1. Ntshinyi tshivua Paulo muenze bua bantu bavua benzele Yehowa mudimu bikole?

MUPOSTOLO Paulo wakavuluka bantu bavua benza mudimu mukole bua kuyisha lumu luimpe. Wakafunda ne: “Tudi tuvuluka misangu yonso mudimu wenu wa ditabuja ne mudimu wenu mukole muenza ne dinanga, ne dinanukila dienu bua ditekemena dinudi nadi mu Mukalenge wetu Yezu Kristo kumpala kua Nzambi wetu ne Tatu.” (1 Tes. 1:3) Bushuwa, Yehowa udi uvuluka midimu mikole mienza ne dinanga ya bantu bonso badi bamuenzela mudimu ne lulamatu nansha bikala nsombelu wabu ubapetesha mushindu wa kuenza mudimu wa bungi anyi mukese.​—Eb. 6:10.

2. Ntshinyi tshituakonkonona mu tshiena-bualu etshi?

² Bena Kristo netu ba bungi ba kale ne ba lelu mbadipangishe malu a bungi bua kuenzela Yehowa mudimu ne muoyo mujima. Tuakulayi bua muvua bamue benzele Nzambi mudimu mu bidimu lukama bia kumpala. Netukonkonone kabidi imue mishindu ya midimu ya ku dîba ne ku dîba ya matuku etu aa ne netumone mutudi mua kuvuluka bana betu batudi banange badi badifile bua kuenza midimu eyi mu mishindu ya pa buayi.

3, 4. a) Mmunyi muvua bamue benzele Yehowa mudimu mu bidimu lukama bia kumpala? b) Mmunyi muvuabu bakumbaja majinga abu a ku mubidi?

³ Katupa kakese panyima pa Yezu mumane kutambula, wakatuadija  mudimu uvua ne bua kufika too ne miaba yonso pa buloba. (Luka 3:21-23; 4:14, 15, 43) Panyima pa lufu luende, bapostolo bende bakatungunuka ne kumuangalaja mudimu wa kuyisha lumu luimpe eu. (Bien. 5:42; 6:7) Bamue bena Kristo bu mudi Filipo, bavua bamanyishi ba lumu luimpe ne bamisionere mu Palestine. (Bien. 8:5, 40; 21:8) Paulo ne bantu bakuabu bakenza ngendu ntanta mile bua kuyisha. (Bien. 13:2-4; 14:26; 2 Kol. 1:19) Bakuabu bu mudi Siluwano (Sila), Mâko ne Luka bakenza pabu mudimu bu batentudi anyi bafundi. (1 Pet. 5:12) Bena Kristo bantu bakaji bavua benza mudimu pamue ne bana betu ba balume ba lulamatu aba. (Bien. 18:26; Lomo 16:1, 2) Malu adi enza disanka avua bantu bonso aba bapete adi ambuluisha bua Mifundu ya mu tshiena Greke ya bena Kristo ikale isankisha bua kuyibala, ne adi aleja ne: Yehowa udi uvuluka ne dianyisha bantu bavua bamuenzele mudimu aba.

⁴ Nkuepi kuvua bena Kristo ba kumpala bavua benza midimu mikole aba bapetela bintu bia kudiambuluisha nabi? Bimue bikondo bavua babakidila ne babambuluisha kudi bena Kristo nabu mu mishindu mikuabu, kadi kabavua balomba diambuluisha dia mushindu eu to. (1 Kol. 9:11-15) Bamue bantu ne bimue bisumbu bavua bafila diambuluisha ku budisuile. (Bala Bienzedi 16:14, 15; Filipoyi 4:15-18.) Paulo ne bena diende bavuaye wenza nabu ngendu bavua kabidi benza mudimu wa bianza wa mêba makese bua kudiambuluisha.

