1, 2. a) Kuikala ntemu kudi kumvuija tshinyi? Mmunyi mudi bikandakanda ne tudiomba bia pa buloba bipangile bua kukumbaja bualu ebu? b) Bua tshinyi kabiena bitonda Yehowa bua mudi bikandakanda ne tudiomba bia pa buloba kabiyi biamba bulelela buonso bua bidi bimutangila?

KUIKALA ntemu anyi mumanyi kudi kumvuija tshinyi? Nkonga miaku kampanda udi umvuija muaku eu ne: “Ntemu mmuntu udi umona bualu kampanda ne wamba tshidi tshienzeke.” Tshilejilu, kukadi bidimu bipite pa 160 bidibu bapatula tshikandakanda kampanda tshidibu babikila lelu ne: Ntemu (Angl.) mu tshimenga tshia Pietermaritzburg mu Afrique du Sud. Dîna edi nditshikumbanyine bualu tshipatshila tshia tshikandakanda etshi ntshia kuamba malu adi enzeka pa buloba anu mudiwu. Mupatudi wa tshikandakanda etshi wakaditshipa ne: tshivua ne bua kuamba “bulelela, bulelela buonso, anu bulelela.”

² Kadi bia dibungama, bikandakanda ne tudiomba bia pa buloba bujima kabiena biamba bulelela buonso bua malu a mushinga a mu nsombelu wa bantu to. Kadi, nansha mudibi kabiyi bifila ngumu milelela bua Nzambi ne bua malu adiye wenza, bualu ebu kabuena bumuambila bualu to. Wakamba ku diambuluisha dia muprofete Yehezekele ne: ‘Ba mu bisamba bia bantu nebamanye ne: meme ndi Yehowa.’ (Yeh. 39:7) Udi ne Bantemu bende batue ku miliyo muanda mukulu badi bambila bantu ba mu bisamba bionso malu ende a kale ne adiye wenzela bantu matuku etu aa. Tshiluilu tshia Bantemu etshi tshidi kabidi tshimanyisha malu mimpe adi Nzambi mulaye bua kuenzela bantu mu matuku adi alua. Patudi tuteka mudimu wa  bumanyishi eu pa muaba wa kumpala, tudi tuleja mutudi bushuwa bakumbanyine dîna didi Nzambi mutupeshe edi anu mudibi bileja mu Yeshaya 43:10 ne: ‘Yehowa udi wamba ne: nuenu nudi bamanyi banyi, ne nudi muntu wanyi ungakusungula.’

3, 4. a) Ntshidimu kayi tshivua Balongi ba Bible bangate dîna dipiadipia? Bavua badiumvue bishi bua dîna edi? (Tangila tshimfuanyi tshia ntuadijilu.) b) Netuandamune nkonko kayi?

³ Kuikala ne dîna dia Yehowa ndiakalenga dinene bualu udi ‘Mukalenge wa kashidi’ ne udi wamba ne: ‘Edi ndîna dianyi tshiendelele, etshi ntshivulukidi tshianyi kudi bantu bonso.’ (1 Tim. 1:17; Ekes. 3:15; fuanyikija ne Muambi 2:16.) Mu 1931, Balongi ba Bible bakangata dîna dia Bantemu ba Yehowa. Pashishe, bakapatula mu tshibejibeji etshi mikanda ya bungi ivuabu bafunde bua kuleja dianyisha. Tshisumbu kampanda tshia mu Canada tshiakafunda ne: “Lumu luimpe lua ne: tudi ‘Bantemu ba Yehowa’ ndutambe kutusankisha bikole ne ndukoleshe dipangadika dietu dia kuenza malu adi atumbishisha Yehowa.”

⁴ Ntshinyi tshiudi mua kuenza bua kuleja dianyisha bua diakalenga diudi nadi dia kuikala ne dîna dia Nzambi? Udiku mua kumvuija bua tshinyi Yehowa udi utubikila ne: Bantemu bende anu mudibi bileja mu mukanda wa Yeshaya anyi?

