Dibala dia bibejibeji bia Tshibumba tshia Nsentedi bishale ebi divua dikusankishe anyi? Nanku, anji tangila ni udi mua kuandamuna nkonko idi ilonda eyi:

Ndîba kayi divua Yezu muye “kuyisha nyuma ivua mu buloko”? (1 Pet. 3:19)

Bidi bimueneka ne: katupa kîpi panyima pa Yezu mumane kubiika ku lufu, wakamanyisha nyuma mibi ne: ivua ne bua kupeta dinyoka divua diyikumbanyine.​—15/6, dibeji dia 23.

Ntatu kayi isatu idi muntu bua kupeta mu dibaka diende dibidi?

Nyoyi eyi: mbikole bua kupua muoyo dibaka dia kumpala ne kuangata dipiadipia ne mushinga; mbikole bua kukosa malanda ne balunda bebe ba kumpala bavua bibidilangane ne muena dibaka nebe wa kumpala badi kabayi bibidilangane ne muena dibaka muibidi; mbikole bua kueyemena muena dibaka nebe mupiamupia bikala wa kumpala uvua mua kuikala kayi wa kueyemena.​—1/7, dibeji dia 9-10.

Ndîba kayi didi Yezu utapulula bantu bu mikoko ne mbuji? (Mat. 25:32)

Nebikale munkatshi mua dikenga dinene padi Yezu ulua bua kulumbuluisha bantu panyima pa dibutuka dia bitendelelu bia dishima.​—15/7, dibeji 6.

Ndîba kayi dikala benji ba malu mabi badi mu lusumuinu lua Yezu lua mponda ne lupela mua kudila ne kusumakaja menu? (Mat. 13:36, 41, 42)

Nebenze nunku munkatshi mua dikenga dinene pamanyabu ne: kakuena mushindu wa buobu kupanduka ku kabutu to.​—15/7, dibeji dia 13.

Ndîba kayi didi mêyi a Yezu adi akula bua mupika wa lulamatu udi mudimuke akumbana? (Mat. 24:45-47)

Akatuadija kukumbana mu 1914, kadi ki mmu Pentekoste wa mu 33 to. Mu 1919 bakateka mupika ku mutu kua bena mudimu, mu bena mudimu emu mudi bena Kristo bonso badibu badisha mu nyuma.​—15/7, dibeji dia 21-23.

Ndîba kayi didi Yezu uteka mupika wa lulamatu ku mutu kua bintu biende bionso?

Bualu ebu nebuenzeke mu matuku atshilualua munkatshi mu dikenga dinene padi mupika wa lulamatu upeta difutu diende mu diulu.​—15/7, dibeji dia 25.

Bible kena utela mêna a bamue bantu bualu bavua bantu babi anyi kabayi ne mushinga anyi?

Katuena anu mua kuamba nanku to. Bible ki mmutele mêna a bamue bantu bimpe ne a bakuabu bavua bantu babi to. (Luta 4:1-3; Mat. 26:18) Bible udi utela mêna a banjelu ba lulamatu anu babidi patupu.​—1/8, dibeji dia 10.

Pa kumbusha bukole bua kudi Nzambi, ntshinyi tshivua tshiambuluishe Bantemu 230 ba mu buloko bua mu Sachsenhausen bua kupanda mu luendu lule?

Nansha muvuabu batshioke bua nzala ne masama. Bakatungunuka ne kukankamijangana bua kutungunuka ne luendu.​—15/8, dibeji dia 18.

Bua tshinyi muyuki wa bena Isalele wa disabuka musulu wa Yadene ne kubuela mu buloba bulaya udi utukankamija?

Nansha muvua mâyi muule, Yehowa wakaimanyika bua bantu bende kusabukabu. Bualu ebu buvua ne bua kuikala bukoleshe ditabuja ne dieyemena diabu kudi Yehowa, ne muyuki eu udi mua kutukolesha petu.​—15/9, dibeji dia 16.

Mushindu udi Bible utamba kuenza mudimu ne mekala udi uleja tshinyi?

Mushindu udi Bible wenza mudimu ne mekala udi uleja ne: Nzambi mmumanye ne: mekala adi mua kujula bantu dijinga kampanda ne adi mua kutuambuluisha bua kuvuka malu.​—1/10, dibeji dia 14-15.

Mmunyi mudi mulayi wa buprofete udi mu Mika 5:5 udi wakula bua bakokeshi ne balami ba mikoko ukumbana lelu?

Tudi tumvua ne: “balami ba mikoko muanda mutekete ne bakokeshi muanda mukulu” badibu batele mu Mika 5:5 badi baleja bakulu badi mu tshisumbu badi bakolesha bantu ba Nzambi bua mvita ikavuabu bamanyishe yabelabu mu matuku atshilualua.​—15/11, dibeji dia 20.

Ngamue malu kayi adi enza bua tuikale dijinga ne Nzambi?

Tudi dijinga ne bulombodi buimpe ne mushindu wa kujikija ntatu ya mu nsombelu, mmalu atudi tupetela kudi Nzambi. Udi utuleja mushindu wa kuikala ne nsombelu muimpe ne wa disanka, ne neakumbaje milayi idi mu Dîyi diende bua tuetu kupeta nsombelu eu.​—1/12, dibeji 4-6.