5. Muanetu wa balume mukuabu ne mukajende mbambe tshinyi bua mudibu mu mudimu wa ku dîba ne ku dîba?

⁵ Bia muomumue lelu, bantu ba bungi mbadifile mu mishindu mishilashilangane ya mudimu wa ku dîba ne ku dîba. (Tangila kazubu ka ne: “ Mishindu ya mudimu wa ku dîba ne ku dîba.”) Bavua bumvue bishi bua mudimu uvuabu basungule bua kuenza mu nsombelu wabu? Wewe mubele lukonko elu nebikukankamije. Tuangate tshilejilu: Muanetu wa balume mukuabu uvua muenze mudimu mu ditunga dikuabu bu mpanda-njila wa pa tshibidilu, mpanda-njila wa pa buende, misionere ne mu dîku dia Betele udi wamba ne: “Ndi mmona ne: kuenza midimu ya ku dîba ne ku dîba ke disungula ditambe buimpe dimvua muenze mu nsombelu wanyi. Pamvua ne bidimu 18, bivua bintatshisha bua kuangata dipangadika pankatshi pa kulonga tulasa tua iniversite, kuenza mudimu wa bianza uvua ulomba mêba a bungi ne kulua mpanda-njila. Malu andi mumone mmandeje ne: Yehowa kena upua muoyo didifila dia muntu bua kumuenzela mudimu ku dîba ne ku dîba to. Ndi muenze mudimu ne bipedi ne mamanya bidi Yehowa mumpeshe mu mishindu imvua tshiyi mua kuenza nayi mudimu bu meme musungule bua kuenza mudimu kampanda wa mu bulongolodi ebu to.” Mukajende udi wamba ne: “Mudimu wonso utudi benze mmungambuluishe bua kukola. Tudi bamone mudi Yehowa mutukube ne mutulombole misangu ne misangu ne mu mishindu ivua kayiyi mua kuenzeka bu tuetu bashale muaba muimpe utuvua. Ndi ngela Yehowa tuasakidila dituku dionso bua mutudi mu mudimu wa ku dîba ne ku dîba.” Udiku pebe musue kuikala ne nsombelu wa buena eu anyi?

6. Ntshinyi tshidi yonso wa kutudi ne bua kuikala mujadike bua bidi bitangila Yehowa?

⁶ Bushuwa, bamue badi ne nsombelu idi kayiyi ibapetesha mushindu wa kuenza mudimu wa ku dîba ne ku dîba to. Tuikale bajadike ne: Yehowa udi kabidi wangata ne mushinga mudimu udibu bamuenzela ne muoyo wabu mujima. Ela meji bua bantu bavua Paulo mutele mu Filemona 1-3, kusangisha ne bonso bavua mu tshisumbu tshia mu Kolosayi. (Bala.) Paulo uvua ubanyisha ne Yehowa pende uvua mubanyishe. Mu mushindu wa muomumue, Tatu wetu wa mu diulu udi wanyisha mudimu wetu. Kadi, mmunyi muudi mua kuambuluisha bantu badi mu mudimu wa ku dîba ne ku dîba lelu?

7, 8. Kuenza mudimu wa bumpanda-njila kudi kulomba malu kayi? Mmunyi mudi bena mu tshisumbu bakuabu mua kuambuluisha bampanda-njila?

⁷ Anu bu bamanyishi ba lumu luimpe ba mu bidimu lukama bia kumpala, lelu bampanda-njila ba tshisumi badi bakolesha bisumbu. Ba bungi batu bayisha mêba 70 ku ngondo yonso. Mmunyi muudi mua kubambuluisha?

 ⁸ Muanetu wa bakaji mukuabu udi mpanda-njila diende Shari wakamba ne: “Bampanda-njila batu bamueneka ne makanda bua mudibu mu buambi dituku dionso. Kadi, batu pabu dijinga ne kubakankamija.” (Lomo 1:11, 12) Muanetu wa bakaji mukuabu uvua mpanda-njila munkatshi mua bidimu bia bungi wakamba bua bampanda-njila ba mu tshisumbu tshiabu ne: “Batu benza mudimu mukole kabayi balekela. Padi bena Kristo bakuabu babambula ku mashinyi abu bua kuya kuyisha, bababikila bua kudia nabu, babapesha ndambu wa makuta a kuela kasolonyi peshi babapesha makuta bua kudiambuluisha mu mushindu kampanda, batu ne dianyisha dia bungi. Bidi bibaleja ne: udi bushuwa ubatabalela.”

9, 10. Ntshinyi tshivua bamue benze bua kuambuluisha bampanda-njila ba mu tshisumbu tshiabu?

