Nkonko ya babadi

Bua tshinyi Bantemu ba Yehowa kabatu ne nkuluse mu bitanda biabu?

Bantemu ba Yehowa mbamanye ne: Lufu lua Yezu Kristo ndunzuluile muntu yonso udi wenza malu adi aleja ditabuja tshiibi tshia muoyo wa kashidi. (Matayo 20:28; Yone 3:16) Kadi kabatu bitaba ne: Yezu uvua mufuila pa nkuluse bu mudibu bamuleja mu mikanda kudi bantu ba bungi to. Bilondeshila malongesha etu, Yezu uvua mufuile pa mutshi mululame kadi ki mpa mutshi mutshiamakane to.

Mu tshimenga tshia kale tshia Mesopotamia ke muvuabu benza mudimu ne nkuluse bidimu binunu 2 kumpala kua Yezu (KY). Nansha pa mabue manene a mu Scandinavie a mu bidimu bipite pa binunu 3 KY, bavua bondolapu bua kuzola nkuluse ya bungi. Mumanyi wa malu a kale ne a bimfuanyi wa mu Danemark diende Sven Tito Achen udi wamba mu mukanda uvuaye mufunde ne: Bantu bavua kabayi bena Kristo bavua benza mudimu ne nkuluse bu “tshimanyinu tshia manga abu bua kudilama, ne kututa dikasa dilenga.” (Symbols Around Us) Ke bualu kayi kabiena bitukemesha padi mukanda mukuabu wa bena Katolike wamba ne: “Nkuluse uvua mu bantu ba kumpala kua Kristo ne ba panyima pende, muaba uvuabu bamupeshe diumvuija dia bintu bia mu diulu bikole.” (New Catholic Encyclopedia) Kadi bua tshinyi bitendelelu bia bungi mbiangate nkuluse bu tshimanyinu tshiabi tshinene tshia tshijila?

William Vine (mumanyi mukuabu wa mu ditunga dia Grande Bretagne) wakamba ne dishindika ne: “Pabuipi ne bidimu bia 350 panyima pa Yezu (PY), . . . bantu bavua kabayi bena Kristo bakatuadija kubuela mu ekeleziya ya bena Kristo, ne bavua babanyishile bua bobu kushala ne bimanyinu biabu bia nkuluse ne bimfuanyi. Nanku, bena mu ekeleziya bakangata tshimanyinu tshia Tau tshifunda bu dileta dia T dikale ne kakolo pamutu.”​—Vine’s Expository Dictionary of Old and New Testament Words.

Vine udi wamba kabidi ne: “nkuluse” ne “kupopela pa nkuluse” bidi bileja “mutshi muiname . . . udi mushilangane ne mitshi ibidi mitshiamakaja bu mudi bena bitendelelu bamba.” Mu mukanda mukuabu badi bitaba bualu ebu bamba ne: “Bidi bimueneka patoke ne: bavua bashipele Mukalenge pa mutshi mululame kadi ki mpa mitshi ibidi mituta mienze nkuluse to.” (Oxford University’s Companion Bible) Biamueneki patoke ne: bena bitendelelu bavua bangate tshilele tshivua katshiyi tshia mu Bible to.

Achen utukavua batela kulu eku udi wamba ne: “Bidi bimueneka ne: mu bidimu 200 panyima pa lufu lua Yezu, kakuvua muena Kristo nansha umue uvua wenza mudimu ne tshimanyinu tshia nkuluse to.” Udi usakidila bua bena Kristo ba kumpala wamba ne: Nkuluse “uvua ne bua kuikala ubaleja lufu ne bubi, anu bu mudi tshiamu tshia dikosa natshi bantu mitu ku Mputu anyi nkuasa idibu batua ku nzembu lelu eu bua kushipa bantu.”

Bualu bukuabu bua mushinga budi ne: Tshivuabu bashipele Yezu, nansha tshikala nkuluse anyi mutshi wa tshianana, tshivua ne bua kuleja anu makenga ne lufu luende, kadi katshiena ne bua kulua tshimanyinu tshia kunemeka anyi tshidi bena Kristo ne bua kutendelela to. Bible utuambila ne: ‘Nyemayi kutendelela kua mpingu.’ (1 Kolinto 10:14) Yezu muine uvua muleje tshimanyinu tshia bena Kristo balelela pavuaye muamba ne: ‘Bua bualu ebu bantu bonso nebamanye ne: Nudi bayidi banyi, binuasuangana nunku.’​—Yone 13:35.

Anu bu muvua bena Kristo ba kumpala, Bantemu ba Yehowa badi benza muabu muonso bua kulonda tshidi Bible wamba mu malu onso pamutu pa kulonda bilele bia bantu. (Lomo 3:4; Kolosai 2:8) Ke bualu kayi kabatu ne nkuluse mu bitanda biabu to.

[Tshimfuanyi mu dibeji 25]

Bishadile bidi bileja mukalenge wa Ashû muele nkuluse, bu mu 800 KY

[Mêyi a dianyisha]

Foto mukuata ne dianyisha dia British Museum