5, 6. a) Baledi bena Isalele bavua bantemu ba Yehowa mu mushindu kayi? b) Mbualu kayi bukuabu buvuabu balombe baledi bena Isalele bua kuenza? Bua tshinyi bualu ebu budi kabidi butangila baledi ba lelu?

⁵ Muena Isalele yonso wa mu matuku a Yeshayi uvua ‘mumanyi’ anyi ntemu wa Yehowa ne tshisamba tshijima tshivua “muntu” wa Nzambi. (Yesh. 43:10) Umue mushindu uvua baledi bena Isalele bamanyisha uvua wa kulongesha bana babu malu avua Nzambi muenzele bankambua babu. Tshilejilu, pavuabu babambile bua kuenza tshibilu tshia Pasaka tshidimu tshionso, Nzambi wakabambila ne: ‘Panukonka bana benu ne: nudi nuenzela tshilele etshi tshinyi? nenubambile ne: tshidi tshintu tshishipa tshia kupita kua Yehowa, yeye wakapita pa mutu pa nzubu ya bena Isalele mu Ejipitu, pakashipaye bena Ejipitu, ne  wakasungila nzubu yetu.’ (Ekes. 12:26, 27) Baledi aba bavua kabidi mua kuikala bambile bana babu ne: pavua Mose muye kudi Palô mukalenge wa mu Ejipitu bua musangu wa kumpala bua kumulomba dianyisha bua bena Isalele kuya kutendelela Yehowa mu tshipela, Palô wakandamuna ne: ‘Yehowa nganyi? Tshiena ngitabuja dîyi diende bua kulekela bena Isalele.’ (Ekes. 5:2) Bushuwa, bavua mua kuikala babalondele kabidi ne: panyima pa bipupu dikumi bimane kunyanga buloba bua Ejipitu ne bena Isalele bapanduke mu bianza bia tshiluilu tshia Ejipitu ku Mbuu Mukunze, diandamuna ku lukonko lua Palô diakamueneka patoke kudi bantu bonso. Yehowa uvua Wa bukole buonso ne utshidi nanku. Tshisamba tshia Isalele tshiakadimuenena ne: Yehowa uvua Nzambi mulelela ne Mukumbaji wa malu adiye ulaya.

⁶ Kakuyi mpata bena Isalele bavua banyishe diakalenga dia kuikala ne dîna dia Yehowa bakambila bana babu ne benyi bavua balue bapika mu nzubu yabu malu mimpe aa. Bukuabu bualu bua mushinga budi ne: bavua balombe bena Isalele bua kulongesha bana babu bua kutumikila mikenji ya Nzambi ya tshijila. Yehowa wakamba ne: “Nuikale bantu ba tshijila bualu bua meme Yehowa, Nzambi wenu, ndi wa tshijila.” (Lew. 19:2; Dut. 6:6, 7) Mbashile baledi bena Kristo lelu tshilejilu tshimpe bualu badi pabu ne bua kulongesha bana babu bua kuikala ba tshijila, nunku babambuluisha bua kutumbishisha dîna dinene dia Nzambi.​—Bala Nsumuinu 1:8; Efeso 6:4.

7. a) Pavua bena Isalele balamate Yehowa, ntshinyi tshivua bualu ebu busake bisamba bivua bibanyunguluke bua kuenza? b) Mbujitu kayi budi nabu bantu bonso badi ne dîna dia Nzambi?

⁷ Nunku pavua bena Isalele balamata Nzambi, bavua bafila bumanyishi buimpe bua dîna dia Nzambi. Bavua babambile ne: ‘Bantu bonso ba pa buloba nebamanye ne: nuenu nudi nubikidibua ku dîna dia Yehowa; bobu nebanutshine.’ (Dut. 28:10) Kadi bia dibungama, bena Isalele bakenza malu a bungi avua aleja dipanga lulamatu. Ku musangu ne ku musangu bavua bapingana ku ntendelelu ya mpingu mienza kudi bantu. Kabidi, anu bu nzambi ya bena Kanâna ivuabu batendelela, bakalua bena tshikisu, bavua balambula bana babu pa kapia ne bakengesha bapele. Bualu ebu budi butupesha dilongesha dinene bua tuetu kudienzeja bua kuikala ba tshijila anu bu Eu udi Mutambe tshijila, muena dîna ditudi bambule.

