1. Ntshinyi tshidi ne muaba wa pa buawu mu ntendelelu wetu?

KUTUKU muanji kumona bafunde dîna Yehowa ku tshimanu kampanda peshi ku nzubu minene ya dilamina bintu bia kale anyi? Kakuyi mpata bivua bikukemeshe ne bikusankishe. Kadi dîna dia Nzambi didi ne muaba wa pa buawu mu ntendelelu wetu bualu tudi Bantemu ba Yehowa. Pa buloba bujima kakuena tshisumbu tshikuabu tshia bantu tshidi tshienza mudimu ne dîna dia Nzambi bu tuetu to. Kadi, tudi bamanye ne: diakalenga ditudi nadi dia kuikala ne dîna dia Nzambi didi dilomba kuenza malu kampanda.

2. Diakalenga ditudi nadi dia kuikala ne dîna dia Nzambi didi ditulomba bua kuenza tshinyi?

² Yehowa kena utuanyisha anu bualu tudi tuenza mudimu ne dîna diende to. Kadi tudi ne bua kuenza malu mu diumvuangana ne mikenji yende minene idi itangila bikadilu bilenga. Ke bualu kayi Bible udi utudimuija ne: bantu ba Yehowa badi ne bua ‘kumbuka ku malu mabi.’ (Mus. 34:14) Mupostolo Paulo wakaleja patoke dîyi dinene edi pakafundaye ne: “Muntu yonso udi utela dîna dia Yehowa, alekele malu adi kaayi makane.” (Bala 2 Timote 2:19.) Bu mutudi Bantemu  ba Yehowa, mbatumanye bikole bua mutudi tuenza mudimu ne dîna diende. Kadi mmunyi mutudi mua kulekela malu mabi?

3, 4. Mmêyi kayi avua makolele bamue bamanyi ba malu a mu Bible bua kumvua? Bua tshinyi?

³ Mu 2 Timote 2:19 Paulo udi wakula bua “tshishimikidi tshikole tshia Nzambi.” Mbafunde pa tshishimikidi etshi mamanyisha abidi. Dimanyisha dia kumpala dia ne: “Yehowa mmumanye badi bende” didi bushuwa diangatshila mu Nomba 16:5. (Tangila tshiena-bualu tshishale.) Dimanyisha dibidi dia ne: “Muntu yonso udi utela dîna dia Yehowa, alekele malu adi kaayi makane” nditatshishe bikole bamanyi ba malu a mu Bible bua kudiumvua. Bua tshinyi?

⁴ Mêyi a Paulo aa adi amueneka bu ne: mmangatshila muaba kampanda. Kadi, kakuena mvese nansha umue wa mu Mifundu ya tshiena Ebelu udi upetangana ne mêyi a Paulo aa to. Nunku Paulo uvua wakula bua tshinyi pavuaye muambe ne: “Muntu yonso udi utela dîna dia Yehowa, alekele malu adi kaayi makane”? Kumpala kua Paulo kuambaye mêyi aa, uvua mutele mêyi a mu Nomba nshapita wa 16 udi wakula bua buntomboji bua Kola. Dimanyisha dibidi edi didiku mua kuikala padi diakula bua buntomboji ebu anyi?

5-7. Mu 2 Timote 2:19, Paulo uvua wakula bua bualu kayi bua mu matuku a Mose? (Tangila tshimfuanyi tshia ntuadijilu.)

⁵ Bible udi wamba ne: Datana ne Abilama bana balume ba Eliaba bakadisangisha ne Kola ne kuluabu bantomboji banene bua kuluisha Mose ne Alona. (Nom. 16:1-5) Bakabenga patoke bua kunemeka Mose ne bakabenga bukokeshi buvua Nzambi mumupesha. Bantomboji aba bakatungunuka ne kuikala munkatshi mua bantu ba Yehowa, nunku bavua njiwu kudi batendeledi ba Nzambi ba lulamatu. Pakakumbana tshikondo bua Yehowa kuleja dishilangana divua pankatshi pa batendeledi bende ba lulamatu ne bantomboji, wakela mukenji kampanda musunguluke.

