“Kupu muoyo bua kuyisha ku nzubu ne ku nzubu”

Muyuki mulonda kudi Jacob Neufeld

Pamvua ngenda ngela meji pa mêyi a ne: “Nansha kuikale bualu bua mushindu kayi, kupu muoyo kuyisha ku nzubu ne ku nzubu,” mvua muende kilometre mitue ku 5 mutangile mu musoko uvua pa buipi apu. Pamvua mufike, ntshivua mupete dikima bua kuyisha ku nzubu wa kumpala to. Meme mumane kuditatshisha bikole, ngakaya muinshi mua mitshi ne kutuadija kusambila bua Nzambi ampeshe dikima dia kuyisha. Ndekelu wa bionso, meme kupingana ku nzubu wa kumpala ne kutuadija muyiki.

NTSHINYI tshivua tshinsaka bua kuya kuyisha nkayanyi mu musoko eu wa mu tshipela tshia mu ditunga dia Paraguay? Telejayi ndumvuije muvua malu mabange. Bavua bandelela mu musoko wa Kronstalʹ muaba uvua ba-Mennonite ba ku Allemagne basombele mu ditunga dia Ukraine mu ngondo wa 11 tshidimu tshia 1923. Ku ndekelu kua bidimu bia 1700, ba-Mennonite bavua bumuke ku Allemagne balue kusombela mu Ukraine, bavua ne malu a bungi avuabu bapete tuambe ne: budikadidi bua kutendelela (kadi kabavua mua kuyisha bakuabu to), kudienzela buabu bukalenge ne kubenga kubuela mu busalayi.

Pavua ba koministe bangate bukalenge, bavua babakandike malu onso avuabu badienzela au. Kundekelu kua bidimu bia 1920, mbulamatadi wakanyenga madimi a manene a ba-Mennonite mashale bintu biende. Bantu bavua babenga kutumikila mbulamatadi bavua babapale biakudia ne muntu yonso uvua uteka mutu mukole bavua bamuenzeje malu ku bukole. Mu bidimu bia 1930, Mpulushi ya lukebakeba ya mbulamatadi wa mu Russie (KGB) yakakuata bantu balume ba bungi nangananga butuku, mu misoko ya bungi muakashala bantu balume babale ku minu. Mu tshidimu tshia 1938 pamvua ne bidimu 14, bakakuata tutuanyi too ne lelu katu muanji kumueneka anyi kumvuika. Bakakuata kabidi tutuanyi panyima pa bidimu bibidi.

Basalayi ba Hitler bakakuata Ukraine pabuipi ne tshidimu tshia 1941. Bualu bua katusulula ku dikenga dia bukokesha dia ba Koministe. Kadi mêku 8 a bena Yuda avua mu musoko wetu akajimine anu musangu umue. Malu onso aa avua manshiye ne nkonko ya bungi mu mutu. Bua tshinyi malu onso aa avua enzeke?

Bululame buakansungila

Mu 1943 pavua basalayi bena Allemagne bapingana, bakangata bena Allemagne bonso e kuya nabu, too ne bena mu dîku dietu kabidi bua kuya kuambuluisha mu mvita. Kubangila anu mu tshikondo atshi, bakambueja mu busalayi ne kuntumabu mu Roumanie mu tshiluilu tshia bamanyi (SS) bavua balama Hitler tshibikila ne:  Schutzstaffel. Bualu bukuabu bukese buvua buenzeke buvua bushintulula nsombelu wanyi bikole menemene.

Shefu wetu wa basalayi uvua musue kuteta bululame buanyi. Wakampesha nsukutu yende bua kuyisukula. Uvua muela makuta mu mpaya. Pamvua mumupingajile makuta ende aa, wakamba ne: kavua mushiya tshintu nansha tshimue mu mpaya ya nsukutu yende to. Kadi meme kusuminyina mmuleja mumvua muapete mu mpaya wende. Matuku makese pashishe, bakanteka tshindodi tshiende, ne kumpeshabu mudimu wa mu biro, wa kutuma basalayi miaba ya kulama, ne kulama makuta.

