Semena pabuipi ne Nzambi

Mulami udi ukutabalela

Matayo 18:12-14

PAMUAPA ukadiku mudiebeja ne: ‘Nzambi utuku untabalela anyi?’ Kadi umanye ne: bantu ba bungi batu badiela pabu lukonko elu. Patu makenga, ntatu ne malu makole akuata bantu, ba bungi ba kutudi batu badiebeja bua kumanya bikala Mufuki wa diulu ne buloba umona bionso bidi bituenzekele. Mbimpe tuetu kumanya bikala Yehowa Nzambi ni utu utabalela muntu ne muntu. Yezu mmumanye Yehowa bimpe menemene, ne pavuaye pa buloba apa, wakafila tshilejilu tshidi tshituambuluisha bua kupeta diandamuna dia lukonko elu.

Yezu wakafuanyikija Yehowa ne mulami wa mikoko ne kuambaye ne: ‘Bikala muntu ne lukama lua mikoko, pajimina mukuabu, yeye kena ushiya makumi tshitema ne tshitema, kena uya mu mikuna bua kukebaye udi mupambuke anyi? Biawumonaye, bulelela ndi nuambila ne: Disanka diende kudi wakadi mupambuke neditambe disanka diende kudi makumi tshitema ne tshitema yakadi kayiyi mipambuke. Nunku Tatu wenu wa mu diulu kena musue muana umue wa mu bana aba bakese afue.’ (Matayo 18:12-14) Tumonayi mushindu udi Yezu umvuija bimpe mudi Yehowa utabalela basadidi bende bonso ne dinanga.

Mulami wa mikoko utu idiumvua mu dibanza dia kulama mukoko wonso. Mukoko wowu mupambuke, udi umanya ne: mukoko kampanda mmujimine. Mmumanye mukoko wonso mu dîna didiye muwinyike. (Yone 10:3) Mulami muimpe katu wikisha padiye kayi muanji kupeta mukoko udi mujimine nansha. Padiye uya kukeba udi mujimine, kena ushiya mikoko 99 mu njiwu nansha. Balami batu benda ne mikoko yabu mu bisumbu pamue ne balami nabu bakuabu. * Nunku mulami udi uya kukeba mukoko wende udi mujimine udi mua kuanji kushila balami nende bakuabu mikoko yende bua bamutangidilayi. Padiye upeta uvua mujimine mujima, udi usanka. Yeye muupete ne mputa, udi uwambula pa makaya ende, ulue nawu muaba udi mikuabu.​—Luka 15:5, 6.

Yezu udi umvuija tshilejilu etshi wamba ne: Nzambi ki mmusue bua “umue wa mu bana aba bakese afue.” Kumpala, Yezu ukavua mudimuije bayidi bende ne: kanulenduishi ‘umue wa mu bantu aba bapuekele badi bangitabuja.’ (Matayo 18:6) Kadi ntshinyi tshidi tshilejilu tshia Yezu etshi tshitulongesha bua Yehowa? Yehowa Mmulami udi uditatshisha bikole bua mukoko wende wonso, too ne idi ‘mipuekele’ idi imueneka bu idi kayiyi ne mushindu ku mêsu kua bena panu. Ku mêsu kua Nzambi, musadidi wende yonso mmuntu wa pa buende ne udi ne mushinga kudiye.

Wewe musue kumanya bikala Nzambi uditatshisha bua bualu buebe, mbimpe wanji kumanya Yehowa Nzambi Mulami munene bimpe ne umanye muudi mua kusemena kudiye. Wewe muenze nanku, neupete dishindika bu dia mupostolo Petelo uvua mudiumvuile nkayende muvua Yezu ufila tshilejilu tshia mukoko mujimine etshi. Petelo wakalua kufunda matuku a bungi pashishe ne: ‘Nuteke ntatu yenu yonso kudiye [kudi Nzambi], bualu bua yeye udi unulubulula’ anyi uditatshisha bua bualu buenu.​—1 Petelo 5:7.

[Mêyi adi kuinshi]