1, 2. Mmunyi muvua Yezu mukoleshe bapostolo bende dituku divuaye mubike ku lufu?

TUDI dituku divua Yezu mubike ku lufu. Bayidi bende babidi bavua baya mu musoko uvua mu bule bua kilometre mipite pa 11 bumbukila mu Yelushalema. Bu muvuabu kabayi bamanye ne: Yezu uvua mubike ku lufu, bavua ne dibungama bua malu avua afuma ku dienzeka. Diakamue Yezu udi ubamuenekela, batuadija kuenza luendu pamue. Uvua mua kukankamija bayidi aba. Mushindu kayi? “Wakabumvuija malu avua amutangila a mu Mifundu minsantu, kutuadijila ku Mose too ne ku baprofete bonso.” (Luka 24:13-15, 27) Dîba adi, mioyo yabu yakatuadija kutema bualu uvua ‘mubajinguluile bimpe Mifundu minsantu’ anyi mubumvuijayi bimpe.​—Luka 24:32.

² Anu butuku abu, bayidi babidi abu bakapingana mu Yelushalema. Pakapetanganabu ne bapostolo bakuabu, bakabalondela malu avua mabafikile. Patshivuabu bakula, Yezu wakabamuenekela buonso buabu. Kadi, bapostolo bende bavua ne buôwa. Bavua ne dielakana mu mioyo yabu. Yezu wakabakolesha mushindu kayi? Bible udi utuambila ne: “Wakabunzulula lungenyi bimpe menemene bua kujingululabu malu a mu Mifundu minsantu.”​—Luka 24:45.

3. Nntatu kayi itudi mua kupeta? Tshidi mua kutuambuluisha bua kuikala ne mmuenenu muimpe bua mudimu wetu wa kuyisha ntshinyi?

³ Anu bu bayidi abu, tudi mua kudiumvua imue misangu  babungame. Pamuapa tudi ne bia bungi bia kuenza mu mudimu wa Bukalenge, kadi tudi tuteketa mu mikolo bua mudiku kakuyi bipeta bia nsongo. (1 Kol. 15:58) Peshi bidi mua kumueneka ne: bantu batudi tulonga nabu kabena baya kumpala bimpe. Bakuabu batudi tuambuluisha badi mene mua kuela Yehowa nyima. Ntshinyi tshitudi mua kuenza bua kuikala ne mmuenenu muimpe bua mudimu wetu wa diyisha? Bualu bumue budi mua kutuambuluisha nkumvua bimpe bilejilu bia Yezu bidi mu Mifundu minsantu. Tukonkononayi bilejilu bisatu ne tumone malongesha atudi tupeta.

4. Tshilejilu tshia Yezu tshia mukunyi wa maminu udi ulala tshidi tshiumvuija tshinyi?

⁴ Bala Mâko 4:26-29. Tshilejilu tshia Yezu tshia mukunyi wa maminu udi ulala tshidi tshiumvuija tshinyi? Muntu wa mu tshilejilu tshia Yezu udi uleja mumanyishi wa Bukalenge yonso. Maminu adi aleja mukenji wa Bukalenge utudi tuyisha bantu ba muoyo muimpe. Anu bu mutubi bienzeka, mukunyi “udi ulala butuku, ujuka mu dinda.” Dikola didi dienzeka mu bule bua tshikondo kampanda, kutuadijila ku dikuna too ne ku dipola. Mu tshikondo etshi, ‘maminu adi atoloka ne akola.’ Dikola edi didi dienzeka ‘nkayadi’ ku kakese ku kakese mu bitupa bishilangane. Bia muomumue, dikola dia mu nyuma didi dienzeka ku kakese ku kakese ne mu bitupa bishilangane. Padi muntu uya mutangile kumpala ne bimusaka bua kuenzela Nzambi mudimu, udi ukuama mamuma mu ngumvuilu wa ne: udi ulambula muoyo wende kudi Yehowa ne utambula.

5. Bua tshinyi Yezu uvua mufile tshilejilu tshia mukunyi wa maminu udi ulala?

⁵ Bua ntshinyi Yezu uvua mufile tshilejilu etshi? Yezu udi utuambuluisha bua kumanya ne: Yehowa ke udi wenzeja bua bulelela bukole mu mioyo ya bantu badi “badiakaje.” (Bien. 13:48; 1 Kol. 3:7) Tudi tukuna ne tumiamina mâyi, kadi katuena tukolesha nansha. Katuena mua kuenzeja bua kukolabi to. Anu bu muntu wa mu tshilejilu tshia Yezu, katuena bamanye mudi dikola dienzeka nansha. Ditu misangu ya bungi dienzeka mu mushindu utudi katuyi tumona patudi tudifila mu midimu yetu ya buatshia buila. Kadi, mu bungi bua matuku, maminu a Bukalenge adi mua kukuama mamuma. Dîba adi muyidi mupiamupia udi mua kudisangisha netu mu mudimu wa dinowa, ne malu adiye wenza adi atuambuluisha.​—Yone 4:36-38.