⁶ Bible udi wamba ne: ‘Yehowa wakambila Mose ne: wambile tshisumbu tshionso ne: umbukayi ku nzubu wa tshitendelelu wa Kola ne Datana ne Abilama. Mose wakabika, wakaya kudi Datana ne Abilama; ne bakulu ba mu Isalele bakamulonda kunyima. Yeye wakambila tshisumbu tshia bantu ne: umbukayi, ndi nnusengelela, ku ntenta ya bantu aba babi, kanulengi tshintu tshiabu tshianza, kabanushipi bua mibi yabu. Nunku bakumbuka [diakamue] ku nzubu wa tshitendelelu wa Kola ne Datana ne Abilama ku nseke yonso.’ (Nom. 16:23-27) Nunku Yehowa wakashipa bantomboji bonso. Kadi, bantu bavua ne lulamatu kudi Nzambi bakashala ne muoyo bualu bavua balekele malu mabi pavuabu bumbuke kudi bantomboji.

⁷ Pavua Paulo muambe mu 2 Timote 2:19 ne: “Yehowa mmumanye badi bende,” uvua mutele mêyi a mu Nomba 16:5. Pavuaye muambe kabidi ne: “Muntu yonso udi utela dîna dia Yehowa, alekele malu adi kaayi makane,” uvua mua kuikala wakula bua muyuki udi mu Nomba 16:23-27. Nunku bidi bimueneka ne: mbikumbane bua kuamba ne: malu onso abidi aa adi akula bua tshilumbu tshimue. Malu abidi aa adi atulongesha tshinyi? Adi atulongesha ne: Yehowa udi umona mu muoyo. Mmumanye bantu badi bamuenzela mudimu ne lulamatu ne mmutekemene bua bumbuke kudi bantu babi.

8. Bua tshinyi kuenza mudimu ne dîna dia Yehowa peshi kuikala mu tshisumbu tshia bena Kristo nkayaku ki nkukumbane?

⁸ Pavua Paulo mutele malu a mu matuku a Mose, uvua uvuluija Timote bua muvuabi ne mushinga bua kuenza malu ne muoyo mujima bua kukuba malanda ende ne Yehowa avua ne mushinga. Kuikala mu tshisumbu tshia bena Kristo nkayaku kakuvua kukumbane to, anu bu muvua kubikila patupu dîna dia Yehowa mu matuku a Mose kakuyi kukumbane. Batendeledi ba Yehowa ba lulamatu badi ne bua kulekela ne  muoyo mujima malu adi kaayi makane. Bualu ebu buvua bulomba Timote bua kuenza tshinyi? Mmalongesha kayi adi bantu ba Yehowa lelu mua kupetela mu mêyi avua Paulo mufunde ku diambuluisha dia nyuma muimpe aa?

9. “Dikokangana dia malu mapote ne didi kadiyi ne mutu” divua mua kukebesha tshinyi mu tshisumbu tshia bena Kristo?

⁹ Dîyi dia Nzambi didi difila mibelu misunguluke bua ditangila malu mabi adi bena Kristo ne bua kulekela peshi kubenga. Tshilejilu, mu 2 Timote 2:19 Paulo udi wambila Timote bua “kubenga kukokangana bua miaku” ne bua ‘kuepuka biyukiyuki bia tshianana.’ (Bala 2 Timote 2:14, 16, 23.) Bamue bena mu tshisumbu bavua balongesha malongesha a batontolodi. Bidi bimueneka kabidi ne: bakuabu bavua bamba malu avua akebesha makokangana. Nansha muvua malu avuabu bamba kaayi abengangana buludiludi ne tshidi Bible wamba, avua akosoloja bantu ne anyanga buobumue bua tshisumbu. Nunku, Paulo wakaleja muvuabi ne mushinga bua ‘kuepuka dikokangana dia malu mapote ne didi kadiyi ne mutu.’

