TATUANYI uvua muledibue mu tshimenga tshia Graz mu Autriche mu 1899, nunku utshivua mupuekele mu Mvita ya kumpala ya buloba bujima. Bakamubueja mu tshiluilu tshia bena Allemagne matuku makese panyima pa Mvita mibidi ya buloba bujima mimane kutuadija mu 1939. Bakamushipa mu 1943 pavuabu baluangana mu Russie. Bia dibungama, ke mushindu ungakajimija tatuanyi pantshivua anu ne bidimu bibidi. Tshitu mupete mpunga wa kumumanya to, ne mvua anu ne dijinga dikole dia kuikala ne tatu nangananga pamvua mmona ne: bana ba bungi mu kalasa bavua ne ba tatuabu. Pashishe, pantshivua nsonga, ngakapeta disulakana pangakalonga malu a Tatuetu wa mu diulu, Tatu udi ku mutu kua bionso udi kayi mua kufua.​—Hab. 1:12.

Pamvua ne bidimu 7, ngakabuela mu bunsukutu. Bunsukutu mbulongolodi bua pa buloba bujima buvuabu benze mu Grande-Bretagne mu 1908 kudi Robert Stephenson Smyth Baden-Powell, kamanda ka tshiluilu tshia basalayi ba mu Grande-Bretagne. Mu 1916, wakenza tshisumbu tshia bansukutu tshia bana ba bidimu 8 too ne ku 10.

Mvua musue bikole mutuvua tupatuka tshimenga ku ndekelu kua lumingu tuya ku misoko, tulala mu ntenta, tuluata nsukutu ne tuya mu milongo ngoma yenda idila. Mvua mutambe kunanga patuvua tudisangisha ne bansukutu bakuabu, kabidi ne patuvua tuimba misambu banyunguluke midilu dilolo ne tunayila mu dîtu. Tuakalonga kabidi malu a bungi adi atangila bufuki avua mansake bua kuanyisha malu a kukema a Mufuki wetu.

Batu bakankamija bansukutu bua kuikala ne bienzedi bimpe dituku dionso. Etshi ke tshimanyinu tshiabu tshinene. Tuvua tuelangana muoyo tuamba ne: “Badiakaje misangu yonso.” Ebi bivua binsankisha bikole. Mu tshisumbu tshietu tshivua ne bana bapite pa 100, bana batue ku tshiabibidi bavua bena Katolike, tshia bibidi tshivua tshia bena mishonyi ne umue uvua muena Buddha.

Katshia mu 1920, bavua benza tshisangilu tshia bansukutu ba pa buloba bujima misangu yonso panyima pa bidimu bikese. Ngakabuela mu tshisangilu tshia bansukutu ba pa buloba bujima tshia 7 mu tshimenga tshia Bad Ischl, mu Autriche mu ngondo wa 8 wa 1951, ne mu tshisangilu tshia 9 tshivua tshienzekele mu tshimenga tshia Sutton Park pabuipi ne tshimenga tshia Birmingham mu Angleterre mu ngondo wa 8 wa 1957. Mu tshisangilu tshianyi tshia ndekelu etshi, muvua bansukutu batue ku 33 000 bafumine mu matunga 85. Kabidi, bantu batue ku 750 000 bavua balue kututangila mu tshisangilu etshi, munkatshi muabu muvua mukalenge mukaji Elizabeth wa mu Angleterre. Buanyi meme kuikala nsukutu kuvua anu bu kuikala mu dîku dia pa buloba bujima. Tshikondo atshi, tshivua mumanye ne: mvua mua kupeta dîku dinene dimpe dia pa buloba bujima dienza ne bantu badi banange Nzambi to.

Pankatshi pa ngondo 3 ne 4 wa 1958, nkavua pa kujikija kulonga bua kuikala muakididianganyi ku nzubu  wa tshilala benyi wa Grand Hotel Wiesler mu Graz mu Autriche. Kuoku aku, ke kuvua muena mudimu wetu Rudolf Tschiggerl uvua utangila tshibambalu tshia buoshi ba bintu bishême munyishe pavua mpunga mumueneke. Katshia tshivua muanji kumvua bulelela musangu nansha umue. Wakanji kuakula bua dilongesha dia Busatu bunsantu ne kulejaye muvuadi kadiyi dilongesha dia mu Bible. Ngakimanyina dilongesha dia Busatu bunsantu ne mvua musue kumuleja ne: tshivuaye muambe katshivua tshilelela to. Mvua munange muena mudimu wetu eu ne mvua musue kumutuisha bua apingane mu tshitendelelu tshia Katolike.