6. Ntshinyi tshitudi mua kumanya bua bidi bitangila didiunda dia mu nyuma?

⁶ Tshilejilu etshi tshidi tshitulongesha tshinyi? Tshia kumpala, tudi ne bua kumanya ne: katuena ne bukokeshi bua kuenzeja didiunda dia mu nyuma dia mulongi wa Bible to. Kumanya mikalu yetu nekutuambuluishe bua kuepuka buteyi bua kusaka mulongi ku bukole bua kutambulaye. Tudi tuenza tshionso tshitudi bakumbane bua kuenza bua kuambuluisha muntu, kadi tudi tuitaba ne budipuekeshi buonso ne: muntu ke udi ne dipangadika dia ndekelu bua kudilambula. Didilambula ndipangadika didi ne bua kufumina mu muoyo wa muntu nkayende, dienzeja kudi dinanga didiye nadi kudi Nzambi. Anu kuenza nunku ke kudi Yehowa wanyisha.​—Mus. 51:12; 54:6; 110:3.

7, 8. a) Mmalongesha kayi makuabu adi tshilejilu tshia Yezu tshia mukunyi wa maminu udi ulala tshitulongesha? Fila tshilejilu. b) Tshilejilu etshi tshidi tshitulongesha tshinyi bua Yehowa ne Yezu?

⁷ Tshibidi, kumvua dilongesha didi mu tshilejilu etshi nekutuambuluishe bua kubenga kuteketa mu mikolo tuetu katuyi bamone diakamue bipeta bia mudimu wetu. Tudi ne bua kuikala ne lutulu. (Yak. 5:7, 8) Nansha maminu wowu kaayi makuame, tuetu benze muetu muonso bua kuambuluisha mulongi, tumanye ne: dibenga kumueneka dia bipeta ki ntshimanyinu tshia ne: katuena ne lulamatu to. Yehowa udi wenza bua maminu a bulelela akole anu mu mioyo ya bantu bapuekele badi basue kushintuluka.  (Mat. 13:23) Nunku katuena mua kuamba ne: mudimu wetu wa diyisha mmubi anu bua bipeta to. Yehowa yeye kena umona buimpe bua mudimu wetu bilondeshile bidi bantu batudi tuyisha benza to. Kadi, udi wanyisha didienzeja dietu ne muetu muonso nansha bipeta biobi mushindu kayi.​—Bala Luka 10:17-20; 1 Kolinto 3:8.

⁸ Tshisatu, katutu misangu yonso tumona mudi muntu ushintuluka nansha. Tshilejilu, mulume ne mukajende bavua balonga Bible ne misionere mukuabu bakamulomba bua kutuadijabu kuyisha. Misionere wakambila bena dibaka aba ne: bua bobu kukumbana bua kuyisha, bavua ne bua kulekela dinua makanya. Wakakema bikole pakamuambilabu ne: kukavua ngondo ya bungi ivuabu balekele makanya. Bua tshinyi bavua baalekele? Bavua bafike ku dijingulula ne: Yehowa uvua mua kubamona pavuabu banua makanya ne mmukine lubombo. Nunku, mioyo yabu yakabasaka bua kuangata dipangadika dia kubenga kunua makanya pavua misionere muikalaku anyi pavuaye kayiku. Dinanga diabu dia Yehowa ditshivua dituadijilaku diakabambuluisha bua kuangata dipangadika dimpe. Bavua bakole mu nyuma nansha muvua misionere kayi mumanye ne: bavua bashintuluke mushindu eu.

9. Tshilejilu tshia kapamba tshidi tshinyi?

⁹ Bala Matayi 13:47-50. Tshilejilu tshia Yezu tshia kapamba tshidi tshiumvuija tshinyi? Yezu uvua musuikakaje mudimu wa kuyisha Bukalenge kudi bantu bonso ne diela kapamba kanene mu mbuu. Anu mutu kapamba kakuata “mishipa ya mishindu yonso” ya bungi kakayi kasunguluja, mudimu wetu wa diyisha udi ukoka bantu ba mishindu yonso miliyo ya bungi. (Yesh. 60:5) Bantu ba bungi badi babuela mu mpungilu ne mu Tshivulukilu tshidimu tshionso ntshijadiki tshia bualu ebu. Bamue ba ku mishipa ya mu tshimfuanyi eyi ‘mbimpe’ ne badi babasangisha mu tshisumbu tshia bena Kristo. Kadi bakuabu ‘mbabi’; ki mbonso badibu basangishe badi baleja ne: Yehowa udi ubanyisha to.

