“UKADI mudiakaje anyi?” Bakatuku bakuele lukonko elu anyi?​— Muntu udi wela lukonko elu utu ujinga kumanya ne ukavua mudilongolole. Tshilejilu, muntu udi mua kukukonka ne: ‘Udi ne mikanda yebe ya mu kalasa anyi? Ukadi mudilongela bia mu kalasa anyi?’ Anu mutuabimona, Timote uvua mudiakaje.

Timote uvua musue. Uvua musue tshinyi?​— Pavuabu bamubikile bua kuenzela Nzambi mudimu, uvua ne mmuenenu wa buena wa mutendeledi wa Nzambi mukuabu wakamba ne: ‘Ke meme eu, untume meme!’ (Yeshaya 6:8) Bu muvua Timote musue kuenza mudimu, wakapeta disanka. Udi musue kumanya muvua bualu ebu buenzeke anyi?​—

Bavua balelela Timote ku Luseta, ntanta wa kilometre ya bungi ne Yelushalema. Kakuende Loi ne mamuende Eunike, bavua balongi bimpe ba Dîyi dia Nzambi. Bakatuadija kulongesha Timote Dîyi dia Nzambi anu patshivuaye muana.​—2 Timote 1:5; 3:15.

Pavua Timote kansongalume, Paulo ne Banaba bakalua ku Luseta bua musangu wa kumpala bua kuyisha. Pamuapa tshikondo atshi ke tshivua mamuende wa Timote ne kakuende balue bena Kristo. Udi musue kumanya ntatu ivua Paulo ne Banaba bapete anyi?​— Bantu bavua kabayi bena Kristo bakasa Paulo mabue, kumututa panshi, ne kumupulumuna too ne pambelu pa tshimenga. Bakela meji ne: uvua mufue.

Bantu bavua bitabe malongesha a Paulo bakamunguila ne yeye kujuka. Dituku diakalonda, Paulo ne Banaba bakaya, kadi matuku makese panyima bakapingana kabidi ku Luseta. Pavuabu bapingana, Paulo wakenza muyiki ne kuambila bayidi ne: ‘Bua tuetu kubuela mu bukalenge bua Nzambi, anu patuapitshila mu makenga a bungi.’ (Bienzedi 14:8-22) Udi mumanye tshivua Paulo usua kuamba anyi?— Uvua usua kuamba ne: bantu bakuabu nebatatshishe bantu badi batendelela Nzambi. Paulo wakafundila Timote ne: ‘Bantu bonso badi  basue kuikala ne [nsombelu udi usankisha Nzambi] nebakengeshibue.’​—2 Timote 3:12; Yone 15:20.

Pavua Paulo ne Banaba bumuke ku Luseta, bakapingana kuabu. Ngondo mikese panyima, Paulo kuangata Sila bua akamufila ku luendu, ne buobu kupingana bua kukolesha bayidi bapiabapia bavua bashale miaba ivua Paulo muyishe. Pakafikabu ku Luseta, Timote uvua ne disanka dia bungi dia kumonangana kabidi ne Paulo! Timote uvua kabidi ne disanka dipite pavua Paulo ne Sila bamubikila bua kuyaye nabu ku luendu. Timote wakitaba. Uvua mudiakaje ne musue kuya nabu.​—Bienzedi 15:40–16:5.

Bakenza luendu lule ku makasa ne pa mâyi. Padibu bafika dia muamua dia mâyi, bakenda batangila ku Tesalonike mu ditunga dia Greke. Mu tshimenga etshi, bantu ba bungi bakalua bena Kristo. Kadi bakuabu bavua ne tshiji ne buobu kudikunguija. Bu muvua muoyo wa Paulo ne Sila ne wa Timote mu njiwu, bakaya ku Beloya.​—Bienzedi 17:1-10.

Paulo uvua wela meji bikole bua bena kuitabuja bapiabapia ba mu Tesalonike, ke kubatuminaye kabidi Timote. Udi mumanye mbua tshinyi anyi?​— Paulo wakumvuija bualu ebu mu mukanda uvuaye mutumina bena Kristo ba ku Tesalonike wamba ne: ‘Bua kunujadikaye ne bua kunusambaye bua nansha umue wenu kateketshi ku muoyo.’ Udi mumanye bua tshinyi Paulo uvua mutume anu Timote mu tshimenga etshi tshia njiwu pende muikala muana anyi?​— Bualu baluishi abu kabavua bamanye Timote bimpe to, ne yeye muine uvua musue kuya. Bivua bilomba dikima dikole! Luendu luende luakapita bishi? Pavua Timote mupingane kudi Paulo, wakamulondela bua lulamatu luvua bena mu Tesalonika nalu. Ke Paulo kubafundila ne: “Tuakasambibua bua bualu buenu.”​—1 Tesalonike 3:2-7.

Timote wakenza kabidi mudimu ne Paulo bidimu 10. Pashishe bakakuata Paulo ku Lomo, ne Timote utshivua upatukilaku mu buloko, wakapingana bua kusomba nende. Pavua Paulo mu buloko, wakafundila bena ku Filipoi mukanda, pamuapa Timote ke uvua mumufundilawu. Paulo wakamba ne: ‘Ndi ntekemena bua kunutumina Timote bua ntshiena ne mukuabu udi ne lulamatu ne udi mua kunuenzela mudimu.’​—Filipoi 2:19-22; Ebelu 13:23.

Mmiaku eyi ivua ne bua kuikala misankishe Timote bikole. Paulo uvua munange Timote bikole bualu uvua ne muoyo wa kuenza mudimu. Tudi batekemena ne: newenze pebe nanku.