8. Yehowa uvua mupeshe Yeshayi mudimu kayi? Yeshayi wakadiumvua mushindu kayi?

⁸ Yehowa uvua mumanyishe muvua tshisamba tshia Isalele mua kumona muvuaye mua kubumbusha mu bupika mu mushindu uvua ukemesha. (Yesh. 43:19) Nshapita isambombo ya ntuadijilu ya mu mukanda wa Yeshaya idi ne madimuija a bungi adi atangila dikenga kampanda divua ne bua kukuata Yelushalema ne bimenga bivua bimunyunguluke. Yehowa, mubadi munene wa mu muoyo wakambila Yeshayi bua kutungunuka ne kumanyisha didimuija edi nansha muvuaye mua kutuilangana ne buluishi bukole. Bivua bitonde Yeshayi ne wakajinga bua kumanya bule bua tshikondo tshivua tshisamba tshia Nzambi mua kushala katshiyi tshinyingalale. Nzambi wakamuambila tshinyi? Wakamuambila ne: ‘Too ne pabutuka misoko mishale mutupu, too ne pashala nzubu idimu mutupu; too ne palua buloba kushala anu tshipela tshia patupu.’​—Bala Yeshaya 6:8-11.

9. a) Ndîba kayi divua mulayi wa buprofete wa Yeshayi uvua utangila Yelushalema mukumbane? b) Nnsombelu kayi udiku lelu udi utulomba bua kuikala badimuke?

⁹ Bakapesha Yeshayi mudimu eu ku ndekelu kua bukokeshi bua mukalenge Uziya peshi pabuipi ne 778 kumpala kua Yezu. Wakatungunuka ne kuenza mudimu wende wa buprofete munkatshi mua bidimu bitue ku 46 too ne panyima pa tshidimu tshia 732 kumpala kua Yezu, mu bukokeshi bua mukalenge Hezikiya, bidimu 125 kumpala kua kubutulabu Yelushalema mu 607 kumpala kua Yezu. Nunku, bakadianjila kumanyisha bantu ba Nzambi tshivua ne bua kuenzekela tshisamba tshiabu matuku avua alua. Lelu, Yehowa ukadi mumanyishe kabidi bantu bende  malu atshilualua. Kutuadijila anu ku nimero wa kumpala wa Tshibumba tshia Nsentedi uvuabu bapatule kukadi bidimu 135, badi badimuija bantu badi batshibala bua kumona ne: bukokeshi bubi bua Satana bukadi pa kujika mu katupa kîpi emu ne nebabupingane kudi bukokeshi bua Yezu bua bidimu tshinunu.​—Buak. 20:1-3, 6.

10, 11. Bena Isalele bavua mu Babulona bakamona dikumbana dia mulayi kayi wa buprofete wa Yeshayi?

¹⁰ Bena Yuda ba bungi bavua batumikile bua kudikokela kudi bena Babulona bakapanduka pakabutulabu Yelushalema ne bakaya nabu mu bupika mu Babulona. (Yel. 27:11, 12) Bidimu 70 pashishe, bantu ba Nzambi bakamona dikumbana dia mulayi wa dikema eu: ‘Yehowa, Mupikudi wenu, Wa Tshijila wa Isalele udi wamba nunku ne: bua bualu buenu, ngakutuma dîyi ku Babulona, nempuekeshe bonso badimu.’​—Yesh. 43:14.

