyi muntu yonso witaba ku budisuile bua kulua mupika wa Yehowa to. Muluishi wa Nzambi eu mmusue bua bantu bonso badi balambule mioyo yabu kudi Yehowa bajimije lulamatu ne muoyo wabu mutoke.

¹¹ Tupingane ku tshilejilu tshia mupika uvua muitabe bua bamutubule ditshi. Bivua mua kuanji kusama mupika eu bua tshitupa tshîpi, kadi kusama eku kuvua ne bua kujika lukasa kadi ushala ne tshimanyinu tshia kashidi tshia mudimu wende. Kusungula njila mushilangane ne udi bansonga bakuabu basungule kudi mua kuikala kukole, anyi mene kusama nsonga muena Kristo ku muoyo. Satana utu utumbisha lungenyi lua ne: kuenza mudimu mu ndongoluelu wende kudi mua kupetesha muntu disanka, kadi bena Kristo badi ne bua kumanya mushinga udi nawu dikumbaja majinga abu a mu nyuma. Yezu wakalongesha ne: “Badi bamanye ne: mbapele mu malu a mu nyuma mba diakalenga.” (Mat. 5:3) Bena Kristo badi badilambule kudi Nzambi badi benza disua diende, kadi ki ndia Satana to. Disanka diabu didi mu mikenji  ya Yehowa, ne badi belanganamu meji munya ne butuku. (Bala Musambu wa 1:1-3.) Kadi tulasa tua bungi lelu tutu tukepesha dîba didi batendeledi ba Yehowa nadi bua kuelangana meji ne kukumbaja majinga abu a mu nyuma.

12. Bansonga ba bungi batu badimona kumpala kua disungula kayi?

¹² Mukokeshi wa bulongolodi ebu udi mua kuenza bua nsombelu wa mupika muena Kristo alue mukole. Paulo wakebeja mu mukanda wa kumpala uvuaye mufundile bena Kolinto ne: “Uvua mubikidibue pauvua mupika anyi?” Pashishe kubabelaye ne: “Bualu ebu kabukutatshishi to; kadi wewe ne mushindu wa kupeta budikadidi, wenze nanku.” (1 Kol. 7:21) Bantu bavua mua kujinga budikadidi. Lelu mu matunga a bungi batu banzeja bantu bua kulonga too ne padibu bakumbaja bidimu bungi kampanda. Pashishe batu babapesha mpunga wa kusungula tshia kuenza. Kutungunuka ne kulonga tulasa kampanda bua kupeta mudimu mu bulongolodi ebu kudi mua kupangisha muntu budikadidi bua kuenza midimu ya pa buayi.​—Bala 1 Kolinto 7:23.

13. Ntulasa tua mushindu kayi tudi mua kuambuluisha bikole batendeledi ba Yehowa?

¹³ Paulo wakadimuija bena Kristo ba mu Kolosayi ne: “Nudimuke bua muntu nansha umue kanukuatshi ku bupika ne nkindi ne mashimi a patupu bilondeshile bilele bia bantu, bilondeshile malu a ku ntuadijilu a pa buloba, kabiyi bilondeshile Kristo.” (Kolos. 2:8) “Nkindi ne mashimi a patupu bilondeshile bilele bia bantu” bidi bimueneka patoke lelu mu meji a pa buloba adibu batumbisha kudi bantu ba bungi badi balonge tulasa tua bungi. Tulasa tua iniversite tutu misangu ya bungi tupetesha bantu badi batulonga dimanya dikese anyi mene kadiyi dikumbane, tubashiya kabayi balongolola bimpe bua kumanya tshia kuenza mu nsombelu. Kadi batendeledi ba Yehowa bobu badi basungula tulasa tudi tubambuluisha bua kupeta dimanya dikumbane diabambuluisha bua kuikala ne nsombelu mupepele ne kuenzela Nzambi mudimu. Badi bangata ne mushinga mubelu uvua Paulo mupeshe Timote eu: “Mu kuamba kuimpe, dilamata Nzambi didi ne dikuatshisha dinene bituikala tusanka ne bintu bitudi nabi. Nunku, bituikala ne biakudia ne bia kuvuala, tusanke ne bintu ebi.” (1 Tim. 6:6, 8) Pamutu pa bena Kristo balelela kujinga bua kupeta mapoloma ne mianzu mu bulongolodi ebu idi ne mêna abu, badi batuishila mêsu abu pa kupeta “mikanda ya kudimanyisha nayi” padibu benza ne muoyo mujima mudimu wa buambi.​—Bala 2 Kolinto 3:1-3.

14. Bilondeshile Filipoyi 3:8, mmunyi muvua Paulo mumone diakalenga diende dia kuenzela Nzambi ne Kristo mudimu bu mupika?

