1. Bu mutudi bafukibue ku tshimfuanyi tshia Nzambi, tudi ne bukole bua kuenza tshinyi?

BANTU batu bamba ne: “Nkashama katu ulela munga nyama.” Bushuwa, bana ba bungi batu bafuana baledi babu bikole. Kadi, tatu ne mamu batu basambulujila bana babu ngikadilu yabu. Yehowa Tatu wetu wa mu diulu ke Mufidi wa muoyo. (Mus. 36:9) Bu mutudi bana bende, tudi bamufuane ku amue malu. Bu mudibu batufuke ku tshimfuanyi tshiende, tudi ne bukole bua kuela meji, kuangata mapangadika, kukolesha bulunda buetu ne kubulama.​—Gen. 1:26.

2. Mmalu kayi adi enza bua Yehowa alue Mulunda wetu?

² Yehowa udi mua kulua Mulunda wetu wa pa muoyo. Mushindu udi Nzambi mutunange ne ditabuja dietu kudiye ne kudi Muanende ke bidi bienza bua tudie bulunda bua nunku. Yezu wakamba ne: “Bu muvua Nzambi munange ba pa buloba bikole menemene, wakabapesha Muanende mulela umuepele bua muntu yonso udi uleja ditabuja kudiye kafu, kadi ikale ne muoyo wa tshiendelele.” (Yone 3:16) Kudi bilejilu bia bungi bia bantu bavua badie bulunda bukole ne Yehowa. Tukonkononayi bilejilu bibidi.

3, 4. Leja dishilangana didi pankatshi pa Abalahama ne ndelanganyi yende bua bidi bitangila bulunda ne Yehowa.

³ Yehowa wakabikila nkambua wa bena Isalele ne: “Abalahama  mulunda wanyi.” (Yesh. 41:8) 2 Kulondolola 20:7 udi ubikila pende Abalahama ne: mulunda wa Nzambi. Ntshinyi tshivua tshienze bua Abalahama, muntu uvua ne lulamatu eu kulamaye bulunda ne Mufuki wende? Nditabuja diende.​—Gen. 15:6; bala Yakobo 2:21-23.

⁴ Yehowa uvua Tatu ne Mulunda wa ndelanganyi ya Abalahama yakalua tshisamba tshia Isalele wa kale. Bia dibungama, bakashipa bulunda buabu ne Nzambi. Bua tshinyi? Bualu bavua bapangile bua kuleja ditabuja mu milayi ya Yehowa.

5, 6. a) Mmunyi muvua Yehowa mulue Mulunda webe? b) Tudi mua kudiela nkonko kayi?

⁵ Patudi tulonga malu adi atangila Yehowa, ditabuja ne dinanga dietu kudiye bidi bikola. Elabi meji bua tshikondo tshiwakamanya ne: Nzambi mmuntu mulelela, utudi mua kudia nende bulunda. Wakalonga ne: tuetu bonso tudi baledibue mu bubi bualu Adama uvua mubenge kutumikila. Wakamanya kabidi ne: bantu mu tshibungi badi kule ne Nzambi. (Kolos. 1:21) Pashishe wakalua kumona ne: Tatu wetu wa mu diulu udi pabuipi netu ne udi uditatshisha bua bualu buetu. Patuvua balonge bua mulambu wa Yezu udi upikula ne baleje ditabuja mu mulambu eu, tuakatuadija kudia bulunda ne Nzambi.

⁶ Patudi tutangila panyima, tudi mua kudiebeja ne: ‘Ndiku ngenda nkolesha bulunda buanyi ne Nzambi anyi? Ndiku mumueyemene bikole anyi? Dinanga dindi munange Yehowa Mulunda wanyi munene didiku dienda dikola dituku dionso anyi?’ Muntu mukuabu wa kale uvua mudie bulunda ne Yehowa uvua Gideona. Tukonkononayi mpindieu tshilejilu tshiende tshimpe ne tumone muditshi tshituambuluisha.

7-9. a) Mbualu kayi bua pa buabu buvua bufikile Gideona? Buakapatula bipeta kayi? (Tangila tshimfuanyi tshia ntuadijilu.) b) Ntshinyi tshitudi mua kuenza bua kudia bulunda ne Yehowa?

⁷ Gideona uvua mulumbuluishi ne uvua muenzele Yehowa mudimu mu tshikondo tshivua Isalele mu nsombelu mukole panyima pa dibuela diabu mu Buloba bulaya. Mukanda wa Balumbuluishi nshapita 6 udi ulonda muvua muanjelu wa Yehowa mumuenekele Gideona ku Ofela. Tshikondo atshi, bena Midiyana bavua bateke bena Isalele mu njiwu minene bu muvuabu bena mutumba. Ke bua tshinyi, Gideona kavua ushipuila mponda mu budimi to, kadi mu tshikaminu tshia mvinyo, muaba uvuaye mua kusokoka ntete mimpe ne lukasa. Bu muvua Gideona ukema bua muvua muanjelu mumumuenekele ne mumubikile ne: ‘muntu wa bukitu,’ wakebeja bikala Yehowa uvua musungile bena Isalele mu Ejipitu mua kubambuluisha bushuwa. Bu muvua muanjelu wakula mu dîna dia Mufuki, wakamujadikila ne: Yehowa uvua ne bua kumuambuluisha.