⁹ Mushindu mukuabu wa kuambuluisha bampanda-njila, nkuyisha nabu. Mpanda-njila mukuabu diende Bobbi wakamba ne: “Tudi ne dijinga dikole ne bantu ba kuyisha nabu munkatshi mua lumingu.” Mpanda-njila nende wa mu tshisumbu tshiabu udi usakidila ne: “Bitu bikole bua kupeta bantu ba kuyisha nabu mu mapingaja.” Muanetu wa bakaji udi wenza mudimu ku Betele wa ku Brooklyn udi wamba ne disanka bua mudimu wende wa bumpanda-njila ne: “Muanetu wa bakaji mukuabu uvua ne mashinyi ende wakangambila ne: ‘Dîba dionso diudi upangila muntu wa kuyisha nende, mbikila, ne netuye nebe mu buambi.’ Uvua mungambuluishe bikole bua kushala mpanda-njila.” Muanetu mukuabu Shari udi wamba bualu bua mushinga ebu: “Panyima pa mudimu wa buambi, bampanda-njila bajike batu misangu ya bungi bashala nkayabu. Udi mua kubikila bana betu ba balume anyi ba bakaji bajike mu ntendelelu wenu wa mu dîku ku musangu ne ku musangu. Kuenza nabu malu makuabu pamue kudi kabidi kubambuluisha bua kushala bakole.”

¹⁰ Padi muanetu wa bakaji mukuabu udi muenze mudimu wa bumpanda-njila munkatshi mua bidimu bitue ku 50 uvuluka mudimu wa bumpanda-njila uvuabu benze ne bana betu ba bakaji bakuabu bajike, udi wamba ne: “Bakulu ba mu tshisumbu tshietu bavua bakumbula bampanda-njila panyima pa ngondo ibidi yonso. Bavua batuebeja bua kumanya muvua makanda etu a mubidi, bua midimu yetu ya bianza ne bajinga kumanya bituikala tuvua ne malu makuabu avua atutatshisha. Bavua bushuwa benza mudimu eu ne muoyo mujima. Bavua balua kutangila nzubu yetu bua kumona ni tuvua dijinga ne diambuluisha.” Bualu ebu budi mua kukuvuluija dianyisha divua nadi Paulo bua mudimu uvuabu bamuenzele kudi mfumu wa dîku kampanda mu Efeso.​—2 Tim. 1:18.

11. Kuenza mudimu wa bumpanda-njila bua pa buabu kudi kulomba malu kayi?

 ¹¹ Bimue bisumbu bitu ne diakalenga dia kuikala ne bampanda-njila ba pa buabu. Ba bungi ba ku bana betu ba balume ne ba bakaji aba batu badienzeja bua kuyisha mêba 130 ku ngondo yonso. Bu mudibu bapitshisha mêba a bungi mu diyisha ne mu diambuluisha mu mishindu mikuabu, badi ne dîba dikese dia kuenza midimu ya bianza peshi kabena nadi. Biro bia filiale bitu bibapesha ku ngondo yonso tumakuta bua bamone mua kudifila bikole mu mudimu wa diyisha.

12. Mmunyi mudi bakulu ne bena Kristo bakuabu mua kuambuluisha bampanda-njila ba pa buabu?

¹² Mmunyi mutudi mua kuambuluisha bampanda-njila ba pa buabu? Mukulu kampanda udi wenza mudimu ku Betele uvua muyukile ne bampanda-njila ba pa buabu ba bungi udi wamba ne: “Mbimpe bakulu bikale bayukila nabu, bamanye nsombelu idibu nayi ne pashishe bamanye mudibu mua kubambuluisha. Bamue Bantemu batu bela meji ne: bampanda-njila ba pa buabu batu ne tshionso tshidi tshikengela bualu batu babapesha makuta ku ngondo yonso, kadi bana betu ba mu bisumbu badi mua kubambuluisha mu mishindu ya bungi.” Anu bu bampanda-njila ba pa tshibidilu, bampanda-njila ba pa buabu batu ne disanka patubu bapeta bantu ba kuyisha nabu. Kuenaku pebe mua kuyisha nabu anyi?

13, 14. a) Tudi ne bua kuvuluka tshinyi bua bidi bitangila batangidi ba bijengu? b) Ntshinyi tshiudi mua kuenza bua kuambuluisha batangidi bena ngendu?

