PANGAKAKUMBAJA bidimu tshitema, tshitshivua ndepa kabidi to. Lelu ndi ne bidimu 43, kadi ndi bule bua metre umue tshianana. Pakamona baledi banyi ne: tshivua ndepa kabidi, bakankankamija bua kuenza mudimu bikole bua tshitambi kuela meji bua bule buanyi. Ngakenza tshintu tshia kutekela bimuma bia kupana kumpala kua nzubu wetu ne kuenza bua tshikale ne mankenda. Kuenza nunku kuvua kukoka basumbi.

Bushuwa, kuenza mudimu bikole kakuvua anu kushintulule malu onso to. Mvua anu muîpi bikole, ne mvua ntata nansha bua malu mapepele a mu nsombelu bu mudi, bule bua tshibasa tshia bintu bidibu bapana. Bivua bimueneka bu ne: bintu bionso bivua bienzela anu bantu bavua bale kundi misangu ibidi. Mvua ngumvua bibi bua tshimvua, kadi malu akashintuluka pangakakumbaja bidimu 14.

Dimue dituku, bamamu babidi Bantemu ba Yehowa bakansumba bimuma ne kundomba bua kundongeshabu Bible. Mu matuku makese ngakajingulula ne: kumanya Yehowa ne malu adiye mulongolole kudi ne mushinga wa bungi kupita bule buanyi. Bualu ebu buakangambuluisha bikole. Musambu wa 73:28 wakalua mvese wanyi munene. Tshitupa tshia kumpala tshia mvese eu tshidi tshiamba ne: ‘Kusemena pabuipi ne Nzambi nkuimpe buanyi meme,’ NWT.

Dîku dietu diakumbuka mu Côte d’Ivoire bua kuya kusombela mu Burkina Faso, nsombelu wanyi wakashintuluka bikole. Mu Côte d’Ivoire bantu bavua bibidile kummona muaba umvua mpanyina bimuma. Kadi mu Burkina Faso, mvua muntu muenyi ne bantu ba bungi bavua bammona bu muntu udi ukemesha. Bu muvua bantu bantangila bikole, ngakashala musombe mu nzubu munkatshi mua mbingu ya bungi. Pashishe ngakavuluka muvuabi bimpe bua meme kusemena pabuipi ne Yehowa. Ngakafundila Betele wa Bantemu ba Yehowa mukanda, ne kuntuminabu muntu muimpe. Nani uvua misionere wakalua ku moto wende bua kuntangila.

Njila ya muaba utuvua ivua ne busenu bukebesha kudi lusenga lua bungi ne ivua ne bitotshi bia bungi tshikondo tshia mvula. Nani uvua udishinda misangu ya bungi ne moto pavuaye ulua kundongesha, kadi kakatshioka to. Dimue dituku, wakandomba bua tuetu kuya nende mu bisangilu. Ngakamona ne: bivua bindomba kupatuka mu nzubu ne kutantamena dintangila dia bantu. Bualu bukuabu, pamvua mbanda pa moto, bujitu buvua buvula kabidi bikole, eku moto mudianjile kuikala ne lutatu bua kuwendesha. Nansha nanku ngakitaba, meme kuvuluka tshitupa tshibidi  tshia mvese wanyi munene tshidi tshiamba ne: ‘Ndi muvuije Mukalenge Mutambe Bunene Yehowa tshinyemenu tshianyi.’

Meme ne Nani tuvua imue misangu tudishinda mu bitotshi, kadi bu mutuvua banange bisangilu, kabivua bituambila bualu to. Ndishilangana dinene kayipu divua pankatshi pa mimuemue ivua kudi bantu mu Nzubu wa Bukalenge ne dintangila divuabu bantangila kudi bantu bakuabu pambelu! Ngondo tshitema pashishe, ngakatambula.

Tshitupa tshisatu tshia mvese wanyi munene tshidi ne: ‘Bua kumanyisha midimu yebe yonso.’ Mvua mumanye ne: mvua ne bua kupeta lutatu lunene mu mudimu wa buambi. Ntshidi mvuluka musangu wa kumpala umvua muye kuyisha ku nzubu ne ku nzubu. Bakulumpe ne bana bavua bashala bantangile, benda bandonda ne baseka mumvua ngenda. Biakantonda bikole, kadi pangakavuluka ne: bavua pabu dijinga ne Mparadizu anu bu meme, ngakatantamena lutatu elu.

Bua kupepeja malu, ngakasumba dikalu dia nkata isatu dia kuendeshila ku bianza. Muntu utuvua tuyisha nende uvua umpusa bua kubanda mukuna ne usomba panyima pa dikalu patuvua tupueka. Nansha muvua mudimu wa kuyisha mukole ku ntuadijilu, ngakalua kuwunanga bikole, nunku mu 1998, ngakalua mpanda-njila wa pa tshibidilu.

Mvua ndonga Bible ne bantu ba bungi, banayi ba kudibu bakatambula. Bualu bukuabu, umue wa ku bana betu ba bakaji wakitaba pende bulelela! Pamvua ngumvua muvua bakuabu baya kumpala mu nyuma bivua misangu ya bungi binkolesha tshikondo tshimvua dijinga ne dikoleshibua. Dimue dituku pamvua nsama malaria, ngakapeta mukanda ufumina mu Côte d’Ivoire. Mvua muyukile malu a mu Bible ne mulongi kampanda wa mu iniversite mu Burkina Faso ne meme kumupesha muanetu wa balume bua kutungunukabu ne dilonga. Mulongi wa Bible eu wakaya kusombela mu Côte d’Ivoire. Ngakasanka pangakumvua ne: uvua mulue mumanyishi uvua kayi muanji kutambula.

Mmunyi muntu ndiambuluisha? Bena mu bulongolodi kampanda budi buambuluisha bantu badi ne bulema bakandomba bua kundongesha mua kutela. Umue wa ku balongeshi wakamona ngenzelu wanyi wa mudimu ne yeye kuamba ne: “Mbimpe tukulongeshe mua kuenza nsabanga.” Ke bobu kundongesha. Mpindieu, ntu ngenza nsabanga ya kusukula nayi bilamba, ya kuowa nayi mâyi ne ya kusukula nayi mu nzubu. Bantu batu banange nsabanga intu ngenza ne batu bambila bantu bakuabu bua kuyisumba. Ntu nya kuyipesha bantu ku dikalu dianyi.

Bia dibungama, mu 2004 ngakimanyika bumpanda-njila bualu nyima uvua unsama bikole. Kadi ntu anu nyisha pa tshibidilu.

Bantu batu bamba ne: batu bammanyine bua tuseku. Ndi ne malu a bungi adi ansaka bua kuikala ne disanka bualu kusemena pabuipi ne Nzambi nkuimpe buanyi meme.​—Muyuki mulonda kudi Sarah Maiga.