1, 2. Bua tshinyi mashimi mmavule lelu? Mmushindu kayi udibu baamuangalaja? (Tangila tshimfuanyi.)

KUMUANGALAJA malu a dishima, kuibila ne kushima, mmalu adi matangalake mu ndongoluelu eu. Bualu ebu kabuena ne bua kutukemesha to. Bible udi uleja patoke ne: Satana Diabolo mmushimianganyi munene ne yeye ke mukokeshi wa ndongoluelu eu. (1 Tim. 2:14; 1 Yone 5:19) Bu mutudi tuenda tusemena ku nshikidilu kua ndongoluelu mubi eu, tshiji tshia Satana tshidi tshienda tshikola bualu nkumushadile anu “tshikondo tshîpi.” (Buak. 12:12) Nunku tudi batekemene ne: bantu badi Diabolo ulombola nebavudije mashimi nangananga bua bantu badi batua ntendelelu mulelela nyama ku mikolo.

² Batu imue misangu bamuangalaja malu a dishima atubu bamba bua batendeledi ba Yehowa ne bua malu adibu bitabuja ku bisanji. Batu bakuata mudimu ne bikandakanda, ndongamu ya ku televizion ne Enternete bua kumuangalaja malu a dishima. Bua bualu ebu bamue bantu batu bapanga tshia kuenza ne bitabakana mashimi a mushindu eu.

3. Tshidi mua kutuambuluisha bua kukandamena mashimi ntshinyi?

³ Bua kukandamena mayele adi muluishi wetu ukuata nawu mudimu bua kututekesha nawu mu mikolo aa, tudi ne dianyisha bua mutudi ne Dîyi dia Nzambi didi “diambuluisha . . . bua kululamija malu.” (2 Tim. 3:16) Mbia mushinga bua tuetu kupetela dilongesha mu mêyi avua mupostolo Paulo mufunde avua aleja muvua bamue bena Kristo ba mu bidimu lukama bia kumpala badingibue ne bitabe malu a dishima. Wakabadimuija bua kubenga ‘kunyungishibua mu meji abu lukasa.’ (2 Tes. 2:1, 2) Didimuija dia Paulo edi didi mua kutulongesha tshinyi? Mmushindu kayi utudi mua kutumikila malu aa mu nsombelu wetu?

4. Mmunyi muvuabu badimuije bena Kristo ba mu Tesalonike bua dilua dia “dituku dia Yehowa”? Mmunyi mudibu batudimuija petu lelu?

⁴ Mu mukanda wa kumpala uvua mupostolo Paulo mufundile  tshisumbu tshia mu Tesalonike, wakakoka ntema yabu ku dilua dia “dituku dia Yehowa.” Kavua musue bua bena Kristo nende kuikalabu mu mîdima ne kabayi badilongolole to. Kadi wakabadimuija bu “bana ba butoke” bua ‘kushala batabale ne kulama bieledi biabu bia meji bimpe.’ (Bala 1 Tesalonike 5:1-6.) Lelu, tudi bindile kabutu ka Babilona munene udi nsangilu wa bitendelelu bia dishima. Kabutu aka ke kikala ntuadijilu wa dituku dinene dia Yehowa. Tudi ne dianyisha bualu tudi bavudije dimanya bua malu adi Yehowa wenda wenza bua kukumbaja disua diende. Kabidi, ku diambuluisha dia tshisumbu, tutu tupeta mavuluija pa dîba diawu adi atuambuluisha bua kulama bimpe bieledi bietu bia meji. Kuangata malu adibu batuvuluija misangu ne misangu aa ne mushinga kudi mua kukolesha dipangadika dietu dia kuenzela Nzambi ‘mudimu wa tshijila muenza ne tshieledi tshietu tshia meji.’​—Lomo 12:1.