Rudolf, utuvua tubikila kabidi ne: Rudi wakampetela Bible. Meme kuamba kuambulula ne: Bible au uvua ne bua kuikala anu wa bena Katolike. Ngakatuadija kumubala, katupa kîpi pashishe ngakasangana ne: Rudi uvua muele trakte kampanda uvuabu bapatule kudi Watchtower Society mu Bible amu. Ngakabenga ka trakte aku bualu mvua ngela meji ne: mukanda wa nunku uvua mua kuikala mufunda mu mushindu wa ne: malu adimu amvuike bu malelela pabi kabiyi mua kuikala nanku to. Kadi mvua musue kuyukila nende malu a mu Bible. Rudi wakaleja muvuaye ne lungenyi lutue ne kakampesha mukanda mukuabu nansha umue to. Mu ngondo mitue ku 3, tuvua tuyukila malu a mu Bible ku misangu ne tuvua tuya too ne ku dilolo menemene.

Pangakajikija mudimu umvua ndonga ku nzubu wa tshilala benyi wa mu tshimenga tshietu tshia Graz, mamuanyi wakantuma bua kulonga kabidi tulasa tua mua kulombola nzubu ya bilala benyi. Nunku ngakaya mu tshimenga tshia Bad Hofgastein tshidi mu tshibandabanda tshia mikuna ya Alpes muaba uvua tulasa atu. Tulasa atu tuvua tueleshangana diboko ne bena ku Grand Hotel mu Bad Hofgastein ne imue misangu mvua ngenzaku mudimu bua kupeta dimanya dipite dimvua mupete mu kalasa.

Rudi uvua mutume adrese wanyi mupiamupia ku biro bia Betele bia mu Vienne ne biro pabi biakatuma bana betu ba bakaji babidi Ilse Unterdörfer ne Elfriede Löhr, * bavua bamisionere. Dimue dituku muakididi wa benyi wa ku nzubu wa tshilala benyi au wakambikila kungambilaye ne: kuvua bamamu babidi pambelu mu mashinyi bavua bakeba kuyukila nanyi. Biakampampakaja bualu tshivua mubamanye to. Kadi ngakapatuka bua kumonangana nabu. Ngakalua kumanya pashishe ne: bavua benze mudimu wa diabanya mikanda ya Bantemu mu Allemagne mu tshikondo tshia bena Nazi pavuabu bimanyike midimu ya Bantemu kumpala kua Mvita mibidi ya buloba bujima. Nansha kumpala kua mvita kutuadija, bavua babakuate kudi bampuluishi ba bena Allemagne ba mu mifuintshifuintshi (Gestapo) ne babatume mu buloko bua mu Lichtenburg. Pashishe, munkatshi mua mvita bakabatuma mu kamponya ka Ravensbrück pabuipi ne tshimenga tshia Berlin.

Bana betu ba bakaji aba bavua ne bidimu bisua kupetangana ne bia mamuanyi, nunku mvua mbanemeka bikole. Ke bua tshinyi tshivua mubajimijile dîba diabu bua kuyukila nabu ne pashishe panyima pa mbingu anyi ngondo mikese kulua pamuapa kubambila ne: tshiena musue kutungunuka ne kulonga to. Nunku ngakabalomba ni bavua mua kuntumina liste wa mvese idi yakula bua dilongesha dia bena Katolike dia dilondangana dia bupostolo. Ngakabaleja ne: mvua ne bua kuya nende kudi nsaserdose wa muaba umvua au bua kuyukila nende pa mvese ayi. Mvua ngela meji ne: mvua mua kumanya bulelela.

