Bishima bia diondopangana bidiku lelu mbia kudi Nzambi anyi?

MU AMUE matunga bantu batu baya miaba itubu ba bikila ne: minsantu anyi idi bansantu, bua kuenzelapu masambila, bantu ba bungi batu baya miaba eyi batu bamba mudibu babuondopa ku masama ne mateketa a mubidi ne masama “atu baminganga bapangile bua kuondopa.” Mu matunga makuabu pamu, ba mua mulopu, bena kabukulu ne ba profete batu bamba mudibu buondopa bantu ne makole a nyuma. Mu imue miaba payi, bantu batu benza tumpanye bela masambila bua balema ne badi batshibuile panshi bajuke mu makalu abu anyi bimanshe mikombo yabu bamba mudibu buondopibue.

Pabi, bantu batu benza bishima ebi badi mu bitendelelu bishilangane ne batu misangu ya bungi bambangana nkayabu mudibu bantomboji, bena dishima ne babule ditabuja. Lukonko ludi mua kujuka ne: Nzambi udi mua kuenza bishima kupitshila ku bisumbu bia ntendelelu bishilangane bidi biobi bine kabiyi mu diumvuangana anyi? Bible pende udi wamba ne: “Nzambi kena Nzambi wa malu mabuelakane, kadi udi Nzambi wa ditalala.” (1 Kolinto 14:33) Kadi, ‘diondopa bantu mu bishima’ dia nunku ndia kua Nzambi anyi? Bamue badi bamba mudibu buondopa bantu ne bukole bua kudi Yezu. Tuanji tukonkononayi mushindu uvua Yezu wondopa bantu.

Mushindu uvua Yezu wondopa bantu

Yezu uvua muondope bantu mishindu mishilashilangane kabiyi bu mudi buondopi ba lelu benza. Tshilejilu, Yezu wakondopa muntu yonso uvua ulua kumulomba bua kumuondopa. Kavua usungula anu bantu bakese bua kuondopa munkatshi mua bakuabu ne waluja banga kayi mubuondope to. Yezu uvua wondopa bantu anu musangu umue, ujikije masama abu onso misangu ya bungi anu pa tshibanza. Bible udi wamba ne: ‘Bantu bonso bakasua kumulenga bianza, bualu bua bukole buakadi bufuma munda muende, buakajikija masama a buonso buabu.’​—Luka 6:19.

Bantu badi buondopa mu bishima lelu, batu misangu ya bungi bamba bantu padibu bapangila bua kubuondopa ne: kabena ne ditabuja to, kadi Yezu kavua wenza nanku to, uvua wondopa too ne bantu bavua kabayi bamuitabuja. Tshilejilu, Yezu wakabikila mpofu kampanda ne kumuondopa. Pashishe, Yezu kumukonka ne: ‘Udi witabuja Muana wa Nzambi anyi?’ Muntu au kuandamunaye ne: ‘Yeye udi nganyi, mmuitabuje?’ Yezu kumuambila ne: ‘Udi wakula nebe nyeye mene.’​—Yone 9:1-7, 35-38.

Udi pamuapa mua kudikonka ne: ‘bikala ditabuja kadiyi bualu buvua bulombibue kudi bantu bua Yezu kuondopa, bua tshinyi Yezu muine uvua misangu yonso wambila bantu bavuaye wondopa ne: “Ditabuja diebe diakukupandisha”?’ (Luka 8:48; 17:19; 18:42) Pavua Yezu wamba nanku, uvua uleja ne: bantu bavua ne ditabuja bavua balua kudiye ne buondopibua, kadi bua bantu bavua kabayi baya kudiye kabavua bapeta diakalenga adi to. Bantu bavua buondopibua kabavua bumvua bimpe bua ditabuja diabu to, kadi bivua nku bukole bua Nzambi. Bible udi wamba bua Yezu ne: ‘Nzambi wakamuela Nyuma Muimpe ne bukole; yeye wakendakana wenza malu mimpe, wondapa ukolesha bonso bakadi bakengeshibua kudi Diabolo, bua Nzambi wakadi nende.’​—Bienzedi 10:38.

Lelu bua kuondopa bantu bine mu tshishima anu makuta mikalaku. Benji ba bishima bia luondapu aba mbamanyike bikole bua disangisha dia makuta. Umue wa ku bayishi utu wondopa mu bishima wakapeta miliyo 89 ya dolare mu tshidimu tshimue kudi bantu bavuaye wenzela bishima. Bitendelelu bia bungi bitu bipeta makuta tshikondo tshitu bantu baya kubandila nzubu yabu ne ditekemena dia kupetela luondapu ku bintu bia tshijila bidiku. Yezu yeye kavua ulomba bantu bavuaye wondopa dikuta nansha. Amue matuku, uvua upesha bantu bavua balue kudiye biakudia. (Matayo 15:30-38) Pavua Yezu mutume bayidi bende bua kuyisha wakabambila ne: ‘Nukoleshe badi ne mabedi, nubishe bafue, nulengeje bena nsudi, numushe bademon; nuakuangata  tshianana, nubapabu tshianana.’ (Matayo 10:8) Bua tshinyi mishindu idi bantu buondopa mu bishima lelu mmishilangane ne ivua Yezu wondopa?