5, 6. a) Ntshinyi tshivua Paulo muambe mu mukanda muibidi uvuaye mufundile bena Tesalonike? b) Ntshinyi tshienza Nzambi mu katupa kîpi emu ku diambuluisha dia Yezu? Nnkonko kayi itudi ne bua kudiela?

⁵ Matuku makese panyima pa Paulo mumane kutumina bena Kristo ba mu Tesalonike mukanda wende wa kumpala, wakabatumina muibidi. Mu mukanda eu, wakakoka ntema yabu ku dilua dia dikenga pikala Mukalenge Yezu mua kulua kulumbuluisha “badi kabayi bamanye Nzambi ne badi kabayi batumikila lumu luimpe.” (2 Tes. 1:6-8) Ke bualu kayi nshapita muibidi wa mukanda eu udi uleja ne: bamue bantu mu tshisumbu bavua ‘batatshishibue’ bua dituku dia Yehowa bafike too ne ku ditaba ne: dikavua pabuipi. (Bala 2 Tesalonike 2:1, 2.) Bena Kristo ba kumpala aba bavua ne dimanya dikese dia malu avua Yehowa mulongolole bua kuenza, anu muvua Paulo mulue kuamba pashishe bua milayi ne: “Tudi bamanye anu tshitupa ne tudi tuamba anu tshitupa tshia mêyi a buprofete; kadi palua tshidi tshijima, tshia tshitupa netshijimine.” (1 Kol. 13:9, 10) Kadi malu avua Paulo, Petelo ne bakuabu bena Kristo bela manyi ba lulamatu ba mu tshikondo atshi bafunde ku bukole bua nyuma muimpe avua mua kubalama bua kushalabu ne ditabuja.

⁶ Bua kululamija malu, Paulo wakumvuija ku diambuluisha dia nyuma muimpe ne: butontolodi bukole ne “mushipi wa mikenji” bivua ne bua kumueneka kumpala kua dilua dia dituku dia Yehowa. * Pashishe, pavua tshikondo ne  bua kukumbana, Mukalenge Yezu uvua ne bua kuvuija bantu bonso bavuabu bashime “tshintu tshia tshianana.” Mupostolo wakaleja bua tshinyi bavua ne bua kulumbuluisha bantu aba: mbualu “kabavua bitabe dinanga dia bulelela.” (2 Tes. 2:3, 8-10) Mbimpe tudiebeje ne: ‘Ndiku munange bulelela ne muoyo wanyi mujima anyi? Ndiku ne ngumvuilu mupiamupia wa malu udibu baleje mu bibejibeji ne mu mikanda idi yumvuija Bible bidibu bapatula bua tshisumbu tshia bantu ba Nzambi tshia mu buloba bujima anyi?’

7, 8. a) Bena Kristo ba kumpala bavua ne bua kukandamena njiwu kayi? b) Nnjiwu kayi minene idi nayi bena Kristo balelela lelu?

⁷ Bushuwa bena Kristo badi mua kupeta ntatu mikuabu pa kumbusha ya kudi batontolodi ne malongesha abu. Paulo wakafundila Timote ne: “Dinanga dia makuta didi muji wa malu mabi a mishindu yonso.” Mupostolo wakaleja ne: “Bua dipatshila dinanga edi, bamue bantu mbasesuke kule ne ditabuja ne mbadisunsule mubidi mujima ne tunyinganyinga tua bungi.” (1 Tim. 6:10) “Malu adi mubidi wenza” avua pawu mua kuikala njiwu misangu yonso.​—Gal. 5:19-21.

