PAVUA bena Isalele bumbuke mu Babulona mu 537 kumpala kua Yezu, Yehowa wakaditatshisha bikole bua dipingana diabu mu Yelushalema. Wakabambila ne: ‘Longoluelayi bantu njila; elayi, elayi mabula mu tshibeba, umbushayimu mabue.’ (Yesh. 62:10) Ntshinyi tshivuabu mua kuenza bua kutumikila mukenji eu? Bamue bena Isalele bakaya kumpala kua bana babu bua kulongolola njila, pamuapa bajibikila bina ne babatamija njila. Kakuyi mpata, bualu ebu buakambuluisha bana babu bavua babalonda bua kupinganabu bimpe kuabu.

Tudi mua kuangata bualu ebu bu tshilejilu tshia njila udi ufikisha ku bipatshila bia mu nyuma. Yehowa mmusue bua batendeledi bende bonso bende mu njila kabayi ne tshipumbishi nansha tshimue tshia patupu. Bible udi utudimuija ne: ‘Ubatamijile makasa ebe njila, ne njila yebe yonso ikale miludika bimpe.’ (Nsu. 4:26) Nansha wewe muikale nsonga anyi muntu mukole, udi mua kumona mudi mubelu wa Nzambi eu wa meji.

Ukadi pamuapa mumvue bantu bamba nsonga kampanda ne: ‘Udi ne bipedi bia bungi’ anyi ne: ‘Udi wenda ulongolola njila wende.’ Misangu ya bungi, bansonga batu ne bukole bua mubidi, lungenyi lutabuluke, ne dijinga dikole dia kupeta diakalenga. Bible udi ujadika ne: ‘Butumbi bua bansongalume mbukole buabu.’ (Nsu. 20:29) Nsonga udi ukuata mudimu ne bipedi biende ne bukole buende bua kuenzela Yehowa mudimu udi mua kukumbaja bipatshila bia mu nyuma ne kupeta diakalenga dilelela.

Kadi, anu muudi mumone, bipedi bidi bansonga betu nabi badi babiangata ne mushinga wa bungi kudi bena mu bulongolodi ebu. Padi nsonga udi Ntemu ne meji mu kalasa, mufidi wa mibelu, mulongeshi, nansha mulongi wabu udi mua kumuenzeja bua kutungunuka ne tulasa tua iniversite ne kutuangata bu tudi tufikisha ku nsombelu muimpe mu bulongolodi ebu. Nansha nsonga mulume anyi mukaji udi mupepele mu malu a manaya badi mua kumukankamija kudi bantu  bakuabu bua kulua munayi munene. Nsombelu wa nunku ukadiku mukufikile anyi? Peshi, udiku mumanye muntu kampanda udi utuilangana ne malu a nunku? Ntshinyi tshidi mua kuambuluisha muena Kristo bua kuangata dipangadika ne meji?

Malu adi Bible ulongesha adi mua kuambuluisha muntu bua kudilongolola bua kuendela mu njila mutambe buimpe mu nsombelu wende. Muambi 12:1 udi wamba ne: “Uvuluke Mufuki webe mu matuku a bunsongalume buebe.” Mmunyi muudi wewe anyi nsonga uudi mumanye mua ‘kuvuluka Mufiki webe’ bimpe?

Tuakule bua tshivua tshifikile Eric, * nsonga wa ku Afrike wa ku Ouest. Uvua munange kunaya ndundu. Pavua Eric ne bidimu 15, bakamusungula bua kunaya ndundu mu tshisumbu tshia ditunga diabu. Mmumue ne: mu matuku avua alua kumpala, uvua mua kupeta diakalenga dia kuya kushikuluja dimanya dia manaya ku Mputu, bivua pamuapa mua kumufikisha ku dilua munayi munene. Kadi mmunyi muvuaye mua kutumikila mubelu wa ne: “Uvuluke Mufuki webe”? Ntshinyi tshidi bualu ebu mua kukulongesha wewe anyi mulunda webe mukuabu nsonga?

Patshivua Eric ulonga, wakatuadija kulonga Bible ne Bantemu ba Yehowa. Nunku, wakatuadija kumanya ne: Mufuki wende uvua mua kujikija ntatu ya bantu kashidi. Eric wakalua kumona mushinga wa kuenza mudimu ne dîba diende ne bukole buende bua kuenza disua dia Nzambi. Pakamona Eric muvua bualu ebu bua meji, wakasungula bua kubenga kuditatshisha bua kulua munayi munene. Kadi, wakatambula ne kudifilaye mu malu a Nzambi. Pakapita matuku, wakalua musadidi wa mudimu ne pashishe kumubikilabu mu Kalasa ka malu a mu Bible bua bana betu ba balume bajike.

Bu Eric musungule bua kulua munayi munene, uvua mua kupeta bubanji ne lumu. Kadi wakajingulula muvua mêyi a mu Bible aa malelela: ‘Biuma bia muntu mubanji bidi musoko wende wa ngumbu, bidi bu lumbu lule mu meji ende.’ (Nsu. 18:11) Eyowa, bukubi budi muntu mua kumona bu mupetele ku bubanji budi anu bua mu tshingenyingenyi patupu. Kabidi, aba badi bipatshila bubanji ne muoyo mujima batu anu ‘badisunsula mubidi mujima ne tunyinganyinga tua bungi.’​—1 Tim. 6:9, 10.

