Bakatatshishabu kudi tshipepele mu Birmanie bakapeta diambuluisha

DIA matuku 2 a ngondo muitanu 2008 tshipepele tshikole tshidibu binyike ne: ntshia Nargis tshiakadituta mu ditunga dia Birmanie e kunyangakaja bintu bia bungi, diakamue kubangabu kuakula bualu buatshi ku tudiomba tua buloba bujima. Bakamanyisha muvua bantu batue ku 140 000 bafue anyi bajimine mu tshipepele atshi pavuatshi tshisake mâyi a mbuu ku mukuna, mapulumune bantu mu mâyi a tshitupa tshidi musulu wa Irrawaddy udielela mu mbuu.

Bualu budi bukemesha mbua muvua Ntemu wa Yehowa nansha umue wa muaba eu kayi mupete njiwu to. Ba bungi ba kudibu bavua bapande bualu bavua baye kusokomena mu Nzubu yabu ya Bukalenge mibaka bimpe. Muaba mukuabu, Bantemu 20 ne bamue bena musoko 80 bavua babande pa musaka wa Nzubu wa Bukalenge bashalapu mêba 9 majima pavua mâyi masapalale mu musoko, mabande bule bua metre matue ku 5. Bakapanda bonso. Diakabi, bantu 300 ba patupu bavua bafue mu musoko au. Mu misoko ya bungi, anu Nzubu ya Bukalenge ke ivua mishale mimane.

Matuku abidi panyima pa tshipepele atshi, biro bia Bantemu ba Yehowa bidi mu tshimenga tshia Rangoun biakatuma kasumbu ka bantu mu tshisumbu tshia ku Bothingone (muaba udi mâyi adielela mu mbuu) bua kuambuluisha Bantemu. Bena luendu abu bakapitshila miaba ivua minyanga kudi tshipepele bua kuepuka bivi, bapitshila miaba ivua bitalu bia bantu bikavua bibola, kufikabu mu musoko wa Bothingone ne losa, ne mâyi a kunua, ne buzi ne biakudia bikuabu. Bantu abu ke ba kumpala bavua bafike mu tshitupa atshi ne diambuluisha. Bobu bamane kupesha Bantemu ba kuine aku biakudia, kubenzelabu kabidi miyuki ya malu a mu Bible bua kubakolesha, e kubashilabu Bible ya bungi ne mikanda ya malu a mu Bible, bualu bivuabu nabi bionso bivua biambula kudi tshipepele.

Bantemu bavua tshipepele tshinyangile bintu bavua ne mmuenenu muimpe wa  malu. Ntemu mukuabu wa mu tshisumbu tshia ku Irrawaddy kuvua bionso binyanguke bikole wakamba ne: “Tudi bajimije bietu bionso bituvua nabi. Nzubu yetu yonso mmiupuke. Bia mu madimi etu bionso mbinyanguke. Mâyi a kunua mmanyangakaja onso kudi mâyi a mu mbuu avua tshipepele etshi tshilue nawu. Kadi bana betu balume ne bakaji bonso kabena bapampakana bu bantu bakuabu nansha. Mbeyemene Yehowa ne bulongolodi buende. Netutumikile tshionso tshiatuambilabu, nansha tuetu bashale mu musoko anyi baye muaba mukuabu.”

Bantemu bakuabu 30 bavua pabu bajimije biabu bionso bakaya ntanta wa meba 10 benda bimba misambu ya Bukalenge ne disanka batangile muaba uvua bana betu bavua babalongoluele biakudia, bilamba ne miaba ya kulala. Kumpala kua kufikabu kuvuabu baya, bakabambila ne: disangisha dinene dia Bantemu ba Yehowa (anyi mpuilu wa tshijengu) divua dienzekela mu tshimenga tshia pabuipi ne kuvuabu baya aku. Bobu kupangadija bua kuanji kubuelamu bua kumvua malu mimpe a mu Bible avua mua kubakolesha ne bua kumonangana ne bena Kristo nabu bakuabu.

Tshipepele tshivua tshiupule nzubu 35 ya bamue Bantemu, tshinyange ya bana betu bakuabu 125 ndambu ne Nzubu ya Bukalenge 8 kakese. Diakalenga, biro bietu bia mu ditunga edi kabivua bitambe kunyanguka to.

Kumpala, tshipepele atshi tshiakakosolola biro bietu ne bantu bakuabu, kabayi mua kufikaku anu bua mitshi minene ivua midishinde mikange njila yonso. Mêba makese panyima pa tshipepele, bana betu batue ku 30 ba ku Betele aku bakumbusha mitshi ayi anu ne bianza. Pavuabu benza mudimu apu, bantu bakalua kuimana bakema. Mu mêba makese, Bantemu bakaji ndambu kuluabu ne mâyi matalala a kunua ne bimuma bua kubipesha bana babu bavua benza mudimu ne bena mutumba babu bavua bakatshila mudimu uvua Bantemu benza. Kamona-kamba mukuabu uvua mumone tshivua tshienzeka, wakakonka ne: “Aba mbanganyi badi benza mudimu bimpe nunku?” Bobu bamane kumuandamuna wakamba ne: “Bivua kuikala bimpe bua bantu bakuabu bavule kuikalabu pabu ne lungenyi lua mudimu wa tshinsanga lua buena lua Bantemu ba Yehowa elu!”

