Bantemu ba Yehowa batu bitaba dipungila dikulukulu anyi?
Nkonko ya babadi
Bantemu ba Yehowa batu bitaba dipungila dikulukulu anyi?
Bantemu ba Yehowa batu bitaba ne: Bible n’Dîyi dia Nzambi ne batu bitaba tshitupa tshia Dipungila Dikulukulu ne Dipungila Dipiadipia. Kadi, batu basue kubikila bitupa ebi bimpe bilondeshile miakulu ivuabu babifunde ne: Mifundu ya tshiena Ebelu ne Mifundu ya tshiena Greke, bualu Dipungila Dikulukulu divua difunda mu tshiena Ebelu ne Dipiadipia mu tshiena Greke.
Ku lukuabu luseke, bamue bantu batu badiamba mudibu bena Kristo kabatu bitaba Dipungila Dikulukulu to. Badi bamba ne: bualu Nzambi wa mu Dipungila adi ngua tshiji, wanyisha mvita, dishipangana ne malu makuabu mabi adi kaayi aleja dinanga ne bikadilu bimpe bia Nzambi wa mu Dipungila Dipiadipia. Anyi badi bela meji ne: bu muvua Dipungila Dikulukulu ditangila nangananga ntendelelu wa bena Yuda, kadiena dimpe bua bena Kristo nansha. Kadi, mukenji wa Nzambi udi Dutelonome 12:32 udi ukandika kusakidila anyi kumbusha tshintu mu dîyi diende, malu adibu bamba au ke adi mua kutusaka bua kubenga tshitupa tshinene tshia Bible bu tshia 75 pa 100 anyi?
Misangu mikuabu mu tshidimu tshia 50 pavua mupostolo Paulo muya kutangila bena ku Tesalonike ne bena mu Greke, ‘wakakulangana nabu malu a mu Mukanda wa Nzambi, wakabajinguluilawu, wakabambila ne: buakadi Kristo nabu mbua kukengaye ne kubika ku bafue.’ (Bienzedi 17:1-3) Bamue bantu bakateleja Paulo bakalua bena Kristo ne yeye muine panyima pa matuku wakabela kalumbandi wamba ne: ‘Panuakangata dîyi dinuakumvua kutudi, dia Nzambi mene, nuakaditabuja, ke mbu dîyi dia bantu, kadi bu mudidi bushuwa, dîyi dia Nzambi mene.’ (1 Tesalonika 2:13) Tshikondo tshivuaye muya kubatangila atshi, bidi bimueneka ne: ku mikanda yonso 27 ya Mifundu ya tshiena Greke idiku lelu, anu Evanjeliyo wa Matayo ke ukavuabu bafunde. Nanku, “Mukanda wa Nzambi” uvua Paulo muenze nawu mudimu bua kubajadikila nawu bivuaye ‘wamba’ uvua ne bua kuikala mikanda ivua mifunda mu tshiena Ebelu.
Kabidi, bantu bavua bafunde Mifundu ya mu tshiena Greke bavua batela mêyi a mvese ya Mifundu ya mu tshiena Ebelu anu mudiwu amu misangu mitue ku 320 ne batele kabidi mêyi mafuane amu imue mvese misangu nkama. Bua tshinyi bavua benza nanku? Bualu Bible udi wamba ne: ‘Bua malu onso akafundabu diambedi akafundibua bua kutuyisha, bua tuetu tuikale ne ditekemena bua ditantamana dietu ne bua busambi bua mu Mukanda wa Nzambi.’ (Lomo 15:4) Bualu ebu budi buleja patoke ne: bantu badi bitaba bitupa bionso bibidi bia Bible badi bapete malu mimpe a bungi.
Bu mudi Mifundu ya tshiena Greke mmimanyine pa bishimikidi bikavuabu bashindika mu Mifundu ya tshiena Ebelu, bidi biumvuika ne: nditungunuka dia Dîyi dia Nzambi didi dituleja malu adiye mulongolola ku kakese ku kakese. Nanku, Mifundu ya tshiena Greke ki milue kupuekesha mushinga wa ya tshiena Ebelu nansha. Mulongeshi wa malu a bitendelelu wa mu Iniversite wa Cambridge diende Herbert Farmer udi wamba bua Evanjeliyo ne: “Bua tuetu kumvua mikanda eyi bimpe, tudi ne bua kukonkonona tshivua tshienzeke pavua bantu batumikila mikenji ya Mose bu mudibi bifunde mu Dipungila Dikulukulu.”
Dîyi dia Nzambi ki ndia kushintulula to. Tshidibi, ‘njila wa bantu bakane udi bu dîba dia kabundubundu, didi ditema ne dikenkakenka too ne pakumbana dîba dia munda munya.’ (Nsumuinu 4:18) Pavua Nzambi muanyishe bua basakidile Mifundu ya tshiena Greke ku mikanda mikuabu ikavuabu banyishe ya mu Bible, uvua musue kufila butoke bua bungi pa mushindu wa kumbana dilongolola diende kadi kayi upuekesha mushinga wa Mifundu ya tshiena Ebelu to. Mifundu yonso eyi idi ‘dîyi dia Mukalenge didiku tshiendelele.’—1 Petelo 1:24, 25.