Bia disanka, bansonga ba bungi mbapete disanka ne bukubi bidi binenga padibu basungule bua kuenza midimu ya pa buayi. Eric udi wamba ne: “Ndi mubuele mu ‘tshisumbu’ tshinene tshia batendeledi ba Yehowa badi benza midimu ya pa buayi. Etshi ke tshisumbu tshitambe buimpe tshindi mubuele, ne ndi ngela Yehowa tuasakidila bua mudiye mundeje njila umuepele udi ufikisha ku diakalenga ne disanka dilelela mu nsombelu.”

Malu adi bishi buebe wewe? Pamutu pa kulonda bipatshila bia panu, kuenaku mua kuangata mudimu wa bumpanda-njila bua kushindamija ‘njila yebe’ bikole kumpala kua Yehowa anyi?​—Tangila kazubu ka ne: “ Peta masanka adi tulasa tua iniversite katuyi mua kufila.”

Pavua muanetu wa balume mukuabu ne mukajende baye kumona Betele wa mu États-Unis, bakamona muvua bena mu dîku dia Betele badi benzela Yehowa mudimu muaba eu bikale ne disanka. Mukajende wakalua kufunda ne: “Tukavua badifile bikole mu bituvua tuenza.” Bana betu aba bakangata dipangadika dia kulamaku dîba ne bukole bua kuvudija mudimu wabu wa buambi.

Kabivua bipepele bua bena mu dîku aba kushintulula malu mu mushindu wa nunku to. Kadi dimue dituku, bakela meji pa mvese wa dituku adi. Mvese au uvua wa Yone 8:31 mudi mêyi a Yezu a ne: “Nuenu bashale mu dîyi dianyi nudi bayidi banyi bulelela.” Pavuabu bashale balame bualu ebu mu lungenyi, bakela meji ne: “Tshionso tshitudi tuenza bua kupepeja nsombelu wetu tshidi tshitulomba bua kudipangisha amue malu.” Bakapana nzubu wabu munene, kudiumbushilabu majitu makuabu ne kuyabu mu tshisumbu muvuabu dijinga ne diambuluisha. Badi mpindieu bampanda-njila ne badi bambuluisha kabidi mu dibaka dia Nzubu ya Bukalenge ne benza kabidi midimu ya budisuile mu mpungilu ya distrike. Badi badiumvua bishi? Badi bamba ne: “Disanka ditudi nadi bua mutudi ne nsombelu mupepele ne tuenza anu tshidi bulongolodi bua Yehowa butulomba bua kuenza didi ditukolesha.”

Solomo wakafunda ne: ‘Mêsu ebe atangile kumpala kuebe, kaakenzakanyi, bilafinyi biebe bishale bitabale bitangile kumpala.’ (Nsu. 4:25) Anu mutu muendeshi wa mashinyi utangija mêsu ende mu njila, ke mutudi petu ne bua kuepuka ditanaji dionso didi mua kutupangisha bua kudifundila bipatshila bia mu nyuma ne kubikumbaja.

Mbipatshila kayi bia mu nyuma biudi mua kudifundila ne kukumbaja? Bushuwa, kuenza midimu ya pa buayi ntshipatshila tshimpe. Tshipatshila tshikuabu tshidi mua kuikala tshia kuenza mudimu mu tshisumbu tshia pabuipi tshidi dijinga ne bamanyishi ba  lumu luimpe bapiluke badi mua kuyisha mu teritware watshi munene. Tshisumbu kampanda tshidi mua kuikala ne bamanyishi bimpe ba bungi, kadi katshiyi ne bakulu ne basadidi ba mudimu bungi bukumbane to. Kuenaku mua kuambuluisha mu umue wa ku mishindu eyi anyi? Bua tshinyi kuenaku mua kuyukila ne mutangidi wa tshijengu bua kumanya biwikala mukumbane pebe bua kufila diambuluisha? Wewe musue kuya miaba ya kule bua kuyisha, udi mua kulomba malu a mushinga adi atangila bisumbu bia kule bidi dijinga ne diambuluisha. *

Tupinganayi ku tshidibu baleje mu Yeshaya 62:10. Bamue bena Yuda bavua mua kuikala benze mudimu mukole bua kulandakaja ne kutokesha njila wa kupinganyina kuabu bua bantu ba Nzambi bafike kuvuabu baya. Biwikala udienzeja bua kukumbaja bipatshila kampanda mu mudimu wa tshijila, kutshioki to. Nzambi yeye mukuambuluishe, udi pebe mua kukumbaja bipatshila ebi. Tungunuka ne kulomba Yehowa meji paudi udienzeja bua kumbusha bipumbishi bidi kumpala kuebe. Bushuwa, udi mua kumona mudiye ukuambuluisha bua ‘kubatamijila makasa ebe njila.’​—Nsu. 4:26.