Dilongesha dia bena Katolike dia dilondangana dia bupostolo divua diamba ne: kudi dilondangana dia bapape didi kadiyi dimana diakatuadija ne mupostolo Petelo. (Tshitendelelu etshi tshivua tshiumvuija bibi mêyi a Yezu adibu baleje mu Matayi 16:18, 19.) Dilongesha dia buena Katolike edi divua kabidi dileja ne: pape katu mua kutupakana mu malu adi atangila malongesha a ntendelelu padiye wakula bua dilondangana dia bupostolo to. Mvua ngitabuja dilongesha edi ngela meji ne: bu mudi pape udi bena Katolike babikila ne: Tatu wa bunsantu kayi mua kutupakana mu malongesha a ntendelelu ne muambe ne: Busatu bunsantu ndilongesha dilelela, nanku didi ne bua kuikala anu dilelela. Kadi bikalaye utupakana, nanku dilongesha edi didi mua kuikala dia dishima. Kabiena bikemesha bua mudi dilongesha dia dilondangana dia bupostolo dikale dia mushinga mukole kudi bena Katolike ba bungi nansha mudi malongesha makuabu a bena Katolike adi malelela anyi kaayi malelela matambe kuimanyina pa dilongesha edi.

Pangakamonangana ne nsaserdose, kakakokesha bua kuandamuna nkonko yanyi to, kadi wakapatula mu tshitekelu tshiende tshia mikanda mukanda wa malongesha a bena Katolike uvua wakula bua dilondangana dia bupostolo. Ngakaya nawu kumbelu anu muvuaye mungambile, meme kuwubala ne kumupinganyina kabidi ne nkonko mikuabu ya bungi. Ndekelu wa bionso, bu muvua nsaserdose kayi mukumbane bua kuandamuna nkonko yanyi, wakamba ne: “Tshiena mukokeshe bua kukutuisha to, ne wewe pebe kuena mua kuntuisha to. . . . Ndaku bimpe!” Kavua musue kuyukila nanyi kabidi nansha kakese.

Bua bualu ebu, ngakatuadija kulonga Bible ne Ilse ne Elfriede. Bakandongesha malu a bungi adi atangila Tatu mulelela wa tshijila udi mu diulu, Yehowa Nzambi. (Yone 17:11) Kakuvua kuanji kuikala tshisumbu nansha tshimue muaba au to, nunku bana betu ba bakaji babidi aba bavua balombola bisangilu mu nzubu mua dîku kampanda divua ditabe bulelela. Anu bantu bakese ke bavua babuelamu. Bana betu ba bakaji aba bavua batamba kulombola bisangilu bobu babidi, bualu kakuvua muntu mulume mutambule uvua mua kulombola to. Muanetu wa balume wa muaba mukuabu uvua ulua ku misangu ne wenza muyuki wa patoke mu muaba utuvua tufutshila.

Ngakatuadija kulonga Bible ne Ilse ne Elfriede mu ngondo wa 10 wa 1958, ne ngakatambula ngondo isatu pashishe mu ngondo wa 1 wa 1959. Kumpala kua meme kutambula, ngakabalomba bua kuyisha nabu ku nzubu ne ku nzubu bua kumona muvua mudimu wa buambi wenzeka. (Bien. 20:20) Meme mumane kubafila mu buambi musangu wa kumpala, ngakabalomba ni mvua mua kupeta wanyi teritware wa kuyisha. Bakampesha musoko kampanda ne mvua nyamu nkayanyi, nyishamu ku nzubu ne ku nzubu ne mpinganyina kabidi bantu bavua bitaba. Muanetu wa balume wa kumpala ungakaya kuyisha nende ku nzubu ne ku nzubu uvua mutangidi wa tshijengu uvua mulue kutukumbula pashishe.

Meme mumane kujikija kulonga kalasa ka mua kulombola nzubu ya bilala benyi mu 1960, ngakapingana mu tshimenga tshietu bua kuteta bua kuambuluisha balela banyi bua kulongabu Bible. Too ne lelu, muntu nansha umue wa kudibu ki mmulue Ntemu to, kadi bamue badi bateta kuitaba bulelela ndambu.

