1-3. Dieyemena dia Paulo kudi Yehowa diakakola mushindu kayi? (Tangila tshimfuanyi.)

BIVUA njiwu mikole mu tshikondo kampanda bua kuikala muena Kristo mu Lomo. Bu muvuabu babanda bayidi ba Kristo ne: bavua batue tshimenga tshia Lomo kapia mu tshidimu tshia 64 ne bakine bantu, bavua babakengesha bikole. Bu wewe muena Kristo tshikondo atshi, uvua mua kuikala ukuatshibua ne ukengeshibua. Bavua mua kuikala basunsule bamue bena Kristo nebe kudi nyama anyi babapopele pa mitshi peshi baboshe ne muoyo bua kukenkesha butuku.

² Bidi bimueneka ne: mu nsombelu mukole eu ke muvuabu bele mupostolo Paulo mu buloko bua musangu muibidi mu Lomo. Bena Kristo bakuabu bavuaku bamuambuluishe anyi? Bivua mua kuikala bitonde Paulo ku ntuadijilu bua bualu ebu, bualu wakafundila Timote ne: “Mu didibingisha dianyi dia kumpala, muntu nansha umue kavua ku luseke luanyi, kadi bonso bakandekela, Nzambi kababadidi bualu ebu to.” Nansha nanku, Paulo uvua anu mumanye ne: kavua mushale nanku kayi ne diambuluisha. Wakafunda ne: “Kadi Mukalenge wakimana ku luseke luanyi, kunguwujaye ne bukole.” Eyowa, Mukalenge Yezu uvua mupeshe Paulo bukole buvuaye nabu dijinga.  Kadi bukole ebu buvua bumuambuluishe mushindu kayi? Mona tshidiye wamba: “Ngakapandishibua mukana mua ntambue.”​—2 Tim. 4:16, 17. *

³ Pavua Paulo muvuluke tshivua tshimuenzekele atshi, bivua ne bua kuikala bimukoleshe bikole; bimuambuluishe bua kutekemena ne: Yehowa uvua mua kumuambuluisha bua kutantamena ntatu ivuaye nayi ne mikuabu ivua mua kumufikila. Ke bualu kayi wakamba diakamue ne: “Mukalenge neampandishe ku tshienzedi tshibi tshionso.” (2 Tim. 4:18) Bushuwa, Paulo wakapeta dilongesha dia ne: nansha diambuluisha dia bantu diodi dishikile, diambuluisha didi Yehowa ne Muanende bafila ndilelela.

4, 5. a) Nnganyi udi mua kukupesha misangu yonso diambuluisha diudi nadi dijinga? b) Ntshinyi tshiudi mua kuenza bua kukolesha malanda ebe ne Yehowa?

⁴ Kudiku imue misangu iutu udimona nkaya paudi mu lutatu kampanda anyi? Ludi mua kuikala lua dipangila mudimu wa bianza, lua ditatshishibua mu tulasa, lua kusama, anyi lua malu makuabu. Pamuapa uvua mulombe bantu bua bakuambuluishe, kadi kabayi bafike ku dikupesha diambuluisha diuvua nadi dijinga. Bushuwa, imue ntatu kabena mua kuyijikija kudi bantu to. Mu nsombelu ya mushindu eu, mubelu wa mu Bible wa ‘kueyemena Yehowa’ udi patupu anyi? (Nsu. 3:5, 6) Kawena ne mushinga anyi? Udi ne mushinga. Diambuluisha dia Nzambi ndilelela anu mudibi bileja mu miyuki ya bungi ya mu Bible.

⁵ Nunku, pamutu pa kukutondabi bua mudibu kabayi bakuambuluishe mu nsombelu mikole eyi, mbimpe uyimone bu muvua Paulo muyimone, mbuena kuamba ne: angata tshikondo etshi bu tshikondo tshia kueyemena Yehowa bikole ne kudimuenena mudiye ukutabalela ne dinanga. Nunku dimueyemena diebe nedikole ne malanda ebe nende nealue malelela menemene.

