1. Bua tshinyi Yehowa mmukumbane bua tuetu kumuela tuasakidila?

YEHOWA, Mufidi wa “dipa dionso dimpe ne dipa dionso dipuangane,” mmukumbane bua tuetu kumuela tuasakidila. (Yak. 1:17) Bu mudiye Mulami wetu muimpe, udi utukumbajila majinga etu a ku mubidi ne a mu nyuma ne bulenga buonso. (Mus. 23:1-3) Mmuleje mudiye “tshinyemenu tshietu ne bukole buetu” nangananga mu bikondo bia ntatu. (Mus. 46:1) Bushuwa, tudi ne malu a bungi adi atusaka bua kuitaba ne muoyo mujima tshivua mufundi wa Misambu muambe etshi: ‘Nusakidile Yehowa, bualu bua yeye udi muimpe; bua luse luende ludi lujalame tshiendelele.’​—Mus. 106:1.

2, 3. a) Nnjiwu kayi itudi mua kupeta patudi tupepeja mabenesha atudi tupeta? b) Nnkonko kayi ituandamuna mu tshiena-bualu etshi?

² Bua tshinyi mbimpe tuetu kukonkonona tshilumbu etshi tshia diela tuasakidila? Anu mukavuabu balaye, dipanga dianyisha dia bantu ba mu matuku a ku nshikidilu aa didi dienda divula. (2 Tim. 3:2) Bantu ba bungi batu bangata mabenesha adibu bapete bu madiluile. Bu mudi bantu miliyo ya bungi balonda lungenyi lua bungenda-mushinga lua pa buloba ne madisuisha, badi badienzeja bua kupeta  bintu bia bungi pamutu pa kusanka ne bidibu nabi. Lungenyi lua dipanga dianyisha ludi mua kutunyanga petu. Anu bu bena Isalele ba kale, tudi mua kujimija dianyisha bua malanda a mushinga atudi badie ne Yehowa ne bua masanka atudi bapete kudiye.​—Mus. 106:7, 11-13.

³ Tuakule kabidi bua tshidi mua kuenzeka patudi mu ntatu mikole. Mu bikondo bia nunku, tudi mua kutekeshibua bipepele ne kubenga kutuishila mêsu pa masanka etu. (Mus. 116:3) Nunku, ntshinyi tshitudi mua kuenza bua kupeta dianyisha ne kudilama? Ntshinyi tshiatuambuluisha bua kumona malu mu mushindu muimpe nansha patudi mu ntatu mikole? Tumonayi.

4. Ntshinyi tshitudi ne bua kuenza bua kulama muoyo wa dianyisha?

⁴ Tuetu basue kupeta muoyo wa dianyisha ne kuwulama, tudi ne bua kumanya ne kuelangana meji bikole bua mabenesha a kudi Yehowa ne kukonkonona bimpe malu adiye mutuenzele ne dinanga dia lulamatu. Pavua mufundi wa Misambu muenze nunku, wakakatshila bua bungi bua bintu bia kukema bivua Yehowa muenze.​—Bala Musambu 40:5; 107:43.

5. Ntshinyi tshitudi mua kulongela kudi mupostolo Paulo bua bidi bitangila kupeta dianyisha?

⁵ Bua kupeta dianyisha, tudi mua kulongela malu a bungi kudi mupostolo Paulo. Bidi bimueneka patoke ne: uvua muelangane meji pa mabenesha avuaye mupete, bualu uvua misangu ya bungi wela tuasakidila ne muoyo mujima. Paulo uvua mumanye ne: kumpala uvua “mupendi wa Nzambi, mukengeshanganyi, ne mupange bukalanga.” Nunku wakela tuasakidila bualu nansha muvuaye ne bikadilu bibi kumpala, Nzambi ne Kristo bakamuleja luse ne kumupeshabu mudimu wa kuenza. (Bala 1 Timote 1:12-14.) Paulo uvua kabidi muanyishe bena Kristo nende bikole ne muele Yehowa tuasakidila misangu ya bungi bua ngikadilu yabu mimpe ne mudimu wabu wa lulamatu. (Filip. 1:3-5, 7; 1 Tes. 1:2, 3) Pavua Paulo mu bikondo bia ntatu, uvua wela Yehowa tuasakidila diakamue bua dikuatshisha divuaye upeta pa dîba diakanyine kudi bena Kristo nende. (Bien. 28:15; 2 Kol. 7:5-7) Nunku, kabiena bitukemesha bua muvua Paulo mufunde ukankamija bena Kristo wamba ne: ‘Nudileje bena dianyisha. Nutungunuke ne kukoleshangana ne misambu, misambu ya kutumbisha nayi Nzambi ne misambu ya mu nyuma mimba ne milowu yonso,’ anyi dianyisha dionso.​—Kolos. 3:15-17.

