1. Mmalu kayi avua menzeke mu tshidimu tshia 66? (Tangila tshimfuanyi.)

FUANYIKIJABI ne: udi muena Kristo musombele mu Yelushalema mu tshidimu tshia 66. Malu a bungi adi enzeka muaba uudi. Nguvena wa bena Lomo Florus mmuibe ntalanta 17 mu tshibutshilu tshia mu ntempelo. Diakamue bena Yuda badi batomboka. Badi bashipa basalayi ba bena Lomo ne bamba mudibu kabayi ku bukokeshi bua bena Lomo. Kadi bena Lomo kabena bajanguluka bua kubaluisha to. Mu ngondo isatu tshianana, basalayi 30 000 balombola kudi nguvena Cestius Gallus badi bajingila Yelushalema. Bantomboji bena Yuda badi baya kusokoma mu ngumbu ya ntempelo, kadi basalayi ba bena Lomo badi bafika ku tshimanu tshia pambelu pa ntempelo ne batuadija kutshibumbula. Bena mu tshimenga bonso badi bapeta buôwa. Mmunyi muudi udiumvua paudi umona malu onso adi enzeka aa?

2. Ntshinyi tshivua bena Kristo ne bua kuenza pavua basalayi ba bena Lomo bajingila tshimenga? Mmunyi muvuabu mua kufika ku dienza nunku?

² Bidimu bia bungi kumpala, Yezu uvua mudimuije bayidi  bende bua bualu ebu ne mubambile ne: “Panuamona Yelushalema munyunguluka kudi basalayi, nunku numanye ne: dibutuka diende dikadi disemene pabuipi. Dîba adi badi mu Yudaya batuadije kunyemena ku mikuna, badi munkatshi muende bapatuke, ne badi mu misoko ya pa mpenga kababuedimu.” (Luka 21:20, 21) Mmunyi muvuabu mua kutumikila mêyi a Yezu a kupatuka mu Yelushalema pavua basalayi bajingila tshimenga? Bualu bua dikema buakenzeka. Basalayi ba bena Lomo bakumbuka mu Yelushalema diakamue. Anu mukavua Yezu muambe, bavua ‘bakepeshe’ matuku a dibunda adi. (Matayi 24:22) Diakamue pavua basalayi bumbuke, mpunga wakamueneka bua bena Kristo ba lulamatu kutumikila mêyi a Yezu pa kunyemena ku mikuna. * (Tangila note.) Pashishe mu tshidimu tshia 70, tshiluilu tshikuabu tshia bena Lomo tshiakapingana mu Yelushalema. Bua musangu eu, tshiakabutula tshimenga. Kadi muntu yonso uvua mutumikile mêyi a Yezu wakapanduka.

3. Mbualu kayi bua muomumue buikala bena Kristo mua kumona mu katupa kîpi emu? Ntshinyi tshituakonkonona mu tshiena-bualu etshi?

³ Didimuija dia Yezu ne mêyi ende bidi bitangila kabidi matuku etu aa. Mu katupa kîpi emu, netumone bualu bua muomumue. Yezu uvua muakule bua malu avua menzeke mu bidimu lukama bia kumpala bua kuleja tshikala mua kuenzeka patuadija diakamue “dikenga dinene.” (Matayi 24:3, 21, 29) Anu bu muvuaku bena Kristo ba lulamatu bavua bapanduke ku dibutuka dia Yelushalema, nekuikale “musumba munene wa bantu” wapanduka ku dikenga dienzeka pa buloba bujima. (Bala Buakabuluibua 7:9, 13, 14.) Bidi ne mushinga bua tuetu kumvua tshidi Bible utuambila bua malu ikala ne bua kuenzeka aa. Bua tshinyi? Bualu adi atangila lupandu luetu. Tukonkononayi mpindieu bua kumanya mudi malu atshilualua aa atangila yonso wa kutudi.

