1, 2. a) Ndipetangana kayi didi pankatshi pa kulamata Yehowa ne kubenga kubuelakana mu bilumbu bia pa buloba ebu? (Tangila tshimfuanyi.) b) Bantu ba bungi mbalamate ku malu kayi? Bitu bifikisha ku tshinyi?

BATENDELEDI ba Yehowa kabatu babuelakana mu malu a tshididi, anyi mu bilumbu bidi bitapulula bantu bu mudi malu a buena ditunga, a makoba anyi a bibidilu bia bantu to. Bua tshinyi? Bualu tudi banange Yehowa, tudi bamulamate ne tudi tumutumikila. (1 Yone 5:3) Nansha tuetu basombele muaba kayi anyi bafumine muaba kayi, tudi tutumikila mikenji ya Nzambi. Kuikala ne lulamatu kudi Yehowa ne Bukalenge buende kudi ne mushinga wa bungi kupita tshintu kayi tshionso. (Matayi 6:33) Ke bualu kayi tudi tuamba ne: katuena “ba pa buloba to.”​—Bala Yone 17:11, 15, 16; Yeshaya 2:4.

² Bantu ba bungi lelu mbalamate ditunga diabu, tshisa tshiabu, bibidilu biabu anyi bisumbu bia malu a manaya bia mu ditunga diabu. Bia dibungama, kuenza nunku nkufikishe bantu ba bungi ku ditembangana, ku dikinangana ne pamuapa too ne ku dishipa bantu badi balamate ku luseke lukuabu. Nansha mutudi katuyi tubuelakana mu bilumbu ebi, bidi mua kutulenga tuetu anyi bena mu mêku etu, ne tudi mua kukenga katuyi benze bualu. Bidi mua kuikala bipepele bua tuetu kulamata ku luseke kampanda  padi mbulamatadi wangata mapangadika mabi, bualu Nzambi mmutufuke ne bukole bua kumanya malu adi mimpe ne adi mabi. (Genese 1:27; Dutelonome 32:4) Ntshinyi tshiutu wenza mu nsombelu ya nunku? Utu ubenga bua kubuelakana mu malu aa anyi? Utu ulamata ku luseke kampanda anyi?

3, 4. a) Bua tshinyi katuena ne bua kulamata ku luseke kampanda padiku bimvundu? b) Ntshinyi tshituakonkonona mu tshiena-bualu etshi?

³ Bantu ba bungi batu balamata ku luseke kampanda padi bimvundu bijuka bualu mbulamatadi itu ibitabijija ne: ke tshidi muena ditunga muimpe ne bua kuenza. Kadi tuetu tudi tuidikija Yezu. Nunku katuena mua kubuelakana mu malu a tshididi ne mu mvita to. (Matayi 26:52) Bena Kristo balelela kabena bela meji ne: tshitupa kampanda tshia bulongolodi bua Satana ntshimpe kupita tshikuabu to. (2 Kolinto 2:11) Katuena basue kuenza bualu nansha bumue budi butubuejakaja mu bimvundu bia mu bulongolodi ebu to.​—Bala Yone 15:18, 19.

⁴ Kadi bu mutudi bantu bapange bupuangane, bamue ba munkatshi muetu badi mua kuikala batshidi baluangana bua kumbusha meji mabi adibu nawu bua bantu badibu bashilangane nabu. (Yelemiya 17:9; Efeso 4:22-24) Nunku, mu tshiena-bualu etshi netukonkonone amue mêyi a mu Bible ikala mua kutuambuluisha bua kumbusha meji mabi a ditapulula bantu. Netukonkonone kabidi mutudi mua kulonga mua kuikala ne mmuenenu wa muomumue ne wa Yehowa ne Yezu bua kumona mua kulamata Bukalenge.

5, 6. Pavua Yezu pa buloba, mmunyi muvuaye umona bisumbu bia bantu bishilashilangane? Bua tshinyi?

⁵ Wewe mumone bikukolele bua kubenga kubuelakana mu malu a pa buloba ne kubenga kulamata ku luseke kampanda, mbimpe udiebeje ne: ‘Ntshinyi tshivua Yezu mua kuikala muenze?’ Pavua Yezu pa buloba, kuvua bimvundu ne dibenga kupetangana pankatshi pa bantu ba mu Yudaya, ba mu Galela ne ba mu Samaleya. Elabi meji bua bilejilu ebi. Bena Yuda ne bena Samaleya kabavua bakuishangana to. (Yone 4:9) Kakuvua dipetangana pankatshi pa Bafalese ne Basadoke mu malu a bungi to. (Bienzedi 23:6-9) Bena Yuda bavua balonge malu a Mikenji bavua bela meji ne: bavua bapite aba bavua kabayi baalonge. (Yone 7:49) Bantu ba bungi bavua bakine balambuishi ba bitadi ne bena Lomo. (Matayi 9:11) Kadi Yezu kavua mubuelakane mu bimvundu ebi to. Nansha muvua Yezu wakuila bulelela bua Yehowa ne mumanye ne: Isalele uvua tshisamba tshia Nzambi tshia pa buatshi, kavua mulongeshe bayidi bende musangu nansha umue ne: bavua bapite bakuabu to. (Yone 4:22) Kadi uvua mubalongeshe bua kunangabu bantu bonso.​—Luka 10:27.