10. Tudi ne bua kuenza tshinyi patudi tutuilangana ne batontolodi?

¹⁰ Lelu, bantu ba Yehowa kabatu misangu yonso ne batontolodi mu tshisumbu to. Kadi, padibu badimona kumpala kua malongesha adi kaayi a mu Bible, badi baabenga ne muoyo mujima nansha wowu afumina kudi nganyi. Mbibi bua kukokangana ne batontolodi mpala ne mpala, kubandamuna ku Enternete nansha mu mushindu kayi wonso wa diyukidilangana. Nansha tuetu tujinga kuambuluisha muntu, muyuki wa nunku udi ubengangana ne mêyi a mu Bible atudi tufuma ku dikonkonona. Kadi bu mutudi bantu ba Yehowa tudi tuepuka butontolodi ne mu katoba.

11. Ntshinyi tshidi mua kukebesha ‘dikokangana didi kadiyi ne mutu’? Bakulu bena Kristo badi ne bua kuenza tshinyi bua kuikala tshilejilu tshimpe?

¹¹ Pa kumbusha butontolodi, kudi malu makuabu adi mua kunyanga ditalala mu tshisumbu. Tshilejilu, kuikala ne mmuenenu mishilangane bua dijikija dia lutetuku kudi mua kukebesha “dikokangana dia malu mapote ne didi kadiyi ne mutu.” Eyowa, bantu bobu banyisha dijikija lutetuku didi dibengangana ne mikenji ya Yehowa ya bikadilu bimpe, bakulu bena Kristo kabena ne bua kulekela lungenyi lua nunku mu tshisumbu anu bua kuepuka dikokangana to. (Mus. 11:5; Ef. 5:3-5) Kadi bakulu badi ne bua kuikala badimuke bua kubenga kuenzeja bantu bua kulonda anu mmuenenu wabu. Badi batumikila mubelu udibu bapeshe bakulu bena Kristo wa ne: ‘Nulame tshisumbu tshia mikoko ya Nzambi tshidi mu bianza bienu, kanuyi bu badi bakokesha ne bumfumu pa bantu badi bumpianyi bua Nzambi, kadi nulue tshilejilu kudi mikoko.’​—1 Pet. 5:2, 3; bala 2 Kolinto 1:24.

12, 13. a) Bantemu ba Yehowa batu ne lungenyi kayi bua bidi bitangila disungula mushindu kampanda wa dijikija lutetuku? Mmêyi kayi manene a mu Bible atubu balonda? b) Mmunyi mudi mêyi manene atudi bakonkonone mu tshikoso tshia 12 atangila malu a bungi adi atangila muntu nkayende?

¹² Mu tshilumbu tshia dijikija lutetuku, bulongolodi buetu kabutu butangila filme kampanda, manaya a ku ordinatere, mikanda peshi misambu kansanga bua kulua kutuelela mikenji bua bitudi ne bua kuepuka to. Bua tshinyi? Bualu Bible udi ulomba muntu yonso bua ‘kuibidija bukole buende bua kujingulula bua kutapulula tshidi tshimpe ne tshidi tshibi.’ (Eb. 5:14) Mu Bible mudi mêyi manene adi bena Kristo mua kulonda bua kusungula mushindu wa dijikija lutetuku. Mu nsombelu yonso, tshipatshila tshietu tshidi ne bua kuikala tshia ‘kutungunuka ne kukeba mua kumanya malu adi Mukalenge wanyisha.’ (Ef. 5:10) Bible udi ulongesha ne: bamfumu ba mêku badi ne bukokeshi, nunku badi mua kukandika bena mu dîku diabu bua kujikija lutetuku ne mushindu kampanda. *​—1 Kol. 11:3; Ef. 6:1-4.