4. Mmunyi muatuadija dikenga dinene?

⁴ Dikenga dinene nedituadije mushindu kayi? Nedituadije ne dibutuka dia bitendelelu bionso bia dishima. Bible udi ubikila bitendelelu bia dishima ne: “Babilona munene, mamu wa bandumba.” (Buakabuluibua 17:5-7) Bua tshinyi badi babikila bitendelelu bia dishima ne: ndumba? Bualu bamfumu ba bitendelelu kabena ne lulamatu kudi Nzambi to. Pamutu pa kushalabu balamate Yezu ne Bukalenge buende, badi bobu batua mbulamatadi ya bantu nyama ku mikolo ne babenga kulonda malongesha a mu Bible bua bikale ne muaba mu malu a tshididi. Ntendelelu wabu kena mukezuke bu wa bela manyi to. (2 Kolinto 11:2; Yakobo 1:27; Buakabuluibua 14:4) Kadi nnganyi wabutula Babilona munene? Yehowa neasake “nsengu dikumi” ya “nyama wa luonji mukunze” bua ‘kukumbajayi lungenyi luende.’ “Nyama wa luonji mukunze” udi tshimfuanyi tshia Bulongolodi bua matunga masanga ne “nsengu dikumi” idi tshimfuanyi tshia makokeshi a tshididi a bukole adi abutua nyama ku mikolo.​—Bala Buakabuluibua 17:3, 16-18.

5, 6. Bua tshinyi tudi tuamba ne: pabutulabu Babilona munene kabakushipa bantu bonso ba mu bitendelelu abi?

⁵ Nebashipe bena mu bitendelelu bia dishima bonso pabutulabu Babilona munene anyi? Tòo. Yehowa uvua musake muprofete Zekâya bua kufunda ku diambuluisha dia  nyuma muimpe bua tshikala mua kuenzeka. Tshikondo atshi, muntu uvua kumpala mu tshitendelelu tshia dishima neambe ne: ‘Tshiena muprofete, ndi tshidime; bualu bua eu mmudimu wa ku buana buanyi too ne katataka. Mukuabu neamuebeje ne: eyi mmputa kayi idi mu bianza biebe? Yeye neambe ne: bakayintapa mu nzubu wa balunda banyi.’ (Zekâya 13:4-6) Nunku, nansha bamue bamfumu ba bitendelelu nebambe ne: kabatu batendelela to, ne nebavile ne: kabatu banji kudiata mu bitendelelu bia dishima abi to.

⁶ Ntshinyi tshiafikila bantu ba Nzambi tshikondo atshi? Yezu udi wamba ne: “Bu matuku au kaayi makepesha, kakuvua muntu uvua mua kupanda to; kadi nebakepeshe matuku au anu bua basungula.” (Matayi 24:22) Mu bidimu lukama bia kumpala, bavua ‘bakepeshe’ matuku a dikenga mu Yelushalema. Bualu ebu buakambuluisha “basungula” anyi bena Kristo bela manyi bua kunyema. Bia muomumue, “nebakepeshe” matuku a tshitupa tshia kumpala tshia dikenga dinene bua “basungula.” Kabakuanyishila “nsengu dikumi” anyi makokeshi a tshididi a bukole bua kubutula bantu ba Nzambi to. Kadi nekuikale tshikondo tshîpi tshia ditalala diakamue padi dibunda dia kumpala dijika.

7, 8. Mpunga kayi wamueneka panyima pa dibutuka dia bitendelelu bia dishima? Mmunyi muikala bantu ba Nzambi bashilangane ne bakuabu tshikondo atshi?

⁷ Ntshinyi tshienzeka panyima pa kabutu ka bitendelelu bia dishima? Netshikale tshikondo tshia tuetu kuleja tshidi mu muoyo wetu menemene. Tshikondo atshi, bantu ba bungi nebakebe bukubi ne diambuluisha mu malongolodi a bantu adi bu “mabue manene a ku mikuna.” (Buakabuluibua 6:15-17) Kadi bantu ba Yehowa nebakebe bukubi kudiye. Pavuabu ‘bakepeshe’ matuku a buluishi mu bidimu lukama bia kumpala, katshivua tshikondo tshivua bena Yuda bonso ne bua kulua diakamue bena Kristo to. Kadi tshivua tshikondo tshivua aba bakavua bena Kristo ne bua kupatuka mu Yelushalema bu muvua Yezu muambe. Bia muomumue mu matuku atshilualua, ‘pakepeshabu’ matuku a dibunda Babilona munene, katuena mua kutekemena ne: bantu ba bungi nebalue diakamue bena Kristo balelela to. Kadi netshikale tshikondo tshia batendeledi balelela bonso kulejabu mudibu banange Yehowa ne bambuluisha bela manyi.​—Matayi 25:34-40.

