1, 2. Bua tshinyi bantu ba bungi bavua bateleje Yezu kabavua bajingulule mêyi ende?

MUNTU kampanda udi mua kumvua mutoyi wa muntu umuambila bualu. Udi mua kumvua too ne dîyi diende. Kadi nebimuambuluishe ku tshinyi bikalaye kayi ujingulula mêyi adibu bamuambila? (1 Kol. 14:9) Bia muomumue, bantu binunu bia bungi bavua bateleje bivua Yezu wakula. Uvua mene ubambila malu mu muakulu uvuabu mua kumvua. Kadi ki mbonso bavua bajingulule mêyi ende to. Ke bualu kayi, Yezu wakabambila ne: “Ntelejayi nuenu bonso, nujingulule bualu ebu.”​—Mâko 7:14.

² Bua tshinyi bantu ba bungi kabavua bajingulula tshivua Yezu wamba? Bamue bavua badianjile kuikala ne meji kampanda ne bavua ne bipatshila bibi. Yezu wakambila bantu aba ne: “Nudi nulekela mikenji ya Nzambi ne budimu bua kulama bilele bienu.” (Mâko 7:9) Bantu aba kabavua baditatshisha bua kujingulula tshivua mêyi ende to. Kabavua basue kushintulula njila yabu ne mmuenenu wabu nansha. Matshi abu avua makangula, kadi mioyo yabu ivua mikanga mikangilamu. (Bala Matayi 13:13-15.) Kadi mmunyi mutudi mua kujadika ne: mioyo yetu mmikangula bua dilongesha dia Yezu dituambuluishe?

3. Bua tshinyi bayidi ba Yezu bavua bajingulula mêyi ende?

³ Tudi ne bua kulonda tshilejilu tshia bayidi ba Yezu bavua ne budipuekeshi. Wakabambila ne: “Mêsu enu nga diakalenga bualu adi amona, ne matshi enu nga diakalenga bualu adi umvua.” (Mat. 13:16) Bua tshinyi bobu bavua bajingulula pavua eku bakuabu kabayi bajingulula? Tshia kumpala, bavua basue kuela nkonko ne kukeba diumvuija dijalame dia mêyi a Yezu. (Mat. 13:36; Mâko 7:17) Tshibidi, bavua basue kuibakila pa malu akavuabu bitabe mu mioyo yabu. (Bala Matayi 13:11, 12.) Tshisatu, bavua basue kuenza mudimu ne malu avuabu bumvue ne bajingulule mu nsombelu wabu ne mu malu avuabu benza bua kuambuluisha bakuabu.​—Mat. 13:51, 52.

4. Bua kujingulula bilejilu bia Yezu, mmalu kayi asatu atudi ne bua kuenza?

⁴ Tuetu basue kumvua bilejilu bia Yezu, tudi ne bua kulonda tshilejilu tshia bayidi bende ba lulamatu. Kuenza nunku kudi paku kulomba malu asatu. Bua kumpala, tudi ne bua kukeba dîba dia kulonga ne kuelangana meji ne muoyo mujima bua malu avua Yezu muambe, kuenza makebulula adi akengela ne kuela nkonko miakanyine. Ebi bidi bitufikisha ku dimanya. (Nsu. 2:4, 5) Buibidi, tudi ne bua kumona mudi dimanya edi dipetangana ne malu atukadi bamanye ne kujingulula mushinga udidi nadi kutudi. Ebi bidi bitufikisha ku dijingulula dia mianda. (Nsu. 2:2, 3) Buisatu, tudi ne bua kuenza mudimu ne malu atudi balonge ne kuenza mu nsombelu wetu. Ebi bidi bileja mutudi ne meji.​—Nsu. 2:6, 7.

5. Fila tshilejilu bua kumvuija dishilangana didi pankatshi pa dimanya, dijingulula dia mianda ne meji.

⁵ Ndishilangana kayi didi pankatshi pa dimanya, dijingulula dia mianda ne meji? Tuangate tshilejilu etshi: Ela meji ne: udi muimane munkatshi mua njila ne mashinyi adi alua matangile kuudi. Tshia kumpala, udi umona ne: mmashinyi, ke dimanya adi. Tshibidi, udi umona ne: wewe mushale muaba au neakukume, atshi ke dijingulula dia mianda! Nanku udi utupika umbuka mu njila ne lukasa, atshi ke meji! Kakuyi mpata, Bible udi utuleja mushinga wa kuikala ne ‘lungenyi ludi lukuatshisha.’ Ebi nebitupeteshe muoyo.​—Nsu. 3:21, 22; 1 Tim. 4:16.