¹¹ Mulayi eu wakakumbana mu mushindu wa dikema. Butuku kampanda mu ngondo wa 10 wa 539 kumpala kua Yezu, pavua mukalenge wa Babulona ne bantu bende banua mvinyo mu malonga a tshijila avuabu bambule mu ntempelo mu Yelushalema ne batumbisha nzambi yabu mienza kudi bantu, tshiluilu tshia bena Madai ne bena Pelasa biakatshimuna Babulona. Mu 538 peshi mu 537 kumpala kua Yezu, Kolesha uvua mutshimune Babulona wakatumina bena Yuda dîyi bua kupingana mu Yelushalema ne kuibakulula ntempelo wa Nzambi. Yeshayi ukavua mumanyishe malu onso aa, kusangisha ne mulayi wa ne: Yehowa uvua ne bua kukuba bantu bende bavua banyingalale ne kubapesha bivuabu nabi dijinga pavuabu benda bapingana mu Yelushalema. Nzambi wakababikila ne: ‘Bantu bangakudifukila bua bualu buanyi, bua bobo baleje bonso butumbi buanyi.’ (Yesh. 43:21; 44:26-28) Diakamue pakapingana bantu bavua mu bupika aba mu Yelushalema, bakibakulula ntempelo wa Yehowa ne bakamona muvua Yehowa, Nzambi umuepele mulelela ukumbaja dîyi diende misangu yonso.

12, 13. a) Mbanganyi bavua badisangishe ne bena Isalele bavua bajadikulula ntendelelu mulelela? b) Ntshinyi tshidibu balombe “mikoko mikuabu” idi itua “Isalele wa Nzambi” nyama ku mikolo bua kuenza? Idi ne ditekemena kayi?

¹² Bantu ba bungi bavua kabayi bena Isalele bakadisangisha ne bena Isalele, ne pashishe bantu bakuabu ba mu bisamba bia bende bakitaba buena Yuda. (Eze. 2:58, 64, 65; Ese. 8:17) Lelu, bena mu “musumba munene” wa “mikoko mikuabu” ya Yezu badi batua bena Kristo bela manyi badi benza “Isalele wa Nzambi” nyama ku mikolo. (Buak. 7:9, 10; Yone 10:16; Gal. 6:16) Bena mu musumba munene badi pabu ne dîna didi Nzambi mubapeshe dia Bantemu ba Yehowa.

¹³ Mu bukokeshi bua bidimu tshinunu bia Kristo, bena mu musumba munene nebikale ne disanka dinene dia kumvuija bantu babishibua ku lufu tshivua kuikala Bantemu ba Yehowa mu matuku a ku nshikidilu wa ndongoluelu wa malu eu kumvuija. Netuenze nanku anu tuetu tuenza malu mu diumvuangana ne dîna dietu lelu ne tudienzeja  bua kuikala ba tshijila. Kabidi, nansha tuetu tudienzeja mushindu kayi, tudi ne bua kulomba Yehowa dituku dionso bua atufuile luse patudi tupangila bua kutumikila mikenji yende, bamanye ne: tudi bena mibi ne kuikala ne dîna dia tshijila dia Nzambi mbualu bua mushinga mukole.​—Bala 1 Yone 1:8, 9.

14. Dîna Yehowa didi diumvuija tshinyi?

¹⁴ Bua tuetu kuvudija dianyisha dietu bua diakalenga dietu dia kuikala ne dîna dia Nzambi, mbimpe tuelangane meji bua diumvuija dia dîna edi. Dîna dia Nzambi didibu bakudimuna ne: “Yehowa” didi difumina ku muaku wa pa muanda wa mu tshiena Ebelu udi mua kuleja tshienzedi kampanda ne badi mua kuwukudimuna ne: “kulua.” Nunku, bidi biumvuika ne: dîna Yehowa didi diumvuija ne: “Eu udi uvuija.” Diumvuija edi didi bushuwa dipetangana ne mudimu udi Nzambi wenza bu Mufuki wa diulu ne buloba ne bifukibua bia meji ne kabidi bu Mukumbaji wa malu adiye mulongolole. Anu mudi malu adi menzeke aleja, udi utungunuka ne kuenza bua disua diende ne malu adiye mulongolole bikumbane nansha koku muluishi wa mushindu kayi, bu mudi Satana, udi wenza bua kunyanga disua dia Nzambi didi dienda dikumbana ku kakese ku kakese.