⁸ Katuena bamanye bimpe menemene muenzeka malu mu tshikondo tshia diteta atshi to. Kadi tudi bamanye ne: nsombelu neikale mukole, ne nebikengele kudipangisha amue malu. Mu bidimu lukama bia kumpala, bena Kristo bavua ne bua kushiya nzubu yabu ne kutantamena ntatu bua kupanduka. (Mâko 13:15-18) Mbimpe tudiebeje ne: ‘Ndiku mudiakaje bua kushiya bintu bia ku mubidi anyi? Ndiku ngitaba bua kuenza tshionso tshidi tshikengela bua kushala ne lulamatu kudi Yehowa anyi?’ Anji elabi meji! Tshikondo atshi, anu tuetu ke bikala batendelela Nzambi wetu nansha  mu nsombelu wa mushindu kayi, anu muvua muprofete Danyele muenze.​—Danyele 6:10, 11.

9, 10. a) Mmukenji kayi wikala bantu ba Nzambi mua kumanyisha mu tshikondo tshia dikenga dinene? b) Ntshinyi tshienza bena lukuna ba bantu ba Nzambi?

⁹ Tshikondo tshia dikenga dinene katshiakuikala tshikondo tshia kuyisha “lumu luimpe lua Bukalenge” to. Bualu tshikondo tshia kuyisha netshikale tshimane kupita. Tshikondo tshia “nshikidilu” netshikale tshimane kulua. (Matayi 24:14) Bantu ba Nzambi nebamanyishe ne dikima mukenji mukole wa dilumbuluisha watangila bantu bonso. Mukenji eu udi mua kuikala dimanyisha dia ne: bulongolodi bubi bua Satana bukadi pa kubutuka buonso. Bible udi ufuanyikija mukenji eu ne mabue a mvula padiye wamba ne: “Mabue manene a mvula, dibue dionso dikale ne bujitu bu bua ntalanta umue, akafuma mu diulu kudituta pa bantu; bantu bakapenda Nzambi bua tshipupu tshia mabue a mvula, bualu tshipupu atshi tshivua tshinene tshia dikema.”​—Buakabuluibua 16:21.

¹⁰ Bena lukuna betu nebumvue mukenji mukole eu. Yehowa uvua musake muprofete Yehezekele ku diambuluisha dia nyuma muimpe bua kumvuija mushindu wenza bisamba bidisange bidi Bible ubikila ne: Goga wa ku Magoga malu, wamba ne: ‘Mukalenge Yehowa udi wamba ne: mu dituku adi meji neabuele mu mutshima webe, ne wewe neupangadije kuenza bualu bubi. Newambe ne: nembandaku bua kuluisha ba mu misoko idi mu mpata; nenye kuluangana ne bantu aba badi bashikame talalaa, kabayi ne bualu budi bubapumbisha buonso buabu badi bashikamaku kabayi ne ngumbu, anyi nkanu ne biibi. Neupangadije bua kupawula ne bua kunyenga bintu biabu ku bukole, bua kupingaja tshianza tshiebe kabidi ku bipela bidi ne bantu bashikamamu mpindieu bua kubinyanga, bua kuluishamu bantu aba bakapatulabu munkatshi mua bisamba bia bantu, bakamana kuangata bimuna ne lupetu, badi bashikame munkatshi mua buloba.’ (Yehezekele 38:10-12) Bantu ba Nzambi nebamueneke bashilangane ne bakuabu, bienze anu bu “badi bashikame munkatshi mua buloba.” Bualu ebu nebutonde bisamba bia bantu bikole menemene. Eyowa, nebipete dijinga dikole dia kubunda bela manyi ba Yehowa ne mikoko mikuabu.

11. a) Ntshinyi tshitudi ne bua kumanya bua dilondangana dia malu mu tshikondo tshia dikenga dinene? b) Ntshinyi tshienza bantu pamonabu bimanyinu?

¹¹ Ntshinyi tshienzeka pashishe? Bible kena uleja dilondangana dijalame dia malu to, kadi bidi bimueneka ne: amue malu neenzeke mu tshikondo tshimue. Yezu mmuambe mu mulayi wende wa buprofete udi wakula bua nshikidilu wa ndongoluelu wa malu eu ne: “Nekuikale kabidi bimanyinu mu dîba, mu ngondo ne mu mitoto; pa buloba nepikale dipampakana dia bisamba, bualu kabiakumanya tshia kuenza bua tshiona tshia mbuu ne divuanduluka diende dikole. Bantu nebuminyine bua buôwa ne dindila dia malu adi alua pa buloba bujima, bualu nebanyukule makole a muulu. Pashishe nebamone Muana wa muntu ulua mu ditutu ne bukole ne butumbi bunene.” (Luka 21:25-27; bala Mâko 13:24-26.)  Pakumbana mulayi wa buprofete eu, nekuikalaku bimanyinu bidi bienza buôwa ne malu ikala mua kuenzeka mu diulu diena dîna anyi? Tuindile bua kumona muenzeka malu. Kadi tudi bamanye ne: pamona bena lukuna ba Nzambi bimanyinu ebi, nebibakuatshishe buôwa bua bungi.

