1, 2. a) Nntatu kayi itu mêku a bungi apeta? Nnkonko kayi idi mua kujuka? b) Ntshinyi tshidi baledi ne bana mua kuenza bua kutantamena ntatu padi nsombelu ishintuluka?

BITU bisama ku muoyo bua kumvua ne: baledi bebe bavua ne makanda ne badienzela malu nkayabu, kabena kabidi mua kuenza nunku to. Pamuapa, muledi webe mulume anyi mukaji mmudishinde ne tshikundukundu ntshitshibuke, kena mua kuenza bualu, peshi ne: mbamukuate ne disama didi dikengela kunemekela mikenji mikole ya baminganga. Kadi kudi malu makuabu. Bidi mua kukolela mukulakaje bua kuitaba mudi nsombelu wende mushintuluke peshi bua kuitaba nsombelu mikuabu idi ilomba bua bamuambuluishe. (Yobo 14:1) Bidi bikengela kuenza tshinyi? Mmunyi mudibu mua kubatabalela?

² Tshikandakanda kampanda tshidi tshiakula bua mushindu wa kulama bakulakaje tshidi tshiamba ne: “Nansha mudibi bikole bua kuakula bua ntatu ya bukulakaje, bena mu dîku badi bayukile ne balongolole tshia kuenza nebatantamene bimpe bualu buonso budi mua kufika.” Diyukidilangana dia nunku didi ne mushinga wa bungi patudi tumanya ne: katuena mua kuepuka ntatu idi ifumina ku bukulakaje. Kadi tudi mua kulongolola amue malu ne kuangata mapangadika kumpala kua dîba. Tumonayi mushindu udi bena mu mêku mua kuyukidilangana bimpe bua kudilongolola bua kutantamena imue ntatu.

3. Bena mu mêku badi mua kuenza tshinyi padi baledi bakulakaje bikale dijinga ne diambuluishi? (Tangila tshimfuanyi tshia ntuadijilu.)

³ Bitu bienzeka ne: bakulakaje ba bungi bafike mu tshikondo tshidibu kabayi mua kudilama nkayabu bimpe, bibalomba bua kuikala ne muambuluishi. (Bala Muambi 12:1-7.) Padi baledi bakadi bakulakaje kabayi ne mushindu wa kudilama, buobu ne bana babu bakadi bantu bakole badi ne bua kusungula mushindu muimpe wa kubambuluisha bua kulongolola malu mu mushindu muimpe. Mbimpe kuenza tshisangilu mu dîku bua kuyukila mua kueleshangana diboko, majinga abu ne tshia kuenza bua kuakumbaja. Bantu bonso badi mu tshisangilu atshi, nangananga baledi, badi ne bua kuleja lungenyi luabu patoke ne kuamba malu mudiwu. Badi mua kuyukila bua kumanya bikala diambuluisha dikuabu mua kubapesha mushindu wa kutungunuka ne kusomba ku nzubu kudibu. * Peshi badi mua kukonkonona bua kumanya mushindu wenzabu mudimu ne diambuluisha dia muana yonso bua kukumbaja majinga a baledi. (Nsu. 24:6) Tshilejilu, bamue badi mua kuikala bakumbane bua kulama baledi babu dituku dionso, padi bakuabu eku bikale ne mushindu wa kufila bintu bia bungi bia ku mubidi. Muntu yonso udi ne bua kumanya ne: udi ne mudimu wa kuenza, kadi mu bungi bua matuku mudimu eu udi mua kushintuluka, ne badi mua kushintakaja midimu eyi.

4. Nkuepi kudi bena mu dîku mua kupetela diambuluisha?

⁴ Paudi utuadija mudimu wa bu ndeji, keba ne muebe muonso dîba dia kumanya nsombelu wa baledi bebe. Bikala muledi webe ne disama dia munanunanu, teta bua kumanya tshidi mua kumufikila mu matuku atshidi alua. (Nsu. 1:5) Umvuangana ne bibambalu bidi mbulamatadi mulongolole bua kuambuluisha bakulakaje. Manya malongolodi adiku adi mua kupepeja mudimu webe ne kukuambuluisha bua kulama muledi eu bimpe. Dishintuluka dia nsombelu mu dîku didi mua kukufikisha ku didiumvua kuyi ne tshikuabu tshia kuenza. Leja balunda bebe ba pa muoyo muudi udiumvua. Tshia kumpala, pumuina Yehowa bidi mu muoyo webe. Udi mua kukupesha ditalala dia mu lungenyi bua umone mua kupita ne nsombelu kayi yonso.​—Mus. 55:22; Nsu. 24:10; Filip. 4:6, 7.

