TUDI mu tshikondo tshikole kupita bikondo bionso katshia bafuka bantu. (2 Tim. 3:1-5) Dinanga ditudi banange Yehowa ne didisuika dietu bua kutumikila mikenji yende miakane bitu bitetshibua dituku dionso. Yezu ukavua muakule bua tshikondo tshikole etshi, ne wakajadikila bayidi bende ne: bavua ne bua kupeta dikankamija divuabu nadi dijinga bua kunanukila too ne ku nshikidilu. (Mat. 24:3, 13; 28:20) Bua kubakolesha, wakateka mupika wa lulamatu bua ikale ufila ‘biakudia bia mu nyuma pa dîba diabi.’​—Mat. 24:45, 46.

Katshia bateka mupika wa lulamatu mu 1919, mbasangishe “bena mudimu” miliyo ya bungi ba mu miakulu yonso mu bulongolodi bua Nzambi ne badi babadisha mu nyuma. (Mat. 24:14; Buak. 22:17) Kadi, biakudia kabiena bungi bua muomumue mu miakulu yonso to, ne bantu bonso kabena ne mushindu wa kupeta mikanda yetu idi ku Enternete to. Tshilejilu, bantu ba bungi kabena ne filme ne biena-bualu bitu bipatuka anu mu site wa jw.org to. Bidiku bileja ne: bamue badi bapangila biakudia bidi bikengela bua kuikala bakole mu nyuma anyi? Bua kupeta diandamuna, tuanji tuandamune nkonko inayi ya mushinga.

Pavua Satana mutete Yezu bua akudimune mabue alue mampa, Yezu wakandamuna ne: “Muntu kena ne bua kuikala ne muoyo anu bua diampa nkayadi, kadi mbua dîyi dionso didi dipatuka mukana mua Yehowa.” (Mat. 4:3, 4) Mbafunde mêyi a Yehowa mu Bible. (2 Pet. 1:20, 21) Nunku, Bible ke tshintu tshinene tshia mu biakudia bietu bia mu nyuma.​—2 Tim. 3:16, 17.

Bulongolodi bua Yehowa mbupatule Bible wa Nkudimuinu wa bulongolodi bupiabupia mujima anyi tshitupa tshiende mu miakulu mipite pa 120, ne tshidimu tshionso badi bamupatula mu miakulu mikuabu. Pa kumbusha nkudimuinu eu, kudi nkudimuinu mikuabu ya Bible mijima anyi bitupa miliyare ya bungi mu miakulu binunu bia bungi. Bualu bua dikema ebu budi bupetangana ne disua dia Yehowa dia ne: “bantu ba mishindu yonso basungidibue ne bafike ku dimanya dijalame dia bulelela.” (1 Tim. 2:3, 4) Bu mudiku ‘kakuyi tshifukibua tshidi tshisokome ku mêsu kua Yehowa,’ tudi ne bua kuikala bajadike ne: neakoke aba “badi bamanye ne: mbapele mu malu a mu nyuma” mu bulongolodi buende ne neabapeshe biakudia bia mu nyuma.​—Eb. 4:13; Mat. 5:3, 6; Yone 6:44; 10:14.

Bua muntu kukolesha ditabuja diende, kena amu ne bua kubala Bible patupu to. Udi kabidi ne bua kumvua ne kutumikila bidiye ulonga. (Yak. 1:22-25) Ke tshivua muntu mutungu wa mu Etshiopi wa mu bidimu lukama bia kumpala ne bua kuenza. Uvua ubala Dîyi dia Nzambi pavua muambi wa lumu luimpe Filipo mumuebeje ne: “Udi umvua bualu buudi ubala abu anyi?” Muntu eu wakandamuna ne: “Mmunyi mundi mua kubumvua bikala muntu kayi mundudike?” (Bien. 8:26-31) Filipo wakamuambuluisha bua kupeta dimanya dilelela dia Dîyi dia Nzambi. Malu avua muntu eu mulonge akamusaka bua kutambula. (Bien. 8:32-38) Bia muomumue, mikanda yetu idi yumvuija Bible mmituambuluishe bua kupeta dimanya dijalame dia Bible. Mmilenge mioyo yetu ne mmitusake bua kutumikila bitudi tulonga.​—Kolos. 1:9, 10.

Mbapeshe batendeledi ba Yehowa bintu bia bungi bia mu nyuma bia kudia ne bia kunua ku diambuluisha dia mikanda. (Yesh. 65:13) Tshilejilu, Tshibumba tshia Nsentedi tshidi tshipatuka mu miakulu mipite pa 210, tshidi tshiumvuija milayi ya mu Bible, tshivudija lumvu luetu lua malu muondoke a mu nyuma ne tshidi tshitusaka bua kutumikila mêyi manene a mu Bible. Réveillez-vous! udi upatuka mu miakulu mitue ku 100 ne udi ukolesha dimanya dietu bua bintu bidi Yehowa mufuke ne udi utuleja mutudi mua kutumikila mibelu ya mushinga ya mu Bible. (Nsu. 3:21-23; Lomo 1:20) Mupika wa lulamatu udi upatula mikanda idi yumvuija Bible mu miakulu mipite pa 680. Utuku ukeba dîba dituku dionso bua kubala Bible anyi? Utuku ubala tshibejibeji tshipiatshipia tshionso ne mikanda yonso itu ipatuka mu muakulu wenu anyi?