⁸ Kadi, udi mua kuanyisha bua muvua Paulo mudimuije ne muoyo mujima bena Kristo ba mu Tesalonike bua ntatu ivua bantu bavuaye mubikile muaba mukuabu ne: “bapostolo ba dishima” mua kubakebela. Munkatshi muabu muvua bantu bavua “bakula malu makonyangale bua kukoka bayidi mu nyima muabu.” (2 Kol. 11:4, 13; Bien. 20:30) Yezu wakalua kuela bena mu tshisumbu tshia Efeso kalumbandi bualu kabavua ‘banyisha bantu babi’ to. Bena mu Efeso abu bavua ‘batete’ bantu bavua bushuwa bapostolo ba dishima ne bena dishima. (Buak. 2:2) Bia disanka, mu mukanda muibidi uvua Paulo mufundile bena Tesalonike wakafila didimuija edi: “Mpindieu bana betu, tudi tunuambila tshia kuenza mu dîna dia Mukalenge Yezu Kristo ne: nuepuke muanetu yonso udi kayi wenda mu bulongame.” Pashishe, wakaleja patoke bena Kristo bavua ‘kabayi basue kuenza mudimu.’ (2 Tes. 3:6, 10) Kadi bikalaye wamba bantu aba mudibu kabayi benda mu bulongame, netuambe tshinyi bua aba bavua batenkakana kumpala kua butontolodi? Bushuwa, kudia bulunda ne bantu ba mushindu eu mu tshikondo atshi kuvua njiwu minene ivua ikengela kuepuka, ke mudibi kabidi lelu.​—Nsu. 13:20.

9. Bua tshinyi tudi ne bua kuikala badimuke padi muntu kampanda utuadija kuamba malu a dishima anyi kuakula mu mushindu mubi?

⁹ Tukadi pabuipi ne dibudika dia dikenga dinene ne dilua dia nshikidilu wa ndongoluelu mubi wa malu eu, nunku madimuija mafundisha ku nyuma wa Nzambi avuabu bafile mu bidimu lukama bia kumpala aa adi ne mushinga wa bungi. Katuena basue “kupangila tshipatshila” tshia ngasa wa Yehowa ne kujimija mulayi wa muoyo wa tshiendelele mu diulu anyi pa buloba to. (2 Kol. 6:1) Bikala muntu kayi yonso udi ubuela mu bisangilu bietu uteta kutubueja mu biyukiyuki bia malu adi bantu batushiminyina anyi mu miyuki ya batontolodi, tudi ne bua kuikala badimuke.​—2 Tes. 3:13-15.

10. Bavua balombe bena Kristo ba mu Tesalonike bua kulonda bilele kayi?

¹⁰ Paulo uvua mubele bena Kristo ba mu Tesalonike bua ‘kushindama’ ne kulamata malu avuabu balonge. (Bala 2 Tesalonike 2:15.) ‘Mbilele’ kayi bivuabu babalongeshe? Bushuwa ki ngebi bivuabu balonge mu ntendelelu wa dishima bivuabu bangata ne mushinga anu bu ebi bidi mu Mifundu to. Kadi Paulo uvua wakula bua malongesha avuaye yeye ne bakuabu bapetele kudi Yezu ne aa avua Nzambi musake bapostolo bua kuamba. A bungi a kudiwu akalua tshitupa tshia Mifundu minsantu. Paulo wakela bena Kristo nende ba mu tshisumbu tshia mu Kolinto kalumbandi bualu wakabafundila wamba ne: “Nudi numvuluka mu malu onso, ne nudi balamate bilele anu mumvua munushilabi.”  (1 Kol. 11:2) Malongesha aa avua mafumine muaba muimpe ne avua bushuwa a kueyemena.

11. Mmu mishindu kayi mudi bamue bantu mua kukuatshika ku buteyi bua mashimi?

¹¹ Pavua Paulo mufundile bena Ebelu, wakakoka ntema yabu ku mishindu ibidi idi muena Kristo mua kujimija ditabuja ne kupangila bua kuikala mushindame. (Bala Ebelu 2:1; 3:12.) Wakakula bua ‘kupambuka’ ne bua ‘kuya kule.’ Kabitu bipepele bua kumona padi buatu buditukila ku muelelu wa mâyi to. Budi mua kumbuka ku muelelu wa mâyi ku kakese ku kakese. Ku lukuabu luseke, muntu udi mua kumbusha buatu buende ku muelelu, ubusemeja kule ne dilobo. Malu onso abidi aa adi aleja bimpe nsombelu wa bamue bantu badi bakuluka mu buteyi bua mashimi ne balekela dieyemena diabu dia bulelela dikepela.