5. Bua tshinyi mbimpe kuebeja amue malu adi atangila dilama bakulakaje kumpala kua dîba?

⁵ Bamue bakulakaje ne bena mu mêku abu batu bakeba bua kumanya amue malu kumpala kua dîba bua mushindu wa kubatabalela bu mudi: bua disomba dia muledi ne muanende wa balume anyi wa bakaji, mua kuenza mudimu ne diambuluisha didibu bapeta peshi mua kupeta bintu bikuabu bidibu babalongoluele muaba unudi. Badi badianjila kumona ntatu ne ‘tunyinganyinga’ bidi mua kubafikila ne badi badilongolola mua kupita nabi. (Mus. 90:10) Mêku a bungi kaatu adilongolola to, ne pashishe atu adimona menzejibue bua kuangata ne lukasa mapangadika manene padi lutatu lumueneka. Mumanyi kampanda wakamba ne: Etshi “ke tshikondo tshibi menemene bua kuangata dipangadika dia nunku.” Dîba dia buena edi, bena mu dîku bakadi kuulu kuulu ne bilumbu bidi mua kujuka. Ku lukuabu luseke, kulongolola malu kumpala kua dîba kudi kuambuluisha bua kukepesha tunyinganyinga padi nsombelu ushintuluka.​—Nsu. 20:18.

6. Mmunyi mudi diyukidilangana mu dîku bua malu adi atangila bakulakaje mua kubambuluisha buobu ne bana babu?

⁶ Bidi mua kukukolela bua kuyukila ne baledi bebe bua kulongolola amue malu a mu nsombelu wabu ne bidi bikengela kushintulula. Kadi, bamue bantu mbaleje mudi diyukidilangana edi dipatule bipeta bimpe. Bua tshinyi? Bualu bavua balongolole malu avua akengela tshikondo tshimpe tshivuabu mua kupetangana. Bakamona ne: dishintakaja ngenyi kumpala kua dîba ne dinanga ne bulenga biakenza bua mapagandika avuabu bangate ikale mapepele ne baangate  dîba divuabi bikengela. Nansha bikala baledi basue kushala nkayabu ku nzubu kuabu ne basue kudiambuila bujitu buabu padiku mushindu, mbimpe bayukile ne bana babu bua mushindu udibu basue bua babalame pikala dijinga dimueneke.

7, 8. Bena mu mêku badi mua kuyukila bua malu kayi? Bua tshinyi?

⁷ Baledi wetu, mu tshikondo tshinudi nuyukidilangana etshi, lejayi bana benu malu anudi basue, kenu kanudi naku ne malu anudi nujinga bua banuenzele. Nebibambuluishe bua kuangata mapangadika mimpe tshikondo tshiwikala kuyi ne mushindu wa kuenza nunku. Bia muomumue, nebanyishe bua kunemeka disua diebe ne kulama budikadidi buebe ne muabu muonso. (Ef. 6:2-4) Tshilejilu, udiku mutekemene bua umue wa ku bana bebe akulame kuende anyi? Peshi udi mulongolole tshikuabu tshia kuenza? Mona malu mudiwu, manya ne: bantu bonso kabakumona malu anu bu muudi wewe uamona to ne bidi bikengela tshikondo kampanda bua baledi ne bana bashintulule lungenyi luabu.

⁸ Bantu bonso badi ne bua kumanya ne: nudi mua kuepuka bilumbu nuenu balongolole malu ne bayukidilangane. (Nsu. 15:22) Mu malu anudi nuyukidilangana nuakule bua luondapu ne malu adi muntu musue. Nudi mua kuakula bua malu adibu baleji mu karte ka Pas de Sang ka Bantemu ba Yehowa dîba dinudi nuyukidilangana edi. Muntu yonso udi ne bukenji bua kumanya malu adimu ne kuitaba anyi kubenga imue mishindu ya luondapu idibu mua kufila. Karte ka Pas de Sang kadi kaleja malu adi muntu musue. Kusungula mushindu kampanda wa luondapu nekuambuluishe muntu wa kueyemena uudi musungule bua kukuangatshila mapangadika mimpe padibi bikengela. Bantu badibu basungule nebenze muabu muonso bua kupeta dibeji dikuabu dia karte aka pikalabu nabu dijinga. Bamue mbele mabeji a karte aa mu mikanda yabu ya mushinga mukole bu mudi: ya bumuntu, ya asiranse, ya malu a mpetu ne mikuabu ya mbulamatadi.

9, 10. Mmashintuluka kayi adi mua kuenzekela mukulakaje adi mua kushintulula mushindu uvuabu bamuambuluisha?