⁸ Gideona wakajinga bua kumanya muvuaye mua ‘kusungila bena Isalele mu bianza bia bena Midiyana.’ Bakamupesha diandamuna ditoke. Yehowa wakamuambila ne: ‘Meme nengikale nebe, ne wewe neushipe bena Midiyana bu muntu umue.’ (Bal. 6:11-16) Bu mutshivua Gideona ujinga kumanya muvua bualu ebu mua kuenzeka, wakalomba tshimanyinu. Mona ne: mu muyuki eu Gideona kavua muele mpata wamba ne: Yehowa ki mMuntu mulelela to.

⁹ Ntshinyi tshiakalua kuenzeka tshivua tshikoleshe ditabuja dia Gideona ne tshimusemeje pabuipi ne Nzambi? Gideona wakalongolola biakudia ne kubipeshaye muanjelu. Pavua biakudia bioshike mu tshishima bua muvua muanjelu mutuamu lusongo lua mulangala, Gideona wakajadika ne: muanjelu au uvua muleji-mpala wa Yehowa. Gideona wakamba ne buôwa ne: ‘Aka, Mukalenge Yehowa! Bualu bua ngakumonangana ne muanjelu wa Yehowa mpala ne mpala.’ (Bal. 6:17-22) Kadi bualu ebu buvuaku busemeje Gideona kule ne Nzambi anyi? Nansha kakese. Malu akenzeka mu mushindu mukuabu. Gideona wakalua kumanya Yehowa mu mushindu wakenza bua bikale nende mu ditalala. Tudi tuamba nanku bilondeshile  dîna divuabu binyike tshioshelu tshivua Gideona muase muaba au dia ne: “Yehowa-Shaloma.” Dîna edi didi diumvuija ne: Yehowa udi ditalala. (Bala Balumbuluishi 6:23, 24.) Patudi tuela meji bua malu adi Yehowa utuenzela dituku dionso, tudi tumona ne: udi Mulunda mulelela. Kusambila Nzambi bikole kudi kuvudija ditalala dietu ne kukolesha bulunda buetu nende.

10. Bilondeshile Musambu wa 15:3, 5, Yehowa udi utulomba tshinyi bua tuetu kulua balunda bende?

¹⁰ Kadi, bua Yehowa kuluaye Mulunda wetu, tudi ne bua kukumbaja malu kampanda malomba. Anu mudibi bileja mu Musambu wa 15, Davidi wakaleja tshidibu batulombe bua ‘kushikama mu ntenta wa Yehowa,’ mmumue ne: bua kulua mulunda wa Nzambi. (Mus. 15:1) Tukonkononayi abidi a ku malu malomba aa: kubenga kushiminyinangana malu ne kuikala ne bululame mu malu onso. Davidi wakamba bilondeshile malu aa bua muntu udi ne bua kushikama mu ntenta wa Yehowa ne: ‘Nyeye udi kayi wela mukoso ne ludimi luende. Kena witabuja dibuejila bua kunyangaye tshilumbu tshia muntu udi kayi ne bualu.’​—Mus. 15:3, 5.

11. Bua tshinyi katuena ne bua kushiminyina muntu bualu?

¹¹ Davidi udi wamba mu Musambu mukuabu ne: “Kanda ludimi luebe bua kaluambi malu mabi.” (Mus. 34:13) Kubenga kutumikila mukenji mufundisha ku nyuma eu kudi kututapulula ne Tatu wetu muakane wa mu diulu. Eyowa, kushiminyinangana malu nngikadilu wa Satana muluishi munene wa Yehowa. Muaku “Diabolo” mmufumine ku muaku wa mu tshiena Greke udi umvuija “mushiminyinyanganyi wa malu.” Kukonkonona malu atudi tuamba bua bakuabu kudi kuambuluisha bua kushala pabuipi ne Yehowa. Ke tshitudi ne bua kuenza nangananga bua bantu badibu bateke ku mutu mu tshisumbu.​—Bala Ebelu 13:17; Yuda 8.

12, 13. a) Bua tshinyi tudi ne bua kuikala ne bululame mu malu onso? b) Bululame mbufikishe bantu bakuabu ku diamba tshinyi?

