Widikije ditabuja diabu

Wakaluila ntendelelu mulelela mvita

ELIYA uvua utangila tshisumbu tshia bantu benda balempe pa mukuna wa Kâmele. Nansha mututshivua mu dinda, bivua bitekete bua kumona muvuabu batekesha kudi bupele ne nzala. Kukavua bidimu bisatu ne tshitupa bivua mvula kayi muloke mu ditunga diabu to.

Munkatshi muabu muvua baprofete ba Bâla 450 bavua benda ne lutambishi lua bungi ne bakina Eliya muprofete wa Yehowa bikole. Mukalenge mukaji Izebele ukavua mushipe basadidi ba Yehowa bapite bungi, kadi Eliya utshivua anu uluisha ntendelelu wa Bâla ne muoyo umue. Kadi uvua ne bua kutungunuka ne kumuluisha nanku too ne dîba kayi? Pamuapa bakuidi abu bavua bela meji ne: muntu umue eu kavua mua kubatshimuna bobu bonso to. (1 Bakelenge 18:3, 19, 20) Mukalenge Ahaba wakalua pende musombe mu ditempu diende dia bumfumu. Yeye pende kavua munange Eliya nansha kakese to.

Kadi muprofete au uvua nkayende ukavua pa kumona malu a katshia ne katshia. Pavua Eliya mushale mutangile apu, kuvua ne bua kuenzeka mvita ya dikema pankatshi pa bubi ne buimpe. Ntshinyi tshivuaye mumvue pavua butuku buenda butshia? Uvua ne buôwa bualu uvua ‘muntu wa mutshima muomumue netu.’ (Yakobo 5:17) Tshia kumanya ntshia ne: bu muvua Eliya munyunguluka kudi bantu bavua balekele kutendelela Yehowa, mfumuabu uvua muele Yehowa nyima ne bakuidi bavua bashipangana, wakadimona nkayende.​—1 Bakelenge 18:22.

Kadi ntshinyi tshivua tshifikishe bena Isalele mu lutatu alu? Ntshinyi tshiudi mua kulongela ku muyuki eu? Bible udi utulomba bua kuela meji bikole bua tshilejilu tshia basadidi ba Nzambi ne ‘kuidikija ditabuja diabu.’ (Ebelu 13:7) Nunku tukonkononayi tshilejilu tshia Eliya.

Dikokangana dia mutantshi mule didi ditua ku ndekelu

Munkatshi mua bidimu bia bungi, Eliya uvua anu mushale mutangile ne mêsu muvuabu banyangakaja ntendelelu wa Yehowa uvua tshintu tshitambe buimpe tshivuabu natshi mu ditunga diabu. Anu muudi mua kumona, mu Isalele muvua dikokangana dia mutantshi mule pankatshi pa ntendelelu mulelela ne wa dishima, pa Yehowa Nzambi ne mpingu ivuabu batendelela kudi bisamba bivua bibanyunguluke. Mu matuku a Eliya, dikokangana adi dikavua dilue dibi menemene.

Mukalenge Ahaba uvua musele Izebele, muana wa mukalenge wa Sidona. Izebele uvua mudisuike bua kumuangalaja ntendelelu wa Bâla mu Isalele mujima ne bua kumbushamu ntendelelu wa Yehowa bua kashidi. Mu matuku makese patupu, Ahaba katshivua kabidi ne dîyi kumpala kua Izebele to. Ahaba wakashila Bâla ntempelo ne tshioshelu, yeye muine e kulua ntunga-mulongo mu ditendelela nzambi wa bisamba bia bende eu. Wakafikisha Yehowa munda bikole.​—1 Bakelenge 16:30-33. *

Bua tshinyi ntendelelu wa Bâla uvua mubi mutambe? Bualu uvua mufikishe bena Isalele ba bungi ku diela Nzambi mulelela nyima. Uvua kabidi ntendelelu mubi ne wa tshikisu. Mu ntendelelu au bavua ne ntempelo uvua balume ne bakaji bendelamu masandi, bibilu bia malu a masandi, balambula too ne bana babu mu kapia. Yehowa kutumaye Eliya kudi Ahaba bua kumuambila ne: mushipu uvua ne bua kututa too ne pavuaye yeye Eliya ne bua kumanyisha dijika diawu. (1 Bakelenge 17:1) Kuakapita bidimu  bia bungi kumpala kua Eliya kuluaye kabidi kudi Ahaba ne kumuambila bua asangishe bena Isalele ne baprofete ba Bâla ku mukuna wa Kâmele.

