Dibala dia bibejibeji bia Tshibumba tshia Nsentedi bishale ebi divua dikusankishe anyi? Nanku, anji tangila ni udi mua kuandamuna nkonko idi ilonda eyi:

Ndîba kayi divuabu ne bua kushipa muana wa mukoko mu dia 14 Nisana?

Imue nkudimuinu ya Bible idi yamba ne: bavua ne bua kushipa muana wa mukoko ‘pankatshi pa madilolo abidi,’ mmumue ne: dilolo peshi padi dîba dibuela kadi kumpala kua butuku kuila. (Ekes. 12:6)​—12/15, dibeji dia 18-19.

Bansonga badi mua kutumikila mêyi manene kayi bua kuangata mapangadika ne meji?

Kudi mêyi manene asatu: 1) Kukeba tshia kumpala Bukalenge bua Nzambi ne buakane buende. (Mat. 6:19-34) 2) Kupeta disanka mu dienzela bakuabu mudimu. (Bien. 20:35) 3) Kuenzela Nzambi mudimu mu tshikondo tshia bunsonga. (Muam. 12:1)​—15/1, dibeji dia 19-20.

Mbendeshi kayi ba tubalu banayi badi mu lubilu katshia mu 1914?

Bu mudi Yezu wendesha kabalu katoke, mmumbushe Satana ne bademon bende mu diulu. Muendeshi wa kabalu ka dikala dikunze kunzuu udi uleja mvita idi mitatshishe bukua bantu. Muendeshi wa kabalu kafike udi uleja nzala. Muendeshi wa kabalu kutokoloke udi ukebesha lufu ku diambuluisha dia bipupu ne udi ushipa bantu miliyo ya bungi. (Buak. 6:2-8)​—1/2, dibeji 6-7.

Ndîba kayi dienzeka “dibaka dia Muana wa mukoko”? (Buak. 19:7)

“Dibaka dia Muana wa mukoko” didi dienzeka panyima pa Mukalenge Yezu Kristo mumane kutshimuna mvita yende, mmumue ne: panyima pa bamane kubutula Babulona munene ne mvita ya Armagedone mimane kuenzeka.​—15/2, dibeji dia 10.

Bua tshinyi bena Yuda ba mu matuku a Yezu bavua “batekemene” Masiya? (Luka 3:15)

Katuena mua kuamba kujadika ne: bena Yuda ba mu bidimu lukama bia kumpala bavua bumvue mulayi wa Danyele uvua wakula bua Masiya bu mutudi tuwumvua to. (Dan. 9:24-27) Kadi, bavua mua kuikala bumvue dimanyisha divua muanjelu muambile balami ba mikoko peshi tshivua muprofete mukaji Ana muambe pavuaye mumone Yezu utshivua muana ku ntempelo. Bena lubuku lua mitoto bavua pabu balue kukeba ‘mukalenge wa bena Yuda uvuabu balele.’ (Mat. 2:1, 2) Pashishe, Yone Mubatiji wakaleja ne: Kristo uvua ne bua kumueneka mu matuku makese.​—15/2, dibeji dia 26-27.

Ntshinyi tshitudi mua kuenza bua Eyowa wetu kalu Tòo? (2 Kol. 1:18)

Bushuwa, bualu kampanda budi butupite makanda budi mua kuenza bua imue misangu katukumbaji tshitudi balaye. Kadi tuetu balaye peshi bitabe bualu kampanda, tudi ne bua kuenza tshionso tshitudi mua kukokesha bua kubukumbaja.​—15/3, dibeji dia 32.

Mmunyi mutudi mua kukandamena lungenyi lua ditangila malu a porno?

Malu asatu a mushinga atudi mua kuenza: 1) Kumbusha ne lukasa mêsu etu patudi kumpala kua bimfuanyi bibi. 2) Kulama lungenyi luetu pa kulutuma ku malu mimpe ne kusambila Nzambi. 3) Kuepuka filme peshi site ya Enternete idi ne malu a porno.​—1/4, dibeji dia 10-12.

Mbipeta kayi bibi bidi kabiyi bielela meji bidi mua kumueneka padi muena Kristo mulume anyi mukaji ushiya dîku diende bua kuya kukeba makuta mu ditunga dikuabu?

Padi baledi basungula bua kushiyangana ne bena mu mêku abu, bana badi mua kukenga mu lungenyi ne bikadilu biabu bidi mua kunyanguka. Dinanga diabu kudi baledi didi mua kukepa. Bena dibaka badi bashiyangane badi mua kutetshibua bua kuenda masandi.​—15/4, dibeji dia 19-20.

Bua tshinyi bavua batshibula mikolo ya benji ba malu mabi bavuabu bashipa ku mutshi?

Bena Lomo bavua bashipele bamue benji ba malu mabi ku mitshi. Bena Yuda bakalomba bua batshibule mikolo ya benji ba malu mabi pamue ne ya Yezu. Ebi bivua bipangisha benji ba malu mabi bua kueyela, ne bavua bafua ne lukasa. Nunku, kabivua ne mushinga bua kubashiya ku mutshi butuku bujima to. (Dut. 21:22, 23)​—1/5, dibeji dia 11.

Nnkonko kayi inayi itudi ne bua kuvuluka patudi tuya kudi bantu mu buambi?

Mbanganyi bandi nyisha? Mmuaba kayi undi mbayishila? Ndîba kayi dindi mbayisha? Mmushindu kayi undi mua kubayisha?​—15/5, dibeji dia 12-15.

Mmunyi mudi kunua makanya kukebesha lufu?

Mu bidimu lukama bishala ebi, makanya mmashipe bantu 100 000 000. Lelu adi ashipa bantu batue ku 6 000 000 ku tshidimu.​—1/6, dibeji 3.