Ntshinyi tshidi tshienzeka padi muntu ufua?

“Anyima yonso kayitu ifua to, nansha ya benji ba malu mabi . . . Badi bayinyoka mu mudilu utu kauyi ujima, kayiyi ifua ne mbikole bua yoyi kupatuka mu dikenga edi.”​—Clément wa ku Alexandrie, mufundi munene wa mu bidimu bia 100 ne 200.

BANTU badi balongesha dilongesha dia ne: inferno mmuaba utubu bakengeshila bantu babi, badi bela meji anu bu Clément uvua muambe pende ne: muntu utu ne anyima utu kayi ufua to. Ke tshidi Bible wamba anyi? Tukonkononayi mandamuna adi Dîyi dia Nzambi difila ku nkonko idi kuinshi eku.

Adama uvua ne anyima utu kayi ufua anyi? Mukanda wa bena Mishonyi udi mutambe kumanyika wa Mukanda wa Nzambi udi wamba tshivua tshienzeke dîba divuabu bafuka Adama ne: ‘Yehowa Nzambi wakafuka mulume ne dinfuenkenya dia buloba, wakela mupuya wa muoyo mu diulu diende; ne mulume wakalua ne muoyo.’ (Genese 2:7) Tangila ne: mvese eu kena wamba ne: bavua bapesha Adama anyima to.

Tshinyi tshivua tshienzekela Adama panyima pa yeye mumane kuenza bubi? Dinyoka dia Nzambi kadivua dia ne: Adama neaye kukenga mu inferno tshiendelele to. Kadi, mu Bible wa bena Katolike wa Mukanda wa Mvidi Mukulu mbakudimune mêyi a dinyoka divua Nzambi mupesha Adama au nunku: ‘Neupete tshiakudia tshiebe ku tshisululu tshia mu mpala muebe too ne muwandamuka kabidi buloba kuudi mufume. Bualu udi lupuishi, newandamuke kabidi lupuishi.’ (Genese 3:19) Mêyi avua Nzambi muakule au kaena aleja ne: tshitupa kampanda tshia munda mua Adama tshivua ne bua kushala ne muoyo pavuaye ufua to. Pavua Adama mufue, Adama mujime wakafua.

Muntu utu ne anyima utu kayi ufua anyi? Nzambi wakambila muprofete Yehezekele ne: “Muntu udi wenza bualu bubi yeye muine neafue.” (Yehezekele 18:4) Mupostolo Paulo wakafunda ne: “Bubi mbubuele mu buloba bualu bua muntu umue [Adama]; bubi ke budi bubueje lufu, kukuatalu bantu bonso, bualu bonso mbeji ba bibi.” (Lomo 5:12, MMM) Nanku bidi biumvuika ne: bikala bantu bonso bena mibi, anyima yonso udi ufua.

Bafue batu bamanye bualu peshi bumvua tshintu kampanda anyi? Dîyi dia Nzambi didi diamba ne: “Badi ne muoyo badi bamanye ne: Netufue; kadi bafue kabena bamanye bualu bumue.” (Muambi 9:5) Bible udi uleja tshidi tshienzeka padi muntu ufua wamba ne: ‘Udi upingana ku lupuishi, anu dine dituku adi, meji ende adi ajimina.’ (Musambu 146:4, MMM) Bikala bantu bafue ‘kabayi bamanye bualu bumue’ ne ‘meji abu ajimina,’ mmunyi mudibu mua kuya kukenga mu inferno?

Yezu kavua muamba ne: padi muntu ufua udi utungunuka ne kuikala ne muoyo to, kadi wakafuanyikija lufu ne tulu. * (Yone 11:11-14) Bamue bantu badi mua kuikala anu ne mpata, kadi Yezu kavua mulongeshe ne: inferno uvua muaba wa kadilu, ne bantu benji ba malu mabi nebabelamu to. Tukonkononayi tshivua Yezu muine muambe bua inferno.

[Mêyi adi kuinshi]