Mu 1961 bakabadila bena mu bisumbu mikanda ivua Betele mutume bua kusaka bantu bua kulua bampanda-njila. Ntshivua mujike ne mvua ne makanda a mubidi mimpe, ke meme kumona ne: kakuvua tshivua mua kumpangisha bua kulua mpanda-njila to. Ngakayukila ne Kurt Kuhn uvua mutangidi wa tshijengu bua tshivuaye wela meji bua mumvua njinga kuenza kabidi mudimu ndambu wa ngondo bua kusumba mashinyi avua mua kungambuluisha bua kuenza bimpe mudimu wa bumpanda-njila. Ntshinyi tshiakangambilaye? Wakangebeja ne: “Yezu ne bapostolo bende bavuaku dijinga ne mashinyi bua buobu kuyisha bikole anyi?” Lukonko luende luakangambuluisha bua  kuangata dipangadika dia tshimvua mua kuenza. Ngakadilongolola bua kutuadija bumpanda-njila kakuyi dijingakana. Kadi bu mumvua ngenza mudimu ku tshidiilu tshia ku nzubu wa tshilala benyi mêba 72 ku lumingu luonso, bivua bikengela bua meme kushintulula amue malu.

Meme kulomba mfumuanyi wa mudimu ni uvua mua kunganyishila bua kuenza mudimu mêba 60. Wakitaba dilomba dianyi ne wakatungunuka ne kumfuta anu difutu divuaye umfuta kumpala adi. Matuku makese pashishe ngakamulomba bua ngikale ngenza mudimu mêba 48 ku lumingu. Wikitaba kabidi dilomba adi ne uvua umfuta anu difutu dimue dimue adi. Ngakamulomba kabidi bua anganyishile bua ngikale ngenza mudimu mêba 36 ku lumingu, mmumue ne: mêba 6 ku dituku bua matuku 6, wakitaba kabidi dilomba adi. Tshivua tshinkemeshe ntshia ne: mvua anu mpeta difutu dianyi adi. Bivua bimueneka ne: mfumuanyi kavua musue kunjimija to. Programe eu wakangambuluisha bua kutuadija bumpanda-njila bua pa tshibidilu. Tshikondo atshi bavua balombe bampanda-njila bua kufila mêba 100 ku ngondo.

Ngondo inayi pashishe, bakanteka mpanda-njila wa pa buende ne musadidi wa tshisumbu mu tshisumbu tshikese tshia mu provense wa Carinthia, mu tshimenga tshia Spittal an der Drau. Tshikondo atshi bavua balombe bampanda-njila ba pa buabu bua kufila mêba 150 ku ngondo. Tshivua ne mpanda-njila mukuabu umvua mua kuenza nende mudimu to, kadi mvua muanyishe bikole diambuluisha divuabu bampeshe mu buambi kudi Gertrude Lobner, muanetu wa bakaji uvua wenza mudimu bu muambuluishi wa musadidi wa tshisumbu. *

Mu 1963, bakambikila bua kuenza mudimu wa butangidi bua tshijengu. Imue misangu, mvua ngenza ngendu ku kawulu bua kumbuka mu tshisumbu tshimue kuya mu tshikuabu muambule bibuta bivua ne bujitu. Bana betu ba bungi kabavua ne mashinyi to, nunku kakuvua muntu uvua mua kuya kumfikisha ku gare wa kawulu to. Bua kubenga kudileja, tshivua musue kuangata taxi bua kuya muaba umvua musombele to, nunku mvua ngenda ku makasa too ne mumvua mfika ku mabu.

Mu 1965 pantshivua mujike, bakambikila mu kalasa ka Gilada ka 41. Balongi betu ba bungi bavua pabu bajike. Pakatupeshabu mapoloma, biakankemesha bikole bua muvuabu bantume mu ditunga dietu dia Autriche bua kutungunuka ne mudimu wa butangidi bua tshijengu. Kadi, kumpala kua meme kumbuka mu États-Unis, bakandomba bua kuya kufila mutangidi wa tshijengu kampanda mu mbingu inayi. Ngakanyisha bikole mudimu utuvua benze ne Anthony Conte, muanetu wa balume uvua ne dinanga ne uvua munange mudimu wa buambi ne uvua upatulamu bipeta bimpe. Tuakenza mudimu pamue ku Nord kua New York mu Cornwall.