 ¹³ Mêyi manene a mu Bible atukadi bakuila aa kaena atangila anu mushindu wa dijikija lutetuku to. Mmuenenu mushilangane bua mvuadilu ne didilengeja, luondapu ne biakudia ne malu makuabu bidi kabidi mua kukebesha makokangana. Kadi padi muntu kayi mushipe dîyi dinene dia mu Bible, bantu ba Yehowa batu badikanda bua kukokangana bua malu aa, “bualu mupika wa Mukalenge kena ne bua kuluangana, kadi udi ne bua kuikala muena bupole kudi bantu bonso.”​—2 Tim. 2:24.

14. Ntshilejilu kayi tshivua Paulo mufile bua kuleja mudibi ne mushinga bua kuepuka malunda mabi?

¹⁴ Mmu mushindu kayi mukuabu mudi bantu badi ‘batela dîna dia Yehowa, balekela malu adi kaayi makane’? Mpadibu bepuka kudia bulunda ne bantu badi benza malu mabi. Mbikumbane bua muvua Paulo mufile tshilejilu tshikuabu panyima pa yeye mumane kufila tshilejilu tshia “tshishimikidi tshikole tshia Nzambi.” Wakafunda bua “nzubu munene” udi kayi anu ne ‘bivuadi bia ngolo ne bia tshiamu tshia arjan to, kadi udi kabidi ne bia mitshi ne bia dîma, bikuabu bia mudimu wa bunême, kadi binga bia mudimu udi kawuyi wa bunême.’ (2 Tim. 2:20, 21) Pashishe wakadimuija bena Kristo bua ‘kuikala kule’ anyi kumbuka kudi bivuadi bia mudimu udi “kawuyi wa bunême.”

15, 16. Ntshinyi tshitudi mua kulongela ku tshilejilu tshia “nzubu munene”?

¹⁵ Tshilejilu etshi tshidi tshiumvuija tshinyi? Paulo udi ufuanyikija tshisumbu tshia bena Kristo ne “nzubu munene,” ne ufuanyikija bena mu tshisumbu ne bivuadi peshi bintu bia mu nzubu. Bimue bivuadi bia mu nzubu bidi mua kunyanguka kuoku bintu kampanda bia njiwu anyi bidi mua kufila masama bidi bibinyange. Biobi bienzeke nanku, muena nzubu udi mua kuteka bidi bimpe bu mudi bia kulamba nabi ku luseke, ubitapulula ne bidi bibi.

¹⁶ Bia muomumue, bantu ba Yehowa lelu badi badienzeja bua kuikala ne nsombelu mukezuke kabena ne bua kudia bulunda ne bena mu tshisumbu badi babenga kutumikila mêyi manene a Yehowa to. (Bala 1 Kolinto 15:33.) Bikalabi ne: tudi ne bua kuenza nunku bua bamue  badi mu tshisumbu, katuenaku ne bua ‘kulekela’ kudia bulunda ne bantu badi kabayi ba mu tshisumbu anyi? Ba bungi ba kudibu ‘mbanangi ba makuta, kabayi batumikila baledi babu, kabayi ne lulamatu, bashiminyinyanganyi ba malu, bena luonji, kabayi banange malu mimpe, batungidianganyi, banangi ba masanka pamutu pa kuikala banangi ba Nzambi.’​—2 Tim. 3:1-5.