6. Mmalu kayi adi akusaka nangananga wewe bua kuikala ne dianyisha kudi Yehowa?

⁶ Mmunyi mutudi mua kuidikija tshilejilu tshimpe tshia kuikala ne dianyisha ne kudileja? Anu bu Paulo, udi ne bua kuelangana meji bua malu akadi Yehowa mukuenzele wewe. (Mus. 116:12) Bobu bakuebeje ne: ‘Mmabenesha kayi a kudi Yehowa adi akusankisha bikole?,’ newandamune munyi? Udiku mua kutela malanda mimpe audi mudie ne Yehowa anyi? Peshi newakule bua dibuikidibua dia mibi diudi mupete bua ditabuja diebe mu mulambu wa Kristo udi upikula? Neutelaku mêna a bena Kristo nebe balume ne bakaji badi bakuambuluishe mu bikondo bishilashilangane biuvua mu ntatu anyi? Kakuyi mpata, kuakupanga kutela muena dibaka nebe uudi munange peshi bana bebe nansha. Kukeba dîba dia kuelangana meji bua malu mimpe audi mupete kudi Tatu webe wa dinanga nekuwuje muoyo webe ne dianyisha ne nekukusake bua kumuela tuasakidila dituku dionso.​—Bala Musambu wa 92:1, 2.

7. a) Bua tshinyi tudi ne bua kuenza masambila a diela tuasakidila? b) Mmasanka kayi awapeta wewe uleja dianyisha mu masambila ebe?

⁷ Tuetu balame bikole mabenesha etu mu lungenyi ne mu muoyo wetu, netuikale pabuipi bua kusambila Yehowa ne kumuela tuasakidila. (Mus. 95:2; 100:4, 5) Bantu ba bungi batu bamona disambila anu bu mushindu wa kulomba  Nzambi bintu patupu. Kadi tuetu tudi bamanye ne: Yehowa udi usanka patudi tumuela tuasakidila bua bitudi nabi. Mu Bible mudi masambila a bungi a diela tuasakidila menza ne muoyo mujima kusangisha ne dia Hana ne dia Hezikiya. (1 Sam. 2:1-10; Yesh. 38:9-20) Nunku, idikija batendeledi ba Nzambi ba lulamatu bavua baleje lungenyi lua dianyisha abu. Eyowa, ela Yehowa tuasakidila mu disambila bua mabenesha audi nawu. (1 Tes. 5:17, 18) Kuenza nunku nekukupeteshe masanka a bungi. Neukoleshibue ku muoyo, dinanga diebe bua Yehowa nedikole ne neusemene kudiye bikole menemene.​—Yak. 4:8.

8. Ntshinyi tshidi mua kutufikisha ku dijimija dianyisha bua bionso bidi Yehowa mutuenzele?

⁸ Bua tshinyi tudi ne bua kushala batabale bua kubenga kujimija lungenyi lua dileja dianyisha bua buimpe bua Yehowa? Bualu tudi bapiane lungenyi lua dipanga dianyisha. Mona ne: bavua bateke Adama ne Eva, baledi betu ba kumpala mu mparadizu. Bavua babakumbajile majinga abu onso ne bavua ne diakalenga dia kushala ne muoyo kashidi mu ditalala. (Gen. 1:28) Kadi kabavua banyishe masanka avuabu nawu to. Bakajinga bipitshidile bua lukuka. Bua bualu ebu, bakajimija bionso. (Gen. 3:6, 7, 17-19) Bu mutudi banyunguluka kudi bantu badi kabayi ne dianyisha, tudi petu mua kutuadija kupua bintu bionso bikadi Yehowa mutuenzele muoyo. Tudi mua kutuadija kupepeja bulunda butudi badie nende. Tudi mua kujimija dianyisha bua diakalenga ditudi nadi dia kuikala mu dîku dia bana betu ba pa buloba bujima. Tudi mua kulua kudifila bikole mu bintu bia mu bulongolodi ebu buikala ne bua kujimina mu katupa kîpi emu. (1 Yone 2:15-17) Bua kuepuka bionso ebi, tudi ne bua kuelangana meji bua masanka atudi bapete ne kuela Yehowa tuasakidila misangu yonso bua diakalenga ditudi nadi dia kuikala bantu bende.​—Bala Musambu wa 27:4.