6. Bua tshinyi bidi mua kutukolela bua kueyemena Yehowa nangananga patudi mu lutatu?

⁶ Udi mua kuambila Yehowa lutatu luebe mu disambila ne pashishe kushala mutukije, mumanye ne: udi muenze tshionso tshiuvua mua kuenza ne Nzambi neakumbaje bidi bishale. (Bala Musambu wa 62:8; 1 Petelo 5:7.) Kuenza nunku mbualu budi ne mushinga bua kukolesha malanda ebe ne Yehowa. Kadi kuitaba ne: Yehowa neakupeshe tshiudi natshi dijinga ki mbualu butekete to. Bua tshinyi? Bumue bua ku malu budi ne: Yehowa katu misangu yonso wandamuna diakamue to.​—Mus. 13:1, 2; 74:10; 89:46; 90:13; Hab. 1:2.

7. Bua tshinyi Yehowa katu misangu yonso wandamuna masambila etu diakamue?

⁷ Bua tshinyi Yehowa katu wandamuna diakamue ku malu onso atudi tumulomba? Vuluka ne: udi ufuanyikija malanda adi pankatshi petu nende ne adi pankatshi pa tatu ne bana bende. (Mus. 103:13) Muana kena mua kutekemena bua muledi wende amukumbajile dilomba diende dionso diakamue to. Udi mua kulomba bimue bintu anu bua kulomba tshianana kayi nabi dijinga menemene to. Baledi badi mua kuindila bua kupesha bana babu bimue bintu bidibu balombe mu tshikondo tshiakanyine. Bikuabu bidi mua kuikala kabiyi bua diakalenga dia muana anyi dia bantu bakuabu. Bualu bukuabu, kuenzela muana diakamue bualu buonso budiye ulomba kudi mua kushintulula malanda adi pankatshi pa tatu ne muana, mbuena kuamba ne: muana ulua mfumu ne tatu ulua mupika. Bia muomumue, bua diakalenga dietu, Yehowa udi mua kulekela tshikondo kampanda tshipita kumpala kua kuandamunaye masambila etu. Diandamuna masambila mbukenji budi nabu Yehowa, bualu udi Mufuki wetu wa meji, Mfumu wa dinanga ne Tatu wetu wa mu diulu. Yeye utukumbajila diakamue malu onso atudi tumulomba bidi mua kunyanga malanda mimpe adi  pankatshi petu nende.​—Fuanyikija ne Yeshaya 29:16; 45:9.

8. Bu mudi Yehowa mumanye mikalu yetu, ntshinyi tshidiye utulaya?

⁸ Bualu bukuabu budi ne: Yehowa mmumanye bimpe menemene mikalu yetu. (Mus. 103:14) Nunku, kena utekemena bua tutantamene ntatu ne bukole buetu nkayetu to, kadi udi utuambuluisha bu mudiye tatu wetu. Bushuwa, misangu mikuabu tudi mua kumona ne: katuena ne tshikuabu tshia kuenza. Kadi Yehowa udi utujadikila ne: kakulekela lutatu lupita batendeledi bende bukole bua kulutantamena to. Eyowa, ‘neabalongoluele njila wa kupatukamu.’ (Bala 1 Kolinto 10:13.) Ke bualu kayi tudi ne bua kuikala ne dieyemena dia ne: mushindu udi Yehowa umona tshitudi mua kutantamena mmuakane.

9. Tuetu katuyi bapete diakamue diandamuna ku masambila etu, ntshinyi tshitudi ne bua kuenza?

⁹ Tuetu katuyi bapete diakamue diandamuna ku masambila etu, tuindile Nzambi udi mumanye tshikondo tshimpe tshia kutuambuluisha. Uvuluke ne: udi pende uleja lutulu lua bungi, bualu udi ne dijinga dikole dia kutuambuluisha. Bible udi wamba ne: ‘Yehowa udi windila bua kunuleja dinanga diende; ne bua muanda eu neadibishe bua kunuleja luse; bualu bua Yehowa udi Nzambi udi ulumbulula biakane; bonso badi bamuindila badi bavudijibue disanka.’​—Yesh. 30:18.

10-12. a) Ndîba kayi didi nsombelu mua kukolela muena Kristo udi ulama muena mu dîku diabu udi ne disama dia munanunanu? b) Kueyemena Yehowa mu bikondo bia ntatu kudi kuenzela malanda ebe nende tshinyi? Fila tshilejilu.