Kadi ntshinyi tshidi dikokangana edi diumvuija buetu tuetu lelu eu? Bamue badi mua kuamba ne: muyuki wa ntendelelu wa Bâla kautshiena ne mushinga to, bualu katuena tumona ntempelo ne bioshelu biende muaba utudi to. Kadi muyuki eu kawena anu bualu bua kale patupu to. (Lomo 15:4) Dîna dia “Bâla” didi diumvuija “muena” anyi “mfumu.” Yehowa wakambila bantu bende ne: bavua ne bua kumusungula yeye bua ikale “bâla” wabu anyi bayabu. (Yeshaya 54:5) Kuenaku umona ne: too ne lelu bantu batshidi anu benzela bamfumu bakuabu mudimu pamutu pa Nzambi Wa Bukole Buonso anyi? Nunku, muntu yeye mudifile mu nsombelu wende mujima anu bua kukeba makuta, kuenza mudimu, kujikija lutetuku, kuenda masandi anyi yeye mudifile kudi nzambi mipite bungi idi bantu batendelela pamutu pa kutendelela Yehowa, mmusungule wende mfumu. (Matayo 6:24; Lomo 6:16) Nunku tudi mua kuamba ne: malu a bungi avuabu benza mu ntendelelu wa Bâla adi enda enzeka lelu eu. Dikokangana adi divuaku kale pankatshi pa Yehowa ne Bâla didi mua kutuambuluisha bua kusungula bimpe utudi ne bua kukuatshila mudimu.

Mmunyi muvuabu ‘bazobela’?

Bu muvua mukuna wa Kâmele mule bikole, muntu uvua wimanapu uvua mua kumona ditunga dia Isalele kumbukila anu ku musulu wa Kishona uvua muinshi mu tshibandabanda too ne ku Mâyi Manene (a Mediterane) avua pabuipi apu too ne ku mikuna ya mu Lebanona ivua kule ku Nord. * Kadi pavua dîba dipatuka, divua dileja muvua nsombelu munyanguke bikole mu ditunga edi. Buloba buimpe buvua Yehowa mupeshe bana ba Abalahama buvua buatuke bonso. Buvua bulue mpindieu buloba bua miunya mikole ya kafiondola mbua makoba ne bunyanga kudi buenzavi bua bantu ba Nzambi nkayabu. Pakatuilangana bantu bonso, Eliya wakasemena kudibu ne kubakonka ne: ‘Nudi nuenda nuzobela pankatshi pa nseke ibidi musangu bule munyi? Bikala Yehowa Nzambi, numulonde; kadi bikala Bâla Nzambi, numulonde.’​—1 Bakelenge 18:21.

Ntshinyi tshivua Eliya musue kuamba pakambaye ne: nudi ‘nuzobela pankatshi pa nseke ibidi’? Bushuwa, bantu abu kabavua bamanye ne: bavua ne bua kusungula bua kutendelela Yehowa anyi kutendelela Bâla to. Bavua bela meji ne: bavua mua kubatendelela bonso babidi, badiambila ne: bavua mua kutokesha Bâla ku muoyo ne mikiya yabu mibi eku bikale balomba bua Yehowa abenzele malu mimpe. Pamuapa bavua bela meji ne: Bâla uvua ubavudijila bia pa madimi ne bimuna biabu eku ‘Yehowa Nzambi wa bena mvita’ ubalama mu mvita. (1 Samuele 17:45) Bavua bapue bualu bua mushinga mukole muoyo, budi kabidi ba bungi lelu bapue muoyo bua ne: Yehowa katu witaba bua bamutendelele ne nzambi mukuabu to. Udi ulomba ne mmuakanyine bua kumutendelela anu yeye nkayende. Kena witaba bua kumutendelela pamue ne nzambi mukuabu ne kuenza nunku kudi kumufikisha munda.​—Ekesode 20:5.

Nunku bena Isalele abu bavua ‘bazobela’ anu bu muntu ukeba bua kulonda njila ibidi musangu umue. Bantu ba bungi lelu eu badi benza tshilema tshia muomumue, balekela ‘bâla’ mikuabu yangata muaba mu nsombelu wabu ku kakese ku kakese, ne balekela ntendelelu wa Nzambi. Mubelu wa Eliya wa kulekela kuzobela udi mua kutuambuluisha bua kukonkonona tshiakabidi ntendelelu wetu ne malu atudi tuteka pa muaba wa kumpala.