¹³ Bantu batu bamona batangidi ba bijengu ne bakaji babu bu bantu badi bakole mu nyuma ne badi ne bukole. Ke mudibi, kadi batu pabu dijinga ne dikoleshibua, bantu ba kuyisha nabu, ne batu ne dianyisha patu bena Kristo nabu bababikila bua kujikija lutetuku pamue nabu. Kadi bobu basama, babuele mu lupitadi, pamuapa bikengela bua babapande peshi babondope mu mushindu kampanda? Nebakoleshibue padi bana betu ba muaba udibu babambuluisha ne bidi bikengela ne baditatshisha bua bualu buabu. Tudi mua kudifuanyikijila muvua Luka, “munganga munangibue” uvua mufunde mukanda wa Bienzedi muditatshishe bua Paulo ne bantu bavuaye wenza nabu ngendu.​—Kolos. 4:14; Bien. 20:5–21:18.

¹⁴ Batangidi ba bijengu ne bakaji babu batu basue kuikala ne balunda ba pa muoyo. Mutangidi wa tshijengu kampanda wakafunda ne: “Balunda banyi batu bamueneka bu bamanye pantu dijinga ne dikankamija. Batu bangela nkonko ne bujinguludi, ne kuenza nunku kudi kungambuluisha bua kuamba malu adi mantonde. Bu mutubu banteleja bimpe, batu bangambuluisha bikole.” Batangidi ba bijengu ne bakaji babu batu banyisha bikole mudi bana betu ba balume ne ba bakaji babatabalela.

15, 16. Mmidimu kayi idi bana betu badi benza mudimu ku Betele ne ku Nzubu ya mpuilu benza? Mmunyi mutudi mua kubambuluisha?

¹⁵ Pa buloba bujima, bantu badi benza mudimu ku Betele ne ku Nzubu ya mpuilu batu batua bikole mudimu wa Bukalenge nyama ku mikolo mu miaba idibu batangila kudi Betele wabu. Binuikala ne bena ku Betele mu tshisumbu tshienu peshi mu tshijengu tshienu, mmunyi muudi mua kuleja ne: udi ubavuluka?

¹⁶ Patubu bafika ku Betele, kuabu kudi mua kubasamina muoyo bualu mbashiye bena mu mêku abu ne balunda babu ba pa muoyo. Batu ne dianyisha dia bungi patu bana betu bakuabu badibu nabu mu dîku dia Betele ne bena mu tshisumbu tshiabu tshipiatshipia badia nabu bulunda. (Mâko 10:29, 30) Programe wabu wa mudimu udi ubapetesha dîba dia kubuela mu bisangilu bia tshisumbu ne dia kuyisha ku lumingu luonso. Kadi, kutu misangu itu bena ku Betele ne midimu mikuabu ya pa mutu. Padi bena mu bisumbu babumvuila ne baleja mudibu banyisha bena ku Betele ne mudimu udibu benza, bidi bibambuluisha bonso.​—Bala 1 Tesalonike 2:9.

17, 18. Batu batuma bana betu bua kuya kuenza midimu kayi mu matunga makuabu?

¹⁷ Bantu badi bitaba bua kuya kuenza mudimu mu ditunga dikuabu badi mua kupetangana ne biakudia, muakulu, bibidilu ne nsombelu bidi bishilangane bikole ne bivuabu bibidilangane nabi.  Bua tshinyi mbasungule bua kuitaba dishintuluka dia nunku?

¹⁸ Bamue mbamisionere ne badi bapitshisha dîba dia bungi mu mudimu wa diyisha. Mbalongeshi ne mbamanyishi ba lumu luimpe bapiluke, ne badi balongesha bantu bakuabu ba mu tshisumbu tshiabu malu avuabu balonge. Biro bia filiale bitu bipesha bamisionere muaba wa kusomba ne tumakuta bua kukumbaja majinga abu. Batu batuma bamue bana betu bua kuenza mudimu ku Betele ya mu matunga makuabu peshi bua kuambuluisha mu dibaka nzubu ya Betele, biro bia midimu ya dikudimuna, Nzubu ya mpuilu peshi Nzubu ya Bukalenge. Batu babapesha biakudia, muaba wa kusomba ne bintu bikuabu. Anu bu bena mu dîku dia Betele, batu babuela mu bisangilu lumingu luonso ne bayisha miaba idibu, nunku badi diambuluisha kudi bakuabu mu mishindu ya bungi.