¹² Badi bamanya batendeledi ba Yehowa ku bululame, kadi ki nku dienzela bantu malu mabi to. Mupostolo Paulo wakafunda ne: “Nutungunuke ne kusambila bua bualu buetu, bualu tudi ne dishindika dia kuikala ne kondo ka muoyo kalulame, bualu tudi basue kuenda mu bululame mu malu onso.” (Eb. 13:18) Bu mutudi badisuike bua “kuenda mu bululame mu malu onso,” katuena tukeba bua kupetela bintu kampanda pambidi pa bena Kristo netu to. Tshilejilu, bikalabu batuenzela midimu kampanda, tuikale bajadike ne: tudi tubenzela malu mu mushindu muimpe ne tubafuta bilondeshile mutuvua bumvuangane nabu. Bu mutudi bena Kristo, tudi tuenzela bena mudimu betu ne bantu bakuabu bonso malu ne bululame. Kadi, bituikala tuenzela muena Kristo netu mudimu, mbimpe tubenge kumulomba bua atuenzele tuetu malu mu mushindu wa pa buawu.

¹³ Tukadi bumvue bantu ba bungi baleja dianyisha pavuabu benze mudimu ne Bantemu ba Yehowa. Tshilejilu, mfumu wa tshiapu kampanda tshia luibaku wakamona ne: Bantemu ba Yehowa batu bakumbaja malu atubu bamba. Wakamba ne: “Misangu yonso nutu nuenza anu tshinudi bambe bua kuenza.” (Mus. 15:4) Ngikadilu eu udi utuambuluisha bua kulama bulunda buetu ne Yehowa. Bualu bukuabu, udi utumbisha Tatu wetu wa dinanga udi mu diulu.

14, 15. Patudi mu buambi, mmunyi mutudi mua kuambuluisha bantu bakuabu bua kulua balunda ba Yehowa?

¹⁴ Nansha mudi bantu ba bungi batudi tupetangana nabu mu buambi bitaba ne: Nzambi udiku, kabatu bamuangata bu Mulunda wabu wa pa muoyo to. Mmunyi mutudi mua kubambuluisha? Tangila tshivua Yezu muambile bayidi 70 pavuaye mubatume babidi babidi mu mudimu wa  buambi: “Muaba wonso unudi nubuela mu nzubu, nuanji kuamba ne: ‘Ditalala dikale mu nzubu emu.’ Bikalamu mulunda wa ditalala, ditalala dienu nedishale kudiye. Kadi yeye kayimu, nedipingane kunudi.” (Luka 10:5, 6) Tudi mua kukoka bantu ku bulelela patudi tuyukila nabu ne dîyi dimpe. Bualu ebu budi mua kutuambuluisha patudi kumpala kua bantu badi babenga kututeleja bua kubatuyisha tshilunji ne kunzulula njila bua kutuakidilabu musangu mukuabu.

¹⁵ Patudi tupeta bantu badi balamate ntendelelu wa dishima anyi badi benza bilele bidi bibengangana ne Mifundu minsantu, tutungunuke ne kubaleja bulenga ne tuikale ne tshimuenekelu tshia ditalala. Mu bisangilu, tuakidile ne disanka bantu badi banyingalala bua nsombelu mubi udiku lelu udi ubajula dijinga dia kulonga malu a bungi bua bidi bitangila Nzambi utudi tutendelela. Tudi tupeta bilejilu bia bungi bimpe mu biena-bualu bia ne: “Bible utu ushintulula bantu.”

16. Mmu mushindu kayi mudibu mua kutuangata bu balunda ba Yehowa ne ‘benzejanganyi nende ba mudimu’?

¹⁶ Bantu batu benza mudimu pamue batu misangu ya bungi bakolesha bulunda buabu. Bantu bonso badi badilambule kudi Yehowa badi ne diakalenga dia kubangatabu bu balunda bende ne ‘benzejanganyi nende ba mudimu.’ (Bala 1 Kolinto 3:9.) Bushuwa, patudi tuenza mudimu wa diyisha ne divuija bantu bayidi, tudi tumanya bimpe ngikadilu milenga ya Tatu wetu wa mu diulu. Tudi tumona mudi nyuma wa Nzambi utuambuluisha bua kuikala bakumbane bua kukumbaja mudimu wetu wa kuyisha lumu luimpe.