10. Bua tshinyi Yezu uvua mufile tshilejilu tshia kapamba?

¹⁰ Bua tshinyi Yezu uvua mufile tshilejilu etshi? Ditapulula dia mu tshimfuanyi dia mishipa kadiena dileja dilumbuluisha dia ndekelu dienzeka mu dikenga dinene to. Kadi didi dileja tshienzeka mu matuku a ndekelu a ndongoluelu mubi eu. Yezu wakaleja ne: ki mbantu bonso badi bitaba bulelela bashala balamate Yehowa to. Bantu ba bungi batu babuela mu bisangilu bietu. Bakuabu batu basue kulonga netu Bible, kadi kabatu basue kudilambula to. (1 Bak. 18:21) Kadi bakuabu bakadi balekele kudisangisha ne tshisumbu tshia bena Kristo. Bamue bansonga mbabakoleshe kudi baledi bena Kristo, kadi ki mbakoleshe dinanga diabu dia mikenji ya Yehowa to. Nansha biobi mu nsombelu kayi, Yezu wakaleja ne: muntu yonso uvua ne bua kudiangatshila dipangadika. Bantu badi bangate dipangadika badi ku mêsu kuende bu “biuma” anyi bintu bimpe bia mu “bukua bisamba.”​—Hag. 2:7, MMM.

11, 12. a) Mmunyi mudi tshilejilu tshia kapamba mua kutuambuluisha? b) Tshidi tshitulongesha tshinyi bua Yehowa ne Yezu?

¹¹ Mmunyi mudi tshilejilu tshia kapamba mua kutuambuluisha? Kumvua dilongesha dia mu tshilejilu etshi kudi kutuambuluisha bua kubenga kutamba kunyingalala peshi kuteketa mu mikolo padi mulongi wa Bible anyi muana mulela kayi witaba bulelela. Bidi mua kuenzeka nunku nansha tuetu badienzeje ne muetu muonso. Kuitaba bua kulonga Bible anyi kukolela mu dîku dia Bantemu kakuena kumvuija ne: muntu neikale anu bua kukolesha malanda ende ne Yehowa to. Aba badi babenga bua kukokela bumfumu bua Yehowa nebabatapulule ndekelu wa bionso ne bantu ba Nzambi.

 ¹² Ebi bidiku biumvuija ne: kabena mua kuitabila aba bavua balekele bulelela bua kupinganabu mu tshisumbu anyi? Peshi, bikala muntu kayi mudilambule kudi Yehowa, tudiku mua kuamba ne: udi munkatshi mua bantu ‘babi’ anyi? Tòo. Kumpala kua dikenga dinene kutuadijadi, kutshidi anu mpunga bua bantu aba. Mbienze anu bu ne: Yehowa udi ubabikila ne: “Pinganayi kundi, meme kabidi nempingane kunudi.” (Mal. 3:7) Badi batamba kuela kashonyi pa bualu ebu mu tshilejilu tshikuabu tshivua Yezu mufile, tshia muana mujimine.​—Bala Luka 15:11-32.

13. Tshilejilu tshia Yezu tshia muana mujimine tshidi tshiumvuija tshinyi?

¹³ Tshilejilu tshia Yezu tshia muana mujimine tshidi tshiumvuija tshinyi? Tatu udi ne luse wa mu tshilejilu etshi udi uleja Yehowa, Tatu wetu wa dinanga udi mu diulu. Muana udi ulomba bumpianyi buende ne uya kubunyangakaja udi uleja aba badi balekele tshisumbu. Padibu bumbuka mu tshisumbu, mbenze anu bu badi benza luendu baya “mu ditunga dia kule,” mmumue ne: mu bulongolodi bua Satana budi kule ne Yehowa. (Ef. 4:18; Kolos. 1:21) Kadi patu meji aluila bamue, batu benzulula luendu lukole bua kupingana mu bulongolodi bua Yehowa. Yehowa udi wakidila ne muoyo mujima bena budipuekeshi badi banyingalala aba ne ubafuila luse.​—Yesh. 44:22; 1 Pet. 2:25.

