Ngakalonga mushinga udi nawu muoyo

TUVUA MU DIA 16 NGONDO 4 TSHIDIMU TSHIA 2007. Meme kuzonzoma mu ditumba dia etaje muisatu (muinyika ne: Norris) muvua iniversite wa malu a siyanse wa ku Virginie. Bavua bamvuluija kabidi bua kuikala ne dianyisha bua muoyo utudi nawu dituku dionso.

Mvua mu biro bianyi ndilongolole bua kupueka mu etaje muibidi bua kuangata mukanda uvuabu bantumine. Mulongeshi mukuabu e kulua kumbikila mu biro biende bua meme kumulongoluela ordinatere wende. Patuvua tubuela mu biro, tuetu kumvua mazaji adila muinshi mu etaje muibidi. Katuvua bamanye tshivua tshienzeka, kadi tuetu kubuela mu biro ne buôwa lubilu kukanga tshiibi ne nsapi ne kushala bindile bua kumona tshiatuenzekele. Meme kusokoma mu ditumba dikuabu ne kutuadija kusambila Yehowa Nzambi, mmulombe bua ampeshe bukole bua kutantamena tshionso tshivua mua kufika.

Patuvua bindile apu, meme kuvuluka bualu kampanda buvua bungenzekela kukadi bidimu 15. Mvua mulongolodi wa mashinyi mu karaje kakuabu. Kasolonyi kavua naku muena mudimu nanyi mukuabu mu kadilongo kavua kukuata mudilu. Bua buôwa, yeye kuimansha dilongo adi diodi kunkuata kuisu ne mu tshiadi! Meme kupuyakana muishi ne ndimi ya mudilu kungoshayi bikole ku mutu ne mu tshiadi. Buobu kuya nanyi muambula mu ndeka mu lupitadi luvua luondapa bantu batu buoshike ne meme kushalamu ngondo isatu ne tshitupa nkenga ne muoyo. Panyima pa ngondo itanu ya luondapu lukole ne dibidija mudibi, meme kupingana ku mbelu, ngela Nzambi tuasakidila mumvua ne muoyo. Bualu ebu buvua bundongesha mushinga udi nawu muoyo dituku dionso. Meme kukolesha dipangadika dianyi dia kuenzela Yehowa Nzambi wakampesha muoyo mudimu bu Ntemu wende.​—Musambu 90:12; Yeshaya 43:10.

Bu mumvua tshinyi kabidi ne mushindu wa kulongolola mashinyi bua mputa ayi, meme kulonga bua kulongolola ordinatere, kungangatabu ku mudimu mu iniversite wa Virginie. Ke tshivua tshimfikishe muaba eu mu dinda amu.

Mazaji au akadila mutantshi mule ne bantu ba bungi bakafua. Bantu bavuabu bashipe dituku adi bavua bapite bungi bua bantu bonso bakadibu bashipe nanku mu États-Unis. Bualu buvua buenzekela mu etaje uvua muinshi muetu. Bingoma biakalekela kudila anu pakadiasa mulumiana uvua wasa bantu au, pinapu mumane kushipa bantu 32 kabayi ne bualu. Panyima pa minite mitue ku 20, tuetu kumvua bampulushi benda bapitakana mu nzubu. Tuetu kubabikila ne kutupatulabu bimpe pambelu kakuyi bualu.

Bualu ebu bua dikema buvua buenzeke buakandongesha ne: mmuoyo ngua tshitupa ne katuena mua kumanya tshidi mua kutufikila. (Yakobo 4:14) Mbia mushinga bua tuetu kueyemena Yehowa Nzambi mufidi wa muoyo ne kuangata dituku dionso ditudi ne muoyo bu dipa dia mushinga dia kudiye.​—Musambu 23:4; 91:2.

[Mêyi a dianyisha bua tshimfuanyi mu dibeji 26]

AP Photo/​The Roanoke Times, Alan Kim