12, 13. a) Ntshinyi tshienza Yezu paluaye “ne bukole ne butumbi bunene”? b) Ntshinyi tshienza bantu ba Nzambi tshikondo atshi?

¹² Ntshinyi tshienza Yezu paluaye “ne bukole ne butumbi bunene”? Neafute bantu badi ne lulamatu ne kunyoka badi kabayi ne lulamatu. (Matayi 24:46, 47, 50, 51; 25:19, 28-30) Yezu wakafila tshilejilu bua kumvuija bualu ebu bimpe. Wakamba ne: “Palua Muana wa muntu mu butumbi buende ne banjelu bonso bikale nende, neasombe mu nkuasa wende wa butumbi. Bisamba bionso nebidisangishe kumpala kuende, neatapulule bantu anu bu mudi mulami wa mikoko utapulula mikoko ne mbuji. Neateke mikoko ku dia balume diende, kadi mbuji ku dia bakaji diende.” (Matayi 25:31-33) Ntshinyi tshiafikila bantu badi bu mikoko anyi mbuji? Nebabalumbuluishe. Mbuji anyi bantu badi kabayi ne lulamatu “nebaye mu kabutu ka tshiendelele.” Kadi mikoko anyi bantu badi ne lulamatu nebapete muoyo wa tshiendelele.​—Matayi 25:46.

¹³ Ntshinyi tshienza bantu badi bu mbuji pamanyabu ne: nebababutule? “Nebadikume pa tshiadi badila miadi.” (Matayi 24:30) Kadi ntshinyi tshienza bela manyi ne bantu badi babambuluisha? Nebenze tshivua Yezu muambe etshi: “Padi malu aa atuadija kuenzeka, nubanduluke, nujule mitu muulu, bualu dipikudibua dienu dikadi pabuipi.”​—Luka 21:28.

14, 15. Mmudimu kayi wa disangisha wenzeka patuadija Goga wa ku Magoga kubunda bantu ba Nzambi? Mmunyi muenzeka bualu ebu?

¹⁴ Ntshinyi tshienzeka pabunda Goga wa ku Magoga bantu ba Nzambi? Bible udi wamba ne: Muana wa muntu “neatume banjelu ne neasangishe bantu bende basungula kaba kamue bafumine ku mpepele inayi, kutuadijila ku ditengu dia buloba too ne ku ditengu dia diulu.” (Mâko 13:27; Matayi 24:31) Mudimu wa disangisha eu kawena utangila dîba divuabu basungule bela manyi bua musangu wa kumpala to. Kawena utangila dituibua tshitampi tshia ndekelu dia bela manyi batshidi pa buloba to. (Matayi 13:37, 38) Dituibua tshitampi edi didi dienzeka kumpala kua dikenga dinene kutuadijadi. (Buakabuluibua 7:1-4) Kadi, ndisangisha kayi didi Yezu wakuila? Uvua wakula bua tshikondo tshiapeta bela manyi batshidi pa buloba difutu diabu dia kuya mu diulu. (1 Tesalonike 4:15-17; Buakabuluibua 14:1) Bualu ebu nebuenzeke tshikondo kampanda dibunda dia Goga wa ku Magoga dimane kutuadija. (Yehezekele 38:11) Pashishe mêyi a Yezu aa neakumbane: “Bantu bakane nebakenke bu dîba mu Bukalenge bua Tatu wabu.”​—Matayi 13:43. * (Tangila note.)

¹⁵ Bidiku bisua kumvuija ne: nekuikale diambuibua dia bela manyi anyi? Bena mu bukua buena Kristo ba bungi badi bitaba ne: bena Kristo nebaye mu diulu ne mibidi yabu ya buntu. Badi kabidi bela meji ne: nebamone Yezu upingana ne mubidi wa buntu bua kukokesha buloba. Kadi Bible udi uleja patoke ne: dipingana dia Yezu kadiena dimueneka ne mêsu padiye wamba ne: “Tshimanyinu tshia Muana wa muntu” netshimueneke mu diulu, ne Yezu nealue mu “matutu a mu diulu.” (Matayi 24:30) Bible udi wamba kabidi ne: “Musunyi ne mashi kabiena mua kupiana Bukalenge bua Nzambi to.” Nunku, bantu baya mu diulu nebanji ‘kukudimuka mu katupa kakese, mu mupodi wa dîsu, tshikondo tshia mpungi wa ndekelu.’ * (Tangila note.) (Bala 1 Kolinto 15:50-53.) Katuena tuenza mudimu ne muaku diambuibua muaba eu bua kumvuija diya dia bela manyi mu diulu to, bualu bukua buena Kristo budi buenza mudimu ne muaku eu bua kulongesha dilongesha dia dishima. Kadi bela manyi ba lulamatu batshidi pa buloba nebasangishibue mu diulu diakamue.