Bukola ebu budi bufume penyi?

Kukadi bidimu bia bungi, bamue ba minganga bavua benza mateta a bungi bua kujadika luondapu lutu bantu aba baditutshila tshianza pa tshiadi. Bavua bapete tshinyi? Tshikandakanda kampanda tshia mu Londres tshiakatela mêyi a doktere mukuabu wa mu Angleterre uvua muenza bidimu 20 wenda ulondesha tshilumbu tshia diondopangana mu bishima tshiakamba ne: “Kakuena tshijadiki nansha tshimue tshia mu lupitadi tshidi tshishindika mudi luondapu elu lulelela.” Kadi, bantu ba bungi badi bitaba muvuabu bapete luondapu lua mu tshishima ku butuangaji bua lupingu anyi tshimfuanyi tshia munsantu kampanda anyi lukita luabu peshi kudi buondopianganyi ba mu tshitendelelu kampanda. Bavua mua kuikala babadinga anyi?

Yezu uvua muambe mu muyuki wende utu mumanyike bikole uvuaye muenzela pa mukuna ne: batendeledi bena mutshima nebamuambile ne: ‘Mukalenge, Mukalenge, katuena benze malu a kukema a bungi mu dîna diebe anyi?’ Kadi, Yezu neabambile ne: ‘Tshiakunumanya; umukayi kundi, nudi benji ba malu mabi.’ (Matayo 7:22, 23) Mupostolo Paulo wakadimuija wamba bua bukole budi bantu abu benza nabu bishima ne: ‘Kulua kuende kudi bu mudi kuenzeja kua Satana, ne bukole buonso, ne bimanyinu, ne malu a kukema a mashimi, ne kudinga kuonso kua malu mabi.’​—2 Tesalonika 2:9, 10.

Bualu bukuabu, kuondopa bantu ne bishadila bia bansantu, mpingu ne bimfuanyi kabiena bua kuenzeka ne bukole bua Nzambi to. Bua tshinyi? Bualu Dîyi dia Nzambi didi dileja patoke ne: ‘Nyemayi kutendelela kua mpingu’ ne “Nudilame kudi mpingu.” (1 Kolinto 10:14; 1 Yone 5:21) Diondopa bantu mu bishima dia mushindu eu ngamue mayele atu Diabolo umusha nawu bantu ku ntendelelu mulelela. Bible udi wamba ne: “Satana mene udi udiandamuna bu muanjelo wa munya.”​—2 Kolinto 11:14.

Tshivua Yezu ne bapostolo buondopila bantu

Bishima bia luondapu bia bushuwa bidibu bafunde mu mikanda ya mu tshiena Greke bivua bijadika muvua Yezu ne bapostolo batumibue kudi Nzambi. (Yone 3:2; Ebelu 2:3, 4) Bishima bia luondapu bivua Yezu wenza bivua bishindika mudimu wende wa kuyisha: ‘Yezu wakendakana mu luseke luonso lua Galela, uyisha bantu mu nsunagoga yabu, ubambila lumu luimpe lua bukalenge bua mu diulu; ukolesha bantu bakadi ne mabedi.’ (Matayo 4:23) Midimu ya kukema ivua Yezu muenze ivua ya bungi, kavua anu muondope bantu masama, kadi wakadisha bisumbu bia bantu, kutuyisha mpepele mikole, kujula too ne bafue, yonso eyi ileja malu enzela bantu bena butumike patuadijaye kukokesha mu Bukalenge buende. Ebu mbualu buimpe be!

Bishima ebi biakashikila panyima pa lufu lua Yezu ne lua bapostolo bende ne lua bantu bonso bavuabu bapeshe mushindu wa kubienza. Mupostolo Paulo wakafunda ne: ‘Bikala mayisha a baprofete adiku, neashikile; bikala miaku ya bantu [miakula mu tshishima] idiku, neipue; bikala lungenyi [lubuluila muntu kudi Nzambi] ludiku, nelushikile.’ (1 Kolinto 13:8) Bua tshinyi? Bu muvua bishima bimane kukumbaja mudimu wabi, wa kuleja muvua Yezu Masiya mulaya ne muvua Nzambi muanyishe tshisumbu tshia bena Kristo, midimu eyi ya kukema kusangisha ne diondopa mu tshishima kayitshivua kabidi ne mushinga to, ‘yakashikile.’

Diondopa mu bishima divua Yezu muenze didi ne mukenji wa mushinga mukole udi ututangila lelu. Tuetu bateya ntema ne baleja ditabuja ku malu avua Yezu mulongeshe bua Bukalenge bua Nzambi, netuindile ne mioyo kulukulu tshikondo tshikale mêyi a tshiprofete adi atangila malanda etu ne Nzambi ne nsombelu wetu wa ku mubidi aa mua kukumbana: ‘Muena musoko kena wamba ne: Ndi ne disama.’​—Yeshaya 33:24; 35:5, 6; Buakabuluibua 21:4.