¹⁴ Tuangate tshilejilu tshia mupostolo Paulo.  Bavua bamulongeshe kudi Gamaliele mulongeshi wa Mikenji ya bena Yuda. Tudi mua kufuanyikija tulasa tuvua Paulo mulonge ne tua iniversite lelu. Kadi mmunyi muvua Paulo muangate tulasa etu pavuaye mutufuanyikije ne diakalenga diende dia kuenzela Nzambi ne Kristo mudimu bu mupika? Wakafunda ne: “Ndi ngangata bintu bionso bu bijimija bua mushinga mutambe bunene wa dimanya dia Kristo Yezu Mukalenge wanyi.” Wakasakidila kabidi ne: “Bua bualu buende ndi muitabe dijimija dia bintu bionso ne ndi mbiangata bu bintu bia kuimansha ku diala bua meme kupeta Kristo.” (Filip. 3:8) Mêyi ende aa adi ambuluisha bansonga bena Kristo ne baledi babu badi batshina Nzambi bua kuenza disungula dia meji bua bidi bitangila dilonga dia tulasa. (Tangila bimfuanyi.)

15, 16. Bulongolodi bua Yehowa mbutulongoluele tulasa kayi? Tulasa etu ntuimanyine pa tshinyi?

¹⁵ Mmalu kayi atu enzeka mu tulasa tua bungi tua mu bulongolodi ebu? Tulasa etu katutuku imue misangu tukebesha bimvundu mu malu a tshididi ne a mu nsombelu anyi? (Ef. 2:2) Kadi mu bulongolodi bua Yehowa mudi tulasa tutambe buimpe tutudi tulonga mu tshisumbu tshia bena Kristo tshidi mu ditalala. Yonso wa kutudi udi ne mushindu wa kubuela mu Kalasa ka Mudimu wa Nzambi lumingu luonso. Pashishe kudi tulasa tua pa buatu bua bana betu ba balume bampanda-njila batshidi bajike (Kalasa ka malu a mu Bible bua bana betu ba balume bajike) ne bua bana betu badi mu mabaka badi bampanda-njila (Kalasa ka malu a mu Bible bua bena dibaka). Tulasa tua malu a Nzambi etu tutu tutuambuluisha bua kutumikila Yehowa, Mfumu wetu wa mu diulu.

¹⁶ Bua kupeta dimanya dia bungi dia malu a Nzambi, tudi mua kuenza makebulula mu Index des publications Watch Tower anyi mu ditadi dia Watchtower Library. Dimanya ditudi tupeta ndimanyine pa ntendelelu wa Yehowa. Didi ditulongesha mushindu utudi mua kuambuluisha bantu bakuabu bua kulengejanganabu ne Nzambi. (2 Kol. 5:20) Kuenza nunku nekubambuluishe bua kulongeshabu pabu bantu bakuabu.​—2 Tim. 2:2.

17. Kusungula bua kulonga tulasa tutambe buimpe kudi kupetesha difutu kayi?

¹⁷ Bakela bapika babidi ba mu lusumuinu lua Yezu lua ntalanta bavua ne lulamatu kalumbandi ne kubuelabu mu disanka dia mfumuabu pavuaye mubapeshe mudimu wa bungi wa kuenza. (Bala Matayi 25:21, 23.) Kusungula bua kulonga kalasa katambe buimpe lelu kudi kupetesha masanka ne difutu. Tukonkonone tshilejilu tshia Michael. Uvua mulonge bimpe mu kalasa, ke balongeshi bende kumubikilabu mu tshisangilu bua kuyukilabu bua yeye kubuelaye mu iniversite. Kadi biakabakemesha pavua Michael musungule bua kulonga mu matuku makese kamudimu kavua mua kumuambuluisha bua kuenza mudimu wa bumpanda-njila bua pa tshibidilu. Udiku udiumvua bu mupangile tshintu anyi? Udi wamba ne: “Kalasa ka malu a Nzambi kandi mulonge bua mumvua mpanda-njila ne bua mundu mpindieu mukulu mu tshisumbu nkangambuluishe bikole. Masanka ne diakalenga bindi mupete mbipite kule menemene makuta amvua mua kuikala mupete. Ndi ne disanka dia bungi bua mumvua musungule bua kubenga kulonga tulasa tua iniversite.”

18. Tshidi tshikusaka wewe bua kusungula bua kulonga tulasa tutambe buimpe ntshinyi?

¹⁸ Tulasa tutambe buimpe tudi tutulongesha bua kumanya disua dia Nzambi ne tutuambuluisha bua kuenza mudimu bu bapika ba Yehowa. Tudi tututekela kumpala kuetu ditekemene dia kuikala ‘bapikudibue ku bupika bua dibola’ ne kupeta “budikadidi bua butumbi bua bana ba Nzambi.” (Lomo 8:21) Kupita bionso, tudi tulonga mushindu mutambe buimpe utudi mua kuleja mutudi banange bushuwa Yehowa, Mfumu wetu wa mu diulu.​—Ekes. 21:5.