16, 17. Ntshinyi tshienzeka pa buloba kumpala kua dibaka dia Muana wa mukoko kuenzekadi mu diulu?

¹⁶ Pikala bela manyi bonso 144 000 baye mu diulu, dilongolola dia ndekelu dia dibaka dia Muana wa mukoko nedituadije. (Buakabuluibua 19:9) Kadi bualu bukuabu nebuenzeke kumpala kua tshibilu tshia disanka etshi kutuadijatshi. Uvuluke ne: tshikondo tshiabunda Goga bantu ba Nzambi, bela manyi bakuabu nebikale batshidi pa buloba. (Yehezekele 38:16) Ntshinyi tshienza bantu ba Nzambi? Nebatumikile mêyi aa: ‘Kanuena ne bua kuluangana mvita eyi; nudijadike, nuimane talalaa, numone lupandu lua Yehowa ludi nenu, kanutshinyi, kanukemi.’ (2 Kulondolola 20:17) Mutantshi mukese dibunda dia Goga dimane kutuadija, bela manyi bonso batshidi pa buloba nebaye mu diulu. Pashishe Buakabuluibua 17:14 udi utuambila tshienzeka mu diulu bua dibunda dia Goga. Bena lukuna ba  bantu ba Nzambi “nebaluangane ne Muana wa mukoko, kadi bu mudiye Mukalenge wa bakalenge ne Mfumu wa bamfumu, Muana wa mukoko neabatshimune. Kabidi, bantu badi nende badi babikidibue ne basungula ne bena lulamatu, nebatshimune.” Nunku, Yezu ne bela manyi 144 000 bakokesha nende mu diulu nebasungile bantu ba Nzambi pa buloba apa.

¹⁷ Dibasungila edi nedifikishe ku mvita ya Armagedone yatumbishisha dîna dinsantu dia Yehowa. (Buakabuluibua 16:16) Bantu bonso badi bu mbuji anyi badi kabayi ne lulamatu nebabutudibue. Kakuakuikala malu mabi pa buloba to, ne “musumba munene wa bantu” newupanduke ku Armagedone. Ndekelu wa bionso, dibaka dia Muana wa mukoko nedienzeke, bualu bunene bua ndekelu bua mu mukanda wa Buakabuluibua budi buenza disanka. (Buakabuluibua 21:1-4) * (Tangila note.) Bantu bonso bashala ne muoyo pa buloba nebanyishibue kudi Nzambi ne nebamone mudiye mubanange ne mudiye ne muoyo muimpe. Tudi bindile ne muoyo kuulu kuulu tshikondo atshi. Nedikale dibaka dia dikema!​—Bala 2 Petelo 3:13.

18. Bu mutudi bindile malu mimpe akadi pa kuenzaka aa, tudi ne bua kudisuika bua kuenza tshinyi?

¹⁸ Bu mutudi bindile malu mimpe akadi pa kuenzeka aa, ntshinyi tshidi yonso wa kutudi ne bua kuenza mpindieu? Mupostolo Petelo muenzeja kudi nyuma muimpe wa Yehowa wakafunda ne: “Bu mudi bintu bionso ebi ne bua kuvingutuka mushindu eu, nuelangane meji bua kumanya ne: nudi ne bua kuikala bantu ba mushindu kayi mu bikadilu bia tshijila ne mu bienzedi bia dilamata Nzambi, panudi nuindila ne nulama bimpe mu meji dikalaku dia dituku dia Yehowa . . . Nunku bananga, bu munudi bindile malu aa, nuenze muenu muonso bua ndekelu wa bionso anusangane kanuyi katoba, kanuyi kalema, ne mu ditalala.” (2 Petelo 3:11, 12, 14) Nunku, tudisuikayi bua kushala bakezuke mu nyuma ne tutuayi Mukalenge wa ditalala Yezu Kristo nyama ku mikolo.