Diakamue, Bantemu bakenza komite ibidi ya diambuluisha nayi bantu miaba ibidi mu Birmanie bua kulombola midimu ya diambuluisha bavua mu ntatu. Bena budisuile nkama ne nkama bakenza mudimu mu tusumbu tua bavua bambuluishangana. Mu matuku makese kuibakilabu Bantemu nzubu yabu ivua miupuke. Pavua kamue kasumbu ka bambuluishi kafike bua kuibakila muanetu wa bakaji kampanda nzubu mupiamupia, bena mutumba bende bakatuadija kukatshila. Muena mutumba nende mukuabu wakamba ne: “Ntemu eu nya bamuibakuluila nzubu kudi ba mu tshitanda tshiabu. Kakuena wa muetu mu Bouddha udi mulueku kungambuluisha meme to. Monayi mumvua kuikala nansha mulue Ntemu pavua mamu eu unyisha!”

Pavua bena mudimu wa luibaku ne komite wa diambuluishangana baye mu tshimenga tshia Thanlyn kutangila nzubu wa dîku dikuabu dia Bantemu uvua mubumbuke muambe kuya yonso, biakabalenga ku muoyo bikole pavua bena dîku adi babambile ne: “Bualu ki mbutuenzekele tuetu to. Wetu nzubu utshidiku bimpe. Nansha tuetu basombamu nunku, kakuena bualu to. Bana betu bakuabu mbashale kabayi nansha ne kazubu kamue to. Ndayi nuanji nubambuluishe bobu!”

Muaba mukuabu wa mu Rangoun, bantu kampanda bakajinga kunyemena mu bitanda bia nzambi bua kusokomenamu. Kadi biibi bia bitanda abi bivua bikanga, muntu kayi mua kubuelamu. Ke bantu kufikabu munda e kukebabu bua kubipomona. Kadi Bantemu ba Yehowa bobu bakambuluisha bantu ba bungi bua kusokomena mu Nzubu yabu ya Bukalenge pavua tshipepele atshi tshituta. Tshilejilu, ku Nzubu wa Bukalenge wa mu tshimenga tshia Dala, Ntemu mukuabu ne mukajende bakakidila bena mutumba 20 bavua banyemenaku. Pakatshiabu, mêku au kaavua ne nzubu ivuabu mua kusombela kabidi to, kabidi bavua ne nzala. Ntemu au wakaya kukeba muntu uvua upana losa, kulusumbaye bungi bukumbane bua kudisha bantu abu bonso.

Dîku kampanda dia mu Rangoun divua ne Bantemu ba Yehowa ndambu, tshibi bakuabu batendelela mu bitanda bikuabu. Pakapita tshipepele tshibi atshi, dîku adi dionso dijima diakalua mu bisangilu ku Nzubu wa Bukalenge. Mbua tshinyi?  Umue wa kudibu wakamba ne: “Ba mu tshitanda tshietu bavua balaye bua kulua kututangila panyima pa tshipepele, kadi kabatu banji kulua nansha musangu umue. Anu Bantemu ke batu balue kutumona. Nuvua batupeshe losa ne mâyi. Kanuena bu bena mu bitanda bikuabu ebi to!” Bantu ba mu dîku edi bavua kabayi Bantemu bakanyisha malu avuabu bumvue mu dilonga dia Tshibumba tshia Nsentedi divua ne tshiena-bualu ne: “Yehowa utu umvua kudila kuetu,” kuandamunabu kabidi bikole.

Mamu kampanda uvua ulonga Bible ne Bantemu wakalua mu bisangilu lumingu lumue panyima pa tshipepele atshi. Mu bisangilu amu bavua babalamu mukanda mutuma kudi biro bia Bantemu uvua umvuija tshivuabu benze bua kuambuluisha bantu bavua bapanduke, ulonda ne malu avua mabafikile. Patshivuabu baubala, mamu au wakatuadija kudila. Tshivua tshimukemeshe tshimuenze disanka ntshia kumvua ne: bavua bakebe Bantemu bonso, babapete bikale anu bimpe. Pashishe, bakamupesha bintu biakudia ne bia kuvuala ndambu, kumuashilabu ne kazubu ka ntenta pabuipi ne pavua nzubu wende. Kuambaye muvuaye udiumvua ne: Bantemu bandame bimpe menemene.

Yezu wakamba ne: ‘Bua bualu ebu bantu bonso nebamanye ne: Nudi bayidi banyi, binuasuangana nunku.’ (Yone 13:35) Kabidi muyidi Yakobo wakashindika ne: ditabuja dilelela didi dienda pamue ne bienzedi bimpe. (Yakobo 2:14-17) Bantemu ba Yehowa batu batumikila mêyi au ne muoyo mujima, badienzeja bua kuleja dinanga dia nunku pa kuambuluisha badi mu dikenga.

[Lungenyi lunene lua mu dibeji 11]

Bible udi wamba ne: ditabuja dilelela didi dienda pamue ne kuenza bienzedi bimpe