YEHOWA n’Nzambi utu upeshangana bintu. (Yakobo 1:17) Tudi mua kumona ngikadilu wende eu ku diambuluisha dia bintu bidiye mufuke. Mmuwuje tshibuashibuashi ne mitoto, ne mmuwuje buloba ne mitshi mimpe.​—Musambu 65:12, 13; 147:7, 8; 148:3, 4.

Bu muvua mufundi wa Misambu wa 104 ne dianyisha bua bintu bivua Yehowa mufuke, wakafunda musambu bua kumutumbisha. Paudi ubala musambu eu, udiku pebe ne dianyisha anu bu mufundi wa Misambu eu anyi? Wakamba ne: ‘Nengimbile Yehowa misambu pantshidi ne muoyo; nengimbile Nzambi wanyi misambu ya kumutumbisha nayi pantshidiku.’ (Musambu 104:33) Udiku pebe musue kuenza bia muomumue anyi?

Yehowa mmusue bua tuikale petu tupeshangana bintu. Udi utuleja malu mimpe adi atusaka bua kupeshangana bintu. Wakasaka mupostolo Paulo ku nyuma wende bua kufunda ne: “Ambila bantu badi babanji mu ndongoluelu wa malu eu bua kabikadi bena lutambishi, bua kabateki ditekemena diabu mu bubanji budi mua kujimina, kadi baditeke kudi Nzambi udi utupesha bintu bionso bitudi tusanka nabi. Ubambile bua benze malu mimpe, bikale babanji mu midimu mimpe, bikale bapeshanganyi ba bintu, bikale badiakaje bua kuabanyangana bintu ne bakuabu, ne nunku badi baditekela tshishimikidi tshimpe bua matuku atshilualua, bua bakuate bikole ku muoyo wa bushuwa.”​—1 Timote 6:17-19.

Paulo wakumvuija mu mukanda muibidi uvuaye mutumine bena Kolinto lungenyi lutudi ne bua kuikala nalu patudi tupesha bakuabu bintu. Wakamba ne: “Muntu ne muntu enze bu mudiye mupangadije mu muoyo wende, kenji ne kanyinganyinga anyi bu muenzeja ku bukole, bualu Nzambi mmunange muntu udi ufila ne disanka.” (2 Kolinto 9:7) Mbanganyi batudi tuambuluisha patudi tupeshangana bintu? Paulo wakamba ne: tudi tuambuluisha bakuabu patudi tubapesha bidibu nabi dijinga, ne tudi tudiambuluisha petu bualu Yehowa neatubeneshe.​—2 Kolinto 9:11-14.

Pashishe Paulo wakakula bua tshijadiki tshitambe bunene tshia mudi Nzambi upeshangana bintu pakambaye ne: “Tudi tuela Nzambi tuasakidila bua dipa diende difila tshianana didi kadiyi kuamba.” (2 Kolinto 9:15) Dipa didi Yehowa ‘mufile tshianana,’ didi dikongoloja bintu bionso bimpe bidiye mutupeshe ku diambuluisha dia Yezu Kristo. Tudi bapange mêyi makumbane bua kumvuija mushinga udi nawu dipa edi!

Mmunyi mutudi mua kuleja ne: tudi ne dianyisha bua bionso bidi Yehowa ne Yezu batuenzele ne bialuabu kutuenzela? Umue mushindu mpatudi tufila dîba dietu, makanda etu, ne bintu bietu bua ntendelelu wa Yehowa ne bua kuambuluisha bakuabu bua kumumanya. Tudi mua kuenza nunku nansha tuetu ne bintu bia bungi anyi bikese.​—1 Kulondolola 22:14; 29:3-5; Luka 21:1-4.