17. Mmunyi muvua bena Isalele bavua ne lulamatu benze malu avua aleja ne: bavua babenga malu avua kaayi makane?

¹⁷ Bible udi uleja mushindu musunguluke uvua bena Isalele benze bualu kampanda ne muoyo umue pavuabu babambile bua ‘kumbuka ku nzubu wa tshitendelelu wa Kola ne Datana ne Abilama.’ Bible udi wamba ne: ‘diakamue bakumbuka.’ (Nom. 16:24, 27, NWT) Kabavua belakane anyi bajingakane to. Mifundu idi ileja kabidi muvuabu benza malu ne budimu. ‘Bakumbuka ku nseke yonso.’ Bantu bavua ne lulamatu kabavua ne bua kupeta njiwu nansha mikese to. Kabavua batumikile mu amue malu balekele makuabu anyi bikale ne muoyo mukuatshidile to. Bakasungula bua kuikala ku luseke lua Yehowa ne kubenga malu adi kaayi makane. Mmalongesha kayi atudi tupeta mu tshilejilu etshi?

18. Pavua Paulo mudimuije Timote bua kunyema majinga a bunsonga, uvua usua kuamba tshinyi?

¹⁸ Tuetu basue kulama malanda etu ne Yehowa tudi ne bua kuenza malu ne lukasa ne muoyo mujima. Ke lungenyi lutudi tupetela mu mêyi avua Paulo muambe pavuaye mudimuije Timote bua ‘kunyema majinga a bunsonga.’ (2 Tim. 2:22) Tshikondo atshi Timote ukavua nsonga pamuapa ne bidimu 30 ne bia pa mutu. Nansha nanku, ‘majinga mabi a bunsonga’ kaatu alonda anu bidimu bidi muntu nabi to. Pavua Timote upeta majinga mabi uvua ne bua ‘kuanyema.’ Mu mêyi makuabu, Timote uvua ne bua ‘kulekela malu adi kaayi makane.’ Yezu wakamba bualu bua muomumue pakalejaye ne: “Bikala dîsu diebe dikulenduisha, uditule, udimanshe.” (Mat. 18:9) Lelu, bena Kristo badi batumikila mubelu eu badi batantamena ne muoyo mujima nsombelu idi mua kunyanga buena Kristo buabu kabayi belakana anyi bajingakana to.

19. Mmunyi mudi bamue bantu lelu benza malu ne muoyo mujima bua kubenga kunyanga malanda abu ne Yehowa?

¹⁹ Bamue bantu bavua ne tshibidilu tshia kukuatshika maluvu kumpala kua kuluabu Bantemu, mbangate dipangadika dia kubenga kunua tumaluvu nansha tukese. Bakuabu badi babenga mishindu kampanda ya dijikija lutetuku idi kayiyi mibi kadi idi mua kusonsola butekete buabu mu malu a bikadilu bilenga. (Mus. 101:3) Tshilejilu, kumpala kua muanetu wa balume kampanda kuluaye Ntemu uvua musue kuya mu bibilu bia dija dia maja muvua bantu benza malu a busenji. Kadi pakalongaye bulelela wakalekela dija dia maja nansha mu bibilu bia Bantemu bualu ki mmusue bua kudijula majinga mabi anyi kuvuluka malu mabi a kale. Bushuwa, Kabena balomba bena Kristo bua kulekela ne mu katoba maluvu, maja anyi malu makuabu adi kaayi mabi to. Kadi tudi ne bua kuenza tshionso tshidi tshikengela ne muoyo mujima bua kulama malanda etu ne Nzambi.

20. Nansha mudibi kabiyi bipepele bua ‘kulekela malu adi kaayi makane,’ ntshinyi tshidi tshitupesha dieyemena ne tshitukankamija?

²⁰ Diakalenga ditudi nadi dia kuikala ne dîna dia Nzambi didi ditulomba bua kuenza malu kampanda. Tudi ne bua ‘kulekela malu adi kaayi makane’ ne ‘kumbuka ku malu mabi.’ (Mus. 34:14) Bulelela kabitu anu bipepele bua kuenza nunku misangu yonso to. Kadi bidi bitukolesha patudi tumanya ne: Yehowa udi unanga misangu yonso bantu “badi bende” ne badi balonda njila yende miakane.​—2 Tim. 2:19; bala 2 Kulondolola 16:9a.