9. Patudi mu ntatu mikole, bua tshinyi tudi ne bua kuelangana meji bua masanka atukadi bapete?

⁹ Kuikala ne muoyo wa dianyisha kudi mua kutuambuluisha bua kutantamena ntatu mikole. Bidi mua kututonda bikole tuetu batuilangane ne lutatu lua tshimpitshimpi bu mudi dipanga lulamatu dia muena dibaka netu, disama dikole, lufu lua muntu utudi banange peshi patu bipupu kampanda binyangakaja bintu bietu ne muaba utudi basombele. Mu bikondo bia nunku, netupete busambi ne netukoleshibue ku muoyo tuetu belangane meji bua masanka atukadi bapete. Tuakule bua malu malelela adi menzeke adi alonda aa.

10. Mmunyi muvua Irina mupete masanka pavuaye ubala mabenesha avuaye mupete?

 ¹⁰ Irina * uvua mpanda-njila wa pa tshibidilu mu Amerike wa ku Nord ne uvua mukaji wa mukulu. Mukulu eu wakapanga lulamatu kudiye ne kumulekela yeye ne bana bende. Ntshinyi tshivua tshiambuluishe Irina bua kutungunuka ne kuenzela Yehowa mudimu ne lulamatu? Udi wamba ne: “Ndi ne dianyisha bua mudi Yehowa muntabalele meme bikole. Pandi mbala mabenesha a ku dituku, ndi mmona mundi ne diakalenga dia kuikala mumanyike ne munangibue kudi Tatu wetu wa mu diulu udi utukuba. Ndi mumanye ne: kakundekela nansha kakese.” Nansha mudi Irina mutuilangane ne nsombelu ya bungi mikole, disanka didiye nadi didi ditungunuka ne kumukolesha ne udi ukankamija bantu bakuabu.

11. Ntshinyi tshivua tshiambuluishe Kyung-sook bua kutantamena disama divuaye nadi?

¹¹ Kyung-sook, udi musombele mu Asie, uvua muenze mudimu wa bumpanda-njila ne bayende mu bidimu bipite pa 20. Diakamue, bakamukuata ne disama dia kansere ka mu bisulusulu ne bavua bamuambile ne: uvua ne bua kufua mu ngondo isatu anyi isambombo. Nansha muvuaye yeye ne bayende bapete ntatu ya bungi minene ne mikese, bavua misangu yonso ne makanda a mubidi. Wakamba ne: “Tshilumbu tshia disama etshi tshivua tshintonde bikole. Mvua ndiumvua bu uvua mujimije bionso ne mvua ne buôwa bua bungi.” Ntshinyi tshivua tshiambuluishe Kyung-sook bua kutantamena lutatu elu? Udi wamba ne: “Butuku buonso kumpala kua kulala, ntu mbanda pamutu pa nzubu wetu ne nsambila ne dîyi dikole bua malu atanu amvua muanyishe mu dituku adi. Pashishe, ndi ndiumvua mukoleshibue ne binsaka bua kuleja mundi munange Yehowa.” Mmunyi mudi masambila a butuku aa mambuluishe Kyung-sook? Udi wamba ne: “Ndi mulue kumona ne: Yehowa udi utuambuluisha mu bikondo bia ntatu ne tudi ne masanka a bungi mu nsombelu wetu kupita ntatu.”

12. Mmunyi muvua Jason mukoleshibue ku muoyo panyima pa lufu lua mukajende?

¹² Jason udi wenza mudimu ku biro bia Betele kampanda bia mu Afrike udi mu mudimu wa ku dîba ne ku dîba kukadi bidimu bipite pa 30. Udi wamba ne: “Kukadi bidimu muanda mutekete katshia mukajanyi wafua ne ntshidi anu ne kanyinganyinga. Pandi mvuluka muvuaye utata ne disama dia kansere bitu bintonda bikole.” Ntshinyi tshivua tshiambuluishe Jason bua kutantamena nsombelu eu? Udi wamba ne: “Mvua mvuluka tshikondo tshimpe tshituvua tupitshisha ne mukajanyi pamue ne mvua ngela Yehowa tuasakidila mu disambila bua bualu abu. Mvua ngumvua ndambu wa disulakana ne pashishe ngela Yehowa tuasakidila pa tshibidilu bua bikondo bia disanka abi. Dianyisha ndishintulule bikole mushindu wanyi wa dimona malu. Ntshitu ne kanyinganyinga bua lufu luende, kadi kuela Yehowa tuasakidila bua mumvua mupete mukaji muimpe ne bua diakalenga dia kumuenzela mudimu pamue ne muntu uvua mumunange bikole nkuakaje mushindu wanyi wa dimona malu.”