6. Nnkonko kayi inayi ituela patudi tukonkonona bilejilu 7 bia Yezu? (Tangila  kazubu.)

⁶ Mu tshiena-bualu etshi ne mu tshialonda, netukonkonone bilejilu 7 bivua Yezu mufile. Patudi tuenda tubikonkonona, netuende tuela nkonko eyi: Tshilejilu etshi tshidi tshiumvuija tshinyi? (Ludi lutuambuluisha bua kupeta dimanya.) Bua tshinyi Yezu uvua mufile tshilejilu etshi? (Ludi lutuafikisha ku dijingulula dia mianda.) Mmunyi mutudi mua kuenza mudimu ne malu adimu bua kudiambuluisha ne kuambuluisha bakuabu? (Ke meji au.) Ndekelu wa bionso, ntshinyi tshidi bualu ebu butulongesha bua Yehowa ne Yezu?

7. Tshilejilu tshia Yezu tshia lutete lua mutâda tshidi tshiumvuija tshinyi?

⁷ Bala Matayi 13:31, 32. Tshilejilu tshia Yezu tshia lutete lua mutâda tshidi tshiumvuija tshinyi? Lutete ludi luleja mukenji wa Bukalenge ne bipeta bia mudimu wa diyisha mukenji au, mmumue ne: tshisumbu tshia bena Kristo. Anu mudi lutete lua mutâda “lutambe bukese ku maminu onso,” mu 33 tshisumbu tshia bena Kristo tshivua patshi tshikese. Kadi panyima pa makumi a bidimu makese, tshisumbu tshiakadiunda ne lukasa. Tshiakatangalaka muvua muntu kayi muele meji. (Kolos. 1:23) Didiunda edi divua ne mushinga bualu Yezu udi utuambila ne: “nyunyi ya muulu” ivua ne bua kulua “kusomba pa matamba awu.” Nyunyi ya mu tshimfuanyi eyi idi ileja  bantu ba muoyo muimpe badi bapeta biakudia bia mu nyuma, bapeta dileji ne muaba wa kusomba mu tshisumbu tshia bena Kristo.​—Fuanyikija ne Yehezekele 17:23.

8. Bua tshinyi Yezu uvua mufile tshilejilu tshia lutete lua mutâda?

⁸ Bua tshinyi Yezu uvua mufile tshilejilu etshi? Uvua muakule bua didiunda dia lutete lua mutâda didi dikemesha bua kuleja bukole bua malu adi Bukalenge bua Nzambi bulongolole bua kumuangalaja, kukuba ne kutantamena bipumbishi bionso. Katshia ku 1914, didiunda dia tshitupa tshia bulongolodi bua Nzambi tshidi tshimueneka didi dikemesha. (Yesh. 60:22) Bantu badi mu bulongolodi ebu badi basanka bua bukubi bua mu nyuma bua dikema ebu. (Nsu. 2:7; Yesh. 32:1, 2) Kabidi, diya kumpala dia malu a Bukalenge didi dileja ne: kakuena tshintu tshidi mua kubuimanyika ne budi butshimuna buluishi buonso.​—Yesh. 54:17.

9. a) Tshilejilu tshia lutete lua mutâda tshidi tshitupesha dilongesha kayi? b) Bualu ebu budi butulongesha tshinyi bua bidi bitangila Yehowa ne Yezu?

⁹ Tshilejilu tshia lutete lua mutâda tshidi mua kutulongesha tshinyi? Imue misangu tudi basombele muaba udi Bantemu bakese, anyi mene muaba utudi tumona ne: mudimu wetu wa diyisha kawena upatula bipeta ne lukasa. Kadi kuvuluka ne: tshidi Bukalenge bulongolole tshidi mua kutshimuna buluishi buonso kudi mua kutukolesha bua kunanukila. Tshilejilu, pavua muanetu Edwin Skinner mufike mu Inde mu 1926, kuvua anu Bantemu babala ku minu mu ditunga amu. Ku ntuadijilu, kakuvua didiunda dia nsongo to, ne bavua bamba ne: “mudimu uvua mukole.” Kadi wakatungunuka ne kuyisha ne wakamona muvua mukenji wa Bukalenge mutshimune bipumbishi binene. Lelu, kudi Bantemu bapite pa 37 000 badi benza mudimu mu Inde, ne bantu bapite pa 108 000 bavua babuele mu Tshivulukilu mu 2013. Tuangate tshilejilu tshikuabu tshia muvua mukenji wa Bukalenge mumuangalake. Anu mu tshidimu tshivua muanetu Skinner mufike mu Inde atshi, mudimu utshivua utuadijilaku mu Zambie. Mpindieu mu Zambie mudi bamanyishi bapite pa 170 000, ne bantu 763 915 bavua babuele mu Tshivulukilu mu 2013. Ebi bidi biumvuija ne: pa bantu 18, muntu umue uvua mubuele mu Tshivulukilu mu Zambie. Ndidiunda kayipu!