Dimue dituku butuku, basalayi bena Russie bakakuata tshisumbu tshietu tshionso tshia basalayi pakumbusha meme, bualu mvua mushale njikijila shefu wanyi mudimu uvuaye mumpeshe. Tshindi mumanye ntshia ne: ngakapanduka anu nkayanyi bualu mvua muena bululame ne bavua bampesha mudimu wa pa buawu wa kuenza. Bu tshiyi mushale, mvua mua kuikale panyi mukuatshibue.

Mu tshidimu tshia 1944, bakampesha dikisha ku busalayi bua tshikondo kampanda. Meme kupingana kuetu bua kumona mamu. Mu tshikondo tshimvua muindile bua bantume muaba mukuabu atshi, meme kutuadija kulonga mua kuibaka ne dimanya edi divua dingambuluishe bikole pashishe. Mu tshidimu tshia 1945, bisumbu bia basalayi bia bena Amerike biakakuata musoko wetu uvua pabuipi ne tshimenga tshia Magdeburg. Mvita yakajika panyima pa ngondo umue. Bu mutuvua bapanduke ku mvita ayi, matuku etu atshilualua akamueneka mimpe.

Dimue dituku mu ngondo 6, tshikum’a mbila wa mu musoko wetu e kumanyishaye ne: “Basalayi ba bena Amerike bavua baye kuabu butuku bushale, ne basalayi bena Russie badi balua lelu pa dîba dia 11:00 wa dinda.” Patuakumvua ne: ba-Koministe ke bavua balua kukokesha, tuakumvua bibi menemene. Nanku, meme ne muana wa tatuanyi muakunyi kutuadija kudilongolola bua kunyema. Pabuipi ne munkatshi mua mushipu, tuetu kubuela mu tshitupa tshivua bena Amerike bakuata. Pashishe, mu ngondo wa 11 tuetu kupingana mu njiwu ne ntatu ya bungi mu tshitupa tshivua bena Russie, ne kuangata bena mu mêku betu bonso mu musokoko.

“Teleja ne ntema ne ufuanyikije”

Tuakasombela ku Allemagne wa ku Est. Panyima pa matuku, meme kutuadija kunanga malu a mu Bible. Mu Dia lumingu dionso, mvua nya muitu bua kubala Bible, kadi malu amvua mbala avua makole ne mmenzeke kale menemene. Mvua kabidi ndonga kateshisme bua kutambula mu ba-Mennonite. Ngakakema bikole pamvua mupeta mu mukanda wa kateshisme bafunda ne: “Tatu udi Nzambi, Muana udi Nzambi ne Nyuma muimpe udi pende Nzambi,” ne pashishe bela lukonko elu: “Kutu Nzambi isatu anyi?” Diandamuna divua ne: “Tòo, basatu badi Nzambi umue.” Meme kukonka mulongeshi wetu muvuabi mua kuenzeka nanku. Yeye kungambila ne: “Nsongalume, muntu nansha umue kena ne bua kuela meji bikole pa malu aa to; bamue mbalue bidingidingi bua diela meji bikole nunku.” Ngakabenga bua kutambula anu ku tshikondo atshi.

Matuku makese pashishe, meme kumvua muana wa tatu mukaji wa bakaji bayikila malu antu ntshiyi muanji kumvua to. Bu mumvua muteleja miyuki wabu, meme kubuela mu muyuki amu ne kuela nkonko ndambu. Musangu au tshivua mumanye ne: utuvua tuyikila nende au ke Erich Nikolaizig, umue wa ku bantu bavua bapanduke ku buloko bua kasuba bua Wewelsburg. Wakangebeja ni mvua musue kumvua Bible bimpe. Pamvua muitaba, yeye kunshindikila ne: malu onso angambilaye avua ne bua kupatukila mu Bible wanyi umvua nende.