⁶ Bua tshinyi Yezu kavua umona tshisumbu kampanda tshia bantu bu tshipite tshikuabu? Bualu yeye ne Tatuende batu bamona bantu mushindu umue. Yehowa uvua mufuke bantu bua buwuje buloba tente ne bantu ba makoba mashilangane. (Genese 1:27, 28) Nunku, Yehowa ne Yezu kabatu bamona dikoba anyi  ditunga peshi muakulu kampanda muimpe mupite mukuabu to. (Bienzedi 10:34, 35; Buakabuluibua 7:9, 13, 14) Tudi ne bua kulonda tshilejilu tshiabu tshimpe etshi.​—Matayi 5:43-48.

7, 8. a) Tudi ne bua kulamata ku luseke lua nganyi? Bua tshinyi? b) Buetu tuetu, ntshinyi tshiajikija ntatu ya bantu?

⁷ Bua tshinyi katuena ne bua kutua mfumu kampanda anyi mbulamatadi kansanga nyama ku mikolo? Bualu tudi balamate ku luseke lua Yehowa. Yeye ke Mfumu wetu. Mu Edene, Satana wakamba ne: Yehowa kena ukokesha bantu mu mushindu muimpe to. Satana uvua musue bua bantu bitabe ne: wende mushindu wa kuenza malu uvua muimpe mupite wa Nzambi. Yehowa mmutulekele bua tudisunguile luseke lutudi basue kuikala. Kadi wewe udi wela meji kayi? Udi utumikila Yehowa bualu udi witaba ne: mushindu wende wa kuenza malu mmuimpe kupita webe anyi? Udiku mutuishibue ne: Bukalenge buende ke mbulamatadi umuepele wajikija ntatu yetu anyi? Peshi udi wela meji ne: bantu badi mua kudilombola nkayabu bimpe nansha Nzambi kayi mubalombole?​—Genese 3:4, 5.

⁸ Tshilejilu, muntu yeye mukukonke muudi wela meji bua tshisumbu kampanda tshia malu a tshididi anyi bua tshisumbu tshia bantu badi bakeba mashintuluka peshi bua bulongolodi kampanda bua malu a pa buloba, newandamune munyi? Bamue bena mu bisumbu ebi badi mua kuikala ne meji mimpe ne basue kuambuluisha bantu. Kadi tudi bamanye ne: anu Bukalenge bua Yehowa ke buajikija ntatu ya bantu ne malu onso a kansungansunga. Tudi tulonda kabidi buludiki bua Yehowa mu tshisumbu pamutu pa muntu yonso kuenza tshidiye umona ne: ntshimpe. Ke bualu kayi bena mu tshisumbu badi mu buobumue.

9. Ntshilumbu kayi tshivua munkatshi mua bamue bena Kristo mu bidimu lukama bia kumpala? Ntshinyi tshivua Paulo mubalombe bua kuenza?

⁹ Mu bidimu lukama bia kumpala bamue bena Kristo ba mu Kolinto bavua bakokangana bamba ne: “‘Meme ndi wa Paulo,’ ‘Meme ndi wa Apolo,’ ‘Meme ndi wa Kefa,’ ‘Meme ndi wa Kristo.’” Pakumvua Paulo bualu abu, biakamutonda bikole. Tshivua tshilumbu tshinene bualu ditalala dia tshisumbu divua mu njiwu. Nunku, Paulo wakakonka bena Kristo nende ne: ‘Kristo udi mutapuluke anyi?’ Wakababela ne: “Bana betu, ndi nnusengelela mu dîna dia Mukalenge wetu Yezu Kristo bua nuakule dîyi dimue ne bua kakuikadi matapuluka munkatshi muenu, kadi bua nuikale mu buobumue menemene mu meji amue ne mu lungenyi lumue.” Ke mudibi kabidi lelu. Mu tshisumbu tshia bena Kristo kamuena ne bua kuikala matapuluka nansha a mushindu kayi to.​—1 Kolinto 1:10-13; bala Lomo 16:17, 18.

