Pavuabu bambile bampanda-njila kampanda babidi bua babuele mu nzubu kansanga mu Kenya, bakakema pakamonabu tshitumpampa tshia muntu tshilale pa bulalu. Uvua ne tshiadi tshikese menemene ne maboko a bitupa. Pavuabu bamuleje mulayi wa ne: ‘Muntu mulema neatumpike bu ngulungu,’ wakatua mimuemue bikole.​—Yesh. 35:6.

Bakambila bampanda-njila abu ne: Onesmus ukavua ne bidimu bipatshila ku makumi anayi, uvua muledibue ne disama didibu babikila ne: ostéogenèse imparfaite peshi disama dia mifuba mitekete. Mifuba yende ivua mitekete bikole mu mushindu wa ne: ivua mua kutshibuka nansha bua dinyungakana dikese. Bu mudiku kakuyi buanga bua disama edi, Onesmus uvua mutekemene bua kupitshisha matuku ende onso a muoyo mu dikenga ne mukalamine anu mu kakalu ka balema.

Onesmus wakitaba bua kulonga Bible. Kadi mamuende wakamubengela bua kubuela mu bisangilu bia bena Kristo wela meji ne: kuenza nunku kuvua mua kukolesha disama diende ne kumukengeshisha kabidi bikole. Nunku bana betu bakavua bakuatshila Onesmus bisangilu mu bande ne ulua kubitelejila ku nzubu. Panyima pa Onesmus mumane kulonga munkatshi mua ngondo itanu, wakangata dipangadika dia kubuela mu bisangilu nansha muvuabi mua kumukebela ntatu.

Kadi kubuela kua mu bisangilu kuvuaku kukoleshe disama diende anyi? Malu avua menzeke mu mushindu mukuabu. Onesmus udi uvuluka wamba ne: “Mvua ngumvua bintu bivua binsama pa tshibidilu bu bivua bikepela pamvua mu bisangilu.” Wakela meji ne: ditekemena dipiadipia divuaye mupete ke divua dienza bua adiumvue bimpe. Mamuende wa Onesmus wakamona muvua tshimuenekelu tshia muanende tshishintuluke ne uvua ne disanka dia bungi, kumusakadi too ne bua kuitaba dilonga dia Bible. Wakamba ne: “Kuenzela Nzambi mudimu ke luondapu lua muananyi.”

Panyima pa matuku, Onesmus wakalua muambi wa lumu luimpe uvua kayi muanji kutambula. Pakapita matuku wakatambula ne udi mpindieu musadidi wa mudimu. Nansha mudi Onesmus kayi mua kunyungisha mikolo ne diboko dimue, uvua ne dijinga dia kuenzela Yehowa mudimu ne muende muonso. Uvua musue kulua mpanda-njila muambuluishi kadi uvua welakana bua kuwuja formilere. Bua tshinyi? Bualu uvua mumanye ne: bivua bikengela ikale ne muntu ku luseke dîba dionso uvua mua kumupusa mu kakalu kende. Pakalejaye bena Kristo nende dijinga diende, bakamulaya bua kumuambuluisha. Ke tshiakenzabu, bakambuluisha Onesmus bua kuenzaye bumpanda-njila buambuluishi.

Bua Onesmus kukumbajaye dijinga diende dia kulua mpanda-njila wa pa tshibidilu, bivua bikengela bua ikale kabidi ne muntu wa kumupusa. Kadi, mvese wa dituku kampanda wakamupesha dikankamija divuaye nadi dijinga. Mvese eu uvua Musambu wa 34:8 udi wamba ne: ‘Teta, ulabule, umvue ne: Yehowa udi muakane.’ Panyima pa Onesmus mumane kuelangana meji bua mvese eu, wakangata dipangadika dia kulua mpanda-njila wa pa tshibidilu. Udi mpindieu uyisha matuku anayi ku lumingu ne udi ne balongi ba Bible ba bungi badi baya kumpala mu nyuma. Mu 2010, wakabuela mu Kalasa ka Bampanda-njila. Onesmus wakasanka bikole pakamonaye ne: mulongeshi wende wa mu kalasa uvua umue wa ku bana betu babidi bavua balue kumuyisha bua musangu wa kumpala.

Baledi ba Onesmus bakadi bafue kadi, bana betu ba balume ne ba bakaji ba mu tshisumbu badi bamukumbajila majinga ende dituku dionso. Udi ne dianyisha bua mabenesha onso adiye nawu mpindieu ne mmuindile ne muoyo mujima dituku dikala ‘muena musoko kayi wamba ne: ndi ne disama.’​—Yesh. 33:24.