17. Mmunyi mudi malongesha atudi tupeta mu mpuilu ne mpungilu aleja ne: Yehowa mMulunda wetu?

¹⁷ Tuetu tuenza bikole mudimu wa kuvuija bantu bayidi, tudi tudiumvua pabuipi ne Yehowa. Tshilejilu, tudi tumona mudi Yehowa upangisha baluishi mua kuimanyika mudimu wetu. Tuelabi meji bua malu adi menzeke mu bidimu bikese bidi bishale ebi. Katuenaku bamone bimpe mudi Nzambi utulombola anyi? Tudi ne dianyisha bua biakudia bia mu nyuma bitudi tutungunuka ne kupeta. Mpuilu ne mpungilu idi ileja mudi Tatu wetu wa mu diulu umona ntatu yetu ne majinga etu. Dîku kampanda diakafunda bua kuleja dianyisha bua mpungilu kansanga diamba ne: “Mpungilu eu uvua bushuwa mulenge mioyo yetu. Tuvua bumvue mudi Yehowa munange muntu ne muntu yonso wa kutudi ne musue bua malu etu ende bimpe.” Pavua mulume kampanda ne mukajende ba mu Allemagne babuele mu mpungilu munene mu Irlande, bakaleja dianyisha diabu bua muvuabu babakidile ne disanka ne babatabalele. Bakamba kabidi ne: “Kadi tutu tutamba kuela Yehowa ne Yezu Kristo Mukalenge udiye muteke tuasakidila. Bavua batubikile bua kuikala mu tshisamba etshi tshidi mu buobumue. Katutu tuakula anu bua buobumue to, kadi tudi mu buobumue ebu dituku dionso. Malu atudi badimuenene  mu tshisangilu tshia pa buatshi etshi mu Dublin neikale anu atuvuluija diakalenga dinene ditudi nadi dia kuenzela Nzambi wetu munene mudimu pamue nenu bonso.”

18. Tudi mua kudiela lukonko kayi bua bidi bitangila diyukidilangana dietu ne Yehowa?

¹⁸ Padi bantu bayukila bimpe, bulunda budi bukola. Miaba ya kuyukidilangana ne kufundilangana mesaje ku Enternete mmivule mu tshikondo etshi tshidi Enternete ne biamu bia kuyukila nabi bivulangane. Kadi mmushindu kayi ututu tuangata diyukidilangana ne Yehowa Mulunda wetu wa pa muoyo? Bulelela, Nzambi udi ‘Mumvu wa milombu.’ (Mus. 65:2) Kadi mmisangu bungi munyi itutu tukeba mpunga wa kuyukila nende?

19. Ndiambuluisha kayi ditudi nadi padibi bitukolele bua kukanguila Tatu wetu wa mu diulu mioyo yetu?

¹⁹ Bitu bikolele bamue batendeledi ba Nzambi bua kukangula mioyo yabu ne kumuambila mudibu badiumvua. Pabi, ke tshidi Yehowa musue bua tuenze patudi tusambila. (Mus. 119:145; Muad. 3:41) Nansha biobi bitukolele bua kupeta miaku bua kuleja tshidi mu mioyo yetu, tudi ne diambuluisha. Paulo wakafundila bena Kristo ba mu Lomo ne: “Patudi dijinga ne kusambila katuena bamanye tshitudi ne bua kulomba to, kadi nyuma muine udi ulomba pa muaba wetu patudi tutua mikemu dîyi kadiyi dipatuka. Kadi yeye udi utangila mu mioyo mmumanye tshidi nyuma ukeba, bualu udi ulombela bansantu bilondeshile disua dia Nzambi.” (Lomo 8:26, 27) Kuelangana meji bua miaku idi mu mikanda ya mu Bible bu mudi Yobo, Misambu ne Nsumuinu nekutuambuluishe bua kuleja Yehowa mutudi tudiumvua munda muetu.

20, 21. Ndikankamija kayi ditudi tupeta mu mêyi a Paulo adi mu Filipoyi 4:6, 7?

²⁰ Padi nsombelu mikole itukuata, tutumikile mubelu mufundisha ku nyuma uvua Paulo mupeshe bena mu Filipoyi wa ne: “Kanusamishi mutu bua tshintu nansha tshimue, kadi mu malu onso mu disambila ne mu disengelela pamue ne disakidila, numanyishe Nzambi milombu yenu.” Kuyukila ne Mulunda wetu wa pa muoyo mushindu eu nekutukoleshe ne nekutusambe bualu Paulo wakasakidila ne: “Ditalala dia Nzambi didi dipite dijingulula dionso dia malu nedilame mioyo yenu ne lungenyi luenu ku butuangaji bua Kristo Yezu.” (Filip. 4:6, 7) Tuanyishayiku misangu yonso “ditalala dia Nzambi” didi kadiyi kuelekeja didi dilama mioyo yetu ne lungenyi luetu.

²¹ Disambila didi dituambuluisha bua kudia bulunda ne Yehowa. Ke bua tshinyi, tuikalayi ‘tusambila misangu yonso.’ (1 Tes. 5:17) Dilonga dietu edi dikoleshaku malanda etu ne Nzambi ne dipangadika dietu dia kutumikila mikenji yende miakane. Tukebe kabidi dîba dia kuelangana meji bua masanka atudi tupeta bua mudi Yehowa muikale Tatu wetu, Nzambi wetu ne Mulunda wetu.