Tuetu bamane kuyikila nende misangu mikese patupu, tatu Erich wakambikila bua kubuela mu mpungilu wa Bantemu ba Yehowa, ne ndi ngela meji ne: yeye au ke wa kumpala uvuabu benze panyima pa mvita. Mvese yonso ivua bangamba-malu batela anyi babala ivua inkemesha, ne mvua nyifunda yonso. Matuku makese pashishe meme kulua kumvua ne: kulonga malu a mu Bible kudi kupesha muntu bujitu kampanda, ke meme kulekela bua kulonga Bible. Tshimvua kabidi ngitaba ne: kuvua mua kuikala anu tshitendelelu tshimuepele tshilelela to. Pavua tatu Erich mumona ne: mvua muangate dipandika dia kupingana mu tshitanda tshianyi tshia kale,  yeye kumbela ne: “Teleja ne ntema ne ufuanyikije.”

Mvua muyikile ne bambi betu anu misangu ibidi tshianana ne meme kumvua ne: kabavua bamanye bivuabu bamba ne kabavua bamanye bulelela to. Meme kufundila bamue banene ba ekeleziya mukanda mbela nkonko ya malu a mu Bible. Umue wa kudibu wakangandamuna ne: “Bu muudi kuyi muanji kuledibua tshia kabidi, kuena ne bukenji bua kumanya malu a mu Bible to.”

Nsongakaji mukuabu umvua ndonda bua kusela uvua mungenzeje bua kuangata dipangadika dibi. Uvua mu kasumbu ka ba-Mennonite bavua baledibue tshia kabidi. Bu muvuaye ulonda lungenyi lua bena dîku diabu bavua bakine Bantemu ba Yehowa, wakangambila ne: bua tuetu kuselangana, udi ne bua kulekela ntendelelu webe au. Kubangila anu musangu au, meme kumona ne: kuvua anu njila umue wa bulelela umvua ne bua kusungula, nanku meme kukosa malanda ne nsongakaji au.

Matuku makese pashishe, tatu Erich kutuadija kabidi kulua kuntangila. Yeye kungambila ne: mbalongolola bua kutambuisha bantu lumingu ludi kumpala, kungebejaye ne mvua musue bua kutambula. Nkavua mumvua ne: Bantemu ba Yehowa ke bavua balongesha bulelela, ne mvua musue kuenzela Yehowa mudimu. Meme kuitaba dilomba diende ne meme kutambula mu ngondo 5 mu 1948, mu dilongo dia mu tshiowedi.

Matuku makese panyima pa batismo wanyi, dîku dietu kuangata dipangadika dia kuya kusombela mu ditunga dia Paraguay ku Amerike wa ku Sud. Mamu wakansengelela bua tuetu kuya nabu. Tshivua musue kuya nabu to, bualu mvua ne dijinga dia kulonga Bible bikole ne kumundongeshabu kabidi bikole. Pamvua muye kuendakana ku Betele wa Bantemu ba Yehowa ku Wiesbaden ngakapetangana ne: August Peters. Yeye kumvuluija ne: bujitu bua dîku dietu buvua pa makaya anyi. Kumpeshaye kabidi mubelu eu:  “Nansha kuikale bualu bua mushindu kayi, kupu muoyo bua kuyisha ku nzubu ne ku nzubu. Wewe kuyi uyisha, neufuanangane ne bena mu bitendelelu bikuabu bionso ebi.” Too ne lelu’eu, tshitu ndengulula mubelu eu wa kuyisha ku nzubu ne ku nzubu.​—Bienzedi 20:20, 21.