⁹ Mu nsombelu ya bungi, baledi ne bana batu basungula bua kulama budikadidi bua bakulakaje bilondeshile mudibu bakokeshe. Badi mua kudilambila, kusukula bintu biabu, kunua manga ne kuakula kakuyi lutatu. Nunku, badi mua kujadikila bana babu ne: kabakudibuejakaja mu nsombelu wabu wa ku dituku ne dituku. Kadi padi matuku apita, baledi bobu batekete bikole, imue misangu kabayi mua kuya kudisumbila bintu anyi batuadija kusama masama makole a mu lungenyi, bana badi ne bua kuambuluisha padi nsombelu ishintuluka nunku.

¹⁰ Bukulakaje budi mua kufikisha ku tshibuejakaji, dibungama dikole, dipanga didikanda, ku dipata dia matshi, ku dibenga kumona bimpe, ne ku dibenga kuvuluka malu. Bobu bapete ntatu ya mushindu eu, bidi bikengela kubenzela malu ne dinanga. Padi malu aa atuadija, monangana ne baminganga. Bana ke badi mua kutangila tshilumbu etshi. Tshikondo kampanda, bana badi  kabidi mua kutuadija kuenzela baledi malu avuabu badienzela. Bua bana kuakajabu mushindu wa kulama baledi babu, badi mua kubakuila, kufunda pa muaba wabu, kubendeshila mashinyi ne kubenzela malu makuabu.​—Nsu. 3:27.

11. Tshia kuenza ntshinyi bua kukepesha tunyinganyinga tua dishintuluka dia nsombelu?

¹¹ Bikalaku kakuyi mushindu wa kujikija ntatu ya baledi, nudi mua kushintulula mushindu unudi nubatabalela anyi kuakaja nsombelu wabu. Padi nsombelu ushintuluka kakese, mbipepele bua kuakaja malu. Biwikala musombele kule ne baledi, nebikalaku bimpe bua Ntemu mukuabu anyi muena mutumba kumuambuluisha misangu yonso ne kumanyisha umue wa ku bana bikala baledi babu bimpe anyi? Badiku dijinga amu ne diambuluisha bua kulamba ne kusukula bintu biabu nkayaku anyi? Nudiku mua kushintulula tumue tumalu bua badiumvuaku bimpe ne bua kumonabu mua kupatuka pambelu, kuowa mâyi, ne kuenza malu makuabu anyi? Pamuapa, tshidi baledi bakulakaje natshi dijinga bua kudiumvua badikadile tshidi anu kuikala ne muntu udi ubambuluisha. Kadi, buobu kabayi bakumbane bua kusomba nkayabu, bidi bikengela muntu bua asombe nabu. Nansha nsombelu wabu yeye mushindu kayi, tangilayi bimue bibambalu bidi mua kubambuluisha bidi muaba unudi. *​—Bala Nsumuinu 21:5.

12, 13. Ntshinyi tshidi bana badi kule ne baledi babu mua kuenza bua kutungunuka ne kubanemeka ne kubatabalela?

¹² Bana badi banange baledi babu batu basue bua bikale bimpe. Padi bana bamanya ne: mbalame baledi babu bimpe, bidi bibapesha ditalala dia mu lungenyi dikumbane. Kadi, bu mudi bana ba bungi bakadi bantu bakole ne malu makuabu a kuenza, kabatu basomba pabuipi ne baledi babu to. Mu nsombelu ya nunku, bamue batu bangata dikisha bua kuya kubamona, kubakumbajila majinga abu ne kuenza malu atu baledi kabayi mua kudienzela. Kuikala ne tshibidilu tshia kubikila baledi misangu yonso, kuoku mushindu mene dituku dionso, kubafundila mikanda peshi kubatumina mesaje ku Enternete kudi kujadikila baledi ne: mbabanange.​—Nsu. 23:24, 25.

¹³ Nansha nsombelu yeye mushindu kayi, bidi bikengela kukonkonona mushindu unudi nutabalela baledi ku dituku ne ku dituku bua kubakumbajila majinga abu. Pikala baledi bebe Bantemu, ne bikale kule nebe, yukila ne bakulu ba mu tshisumbu tshiabu, ubebeje mudibu. Kupu muoyo bua kusambila bua tshilumbu etshi. (Bala Nsumuinu 11:14.) Nansha baledi bebe bobu kabayi Bantemu, udi ne bua ‘kunemeka tatu webe ne mamu webe.’ (Ekes. 20:12; Nsu. 23:22) Manya ne: mêku onso kaakuangata mapangadika a muomumue to. Bamue batu bangata dipangadika bua muledi wabu ukadi mukulakaje alue kusombela kuabu anyi pabuipi nabu. Nansha nanku kabitu anu bipepele to. Bamue baledi kabatu basue kusomba ku nzubu kua bana ne mêku abu to, batu basue kuikala badikadile ne kabatu basue kuikala bujitu kudi bana nansha. Bamue baledi badi mua kuikala ne kantu ku bianza, basue kukeba muena mudimu ne kusombela ku wabu nzubu.​—Muam. 7:12.

