Mmufuki wa kutumbisha
Semena pabuipi ne Nzambi
Mmufuki wa kutumbisha
UKADIKU muelele lukonko elu meji anyi? ‘Mmuoyo ntshinyi?’ Bantu badi bamba mudi bintu bia patupu ebi biandamuke bilua ne muoyo mbakeba bua kuandamuna lukonko elu bapangila. Kadi bua bantu badi bitaba mudi Yehowa Nzambi mufuke bintu bionso bidi ne muoyo diandamuna nditekete. (Musambu 36:9) Buobu mbamanye tshivuaye mutufukile. Ntshileja mu mvese wa Buakabuluibua 4:11. Tukonkononayi mpindieu miaku ya mupostolo Yone eyi bua tumvue tshivuabu batufukile.
Yone uvua mufunde bua tungimba tua mu diulu tuvua tutumbisha Nzambi ne: ‘Wewe, Mukalenge wetu ne Nzambi wetu, udi muakane bua kuangata butumbi ne buneme ne bukole; bualu bua wewe wakafuka bintu bionso, ne bualu bua disua diebe biakadiku, ne biakafukibua.’ Yehowa nkayende ke udi muakanyine lumu lua mushindu eu. Bua tshinyi? Bualu yeye ke “wakafuka bintu bionso.” Nunku, bifukibua biende bia meji bidi ne bua kuenza tshinyi?
Mvese udi wamba mudi Yehowa mukumbane bua ‘kuangata’ butumbi, buneme ne bukole. Kakuyi mpata, yeye ke Muntu umuepele idibu batamba kutumbisha, kunemeka ne wa bukole buonso mu bionso bidiku. Kadi bantu ba bungi kabatu bitaba mudiye Mufuki wa bionso to. Nansha nanku, kudi bantu badi batshina Nzambi badi bamona bimpe ngikadilu anyi ‘malu a Nzambi adi kaayi mua kumueneka’ mu bintu bidiye mufuke. (Lomo 1:20) Bu mudi bantu aba ne muoyo wa dianyisha, badi bapesha Yehowa lumu ne buneme. Badi bamanyisha lumu luende kudi bantu bonso badi basue kuteleja mudi Yehowa muenze bintu bionso bia kukema ne mukumbane kutumbisha bua bionso bidiye muenza ebi.—Musambu 19:1, 2; 139:14.
Kadi mmushindu kayi udi batendeledi ba Yehowa bamupesha bukole? Tuanji tumanya ne: kakuena tshifukibua nansha tshimue tshidi mua kupesha Mufuki wa bukole buonso bukole nansha. (Yeshaya 40:25, 26) Nansha nanku, bu mutudi bafuke ku tshimfuanyikiji tshia Nzambi, tutu tuenzaku muetu muonso bua kuikala ne ngikadilu ya buena yende bu mudi bukole. (Genese 1:27) Tuetu bikale bushuwa ne dianyisha bua malu adi Mufuki mutuenzele, netufile bukole buetu ne makanda etu bua kumutumbisha ne kumusamuna. Pamutu pa tuetu kufila bukole anu ku malu adi atutangila tuetu nkayetu, tudi bamona ne: Yehowa Nzambi mmukumbane bua tuetu kumuenzela mudimu ne bukole buetu buonso.—Mâko 12:30.
Bua tshinyi tudi pa buloba apa ne muoyo? Tshitupa tshia ndekelu tshia mvese wa Buakabuluibua 4:11 tshidi tshiandamuna ne: “Bualu bua disua diebe biakadiku [bifukibua bionso], ne biakafukibua.” Katuvua badifuke to. Tudi ne muoyo mbua disua dia Nzambi. Bua bualu ebu, tuetu baditue anu mu dikeba malu adi matutangile nkayetu, nsombelu wetu udi anu tshianana. Tuetu basue kuikala ne ditalala dia muoyo, disanka ne nsombelu wa nsongo, tudi ne bua kulonga bua kumanya disua dia Nzambi ne kumutumikila. Anu patuenza nanku, ke tuetu kumanya tshivuabu batufukile bua kuikala ne muoyo.—Misambu 40:8.
[Mêyi a dianyisha bua tshimfuanyi mu dibeji 27]
NASA, ESA, and A. Nota (STScI)