15. Mmu mushindu kayi muvua Yehowa muleje tshitupa tshia bumuntu buende mu diumvuangana ne diumvuija dia dîna diende? (Tangila kazubu ka ne: “ Dîna didi ne diumvuija dinene.”)

¹⁵ Pavua Yehowa mupeshe Mose mudimu wa kupatula bantu bende mu Ejipitu, wakaleja tshitupa tshia bumuntu buende pavuaye muenze mudimu ne muaku wa pa muanda kampanda bua kumvuija dîna diende, musangu eu wakula mu muntu wa kumpala ku bumue. Bible udi wamba ne: ‘Nzambi wakambila Mose ne: “Nendue tshindi nsungula bua kulua” [peshi, “nengikale tshingasua kuikala”]. Kuambaye kabidi ne: “Newambile bena Isalele ne: ‘Nendue mmuntume kunudi.’”’ (Ekes. 3:14, NWT) Nunku, mu nsombelu kayi yonso, Yehowa nealue tshionso tshidi tshikengela bua kukumbaja disua diende. Nzambi wakaleja bena Isalele bavua kumpala mu bupika muvuaye Musungidi, Mukubi, Mulombodi ne Mufidi wa bintu uvua mubakumbajile majinga abu ku mubidi ne mu nyuma.

16, 17. a) Mmunyi mutudi mua kuleja dianyisha bua diakalenga dia kuikala ne dîna dia Nzambi? b) Ndukonko kayi lutuandamuna mu tshiena-bualu tshidi tshilonda?

¹⁶ Lelu, Yehowa udi utungunuka ne kuenza malu mu diumvuangana ne dîna diende padiye utukumbajila majinga etu onso a ku mubidi ne a mu nyuma. Kabidi, diumvuija dia dîna dia Nzambi kadiena dimanyina anu pa tshidiye usungula bua kulua to. Didi kabidi dileja tshidiye wenzeja mu diumvuangana ne mudimu udi Bantemu bende benza bua kukumbaja malu adiye mulongolole. Kuelangana meji bua bualu ebu kudi kutuambuluisha bua kutungunuka ne kuenza malu mu diumvuangana ne dîna diende. Tshilejilu, Kare, muanetu wa bakaji udi ne bidimu 84 udi Ntemu wa tshisumi mu ditunga dia Norvège kukadi bidimu 70 udi wamba ne: “Ndi mumone ne: kuenzela Yehowa Mukalenge wa tshiendelele mudimu ne kuikala munkatshi mua bantu badi ne dîna diende dia tshijila ndiakalenga dinene. Tudi kabidi ne diakalenga dinene dia kumvuija bantu bulelela ne dia kumona mudi bantu basanka ne bumvua bitudi tubambila. Tshilejilu, ntu ngumvua disanka dia bungi pantu mbalongesha mudimu udi nawu mulambu wa Kristo udi upikula ne mushindu udibu mua kupeta muoyo wa tshiendelele ku diambuluisha dia mulambu eu mu bulongolodi bupiabupia muikale ditalala ne buakane.”

¹⁷ Bushuwa, mu imue teritware bitu bikole menemene bua kupeta bantu badi ne dijinga dia kumanya Nzambi. Kadi anu bu Kare, kutuku umvua disanka dia bungi paudi upeta muntu udi ukuteleja ne muudi mukumbane bua kulongesha muntu au bua dîna dia Yehowa anyi? Kadi, mmunyi mutudi mua kuikala Bantemu ba Yehowa eku bikale kabidi bantemu ba Yezu? Netuandamune lukonko elu mu tshiena-bualu tshidi tshilonda.