10. Tshilejilu tshia luevene tshidi tshiumvuija tshinyi?

¹⁰ Bala Matayi 13:33. Tshilejilu tshia luevene tshidi tshiumvuija tshinyi? Tshilejilu etshi tshidi patshi tshiakula bua mukenji wa Bukalenge ne bipeta biawu. “Bukula buonso” budi buleja bisamba bionso bia bantu, ne dituntumuka didi dileja didiunda dia mukenji wa Bukalenge ku diambuluisha dia mudimu wa diyisha. Nansha mudi didiunda dia lutete lua mutâda dimueneka patoke, dimuangalaka dia luevene kudiena dimueneka ku ntuadijilu to. Didi dishala nanku too ne tshikondo kampanda pashishe padi bipeta biadi bilua kumueneka.

11. Bua tshinyi Yezu uvua mufile tshilejilu tshia luevene?

¹¹ Bua tshinyi Yezu uvua mufile tshilejilu etshi? Uvua uleja ne: mukenji wa Bukalenge uvua ne bukole bua kutangalaka bikole ne kushintulula bantu. Mukenji wa Bukalenge mmufike “too ne ku ntengu ya buloba.” (Bien. 1:8) Kadi, mashintuluka atu mukenji eu ukebesha kaatu misangu yonso amueneka to; bimue bipeta kabitu mene bimueneka ku ntuadijilu to. Kadi kudi dishintuluka didiku, ki nganu bua bungi bua bantu to, kadi bantu badi bashintulula kabidi nsombelu wabu padibu bitaba mukenji udi ubalenga eu.​—Lomo 12:2; Ef. 4:22, 23.

12, 13. Fila bilejilu bia muvua mudimu wa kuyisha Bukalenge mudiunde anu mudibi bileja mu tshilejilu tshia luevene.

¹² Bipeta bia mudimu wa diyisha bitu misangu ya bungi bilua kumueneka panyima pa bidimu. Tshilejilu, Franz ne mukajende Margit badi benza mudimu mpindieu mu Betele mukuabu bavua kumpala benza mudimu mu Betele wa mu Brézil mu 1982. Bavua bayishe mu kamusoko kampanda kakese Munkatshi mua bantu bavuabu batuadije kulonga nabu Bible muvua mamu mukuabu ne bana bende banayi. Muanende wa kumpala uvua ne bidimu 12 tshikondo atshi uvua ne bundu bua bungi, ne uvua misangu ya bungi usokoma kumpala kua kutuadijabu kulonga. Bu muvuabu bashintulule miaba ya mudimu ya bana betu aba, bivua bikole bua kutungunukabu ne dilonga. Kadi bakalua kukumbula musoko au panyima pa bidimu 25. Tshiakapetabu ntshinyi? Bakapeta tshisumbu tshia bamanyishi 69 tshivua ne bampanda-njila 13 bavua badisangishila mu Nzubu wa Bukalenge mupiamupia. Kadi bua nsongalume uvua ne bundu au? Udi mpindieu mutangidi wa malu a kasumbu ka bakulu. Anu bu luevene lua mu tshilejilu tshia Yezu, mukenji wa Bukalenge mmudiunde ne mmushintulule nsombelu wa bantu ba bungi. Ndisankapu kayi bua bena dibaka aba!

¹³ Bukole bua kushintulula bantu budi kabuyi bumueneka budi nabu mukenji wa Bukalenge budi bumuenekela mu matunga mudi mbulamatadi mukandike mudimu wetu wa Bukalenge. Mbikole bua kumanya mudi mukenji mufike mu matunga aa, ne misangu ya bungi bipeta bidi bimueneka bitu bikemesha. Tuangate tshilejilu tshia ditunga dia Cuba. Mukenji wa Bukalenge mmufike mu ditunga edi mu 1910, ne muanetu Russell uvua muyamu mu 1913. Kadi ku ntuadijilu, kamuvua bipeta bia nsongo to. Kadi lelu malu adi mushindu kayi mu Cuba? Mudi bamanyishe ba lumu luimpe bapite pa 96 000, ne bantu 229 726 bavua babuele mu Tshivulukilu mu 2013, mmumue ne: pa bantu 48 ba mu tshidiila etshi muntu umue uvua mubuelamu. Nansha mu matunga mudibu kabayi batukandike, mukenji wa Bukalenge udi ufika miaba idi Bantemu ba muaba au bamona ne: badi mua kuyisha kakese. *​—Muam. 8:7; 11:5.

14, 15. a) Mmunyi mudi tshilejilu tshia luevene mua kuambuluisha yonso wa kutudi pa nkayende? b) Tshidi tshitulongesha tshinyi bua Yehowa ne Yezu?