Bavua bambikila ne: “muprofete wa dishima” mu Paraguay

Panyima pa muyiki utuenji ne August Peters, meme kuenza luendu pamue ne bena dîku dietu mutangile ku Paraguay. Tuvua batulukile mu tshimenga tshia Gran Chaco mu ditunga dia Paraguay mu tshisumbu tshia ba-Mennonite. Mbingu ibidi panyima pa difika dietu, meme kuenza luendu lua lutatu mutangile ku musoko wa ku mutumba bua kuyishaku. Lumu lua katangalaka ne lukasa luonso ne: kudi “muprofete wa dishima” munkatshi mua benyi badi balue abu.

Mudimu umvua mulonga wa dibaka wakangambuluisha bikole. Benyi bonso bavua dijinga ne nzubu, ne bavua bibaka nzubu ya nsona. Mu ngondo isambombo yakalonda, mvua ne mudimu wa bungi wa kuibakila bantu nzubu ne mvua mupete kabidi mushindu wa kubayisha pavua mpunga umueneke. Bantu bavua bannemeka, kadi pavua nzubu utua mulu bavua bantombokele.

Mu tshine tshikondo atshi, mazuwa avua anu alua mu ditunga ne ba-Mennonite bakuabu ba bungi ba ku Allemagne. Munkatshi mua benyi abu muvua nsongakaji mukuabu diende Katerina Schellenberg, uvua muyikile anu kakese ne Bantemu ba Yehowa ne kujadikaye ne: buobo ke badi ne bulelela. Nansha muvuaye kayi muanji kutambula, uvua udimanyisha kudi bantu muvuaye Ntemu wa Yehowa pavuabu mu mazuwa pa mâyi. Bua didimanyisha diende adi, bakamubengela bua kusomba muaba uvua bena Allemagne bakuabu. Kumushiyabu nkayende ku Asunción, (tshimenga tshikulu tshia Paraguay) yeye kupetaku mudimu, kulongaye tshiena Espagne ne kupetanganaye ne Bantemu ne kutambulaye. Meme kusela nsongakaji eu wa dikima mu ngondo wa 10 tshidimu tshia 1950. Uvua munkuatshishi mulenga ne mungambuluishe bikole mu malu onso atuvua ne bua kuenza mu bidimu biakalonda.

Mu matuku makese, ngakalama makuta makumbane bua kusumba ditempu ne tubalu tubidi, ke bivua bingambuluisha bua kuyisha, ne mvua anu mvuluka misangu yonso mubelu wa muanetu Peters. Muakunyanyi wa bakaji uvua pende mulue Ntemu panyima, wakalua kutudi. Tuvua misangu yonso tujuka patshiatshia pa dîba dia 4:00, tuenza luendu lua mêba anayi bua kuyisha mêba abidi anyi asatu ne pashishe kupingana.

Mvua mubale mu mikanda yetu ne: batu benza miyuki ya patoke, ke meme kudilongolola bua kuenza muyuki umue. Bu mumvua katshia ntshiyi muanji kubuela mu bisangilu bia Bantemu ku Allemagne, mvua ngela meji a mushindu wa kuwenza ne malu a kuamba pa bidi bitangila Bukalenge bua Nzambi. Bantu 8 bavua bateleja muyuki au ne bambi ba ba-Mennonite bakafika munda bikole. Nanku ke buobo kuenza kampanye ka kuangata mikanda yonso ituvua bapesha bantu ne kubakandika bua kuyikila netu.

Panyima buobu kumbikila ku biro bivua bitangila benyi bena Allemagne buonso bavua mu ditunga dia Paraguay, mulombodi wa biro ne banene bakuabu babidi ba ekeleziya bavua balue bafumine ku Canada kundumbuluisha mêba a bungi. Ku ndekelu umue wa kudibu kungambila ne: “Nsongalume, udi mua kuitaba dilongesha dionso diudi musue kuitaba, kadi kuena ne bua kudiambila muntu mukuabu to.” Meme panyi tshivua mua kuenza bualu bua mushindu au to. Nanku buobu kungambila bua kumuka muaba uvua benyi bakuabu bualu buobu bavua badimona bu “bena kuitabuja ba lulamatu” kabavua basue bua kusomba pamue ne uvuabu babikila ne: “Muprofete wa dishima” to. Pamvua mbenga, buobu kungambila bua kutufutshila bonso njila. Meme kubenga kabidi.

