Bukalenge bua Nzambi ntshinyi?

NTSHINYI tshivua Yezu uyisha? Yeye muine udi wamba ne: uvua uyisha Bukalenge bua Nzambi. (Luka 4:43) Kakuyi mpata, pavua bantu bamuteleja, bavua bumvua muvuaye utamba kuakula bua Bukalenge abu. Bivua bibakemesha anyi? Bavuaku bamuebeja tshivua Bukalenge abu bumvuija anyi? Tòo. Mikanda inayi ya Evanjeliyo idi ilonda malu a Yezu kayena ne lukonko nansha lumue lua nunku to. Nunku bantu abu bavua bamanye tshivua Bukalenge bua Nzambi bumvuija anyi?

Tshitudi ne bua kumanya ntshia ne: Mikanda ya kale ivua bena Yuda banemeka bu ya tshijila ivua yakula bua Bukalenge abu, ileja mu mushindu muimpe tshidibu ne tshikalabu ne bua kukumbaja. Bia muomumue lelu eu, tudi mua kumanya malu makuabu a bungi adi atangila Bukalenge ebu tuetu tubala Bible. Tukonkononayi malu muanda mutekete adi Bible utulongesha bua Bukalenge ebu. Bena Yuda ba kumpala kua Yezu ne ba mu matuku ende bakavua bamanye malu asatu a kumpala. Yezu Kristo anyi bapostolo bende bakakula bua asatu adi alonda mu bidimu lukama bia kumpala. Bualu bua ndekelu mbulue kumueneka mu tshikondo tshietu etshi.

1. Bukalenge bua Nzambi mbumfumu bulelela buikala mua kushalaku kashidi. Mulayi wa kumpala wa mu Bible wakaleja ne: Nzambi uvua ne bua kutuma muntu bua kusungila bantu bimpe. Muntu au uvuabu babikila ne: “Muana” anyi diminu uvua ne bua kujikija ntatu yonso ivua ditomboka dia Adama ne Eva ne Satana dikebeshe. (Genese 3:15) Bidimu bia bungi panyima, Nzambi wakamanyisha Mukalenge Davidi bualu bua dikema buvua butangila diminu adi anyi Masiya. Uvua ne bua kulua Mukalenge wa Bukalenge kampanda. Bukalenge abu buvua ne bua kushilangana ne makalenge makuabu onso. Buvua ne bua kushalaku kashidi.​—2 Samuele 7:12-14.

2. Bukalenge bua Nzambi nebubutule makalenge a bantu onso. Muprofete Danyele wakamona mu tshikena-kumona kampanda mushindu uvua makalenge a bukole a pa buloba mua kulondangana too ne mu matuku etu aa. Tangila tshiakamonaye ku ndekelu kua tshikena-kumona atshi. Tudi tubala ne: ‘Mu matuku a bakalenge aba [ba pa buloba ba ku nshikidilu] Nzambi wa mu diulu neajadike bukalenge bukuabu budi kabuyi bubutudibua tshiendelele. Bukokeshi buabu kabuena bupianyibua kudi bantu bakuabu, kadi nebutshibule makalenge aa onso bitupa bitupa, nebuabutule, ne buobu nebujalame tshiendelele.’ Nunku Bukalenge bua Nzambi nebubutule makalenge onso a pa buloba apa ne nebumbushe mvita, bukokeshi buawu bubi ne mbuejelu. Anu mudi mulayi wa Danyele  uleja, Bukalenge bua Nzambi nebukokeshe buloba bujima mu matuku makese emu. (Danyele 2:44, 45) Bukalenge ebu mbumfumu bua bushuwa buikala mua kushala nkayabu pa buloba bujima. *

3. Bukalenge bua Nzambi nebujikije mvita, masama, nzala ne lufu. Bible udi uleja malu ikala Bukalenge bua Nzambi mua kuenza pa buloba. Bukalenge ebu nebuenze tshidi bukalenge bua bantu nansha bumue kabuyi buanji kuenza anyi kabuyi mua kuenza to. Elabi meji, babutula bingoma bionso bua kashidi! ‘Yeye udi ulekesha mvita bua ijike too ne kumfudilu kua buloba.’ (Musambu 46:9) Baminganga kabakuikalaku kabidi nansha mpitadi anyi masama a mishindu yonso. ‘Muena musoko kêna wamba ne: Ndi ne disama.’ (Yeshaya 33:24) Nzala ne masama adi afumina ku didia dibi nebijimine, biakudia nebikalaku bia bungi. ‘Blé ikale mivule pa buloba.’ (Musambu 72:16) Madilu kaakuikalaku kabidi, nansha miaba ya dilamina bitalu ne nkita, anyi ntatu yonso idi lufu lukebesha. Lufu ludi muluishi munene wa bantu nelujimine. Nzambi ‘neamine lufu tshiendelele; ne Mukalenge Yehowa neakupule binsonji ku mêsu kua bantu bonso.’​—Yeshaya 25:8.