Diteta dinene

Pashishe Eliya wakambila bantu bua kuenza diteta. Divua diteta ditekete dia dikema. Bakuidi ba Bâla bavua ne bua kuenza tshioshelu, kutekapu mulambu ne kulomba nzambi wabu bua atume kapia. Pashishe Eliya pende uvua ne bua kuenza muomumue. Wakabambila ne: ‘Nzambi witaba ne kapia ikale Nzambi mulelela.’ Eliya uvua mumanye Nzambi uvua Nzambi mulelela. Bu muvuaye ne ditabuja dikole, wakambila baprofete ba Bâla bua kutuadijabu. Wakalekela baluishi bende badianjile kusungula ngombe  wa bobu kulambula ne bua badianjile kubikila Bâla. *​—1 Bakelenge 18:24, 25.

Tshikondo tshietu etshi malu a bishima akadi majike. Kadi Yehowa ki mmushintuluke to. Tudi mua kumueyemena anu bu muvua Eliya mumueyemene. Tshilejilu, padi bantu bakuabu babenga kuitaba tshidi Bible wamba, katutshinyi bua kubalekela bua badianjile kuakula. Anu bu Eliya, tulekele bua Nzambi mulelela akose tshilumbu. Tudi tuenza nanku patudi katuyi tudieyemena, kadi patudi tueyemena Dîyi diende difundisha ku nyuma didi ne mudimu wa “kuludika malu.”​—2 Timote 3:16, MMV.

Baprofete ba Bâla kutekabu mulambu pa tshioshelu ne kutuadijabu kumubikila. Bakela mbila njila ne njila ne: ‘Ô Bâla, utumvuile.’ Kuenzabu mêba a bungi bamubikila anu kumubikila. Bible udi wamba ne: ‘Kadi kakuakadi dîyi, nansha muntu wakitaba.’ Munda munya, Eliya kutuadijaye kubaseka ubambila ne: Bâla uvua mua kuikala kayi ubandamuna bua bungi bua mudimu uvuaye nawu, anyi uvua mua kuikala muye ku nkumba, peshi mulale ne bivua bikengela bua muntu amubishe. Eliya kuambilaye bena dishima abu ne: ‘Elayi dîyi dikole.’ Bushuwa, uvua mumone muvua ntendelelu wa Bâla au muikale patupu, ne uvua musue bua bantu ba Nzambi badimuene pabu bualu abu.​—1 Bakelenge 18:26, 27.

Ndekelu wa bionso, bakuidi ba Bâla bakalua bu bapale, ‘bakela mêyi makole, bakaditapa ne tuele ne miele ya mvita bu mudi tshilele tshiabu too ne pakapueka mashi abu pambidi pabu.’ Bakenza bionso abi tshianana. ‘Kakuakadi dîyi, nansha muntu wakitaba.’ (1 Bakelenge 18:28, 29) Mu kuamba kuimpe, Bâla kavuaku to. Uvua patupu nzambi mufuikakaja kudi Satana bua kumbusha bantu kudi Yehowa. Nansha lelu eu kabidi, kusungula mfumu mukuabu pa kumbusha Yehowa kudi kufikisha ku bundu.​—Musambu 25:3; 115:4-8.

Diandamuna

Mu mapingaja, dîba dia Eliya kufila pende mulambu kukumbanadi. Kulongololaye tshioshelu tshia Yehowa, bimueneka ne: bavua batshiupule kudi baluishi ba ntendelelu mulelela. Wakangata mabue 12, pamuapa bua kuvuluija bantu ba bungi ba mu bukalenge bua bisa 10 bia Isalele ne: batshivua anu ne bua kutumikila Mikenji ivuabu belele bisamba 12 bia Isalele. Pashishe wakatekapu mulambu ne kuambaye bua baboleshe bintu bionso ne mâyi, avuaye mua kuikala mupete ku Mbuu wa Mediterane uuvua pabuipi apu. Kuenzejaye munkoloji munyunguluke tshioshelu, kuwuujijaye pawu ne mâyi. Anu bu muvuaye mulekele bua baprofete ba Bâla badianjile kuenza muvuabu basue kumpala, wakalekela Yehowa malu onso bualu uvua mumueyemene.​—1 Bakelenge 18:30-35.

Pakajikijabu kuenza bionso bivua bikengela kuenza, wakenza disambila. Disambila diende divua dipepele ne divua dileja patoke malu avuaye wangata ne mushinga. Tshia kumpalampala, uvua musue bua bantu bamanye ne: Yehowa ke uvua “Nzambi wa mu Isalele,” kadi ki m’Bâla to. Tshibidi, uvua musue bua muntu yonso amanye ne: yeye uvua anu musadidi wa Yehowa patupu; butumbi buonso buvua ne bua kuya kudi Nzambi. Tshisatu, wakaleje ne: utshivua anu uditatshisha bikole bua bana babu, bualu uvua musue kumona Yehowa ukudimuija ‘mitshima yabu kabidi.’ (1 Bakelenge 18:36, 37) Eliya utshivua anu mubanange nansha muvuabu badikebele makenga a bungi bua buntomboji buabu. Patudi tusambila, tulejayi petu mutudi tuditatshisha bua dîna dia Nzambi, mutudi ne kudipuekesha ne mutudi tumvuila bantu badi dijinga ne diambuluisha luse.