10. Ntshinyi tshivua Paulo muvuluije bena Kristo? Bualu ebu budi butulongesha tshinyi?

¹⁰ Paulo uvua muvuluije bena Kristo bela manyi ne: kuabu mmu diulu, ne kabavua ne bua kuimanyina pa “malu a pa buloba” to. (Filipoyi 3:17-20) * (Tangila note.) Bela manyi  mbaleji mpala ba Nzambi ne Kristo. Padi muleji mpala wa ditunga kampanda mu ditunga dikuabu, kena ne bua kubuelakana mu malu a mu ditunga adi nansha mu malu adi a tshididi to. Bia muomumue, ki mbimpe bua bena Kristo bela manyi kubuelakana mu malu a tshididi ne mu malu makuabu a pa buloba to. (2 Kolinto 5:20) Bena Kristo badi ne ditekemena dia kupeta muoyo wa tshiendelele pa buloba badi pabu balamate Bukalenge bua Nzambi ne kabena ne bua kubuelakana mu bimvundu bia mu bulongolodi ebu to.

11, 12. a) Mmeji kayi atudi ne bua kuepuka tuetu basue kushala balamate Bukalenge bua Nzambi? b) Mmeji kayi avua nawu muanetu wa bakaji kampanda bua bamue bantu? Ntshinyi tshivua tshimuambuluishe bua kushintuluka?

¹¹ Mu miaba ya bungi pa buloba, bantu batu bapetangana bikole ne bantu badi bafumine muaba umue nabu anyi badi ne bibidilu bia muomumue ne biabu peshi badi bakula nabu muakulu umue. Misangu ya bungi batu batumbisha muaba udibu bafumine. Kadi katuena ne bua kulekela meji a mushindu eu atunyanga to. Kadi tudi ne bua kushintulula mushindu wetu wa kuela meji ne tudi ne bua kulongesha kondo ketu ka muoyo bua katubuelakanyi mu malu onso a mushindu eu. Mmunyi mutudi mua kuenza nanku?

¹² Tuangate tshilejilu tshia muanetu wa bakaji Mirjeta * (tangila note) wa mu ditunga divuabu babikila ne: Yougoslavie. Muaba uvuaye mukolele bavua bakine bena Serbie. Pakalongaye malu a Yehowa, wakamona ne: Yehowa katu umona tshisa kampanda tshipite tshikuabu to, kadi Satana ke udi musue bua bantu bakinangane. Nunku, wakadienzeja bua kushintulula lungenyi luende. Kadi, pakajuka mvita pankatshi pa bisa bishilangane muaba uvuaye musombele, Mirjeta wakatuadija kabidi kupeta meji mabi bua bena Serbie. Kavua nansha musue kabidi kuyisha bena Serbie to. Bu muvuaye mumanye ne: meji au avua mabi, wakalomba Yehowa bua amuambuluishe bua kuumbushaye. Wakamulomba kabidi bua amuambuluishe bua alue mpanda-njila. Udi wamba ne: “Ngakamona ne: kuimanyina pa mudimu wa buambi ke kuvua kungambuluishe bikole. Mu buambi, ntu ndienzeja bua kuidikija ngikadilu wa Yehowa wa dinanga, ne ndi mumone ne: tshiena kabidi ne meji mabi amvua nawu to.”

13. a) Mbualu kayi buvua bufikile Zoila? Ntshinyi tshiakenzaye? b) Bualu buvua bufikile Zoila budi butulongesha tshinyi?

¹³ Tuangate tshilejilu tshikuabu tshia muanetu wa bakaji Zoila wa mu Mexique uvua muye ku Mputu. Mu tshisumbu tshiabu mudi bana betu ba balume ne ba bakaji badi bafume mu ditunga dikuabu dia mu Amerike wa ku Sud au. Zoila udi wamba ne: bamue ba kudibu bavua bamuseka bua ditunga diabu, bibidilu biabu, ne bua misambu ya kuabu. Bivua bimunyingalaja, ke bualu kayi uvua ulomba Yehowa bua amuambuluishe bua kapatudi mêyi mabi. Mu nsombelu wa nunku, wewe uvua mua kuenza tshinyi? Bamue bana betu ba balume ne ba bakaji batshidi baluangana bua kudikanda padi bantu bakula bibi bua muaba udibu bafumine. Nunku, katuena basue kuamba anyi kuenza bualu kampanda budi mua kufikisha bamue bantu ku didimona bapite bakuabu to. Katuena basue kukebesha matapuluka mu tshisumbu anyi muaba mukuabu to.​—Lomo 14:19; 2 Kolinto 6:3.