14. Nntatu kayi idi bantu badi batabalela baledi mua kupeta?

¹⁴ Mu mêku a bungi, bujitu bunene bua kulama baledi budi bumueneka bu bulekeela muana umue, eu udi pabuipi nabu. Kadi bantu badi batabalela baledi badi ne bua kuikala ne nkatshinkatshi bua majinga a baledi ne a bena mu mêku abu. Muntu ne muntu udi ne ende malu adiye mukumbane bua kuenza bilondeshile dîba ne makanda ende. Nsombelu wa muntu udi mulame muledi udi mua kushintuluka, ne bimulomba bua kuakajilula malu. Kudiku muena mu dîku umue udibu pamuapa balekeele midimu ya bungi anyi? Bena mu dîku bakuabu kabenaku mua kumuambuisha bujitu, bu mudi kuanjibu pabu kuangata muaba wende anyi?

15. Tshia kuenza ntshinyi bua muntu udi ulama muledi mukulakaje katshioki ne lukasa?

 ¹⁵ Padi muledi mukulakaje muikale ne dijinga kampanda kadiyi dijika, bidi mua kutshiokesha muntu udi umulama. (Muam. 4:6) Bana badi banange baledi babu batu basue kubenzela malu onso adibu bakumbane bua kuenza, kadi kulomba malu mapitepite kudi mua kutonda. Mbimpe bana badi batabalela baledi babu ne badiumvua mushindu eu bikale bamona malu mu mushindu muimpe ne balomba diambuluisha padiku mushindu. Kuambuluisha muntu udi mulame mukulakaje kudi mua kuambuluisha bua kubenga kuya ne muledi diakamue ku nzubu itubu balama bakulakaje.

16, 17. Nntatu kayi idi bana mua kupeta padibu balama baledi babu bakadi bakulakaje? Mmunyi mudibu mua kuyitantamena? (Tangila kazubu ka ne: “Patudi tulama baledi.”)

¹⁶ Bidi bitonda bikole bua kumona baledi batudi banange bakenga bua bipeta bia bukulakaje. Bantu ba bungi badi babalama batu bapeta dibungama, muoyo ubasama, tshiji ne badipisha. Imue misangu, muledi ukadi mukulakaje udi mua kuamba malu adi atonda anyi kubenga kuleja dianyisha. Biobi mua kuenzeka nanku, kabikutondi to. Mumanyi mupiluke kampanda wa malu a masama a mitu wakamba ne: “Mushindu mutambe buimpe wa kutantamena mutudi tudiumvua, nangananga padibi bitutonde bikole nkuwitaba. Epuka kubipisha mushindu uudi udiumvua anyi kudilumbuluisha ne lukasa.” Leja muena dibaka nebe, muena mu dîku mukuabu anyi mulunda kampanda wa pa muoyo muudi udiumvua. Kuyukila nunku kudi mua kukuambuluisha bua kumbusha meji auvua nawu.

¹⁷ Kudi mua kufika tshikondo tshidi bena mu dîku mua kupangila bintu bia ku mubidi ne tshia kuenza bua kutungunuka ne kulama muledi wabu udibu banange ku nzubu. Bidi mua kubalomba bua kuya nende ku nzubu itubu balamina bakulakaje. Muanetu wa bakaji mukuabu uvua uya kutangila mamuende ku nzubu itubu balamina bakulakaje pabuipi ne dituku dionso. Udi wamba bua dîku diabu ne: “Katuvua bakumbane bua kulama mamu dîba dionso muvuabi bikengela to. Kuitaba bua balame mamu ku nzubu wa bakulakaje kakuvua dipangadika dipepele to. Bivua bitutonde bikole, bikole menemene. Nansha nanku, ke tshivua tshikengela kumuenzela mu ngondo ya ndekelu ya muoyo wende ne wakitaba.”

18. Bantu badi balama bakulakaje badi mua kuikala ne dishindika kayi?

¹⁸ Bujitu bua kulama baledi bebe padibu benda bakulakaja budi mua kukola ne bukusamisha mutu. Kakuena mishindu misunguluke ya tshia kuenza bua kulama bakulakaje to. Kadi nuenu balongolole malu ne meji, beleshangane diboko, bayukidilangane bimpe ne kupita bionso ebi basambile ne muoyo mujima, nudi mua kukumbaja mudimu wenu wa kunemeka baledi benu banudi banange. Nuenu benze nanku, nenudiumvue bimpe bua kumanya ne: badi bapeta bidibu nabi dijinga. (Bala 1 Kolinto 13:4-8.) Bualu bua mushinga, nudi mua kushala bashindike ne: nenuikale ne ditalala dia mu lungenyi didi Yehowa upesha bantu badi banemeka baledi babu.​—Filip. 4:7.