¹⁴ Mmunyi mudi tshilejilu tshia Yezu tshia  luevene mua kutuambuluisha? Patudi tuelangana meji bua tshilejilu tshia Yezu etshi, tudi tumona ne: kabiena bikengela kuditatshisha bikole bua muikala mukenji wa Bukalenge mua kufika kudi bantu miliyo ya bungi badi kabayi banji kuwumvua to. Yehowa ke udi ne malu onso mu bianza. Kadi tuetu tshietu ntshinyi? Dîyi dia Nzambi didi diandamuna ne: “Kuna maminu ebe ne dinda, kuikishi dilolo; bualu bua kuena mumanye ne bidi bidiunda ngebi anyi mbiabia, anyi bubidi buabi nebidiunde.” (Muam. 11:6) Bushuwa, katuena ne bua kupua muoyo bua kusambila bua mudimu wa diyisha uye kumpala to, nangananga mu matunga mudibu bakandike mudimu wetu.​—Ef. 6:18-20.

¹⁵ Kabidi, katuena ne bua kuteketa mu mikolo tuetu katuyi bamone bipeta bia mudimu wetu ku ntuadijilu to. Katuena ne bua kupepeja “dituku dia malu makese” nansha. (Zek. 4:10) Ndekelu wa bionso, bipeta bidi mua kumueneka bia bungi ne bisankisha bikole kupita mutuvua bele meji.​—Mus. 40:5; Zek. 4:7.

16. Tshilejilu tshia ngenda mushinga ne tshia tshiuma tshisokoka bidi biumvuija tshinyi?

¹⁶ Bala Matayi 13:44-46. Tshilejilu tshia ngenda mushinga ne tshia tshiuma tshia mushinga mukole tshisokoka bidi biumvuija tshinyi? Mu matuku a Yezu, bamue bangenda mushinga bavua benza ngendu mile baya too ne ku Mbuu wa ku Inde bua kupeta mabue matambe buimpe. Ngenda mushinga wa mu tshilejilu etshi udi uleja bantu ba muoyo muimpe badi baditatshisha ne muoyo mujima bua kujikija nzala yabu ya mu nyuma. “Dibue dia mushinga mukole” didi dileja bulelela bua mushinga mukole bua Bukalenge. Padi ngenda mushinga umanya buimpe bua dibue edi, udi usumbisha “diakamue” bintu biende bionso bua kudisumba. Yezu wakakula kabidi bua muntu uvua wenza mudimu mu budimi uvua mupete tshiuma ‘tshisokoka.’ Bishilangane ne ngenda mushinga, muntu eu kavua ukeba tshiuma tshia mushinga mukole to. Kadi anu bu ngenda mushinga, uvua musue kusumbisha “bintu bionso” bua kupeta tshiuma etshi.

17. Bua tshinyi Yezu uvua mufile tshilejilu tshia ngenda mushinga ne tshia tshiuma tshisokoka?

¹⁷ Bua tshinyi Yezu uvua mufile bilejilu bibidi ebi? Uvua musue kuleja ne: bantu badi mua kupeta bulelela mu mishindu mishilangane. Bamue badi babukeba ne badienzeja bikole bua kubupeta. Bakuabu pabu kabavua babukeba to, kadi mbabupete pamuapa pavuabu babatuadilabu. Nansha biobi munyi, muntu yonso mmujingulule mushinga wa tshidiye mupete ne mmuanyishe bua kujimija amue malu bua kubupeta.

18. a) Mmunyi mudi bilejilu bibidi ebi mua kutuambuluisha? b) Bidi bikulongesha tshinyi bua Yehowa ne Yezu?

¹⁸ Mmunyi mudi bilejilu bibidi ebi mua kutuambuluisha? (Mat. 6:19-21) Diebeja ne: ‘Ndiku ne lungenyi lua buena lua bantu aba anyi? Ndiku ngangata bulelela ne mushinga mu mushindu wa muomumue anyi? Ndiku nganyisha bua kudipangisha malu bua kubupeta anyi, peshi ntu ndekela bintu bikuabu bu mudi kuditatshisha bua majinga a ku dituku ne ku dituku bimpangisha bua kubupeta?’ (Mat. 6:22-24, 33; Luka 5:27, 28; Filip. 3:8) Muoyo wetu wowu ne disanka bua mutudi bapete bulelela, netudisuike bikole bua kubuteka pa muaba wa kumpala mu nsombelu wetu.

19. Netukonkonone tshinyi mu tshiena-bualu tshidi tshilonda?

¹⁹ Tulejayiku ne: tudi bateleje ne bajingulule menemene diumvuija dia bilejilu bia Bukalenge ebi. Tuvulukayi ne: katuena tuenza nanku anu patudi tumanya diumvuija diabi to, kadi mpatudi tutumikila malongesha atudi balongamu. Mu tshiena-bualu tshidi tshilonda netukonkonone bilejilu bikuabu bisatu ne netumone malongesha atudi mua kupetelamu.