14. Ntshinyi tshidi mua kukuambuluisha bua kumona bantu bakuabu mudi Yehowa ubamona?

¹⁴ Tuetu bonso tudi bamanye ne: batendeledi ba Yehowa mbantu bamue, nunku  katuena ne bua kuangata muaba kampanda anyi ditunga kansanga bu dipite dikuabu to. Kadi bena mu dîku dienu ne bantu banudi bakole nabu bavua mua kuikala bakusake bua kunanga muaba uudi mufumine. Pamuapa utshidi ne meji mabi bua bantu ba matunga makuabu, ba bibidilu bikuabu, muakulu mukuabu peshi dikoba dikuabu. Ntshinyi tshidi mua kukuambuluisha bua kushintuluka? Elangana meji bua mushindu udi Yehowa umona bantu badi baditumbisha bua ditunga diabu anyi badi bela meji ne: mbapite bakuabu. Enza makebulula bua malu aa bua akuambuluishe paudi udilongela anyi panudi nuenza ntendelelu wa mu dîku. Pashishe lomba Yehowa bua akuambuluishe bua umone bantu bakuabu mudiye ubamona.​—Bala Lomo 12:2.

15, 16. a) Mmunyi muikala bamue bantu mua kutuenzela malu bua mutudi bashilangane nabu? b) Mmunyi mudi baledi mua kuambuluisha bana babu bua kushalabu balamate Yehowa?

¹⁵ Tudi basue kuenzela Yehowa mudimu ne kondo ka muoyo kimpe, nunku netumueneke bashilangane bikole ne bena mudimu netu, balongi betu, bena mutumba ne balela betu. (1 Petelo 2:19) Yezu wakamba ne: bantu bakuabu nebatukine bualu tudi bashilangane nabu. Tuvuluke ne: bantu ba bungi badi batuluisha ki mbamanye malu a Bukalenge bua Nzambi to. Nunku, kabena bumvua bua tshinyi tudi balamate bikole Bukalenge bua Nzambi pamutu pa kulamata mbulamatadi ya bantu to.

¹⁶ Bua kulamata Yehowa, tudi ne bua kumutumikila nansha bantu bakuabu batuamba  anyi batuenzela malu kayi. (Danyele 3:16-18) Bidi mua kukolela nangananga bansonga bua kuenza malu bishilangane ne bakuabu. Baledi wetu, ambuluishayi bana benu bua bikale ne dikima mu tulasa. Bana benu badi mua kutshina bua kubenga kunemekela dibendele anyi kubenga kuenza bibilu bia buena ditunga. Mu ntendelelu wenu wa mu dîku, nudi mua kulonga bua kumanya mudi Yehowa umona malu aa. Ubalongeshe mua kumvuija patoke ne kanemu konso malu adibu bitabuja. (Lomo 1:16) Bualu bukuabu, kuoku mushindu, ambuluisha bana bebe pa kuyukila ne balongeshi babu bua malu atudi tuitabuja.

17. Ndungenyi kayi lutudi ne bua kuepuka? Bua tshinyi?

¹⁷ Misangu ya bungi tutu banange ditunga dietu, bibidilu bietu, muakulu ne biakudia bia mu ditunga ditudi bakolele. Kadi tutuku tuela meji ne: tshitudi tuetu banange ke tshitu anu tshimpe bikole kupita tshidi bakuabu banange anyi? Yehowa mmusue bua tusanke ne bintu bishilashilangane bidiye mufuke. (Musambu 104:24; Buakabuluibua 4:11) Nunku, bua tshinyi kuamba anu ne: mushindu kampanda wa dienza malu mmuimpe mupite mukuabu?

18. Bua tshinyi mbimpe kumona bakuabu mudi Yehowa ubamona?

¹⁸ Yehowa mmusue bua bantu ba mishindu yonso bamumanye, bamutendelele ne bapete muoyo wa tshiendelele. (Yone 3:16; 1 Timote 2:3, 4) Nunku, padi bana betu ne ngenyi kampanda mishilangane ne yetu, tudi tuyitaba bikala Yehowa pende uyanyisha. Tuetu tuenza nunku, nsombelu wetu neikale muimpe ne netuikale mu buobumue ne bana betu ba balume ne ba bakaji. Anu mutudi bamone, katuena tubuelakana mu bimvundu bia mu bulongolodi ebu to, bualu tudi balamate Yehowa ne Bukalenge buende. Tudi bakine diditumbisha ne ditembangana bidi mu bulongolodi bua Satana. Tudi tuela Yehowa tuasakidila bua mudiye mutulongeshe bua kunanga ditalala ne bua kuikala ne budipuekeshi. Tudi tumvua anu bu mufundi wa Misambu wakamba ne: ‘Monayi, bidi bitamba buimpe ne bia disanka bua bukua bantu badikunguije pamue ne mutshima umue!’​—Musambu 133:1.