Pangakapingana mu Autriche, bakantuma mu tshijengu mungakapetangana ne Tove Merete nsongakaji muimpe kumona. Uvua mukolele mu bulelela katshia pavuaye ne bidimu bitanu. Patu bena Kristo netu batuebeja mututu bapetangane, tutu tubambila mu bilele ne: “Betele ke uvua mulongolole bua bienzeke nanku.” Tuakaselangana tshidimu tshiakalonda mu ngondo 4 mu 1967 ne bakatuitabila bua kutungunuka ne mudimu wetu wa butangidi buena ngendu.

Tshidimu tshiakalonda, ngakajingulula ne: bua ngasa wende, Yehowa uvua munkoleshe bu muanende wa mu nyuma. Nunku, ngakatuadija malanda a pa buawu ne Tatuanyi wa mu diulu pamue ne aba bonso badi bela “dîyi ne: ‘Aba, Tatu wanyi!’” bilondeshile Lomo 8:15.

 Meme ne Merete tuakatungunuka ne kuenza mudimu wa butangidi bua tshijengu ne bua distrike too ne mu tshidimu tshia 1976. Imue misangu mu tshikondo tshia mashika, tuvua tulala mu nzubu muvua mashika makole ne kamuyi biamu bia kuela nabi luya. Umue musangu, tuakatabuluka tuetu kumona ne: muelelu wa mbulanketa uvua mukayabale ne mutokesha kudi mashika atuvua tupuyakana. Ndekelu wa bionso tuetu kuangata dipangadika dia kuenda ne katshiamu kakese ka nzembu ka kuela naku luya mu nzubu bua mu nzubu muikalaku mukumbane butuku. Miaba mikuabu, bua kuowa mâyi butuku, tuvua mua kuendela mu neje bua kuya ku nzubu uvua pambelu uvua ubueja mashika. Katuvua ne wetu nzubu to, nunku mu Dimue dionso tuvua ne tshibidilu kushala ku nzubu kutuvua batudile bua kuenzela mudimu lumingu lujima alu. Pashishe mu Dibidi mu dinda tuvua tuya mu tshisumbu tshikuabu.

Ndi ne disanka dia kuamba ne: mu bidimu bionso ebi mukanjanyi undi munange, utu anu ungambuluisha bikole. Utu munange mudimu wa buambi ne tshitu muanji kumuvuluija bua kuenza mudimu eu to. Utu kabidi munange balunda ne utu uditatshisha bua bantu bakuabu. Ebi bingambuluishe bikole.

Mu 1976, bakatubikila bua kuenza mudimu ku Betele wa mu Autriche mu Vienne ne bakanteka umue wa ku bena mu komite wa filiale. Tshikondo atshi, filiale wa Autriche uvua utangila mudimu wa buambi wa matunga ndambu a ku Mputu wa ku Est ne uvua ulongolola bua kutumina matunga au mikanda mu musokoko. Muanetu wa balume Jürgen Rundel ke uvua ulombola mudimu eu, ne uvua ne ngenyi ya bungi ya mua kuwenza. Ngakapeta diakalenga dia kuenza nende mudimu ne bakandomba pashishe bua kutangila tshibambalu tshia bakudimunyi ba miakulu 10 ya ku Mputu wa ku Est. Jürgen ne mukajende Gertrude bakatungunuka ne kuenza mudimu wa bumpanda-njila bua pa buabu ne lulamatu luonso mu ditunga dia Allemagne. Kutuadijila mu 1978, Betele wa mu Autriche wakatuadija kulongolola ne kupatula bibejibeji mu miakulu 6 ne katshiamu kakese ka kupatula naku mikanda. Tuvua kabidi tutuma mikanda mu matunga mashilashilangane muvuabu bayilomba. Otto Kuglitsch ne mukajende Ingrid badi benza mudimu mpindieu ku Betele wa mu Allemagne ke uvua muimanyine midimu eyi.