Kumpala kua Eliya kusambilaye, bisumbu bia bantu bavua muaba au bavua mua kuikala badiebeja bikala Yehowa uvua mua kumueneka pende Nzambi wa patupu bu muvua Bâla. Kadi pakajika disambila, kabavua ne dîba dia kudiela kabidi nkonko to. Bible udi wamba ne: ‘Pashishe kapia ka Yehowa kakapona panshi, kakosha mulambu ne nkunyi ne mabue ne dimfuekenya ne kakakamisha mâyi akadi mu mutubu.’ (1 Bakelenge 18:38) Edi divua diandamuna dimpe ditambe! Kadi ntshinyi tshiakenza bantu?

Bobu bonso bakela mbila ne: “Yehowa, yeye udi Nzambi; Yehowa yeye udi Nzambi.”  (1 Bakelenge 18:39) Ndekelu wa bionso bakafika ku dimona tshivua bulelela. Kadi kabavua banji kuleja ditabuja diabu to. Mu kuamba kuimpe, kuitaba ne: Yehowa udi Nzambi mulelela panyima pa bamane kumona kapia kafume mu diulu bua disambila dia Eliya ki mmushindu muimpe wa kuleja ditabuja to. Nunku Eliya wakabalomba bua kulejabu ditabuja mu mushindu mukuabu. Wakabambila bua kuenza tshivuabu ne bua kuikala benze kuonso aku, tuambe ne: kutumikila Mikenji ya Yehowa. Mikenji ayi ivua yamba ne: baprofete ba dishima ne batendeledi ba mpingu bavua ne bua kushipibua. (Dutelonome 13:5-9) Bakuidi ba Bâla abu bavua baluishi banene ba Yehowa Nzambi bavua benza malu avua kaayi apetangana ne disua diende ku bukole. Bavua bakumbanyine kubafuila luse anyi? Tòo, bualu bobu pabu kabavua bumvuile bana batekete bavua kabayi ne bualu luse, pavuabu babalambula ne muoyo pa tshioshelu to. (Nsumuinu 21:13; Yelemiya 19:5) Ke bualu kayi Eliya wakatuma dîyi bua babashipe bonso.​—1 Bakelenge 18:40.

Bamue bamanyi badi babipisha malu avua menzeke ku ndekelu kua diteta edi dia pa Mukuna wa Kâmele. Bamue badi batshina bua bena bitabataba ba mu bitendelelu kabalu kuangata muyuki eu bua kusaka nawu bantu ku dikengesha bena mu bitendelelu bikuabu. Diakabi, kudi bena bitabataba ba malu a nzambi bapite bungi lelu eu. Kadi Eliya kavua muena tshitabataba to. Uvua muenze malu bilondeshile dilumbuluisha diakane dia Yehowa. Bualu bukuabu, bena Kristo balelela mbamanye ne: kabena mua kuambula muele bua kushipa bantu babi bu muvua Eliya muenze to. Panyima pa Masiya mumane kulua, mukenji udi bayidi bende bonso balonda udi mu mêyi akambilaye Petelo ne: ‘Pingaja muele webe mu muaba wawu; bualu bua bonso badi bangata muele nebashipibue ku muele.’ (Matayo 26:52) Yehowa neatume Muanende bua kunyoka bantu babi mu matuku adi kumpala.

Dibanza didi nadi bena Kristo balelela ndia kuikala ne nsombelu wa ditabuja. (Yone 3:16) Umue mushindu wa kuenza bualu ebu nkuidikija bantu ba lulamatu bu mudi Eliya. Uvua utendelela anu Yehowa nkayende ne wakabela bantu bakuabu bua bamutendelele pabu muomumue. Wakela tshitendelelu tshia dishima tshivua Satana umbusha natshi bantu kudi Yehowa patoke ne dikima dionso. Uvua mulekele bua Yehowa akose bilumbu bivuaku pamutu pa kueyemena meji ne disua diende nkayende. Bushuwa, Eliya wakaluila ntendelelu mulelela mvita. Tuetu bonso tumuidikijayi.

[Mêyi adi kuinshi]

[Lungenyi lunene lua mu dibeji 20]

Kusungula mfumu mukuabu pamutu pa Yehowa kudi kufikisha ku bubi

[Tshimfuanyi mu dibeji 21]

“Yehowa, yeye udi Nzambi”