19. Ntshinyi tshitudi ne bua kuvuluka bua bantu badi benza midimu mu matunga makuabu?

¹⁹ Mmunyi muudi mua kuvuluka bana betu badi mu mudimu wa ku dîba ne ku dîba mu matunga adi kaayi abu aba? Vuluka ne: patshidibu bafikilaku, kabena pamuapa bakokesha bua kudia biakudia bia muaba unudi to. Wikale mumanye bualu ebu paudi ubabikila bua kudia nabu; udi mua kuanji kubebeja tshitubu basue kudia peshi tshidibu basue kuteta kudia. Ikala ne lutulu padibu balonga muakulu ne bibidilu bia muaba unudi. Bidi mua kulomba tshikondo bule kampanda bua bobu kumvua malu onso audi wamba, kadi udi mua kubambuluisha ne bulenga bua kushindumunabu miaku bimpe. Mbasue kulonga.

20. Mmushindu kayi muimpe utudi mua kuvuluka bana betu badi mu mudimu wa ku dîba ne ku dîba ne baledi babu?

²⁰ Padi matuku enda apita, bana betu badi mu mudimu wa ku dîba ne ku dîba kule ne mêku abu badi mua kuangata dipangadika bua mushindu wa kuambuluisha baledi babu bakadi bakulakaje. Bikala baledi babu Bantemu, pamuapa badi bajinga bua bana babu batungunuke ne midimu idibu benza. (3 Yone 4) Bushuwa, bana betu badi mu mudimu wa ku dîba ne ku dîba nebenze tshionso tshidibu mua kuenza bikalabi bikengela kutabalela baledi babu ne nebabambuluisha misangu yonso koku mushindu. Kadi, aba badi pabuipi ne baledi ba bana betu aba badi mua kubambuluisha bikala baledi bakadi bakulakaje aba bakeba diambuluisha. Uvuluke ne: bana betu badi mu mudimu wa ku dîba ne ku dîba badi ne bia bungi bia kuenza bua kutua mudimu wa kuyisha nyama ku mikolo, mudimu udi ne mushinga wa bungi pa buloba lelu. (Mat. 28:19, 20) Wewe peshi tshisumbu tshienu kanuenaku mua kuambuluisha baledi ba bana betu aba bikalabu dijinga ne diambuluisha anyi?

21. Bantu badi mu mudimu wa ku dîba ne ku dîba batu bumvua munyi bua diambuluisha ne dikankamija dia kudi bantu bakuabu?

²¹ Bana betu badi babuela mu mudimu wa ku dîba ne ku dîba badi benza nunku bualu mbasue kupesha Yehowa bintu biabu bia mushinga ne kuambuluisha bantu bakuabu, kadi ki mbua kupeta bintu bia ku mubidi to. Badi banyisha bikole diambuluisha dionso diudi mua kubapesha. Muanetu wa bakaji udi wenza mudimu mu ditunga dikuabu udi uleja mudi bantu ba bungi badiumvua wamba ne: “Padi bantu bakuabu bakufundila nansha mêyi makese tshianana a dianyisha bidi bileja ne: badi bakuelela meji ne basanka bua biudi wenza.”

22. Udi umona mudimu wa ku dîba ne ku dîba mushindu kayi?

²² Kuenzela Yehowa mudimu ku dîba ne ku dîba kudi bushuwa njila mutambe buimpe wa kulonda mu nsombelu. Midimu eyi idi ne yayi ntatu, idi ilongesha ne ipetesha masanka. Kabidi, idi ilongolola muntu bua mudimu wa kashidi udi muindile batendeledi ba Yehowa ba lulamatu mu Bukalenge bua Nzambi. Mbimpe tuetu bonso ‘tuvuluke misangu yonso mudimu wa ditabuja ne mudimu mukole muenza ne dinanga’ kudi bana betu badi mu mudimu wa ku dîba ne ku dîba.​—1 Tes. 1:3.