Bana betu ba ku Mputu wa ku Est bakapatula kabidi mikanda mu matunga abu benza mudimu ne tshiamu tshia fotokopi peshi pa kupatula pa mabeji malu a mu filme. Nansha nanku, bavua dijinga ne dikuatshisha dia matunga makuabu. Yehowa wakakuba mudimu eu, ne ku biro bia Betele tuakananga bana betu bavua benza mudimu mu nsombelu mikole ne bavuabu bakandike mudimu wetu munkatshi mua bidimu bia bungi.

Mu 1989, ngakapeta diakalenga dia kuya kufila muanetu Theodore Jaracz, muena mu Kasumbu kaludiki ku Roumanie. Tshipatshila tshivua tshia kuambuluisha tshisumbu tshinene tshia bana betu bua kupinganabu mu bulongolodi. Kutuadijila mu 1949, bakavua balekele bulongolodi bua malu mashilashilangane ne baye kuenza biabu bisumbu. Nansha nanku, bavua batungunuka ne kuyisha bantu ne kubatambuisha. Bavua kabidi babele mu buloko bua dibenga kubuelakana mu malu a mvita anu bu muvua bana betu bavua bashale mu bulongolodi benza. Batshivua anu bakandike mudimu wetu mu Roumanie, nunku tuvua tutuilangana mu musokoko kua muanetu Pamfil Albu pamue ne bakulu banayi bavua ku mutu ne baleji-mpala ba komite uvuabu banyishe bua kulombola malu mu Roumanie. Tuvua bangate kabidi muanetu Rolf Kellner mu Autriche bua kukudimuna malu atuvua tuyukila.

Butuku bua dituku dibidi dia diyukidilangana dietu, muanetu Albu wakatuisha bakulu nende banayi abu bua kudisangisha netu pakambaye ne: “Tuetu katuyi benze bualu ebu mpindieu, pamuapa katuakupeta kabidi mpunga mukuabu to.” Pashishe, bana betu batue ku 5 000 bakapingana mu bulongolodi. Yehowa uvua bushuwa mutshimune ne Satana uvua mupangile.

Pabuipi ne ku ndekelu kua 1989, kumpala kua bukokeshi bua bakoministe kukulukabu ku Mputu wa ku Est, Kasumbu kaludiki kakambikila meme ne mukajanyi bua kuya ku biro bidi bilombola mudimu pa buloba bujima bia ku New York. Bualu ebu buakatukemesha bikole. Tuakatuadija mudimu ku Betele wa ku Brooklyn mu ngondo wa 7 wa 1990. Mu 1992, bakanteka muambuluishi mu komite wa mudimu wa Kasumbu kaludiki ne katshia ku ngondo wa 7 wa 1994, ndi ne diakalenga dia kuenza mudimu mu Kasumbu kaludiki.

Kukadi bidimu bia bungi katshia ngenza mudimu bu muakididi wa bantu ku nzubu wa tshilala benyi. Mpindieu ndi ne diakalenga dia kuikala panyi munkatshi mua bantu badi balongolola biakudia bia mu nyuma ne babiabanyina bana betu ba pa buloba bujima. (Mat. 24:45-47) Pandi ntangila malu andi muenze mu bidimu bipite pa 50 bindi muenze mu midimu ya pa buayi, ndi ne dianyisha dia bungi ne disanka mudi Yehowa mubeneshe bana betu ba pa buloba bujima. Ntu musue kubuela mu mpungilu ya bantu bafume mu matunga a bungi mutubu batamba kuakula bua kulonga malu a Tatuetu wa mu diulu Yehowa ne bua bulelela bua mu Bible.

Ndi mutekemene ne: bantu bakuabu miliyo ya bungi nebalonge Bible, kuitaba bulelela ne kuenzela Yehowa mudimu mu buobumue pamue ne bena Kristo netu ba pa buloba bujima. (1 Pet. 2:17) Ndi muindile kabidi ne muoyo kuulu kuulu pangikala mu diulu bua kumona dibika dia bantu ku lufu pa buloba ne ndekelu wa bionso mpeta tatuanyi mundedi. Ndi mutekemene ne: yeye ne mamu ne balela betu bakuabu ba pa muoyo nebitabe bua kutendelela Yehowa mu Mparadizu.