14. Bua tshinyi Yezu uvua mufile tshilejilu tshia muana mujimine?

¹⁴ Bua tshinyi Yezu uvua mufile tshilejilu etshi? Yezu wakumvuija mu mushindu muimpe ne: Yehowa mmusue bua aba badi bamulekele bapingane kudiye. Tatu wa mu tshilejilu etshi udi anu mutekemene ne: muanende neapingane. Padiye umona muanende upingana nansha ‘mutshidiye kule,’ tatu udi wenza malu ne lukasa bua kumuakidila. Bualu ebu budi bukolesha bantu badi balekele bulelela bua bapingane kudi Yehowa kabayi bajingakana. Badi mua kuikala batshioke mu nyuma ne bamona njila wa kupingana mukole ne utatshisha. Kadi, mbimpe badienzeje bualu nansha badi mu diulu badi basanka padibu bapingana.​—Luka 15:7.

15, 16. a) Tshilejilu tshia Yezu tshia muana mujimine tshidi tshitulongesha tshinyi? Fila bimue bilejilu. b) Tshidi tshitulongesha tshinyi bua Yehowa ne Yezu?

¹⁵ Mmunyi mudi tshilejilu tshia muana mujimine mua kutuambuluisha? Tudi ne bua kuidikija tshilejilu tshia Yehowa. Katuena ne bua ‘kupita kuikala bakane,’ tubenga too ne bua kuakidila benji ba bubi badi banyingalale badi  bapingana mu tshisumbu. Ebi nebifikishe ku ‘kabutu’ ka mu nyuma. (Muam. 7:16, NWT) Tshilejilu etshi tshidi tshitulongesha bualu bukuabu. Tudi ne bua kumona muntu udi mumbuke mu tshisumbu bu “mukoko mujimine,” kadi ki mbu muntu mujimine kashidi to. (Mus. 119:176) Tuetu bapetangane ne muntu udi mulekele tshisumbu kadi kayi muipatshibue, katuenaku mua kumupesha diambuluisha didi dikengela ne dinanga bua apingane anyi? Tudiku mua kumanyisha bakulu ne lukasa bua bamupeshe diambuluisha didi dikengela anyi? Netuenze nanku tuetu batumikile ne meji dilongesha ditudi balonge mu tshilejilu tshia Yezu tshia muana mujimine.

¹⁶ Tumone bimue bilejilu bia bamue bana bajimine ba lelu mudibu baleja dianyisha diabu bua luse ne dinanga bia Yehowa ne mudi tshisumbu tshibambuluishe. Muanetu wa balume mukuabu uvuabu bipate munkatshi mua bidimu 25 udi wamba ne: “Katshia ngapingana mu tshisumbu, disanka dianyi didi dienda anu divula pandi mpeta ‘bikondo bia dikoleshibua’ bia kudi Yehowa. (Bien. 3:19) Muntu yonso mmungambuluishe ne mmunange. Mpindieu ndi mu dîku dia mu nyuma dimpe.” Muanetu wa bakaji mukuabu nsonga uvua mulekele Yehowa munkatshi mua bidimu bitanu udi wamba bua dipingana diende ne: “Tshiena mua kunuambila bimpe menemene tshimvua mumvue pamvua mumone dinanga divuabu bandeje divua Yezu muambe. Kuikala mu bulongolodi bua Yehowa ke tshintu tshitambe buimpe.”

17, 18. a) Mmalongesha kayi atudi bapete mu bilejilu bisatu bia Yezu? b) Tudi badisuike bua kuenza tshinyi?

¹⁷ Mmalongesha kayi atudi bapete mu bilejilu bisatu ebi? Dia kumpala, tudi ne bua kumanya ne: ki ntuetu badi benzeja dikola dia mu nyuma to. Abu mbualu bua Yehowa. Dibidi, katuena mua kutekemena ne: aba bonso badi babuela mu bisangilu ne batudi tulonga nabu Bible nebanyishe bulelela to. Dia ndekelu, nansha muntu yeye mulekele bulelela, muele Yehowa nyima, tudi anu mua kutekemena ne: dimue dituku neapingane. Yeye mupingane, tumuakidilayi mu mushindu udi uleja mmuenenu wa Yehowa.

¹⁸ Yonso wa kutudi atungunuke ne kukeba dimanya, dijingulula dia mianda ne meji. Patudi tubala bilejilu bia Yezu, tudiebeje tshidibi biumvuija, bua tshinyi mbabifunde mu Bible, mushindu utudi mua kutumikila malongesha adimu ne tshidibi bitulongesha bua Yehowa ne Yezu. Kuenza nanku nekuleje ne: tudi bulelela bumvue diumvuija dia mêyi a Yezu.