Pa kumbusha dipatula mikanda, bulongolodi bua Yehowa butu bulongolola plan ya miyuki itubu benza mu bisangilu bietu, mu mpuilu ne mu mpungilu. Utuku usanka bua miyuki, drama, manaya a tshilejilu ne dielangana nkonko bitubu benza mu bisangilu ebi anyi? Yehowa udi bushuwa utupesha biakudia bia mu nyuma bipite bungi.​—Yesh. 25:6.

Diandamuna didi ne: tòo. Kabiena mua kutukemesha bua mudi bamue batendeledi ba Yehowa bapeta biakudia bia mu nyuma bia bungi kupita bakuabu to. Bua tshinyi? Tuangate tshilejilu tshia bapostolo. Bavua babambile malu a bungi a kuenza kupita bayidi bakuabu ba bungi ba mu bidimu lukama bia kumpala. (Mâko 4:10; 9:35-37) Nansha nanku, bayidi abu kabavua babobe ne nzala ya mu nyuma to; bavua bapete bivua bikengela.​—Ef. 4:20-24; 1 Pet. 1:8.

Mbimpe tumanye kabidi ne: ki mbafunde mu mikanda ya Evanjeliyo malu a bungi avua Yezu muambe ne muenze pavuaye pa buloba to. Mupostolo Yone wakafunda ne: “Kudi malu makuabu a bungi avua Yezu muenze kabidi, bu bobu baafunde onso, ndi ngela meji ne: buloba bujima kabuvua mua kukumbana mivungu ivuabu mua kufunda malu aa to.” (Yone 21:25) Nansha muvua bayidi ba Yezu ba mu bidimu lukama bia kumpala bamanye malu a bungi avua amutangila kutupita, katuena bajimije tshintu to. Yehowa mmuenze bua tumanye malu makumbane adi atangila Yezu bua tumulonde mu makasa ende.​—1 Pet. 2:21.

Ela kabidi meji bua mikanda ivua bapostolo batumine bisumbu bia mu bidimu lukama bia kumpala. Pamuapa kudi mukanda umue uvua Paulo mufunde udibu kabayi bele mu Bible. (Kolos. 4:16) Bualu ebu budiku buleja ne: katuena ne biakudia bia mu nyuma bungi bukumbane bualu katuena ne mukanda eu anyi? Tòo. Yehowa mmumanye bitudi nabi dijinga ne mmutupeshe bintu bikumbane bua tuikale ne makanda a mu nyuma.​—Mat. 6:8.

Lelu, bamue batendeledi ba Yehowa badi ne biakudia bia mu nyuma bia bungi kupita bakuabu. Udiku wakula muakulu mudibu bapatule anu mikanda mikese patupu anyi? Bikalabi nanku, umanye ne: Yehowa udi unutabalela. Longa mikanda inudi nayi, ne bikalaku mushindu, buela mu bisangilu bia muakulu uudi umvua. Ikala mushindike ne: Yehowa neakuambuluishe bua wikale ne makanda a mu nyuma.​—Mus. 1:2; Eb. 10:24, 25.

Tutu tupatula mu site wetu bibejibeji ne bintu bikuabu bia kulonga nabi Bible. Site eu udi kabidi ne biena-bualu bidi biambuluisha bena mu mabaka, bansonga ne baledi badi ne bana batekete. Padi bena mu mêku bakonkonona biena-bualu ebi mu Ntendelelu wabu wa mu dîku, bidi bibambuluisha. Site wetu udi kabidi ufila luapolo bua programe ya pa buayi bu mudi: patubu bapesha bena mu kalasa ka Gilada mapoloma ne patubu benza tshisangilu tshia ku tshidimu, udi umanyisha bena Kristo netu ba pa buloba bujima bua bipupu ne bua bilumbu bia ku tubadi bidi bantu ba Nzambi bapete. (1 Pet. 5:8, 9) Site wa Enternete eu ntshiamu tshia mudimu tshinene bua kuyisha ne kumanyisha lumu luimpe too ne miaba idibu bakandike midimu yetu.

Kadi, udi mua kushala ne makanda a mu nyuma wewe ne mushindu wa kubuela mu site wetu peshi kuyi nawu. Mupika mmuenze muende muonso bua kupatula bintu bia pa mabeji bua kudisha muena mudimu yonso bimpe mu nyuma. Nunku, kuena muenzejibue bua kusumba tshiamu tshidi mua kukuambuluisha bua kubuela mu jw.org to. Bamue bantu batu balongolola bua kupatula pa mabeji malu adibu bapete mu site wetu bua bantu bakuabu badibu bamanye ne: kabena ne mushindu wa kubuela ku Enternete, kadi bisumbu ki mbienzejibue bua kuenza nunku to.

Tudi ne dianyisha kudi Yezu bua mudiye mukumbaje mulayi wende wa kutukumbajila majinga etu a mu nyuma. Bu mudi nshikidilu wenda usemena ne lukasa, tudi ne bua kuikala batuishibue ne: Yehowa neatungunuke ne kutupesha ‘biakudia bia mu nyuma pa dîba diabi.’