¹⁰ Paudi mu lutatu lukole, udi mua kudiumvua anu bu Paulo, udimona bu udi “mukana mua ntambue” anyi bu udi namu pabuipi menemene. Kudi bikondo bidi kueyemena Yehowa kuikale bualu bukole. Tshilejilu, ela meji ne: udi ulama muena mu dîku udi ne disama dia munanunanu. Pamuapa udi mulombe Nzambi bua akupeshe meji ne bukole. * Wewe mumane kuenza bionso biudi mua kuenza bua lutatu elu, kuenaku upeta ndambu wa ditalala paudi umanya ne: mêsu a Yehowa adi kuudi ne neakupeshe tshionso tshiudi natshi dijinga bua wewe kutantamena lutatu alu ne lulamatu anyi?​—Mus. 32:8.

¹¹ Nsombelu mikuabu idi mua kuenza bua umone malu mu mushindu mukuabu. Badoktere badi mua kukupesha ngenyi mibi anyi balela bebe bauvua mutekemene ne: nebakuambuluishe, badi mua kukolesha kabidi lutatu luebe. Tungunuka ne kulomba Yehowa bua akukoleshe. Tungunuka ne kusemena pabuipi nende. (Bala 1 Samuele 30:3, 6.) Padiye ukuambuluisha, malanda ebe nende neakole.

¹² Linda * wakafika ku dijingulula bualu ebu panyima pa bidimu ndambu bivuaye ulama baledi bende bavua basama bakavua mikolo ku tshina. Muanetu wa bakaji eu udi wamba ne: “Pamvua mu lutatu elu, biakatukolela meme ne bayanyi ne muakunyanyi wa balume bua kumanya tshia kuenza. Kuvua bikondo bituvua tudimona katuyi ne wakutuambuluisha. Kadi pandi mvuluka, tuvua bamone patoke muvua Yehowa muikale netu. Wakatukolesha ne kutupeshaye tshituvua natshi dijinga nansha pavuabi bimueneka ne: tukavua bashikile.”

13. Mmunyi muvua kueyemena Yehowa kuambuluishe muanetu wa bakaji kampanda bua kutantamena ntatu ivua yenda ilondangana?

¹³ Kueyemena Yehowa bikole kudi mua kutuambuluisha kabidi bua kutantamena lutatu lunene. Tshikondo tshivua bayende wa Rhonda uvua kayi Ntemu wa Yehowa mushipe dibaka diabu, ke tshikondo tshivuabu bakuate muanabu ne Rhonda wa balume ne disama dia lufu didibu babikila ne: lupus. Ngondo mikese pashishe, yeye kufua. Pakamona Rhonda ne: tunyinganyinga  tuetu tukavua tutuadije kukepela, wakangata bumpanda-njila bua pa tshibidilu. Matuku makese pashishe, mamuende kufuaye pende. Ntshinyi tshiakambuluisha Rhonda bua kutantamenaye ntatu eyi? Udi wamba ne: “Mvua nyukila ne Yehowa dituku dionso nansha bua kuangata mapanga mu tumalu tukese. Pamvua ngenza nunku mvua mmona Yehowa bu muntu mulelela. Ngakapeta dilongesha dia ne: mbimpe kueyemena Nzambi pamutu pa meme kudieyemena anyi kueyemena bantu bakuabu. Diambuluisha divuaye mumpeshe divua dilelela, mbuena kuamba ne: uvua mungenzele bionso bimvua nabi dijinga. Bu tshipeta, ngakadimona pabuipi ne Yehowa bikole menemene mu malu onso amvua ngenza.”

14. Muena Kristo wa lulamatu udi ne mulela wende muipatshibue mu tshisumbu, udi ne bua kuikala ne dishindika kayi?

¹⁴ Tukonkononayi nsombelu mukuabu eu. Ela meji ne: mbipate mulela webe uudi munange bikole mu tshisumbu. Ku diambuluisha dia dilonga diebe dia Bible, udi mumanye mudibu ne bua kuenzela bantu badibu bipate mu tshisumbu malu. (1 Kol. 5:11; 2 Yone 10) Kadi misangu mikuabu bidi mua kumueneka bikole bua kuitaba dipatshibua dia mulela webe kampanda anyi kubenga kuditaba. * Udiku ne dishindika dia ne: Tatu webe wa mu diulu neakupeshe bukole buudi nabu dijinga bua kulonda mubelu wa mu Bible udi utangila dipatshibua anyi? Kuenaku umona mpunga eu bu mushindu wa wewe kusemena pabuipi ne Yehowa bua kukolesha malanda ebe nende anyi?