4. Bukalenge bua Nzambi budi ne Mukalenge udi Nzambi musungule. Masiya ki mmuditeke nkayende mukalenge to, anyi ki mbamusungule kudi bantu bena mapanga nansha. Yehowa Nzambi nkayende ke udi mumusungule. Miaku Masiya ne Kristo idi ileja ne: Nzambi ke uvua mumusungule. Miaku yonso ibidi eyi idi yumvuija “Muela manyi.” Nunku Yehowa mmuele Mukalenge eu manyi anyi mmumusungule bua kuenzaye mudimu wa pa buawu. Nzambi udi wamba bua Mukalenge eu ne: ‘Tangilayi, muntu wanyi undi nshindika, wanyi musungula udi mutshima wanyi usanka bualu buende. Ngakumuela nyuma wanyi pambidi pende; yeye neavuijile bisamba bia bende kulumbulula kuakane.’ (Yeshaya 42:1; Matayo 12:17, 18) Nnganyi mukuabu udi mua kusungula Mukalenge udi mutukumbanyine kupita Mufuki wetu?

5. Mukalenge wa Bukalenge bua Nzambi mmuleje ku mêsu kua bantu bonso mudiye mukumbane. Yezu wa mu Nazaleta ke wakalua Masiya uvuabu balaye. Uvua mufumine mu dîku divua Nzambi musungule. (Genese 22:18; 1 Kulondolola 17:11; Matayo 1:1) Pavuaye pa buloba, wakakumbaja malu a bungi akavuabu bamanyishe bua Masiya bidimu nkama ne nkama kumpala. Nansha bavua mu diulu bakaleja muvuaye Masiya. Mushindu kayi? Nzambi wakakula dîyi difumina mu diulu, uleja muvua Yezu muikale Muanende; banjelu bakaleja ne: Yezu ke uvua Masiya uvuabu balaye; Yezu pende wakenza bishima kumpala kua bantu ba bungi bivua bileja ne: uvua ne bukole bua kudi Nzambi. * Yezu wakaleja misangu ne misangu muvuaye ne bua kuikala Mukalenge muimpe. Kavua anu ne bukole bua kuambuluisha bantu, kadi uvua kabidi ne dijinga dia kubambuluisha. (Matayo 8:1-3) Uvua muntu muimpe, uvua uditeka pa muaba wa bakuabu, uvua ne dikima ne uvua kabidi udipuekesha. Muntu yonso udi mua kubala mu Bible malu akenzaye pa buloba.

6. Bantu 144 000 nebakokeshe ne Kristo mu Bukalenge bua Nzambi. Yezu wakamba ne: bantu bakuabu ne bapostolo bende nebakokeshe nende mu diulu. Wakabikila bantu abu ne: “Tshisumbu tshikese.” (Luka 12:32) Pashishe, bakambila mupostolo Yone ne: tshisumbu tshikese etshi netshikale ne bantu 144 000. Nebikale ne mudimu mulenga mu diulu bualu nebakokeshe ne Kristo bu bakalenge ne bakuidi.​—Buakabuluibua 5:9, 10; 14:1, 3.

7. Bukalenge bua Nzambi budi bukokesha mpindieu mu diulu mbuindile bua kutuadija kukokesha pa buloba bujima. Bualu bua muanda mutekete ebu budi munkatshi mua malu malenga atudi mua kulonga. Mukanda wa Nzambi udi ne bijadiki bia bungi bidi bileja ne: Yezu ukadi mutuadije kukokesha mu diulu. Udi ukokesha mu diulu mpindieu ne mutantshi mukese eu neabangishe kukokesha pa buloba bujima ne neakumbaje malu onso mimpe atudi batele kulu eku. Kadi mmunyi mutudi mua kuikala bashindike ne: Bukalenge bua Nzambi budi bukokesha mpindieu? Nebutuadije kukokesha pa buloba dîba kayi?

[Mêyi adi kuinshi]