13. Ntshinyi tshivua tshiambuluishe Sheryl bua kutantamena lufu lua bena mu dîku diabu?

¹³ Pavua tshipepele tshia Supertyphon Haiyan tshikume mu Philippines wa pankatshi ne tshibueje mâyi mu bantu ku ndekelu kua tshidimu tshia 2013, Sheryl utshivua ne bidimu 13 tshikondo atshi wakajimija bintu pamue ne bionso. Wakamba ne: “Ngakajimija nzubu wetu ne bena mu dîku dietu pa kuamba bonso.” Tatuende ne mamuende ne bana babu basatu bakafua mu tshipepele tshikole atshi. Ntshinyi tshivua tshiambuluishe Sheryl bua kutantamena lutatu elu kayi ushala mutekete mu mikolo? Udi ne muoyo wa dianyisha ne mmumanye mabenesha adiye nawu. Udi usakidila ne: “Mvua mumone malu onso avua bena Kristo balume ne bakaji benze bua kuambuluisha ne kukankamija bantu bonso bavua dijinga ne diambuluisha. Mvua mumanye  ne: bena Kristo netu ba pa buloba bujima bavua basambila bua bualu buanyi. Ndi ne dianyisha dia bungi bua mudi Yehowa muikale Nzambi wanyi. Utu umpesha misangu yonso bintu bindi nabi dijinga.” Eyowa, kumanya mabenesha atudi nawu ntshintu tshia mushinga tshidi mua kutuambuluisha bua kutshimuna kanyinganyinga. Muoyo wa dianyisha udi utuambuluisha bua kuya kumpala nansha tuetu bapete lutatu lua mushindu kayi.​—Ef. 5:20; bala Filipoyi 4:6, 7.

14. Mmasanka kayi adi matuindile? (Tangila tshimfuanyi tshia ntuadijilu.)

¹⁴ Katshia anu ku kale, bantu ba Nzambi mbasanke bua malu mimpe adibu bapete. Tshilejilu, panyima pa bamane kusungila bena Isalele mu bianza bia Palô ne biluilu biende ku Mbuu Mukunze, bakaleja disanka divuabu nadi pakimbabu misambu bua kutumbisha Yehowa ne kumuela tuasakidila. (Ekes. 15:1-21) Lelu, munkatshi mua mabenesha a mushinga atudi bapete mudi ditekemena dilelela ditudi nadi dia kusungidibua ku tshintu tshionso tshidi tshitukebela ntatu ne kanyinganyinga. (Mus. 37:9-11; Yesh. 25:8; 33:24) Ela meji mutuikala mua kudiumvua pikala Yehowa mua kumbusha baluishi bende bonso ne kutubueja mu bulongolodi bupiabupia muikala ditalala ne buakane. Netshikale dituku dinene dia diela Nzambi tuasakidila.​—Buak. 20:1-3; 21:3, 4.

15. Udi mudisuike bua kuenza tshinyi mu tshidimu tshia 2015 tshijima?

¹⁵ Tudi bindile ne muoyo kulu kulu bua kupeta mabenesha a bungi a mu nyuma a kudi Yehowa mu tshidimu tshia 2015. Bushuwa, tudi kabidi mua kupeta imue ntatu. Nansha tuetu mua kuikala mu nsombelu kayi, tudi bamanye ne: Yehowa kakutulekela nansha kakese. (Dut. 31:8; Mus. 9:9, 10) Neatungunuke ne kutupesha bintu bionso bitudi nabi dijinga bua kumuenzela mudimu ne lulamatu. Nunku, tudisuikayi bua kushala balame lungenyi lua buena lua muprofete Habakuka wakamba ne: ‘Bikala mutshi wa mfigi kauyi usampila ntonga, bikalaku kakuyi tumuma ku mionji ya mvinyo; biapanga mutshi wa olive kukuama, biapanga madimi kulua biakudia; bikala mikoko ya mu lupangu kayiyiku, ne bikalaku kakuyi bimuna mu mpangu yabi; kadi meme panyi nensanke mu Yehowa, nentumbile mu Nzambi wa lupandu luanyi.’ (Hab. 3:17, 18) Eyowa, mu tshidimu etshi tshijima, tuelangane meji ne disanka bua mabenesha atudi bapete ne bualu ebu butusake bua kulonda mubelu wa mvese wa tshidimu tshia 2015 eu: “Nusakidile Yehowa, bualu bua yeye udi muimpe.”​—Mus. 106:1.