15. Bua tshinyi Adama kavua mutumikile mukenji wa Yehowa mu Edene?

¹⁵ Bua bualu ebu, ela meji ku tshivua tshifikile muntu wa kumpala Adama. Uvuaku muele  meji ne: uvua mua kubenga kutumikila Yehowa ne kutungunuka ne kuikala ne muoyo anyi? Tòo, bualu Bible udi utuambila ne: “Kabavua bashime” Adama to. (1 Tim. 2:14) Kadi bua tshinyi kavua mutumikile? Adama uvua ne bua kuikala mudie tshimuma tshivua Eva mumupeshe bualu uvua munange mukajende bikole kupita muvuaye munange Yehowa. Wakateleja dîyi dia mukajende pamutu pa kuteleja Yehowa, Nzambi wende.​—Gen. 3:6, 17.

16. Nnganyi utudi ne bua kunanga bikole? Bua tshinyi?

¹⁶ Bualu ebu budiku buleja ne: katuena ne bua kunanga balela betu bikole anyi? Kabiena nanku to. Kadi Yehowa ke utudi ne bua kunanga bikole. (Bala Matayi 22:37, 38.) Tuetu bamunange nanku, nebikale bua diakalenga dia balela betu nansha bobu benzela Yehowa mudimu mpindieu anyi kabatshiyi bamuenzelawu. Nunku tungunuka ne kukolesha dinanga diebe bua Yehowa ne dieyemena diebe kudiye. Dipatshibua dia mulela diodi dikutonda bikole menemene, pumuna muoyo webe kudi Yehowa mu disambila. * (Lomo 12:12; Filip. 4:6, 7) Umone nsombelu mukole eu bu mushindu wa kuvuija malanda ebe ne Yehowa malelela menemene. Dienza nunku, nedikuambuluishe bua kueyemena Yehowa bua kupatula bipeta bimpe.

17. Patudi ne bia bungi bia kuenza mu mudimu wa diyisha Bukalenge, mmunyi mutudi mua kuleja ne: tudi tueyemena Yehowa?

¹⁷ Paulo uvua ‘mupandishibue mukana mua ntambue’ bua tshipatshila kayi? Udi wamba ne: mbua “ku butuangaji buanyi diyisha dienzeke bimpe menemene ne bua ba mu bisamba bionso badiumvue.” (2 Tim. 4:17) Anu bu Paulo, patudi ne bia bungi bia kuenza mu mudimu wa diyisha, tudi ne dishindika dia ne: Yehowa ‘neatusakidile’ bintu bikuabu bionso bitudi nadi dijinga. (Mat. 6:33) Bu mutudi bamanyishi ba Bukalenge, ‘mbatupeshe lumu luimpe’ ne Yehowa udi utuangata bu ‘benzejanganyi nende ba mudimu.’ (1 Tes. 2:4; 1 Kol. 3:9) Tuetu tuenza mudimu wa Nzambi bikole, nebikale bipepele bua kuindila diambuluisha diende.

18. Mmu mishindu kayi mutudi mua kueyemena Yehowa ne kukolesha malanda etu nende?

¹⁸ Nunku, etshi ke tshikondo tshia tuetu kukolesha malanda etu ne Nzambi. Bikala bualu kampanda bututatshisha, tubumone bu mushindu wa tuetu kusemena pabuipi ne Yehowa. Eyowa, patudi tudifila mu Dîyi dia Nzambi, tutungunuka ne kusambila ne kuditua mu midimu ya bena Kristo, tuikalayi batuishibue ne: Yehowa udi umona tshitudi bilondeshile nsombelu utudi nende mpindieu ne udi kabidi umona bualu buonso budi butuindile kumpala.