12. Mmalu kayi a lelu adi mua kunyanga malanda a muntu ne Nzambi?

¹² Ke muvuabi mua kuikala bua bamue bena mu Tesalonike. Netuambe tshinyi bua lelu? Malu adi ajimija dîba adi enda avula. Ela meji bua bungi bua mêba adi muntu upitshisha bua kupetangana ku Enternete ne bantu, kubala ne kuandamuna mesaje, kujikija lutetuku mu mushindu mubi peshi kukeba bua kumanya malu mapiamapia adi atangila malu a manaya. Malu onso atudi batele aa adi mua kushiya muena Kristo mu ditanaji ne kukepesha tshisumi tshiende. Mbipeta kayi bidi mua kumueneka? Udi mua kupanga mua kuenza masambila ne muoyo mujima, kulonga Dîyi dia Nzambi, kubuela mu bisangilu ne kuyisha lumu luimpe. Ntshinyi tshitudi mua kuenza bua kubenga kunyungishibua ne lukasa mu meji etu?

13. Anu mukavuabu bamanyishe, bantu ba bungi lelu badi ne lungenyi kayi? Tshiatuambuluisha bua ditabuja dietu kadinyanguki ntshinyi?

¹³ Tshintu tshimuepele tshitudi ne bua kuenza, nkushala batabale bua kumanya tshikondo tshitudi ne kumanya tshidi kudia bulunda ne bantu badi babenga kuitaba ne: tudi mu “matuku a ku nshikidilu” mua kutuenzela. Mupostolo Petelo wakafunda bua tshikondo tshitudi etshi ne: “Baseki nebalue ne tuseku tuabu, benza malu bilondeshile majinga abu nkayabu bamba ne: ‘Dikalaku diende divuabu balaye didi kuepi? Bualu katshia dituku divua bankambua betu balale tulu mu lufu, malu onso adi atungunuka ne kuikala anu muomumue kumbukila ku ntuadijilu kua bufuki.’” (2 Pet. 3:3, 4) Kubala Dîyi dia Nzambi dituku dionso ne kuikala ne tshibidilu tshia kudilonga nekutuambuluishe bua kumanya muaba utudi mu tshikondo etshi tshikole, bituambuluisha bua kumanya ne: tudi mu “matuku a ku nshikidilu.” Butontolodi bukavuabu bamanyishe bukadi bumueneke kukadi matuku a bungi ne butshidi butungunuka too ne lelu. “Mushipi wa mikenji” udi utungunuka ne kuikalaku ne udi uluisha batendeledi ba Nzambi. Nunku, tudi ne bua kushala anu batabale bu mukadi dituku dia Yehowa disamene pabuipi menemene.​—Sef. 1:7.

14. Mmunyi mudi kuditua mu dienza mudimu wa Nzambi kuikale bukubi?

¹⁴ Malu akadi menzeke mmaleje ne: mushindu munene udi muntu mua kushala mutabale ne kubenga kunyungishibua mu meji, nkuikala ne tshibidilu tshia kuyisha lumu luimpe lua Bukalenge. Nunku, pavua Yezu Kristo udi Mutu wa tshisumbu mutume bayidi bende bua kuvuija bantu ba mu bisamba bionso bayidi, kubalongesha mua kutumikila malu onso avuaye mubalongeshe, tshivua mubelu uvua mua kukuba bayidi bende. (Mat. 28:19, 20) Kulonda bulombodi buende kudi kulomba bua tuikale ne tshisumi mu mudimu wa diyisha. Udiku wela meji ne: bena Kristo nebe ba mu Tesalonike bavua mua kuikala bayisha ne balongesha pa mutu pa mutu bienze bu ne: uvua mudimu wa patupu anyi? Vuluka mêyi avua Paulo mubambile aa: “Kanujimi kapia ka nyuma. Kanupetudi mêyi a buprofete.” (1 Tes. 5:19, 20) Mêyi mimpe  a buprofete aa ngatudi tulonga ne tuambila bantu bakuabu.