Mu mushipu wa tshidimu tshia 1953, meme kuya ku Asunción bua mpungilu. Mu mpungilu amu meme kuyikila ne muanetu Nathan Knorr uvua mufume ku biro bidi bilombola midimu ya Bantemu ba Yehowa pa buloba bujima bidi ku Brooklyn mu New York. Yeye kungambila bua kumuangala  ne kuya kusombela mu tshimenga tshinene bua kuenza mudimu pamue ne bamisionere bakuabu bavuamu, bualu mudimu wetu muaba uvua ba-Mennonite kauvua upatula bipeta bilenga menemene to.

Kukeba Bukalenge kumpala

Musangu au mu Paraguay muvua anu Bantemu batue ku 35. Meme kuambila mukajanyi bualu ebu, kadi nansha muvuaye utshina bua kusombela mu tshimenga tshinene, wakitaba bua kumuangala. Mu 1954, meme ne Katerina kuibaka nzubu ne madiotu a malaba patuvua tupetaku dîba. Katuvua banji kupumbisha mu tshisangilu nansha tshimue ne tuvua anu tuyisha bantu malu a mu Bible ku ndekelu kua lumingu luonso.

Mvua ne mudimu wa kuikala kushindikija mukulu udi wenda ukolesha bisumbu bia Bantemu ba Yehowa bua kukudimuna miyuku yende mu bisumbu bivuaye ukumbula bia bakudi ba tshiena Allemagne mu Paraguay. Bu mumvua mumanye tshi-Espagnole ndambu, bua musangu wa kumpala umvua mukudimune muyuki muenza mu muakulu eu mu tshiena Allemagne, ke uvua mudimu mukole wa ku yonso imvua muenze.

Bu muvua mukajanyi ne masama, tuakaya kusombela ku Canada mu 1957. Pashishe mu 1963 tuetu kumuangala ne kuya mu États-Unis. Muaba wonso utuvua tuya, tuvua tuteka anu malu a Bukalenge bua Nzambi pa muaba wa kumpala mu nsombelu wetu. (Matayo 6:33) Ndi ngela Yehowa Nzambi tuasakidila bua muvuaye mungambuluishe bua kumanya bulelela budi mu Dîyi diende pantshivua nsongalume. Malu a mu Bible avuabu bandongesha avua mangambuluishe bikole mu malu a bungi mu nsombelu wanyi!

Mvua ne diakalenga dinene dia kulongesha bantu bakuabu malu malenga a mu Bible avua ankolesha bikole. Diakalenga ditamba bunene dimvua mupete ndia se: bana banyi bibidi ne bankana banyi mbamanye malu a mu Bible katshia ku buana buabu. Bonso buabu badi balonda mubelu uvua muanetu Peters mumpeshe kukadi bidimu bia bungi wa ne: “Nansha kuikale bualu bua mushindu kayi, kupu muoyo bua kuyisha ku nzubu ne ku nzubu.”

[Lungenyi lunene lua mu dibeji 30]

Diakalenga ditamba bunene dimvua mupete divua dia kumona bana banyi bibidi ne bankana banyi bamanye malu mu Bible katshia ku buana buabu

[Bimfuanyi mu mabeji 28, 29]

Meme ne Katerina matuku makese kumpala kua dibaka dietu mu 1950

[Tshimfuanyi mu dibeji 29]

Tudi ne muanetu wa kumpala ku nzubu wetu mu Paraguay mu 1952

[Tshimfuanyi mu dibeji 31]

Meme ne dîku dianyi dijima lelu

[Mêyi a dianyisha]

Foto wa kudi Keith Trammel © 2000

[Mêyi a dianyisha bua tshimfuanyi mu dibeji 27]

Foto wa kudi Keith Trammel © 2000