Tatu kampanda wa mu Brésil udi wamba ne: “Tutu tuyukila mu Ntendelelu wa mu Dîku dilolo ne misangu ya bungi tutu tuya too ne butuku meme tshiyi mulekeshe bena mu dîku dianyi.” Mfumu wa dîku kampanda wa mu Japon udi wamba ne: muanende wa bidimu 10 katu utangila dîba to, ne utu musue anu bua batungunuke. Bua tshinyi? Tatu eu udi wamba ne: bualu muana “utu udiumvua bimpe ne bitu bimupesha disanka.”

Bushuwa, ki mbana bonso batu basue Ntendelelu wa mu Dîku to, mu bulelela, udi mua kuikala kayi usankisha bamue bana. Bua tshinyi bitu nanku? Tatu kampanda wa mu Togo udi ufila lungenyi luimpe elu: “Ntendelelu wa Yehowa kena ne bua kuikala utshiokesha to.” Bikalabi nanku, mbua mushindu udibu balombola ntendelelu wa mu dîku anyi? Bena mu mêku a bungi mbamone ne: Ntendelelu wa mu dîku udi mua kuikala tshikondo tshia “disanka” anu muvua Yeshaya muambe bua dituku dia Nsabatu.​—Yesh. 58:13, 14.

Batatu bena Kristo badi bamona ne: bua bena mu mêku abu kuikalabu ne disanka mu ntendelelu wa mu dîku, mbimpe bantu bonso bikale badilekelele. Ralf tatu wa bana banayi udi wamba ne: ntendelelu wabu wa mu dîku utu anu bu muyuki, ki mbu dilonga to, muntu yonso utu wakula. Kadi bidi mua kuikala bikole bua kuenza bua malu atudi tulonga asankishe muntu yonso ne bua elamu dîyi. Mamu mukuabu udi uleja ne: “Misangu yonso tshitu anu nkumbana bua kuenza bua ntendelelu wa mu dîku ikale usankisha bu muntu njinga.” Udiku mua kutantamena lutatu lua nunku anyi?

Tatu kampanda wa bana babidi wa mu Allemagne udi wamba ne: “Tudi ne bua kuenza malu bilondeshile nsombelu.” Natalia mamu wa bana babidi udi uleja pende ne: “Bualu budi ne mushinga wa bungi mu dîku dietu, nkushintulula  misangu yonso malu a kulonga.” Mêku a bungi atu akosolola ntendelelu wabu wa mu dîku mu bitupa. Cleiton udi tatu wa bana babidi ba bitende wa mu Brésil udi umvuija ne: “Kuenza nunku kudi kuambuluisha bua dilonga dikale ne luya ne kuenza bua bantu bonso bakule.” Padi baledi bakosolola dîba dia dilonga badi mua kuteya ntema ku majinga a muana yonso bikalabu ne bidimu bishilangane bikole. Baledi badi mua kulenga majinga a muena mu dîku yonso ne kuikala ne nkatshinkatshi padibu basungula malu a kulonga ne mushindu wa kualonga.

Mêku makuabu atu enza tshinyi bua kuikala kushintulula malu? Bamue batu batuadija ntendelelu wabu wa mu dîku pa kuimbila Yehowa misambu. Juan wa mu Mexique udi wamba ne: “Bitu bikebesha musangelu ne bitulongolola mu lungenyi bua malu atudi tujinga kulonga.” Bana bende babidi batu basungula misambu itu ipetangana ne amue malu adibu basungule bua kulonga dilolo.

Mêku a bungi atu abala tshitupa kampanda tshia Bible pamue. Bua dishilangana kuikalaku, muntu umue wa mu dîku utu ubala mêyi a muntu kampanda udibu batele mu tshitupa kansanga tshia mu Bible ne muntu mukuabu ubala pende a mukuabu. Tatu kampanda wa mu Japon udi witaba ne: buende yeye bivua “bikole bua kubala nanku ku ntuadijilu.” Kadi bana bende babidi bavua ne disanka bua kumona baledi babu benza bualu kampanda buimpe pamue nabu. Amue mêku atu mene enza manaya a miyuki ya mu Bible. Roger tatu wa bana babidi wa mu Afrique du Sud udi wamba ne: bana “batu imue misangu bamona malu kampanda mu muyuki wa mu Bible atudi tuetu baledi katuyi bamone.