15. Mmalu kayi a mushinga atudi mua kukonkonona mu ntendelelu wa mu dîku?

¹⁵ Bushuwa, tudi basue kuambuluisha bena mêku etu bua kuikalabu bukumbane bua kuenza mudimu wa buambi. Bena Kristo netu ba bungi mbamone ne: mushindu umue wa kuenza nunku, nkuakula bua mudimu eu mu ntendelelu wabu wa mu dîku. Nudi mua kumona ne: mbimpe kuleja mudi bena mu dîku mua kupinganyina bantu bavua babateleje mu buambi. Ntshinyi tshidibu mua kuamba padibu babapinganyina? Mbiena-bualu kayi bikala mua kusankisha bantu batudi tuya kutangila? Ndîba kayi ditudi mua kubapinganyina? Bana betu ba bungi batu bangata ndambu wa dîba mu ntendelelu wabu wa mu dîku bua kulonga malu a mu bisangilu bia tshisumbu bua bikale bamanye malu ikalabu mua kukonkonona mu bisangilu abi. Udiku mua kudilongolola bikole bua kuandamuna mu bisangilu anyi? Mandamuna audi ufila neakoleshe ditabuja diebe ne neakuambuluishe bua kubenga kunyungishibua mu meji ebe. (Mus. 35:18) Eyowa, kuenza ntendelelu wa mu dîku nekutukube ku mashimi adi matangalake ne ku dielakana.

16. Ntshinyi tshidi tshisaka bena Kristo bela manyi bua kulamabu bieledi biabu bia meji?

¹⁶ Patudi tuela meji bua mushindu udi Yehowa mubeneshe bantu bende mu bidimu bishale padiye mubambuluishe bua kumvua bimpe mulayi wa buprofete wa mu Bible, tudi mua kumanya difutu dinene didi dituindile kumpala eku. Bela manyi badi ne ditekemena bua kupetangana ne Kristo mu diulu. Ebu mbualu budi bubakankamija bua kulamabu bieledi biabu bia meji. Tudi mua kuamba ne dishindika ne: mêyi avua Paulo mufundile bena Tesalonike aa adi abakumbanyina: ‘Tudi benzejibue misangu yonso bua kuela Nzambi tuasakidila bua bualu buenu, bualu Nzambi uvua munusungule, munuvuije ba tshijila ne nyuma wende ne ku ditabuja dienu mu bulelela.’​—2 Tes. 2:13.

17. Ndikankamija kayi diudi mupete mu mêyi adi mu 2 Tesalonike 3:1-5?

¹⁷ Aba bonso badi bindile bua kupeta muoyo wa tshiendelele pa buloba badi pabu ne bua kudienzeja bua kubenga kunyungishibua ne lukasa mu meji abu. Biwikala ne ditekemena dia muoyo pa buloba, lama mu lungenyi dikankamija divua Paulo mufundile bena Kristo nende bela manyi ba mu Tesalonike. (Bala 2 Tesalonike 3:1-5.) Buonso buetu tudi ne bua kuanyisha ne muoyo mujima mibelu mimpe eyi. Bushuwa, mikanda ivua Paulo mufundile bena Tesalonike ivua ne madimuija a mushinga bua mashimi adibu batangalaja anyi bua malu adi afila dielakana. Bu mutukadi basemene ku nshikidilu, aa mmadimuija adi bena Kristo lelu bangata ne mushinga wa bungi.