Mushindu mukuabu wa kukeba dishilangana ngua kuenza mudimu kampanda pamue bu mudi wa kuibaka buatu bua buena bua Nowa peshi ntempelo wa Solomo. Midimu ya nunku itu ilomba kuenza makebulula adi apetesha disanka. Tshilejilu, mu tshisombelu tshia nzubu wa dîku kampanda dia mu Asie muvua muana wa bidimu bitanu ne baledi bende ne kakuende. Bavua benza tablo muikale ne ngendu ya bumisionere ya mupostolo Paulo. Mêku makuabu mmenze tablo ya manaya a miyuki idi mu mukanda wa Ekesode. Donald udi ne bidimu 19 wa mu Togo udi wamba ne: kushintulula malu “nkukebeshe nsombelu mupiamupia mu ntendelelu wetu wa mu dîku, ne mu dîku dietu kabidi.” Udiku mua kukeba mudimu kampanda wa kuenza wenza bua ntendelelu wenu wa mu dîku ikale usankisha bikole anyi?

Nansha mudi dishintulula malu ne kulondesha nsombelu kuenza bua ntendelelu wa mu dîku ikala usankisha, mbimpe muntu yonso adilongolole bua kubambuluishaye. Imue misangu bana batu kutshioka, nunku baledi badi ne bua kuela meji bua malu adibu basungule ne kukeba dîba bua kudilongolola bimpe. Tatu kampanda udi wamba ne: “Meme mudilongolole, dilonga ditu diambuluisha muntu yonso.” Tatu mukuabu wa mu Allemagne utu udianjila kumanyisha bena mu dîku diende tshikalabu mua kulonga mu mbingu idi kumpala. Patu tatu kampanda wa bana 6 wa mu Benin ulongolola bua bamone ditadi dia malu a mu Bible mu ntendelelu wabu wa mu dîku, utu wanji kulongolola nkonko kumpala kua dîba. Bushuwa kudilongolola kudi kuenza bua ntendelelu wetu wa mu dîku ikale muimpe.

Padi bena mu dîku bamanya malu ikalabu ne bua kukonkonona kumpala kua dîba, badi mua kuakuila pa malu aa munkatshi mua lumingu ne ebi nebivudije musangelu wabu. Bikala muntu yonso ne mudimu wa kuenzamu, neadiumvue ne: ntendelelu wa mu dîku nguende yeye.

Mêku a bungi atu ne lutatu bua kuenza ntendelelu wa mu dîku lumingu luonso.

Batatu ba bungi batu benza mudimu mêba a bungi bua kukumbaja majinga a bena mu mêku abu. Tshilejilu, tatu mukuabu wa mu Mexique utu umbuka ku nzubu pa dîba 6 wa dinda ne upingana pa dîba 20. Imue misangu bitu kabidi bilomba kushintulula dîba dia Ntendelelu wa mu Dîku bua bualu kampanda bua mu nyuma.

Kadi, tudi ne bua kuangata dipangadika dia kuikala ne tshibidilu tshia kuenza ntendelelu wa mu dîku. Loïs udi ne bidimu 11 wa mu Togo udi wamba bua muvua bena mu dîku diende badisuike wamba ne: “Nansha mutuvua imue misangu tutuadija ntendelelu wa mu dîku panyima pa dîba bua bualu kampanda buvua buenzeke munkatshi mua dituku, tuvua anu tumuenza misangu yonso.” Udiku mumone bua tshinyi amue mêku atu alongolola bua kuenza ntendelelu wa mu dîku ku ntuadijilu kua lumingu anyi? Bualu kampanda buvuabu kabayi belele meji buobu mua kuenzeka, badi mua kuteka ntendelelu wa mu dîku ku ndekelu kua lumingu alu.

Anu mudi dîna edi “ntendelelu wa mu dîku” dileja, udi tshitupa tshia ntendelelu webe kudi Yehowa. Nuenze bua bena mu dîku dienu bonso bafile ‘mishiku yabu bu milambu ya ngombe’ kudi Yehowa lumingu luonso. (Hosh. 14:2) Enzayi bua tshikale tshikondo tshia disanka bua muntu yonso wa mu dîku, bualu “disanka dia Yehowa mbukole buenu.”​—Neh. 8:9, 10.