Nkonko ya babadi

Bua tshinyi Nzambi katu wandamuna masambila makuabu?

Bantu badi mua kuyikila ne Nzambi bipepele. Anu bu mutu tatu wa dinanga umvua disanka patu bana bende bamukuatshila malu badilekelele, ke mutu Yehowa Nzambi umvua pende patudi tusambila. Kadi anu bu mutu tatu yonso wa meji, kudi malu majalame atu Nzambi kayi wandamuina amue masambila. Mmutusokoke malu aa anyi mmutulejawu mu Bible?

Mupostolo Yone udi utumvuija ne: ‘Edi ndikima ditudi nadi kudiye ne: Bituamulomba tshintu tshionso bu mu disua diende, yeye udi utumvuila.’ (1 Yone 5:14) Masambila etu adi ne bua kumvuangana ne disua dia Nzambi. Bamue batu balomba bintu bitu kabiyi bipetangana ne disua dia Nzambi, bu mudi bua kukuata mu manaya a mfulanga anyi a ditika bintu kampanda. Bakuabu pabu batu basambila ne majinga mabi. Muyidi Yakobo wakadimuija bantu bua masambila mabi a nunku wamba ne: ‘Nudi nulomba ne kanuena nuangata bintu, bualu bua nudi nubilomba bibi, anu bualu bua kubimuangalaja ku masanka enu.’​—Yakobo 4:3.

Tshilejilu, fuanyikijabi bisumbu bibidi bia banayi ba ndundu bisambila bua kuelanganabi ndundu. Katuena mua kutekemena bua Nzambi kuandamuna masambila adi aluishangana a mushindu eu to! Bidi kabidi nanku bua bantu badi baluangana mvita lelu kadi basambila bua kutshimunanganabu.

Bantu badi kabayi banemeka mikenji ya Nzambi, Nzambi kêna wandamuna masambila abu to. Yehowa wakafika too ne ku diambila batendeledi bena lubombo ne: ‘Panuolola bianza bienu kundi, nensokoke mêsu anyi kunudi; ee, panuantendelela ne mitendelelu ya bungi mene, tshiena nnumvuila; bianza bienu bidi biuwule tente ne mashi.’ (Yeshaya 1:15) Bible udi wamba ne: ‘Udi umusha matshi ende ku diyisha dia mikenji, mulombu wende udi utondesha Nzambi.’​—Nsumuinu 28:9.

Kadi Yehowa neikale anu uteleja masambila a muoyo mutoke a batendeledi badi badienzeja bua kumuenzela mudimu biumvuangane ne disua diende. Mbuena kuamba ne: neandamune masambila abu onso anyi? Too. Tumonayi bimue bilejilu bia mu Bible.

Nansha muvua Mose ne malanda a pa buawu ne Nzambi, uvua pende ne bua kusambila ‘bu mudi disua’ dia Nzambi. Mose wakalomba bualu buvua kabuyi disua dia Nzambi bua kubuelaye mu buloba bua Kanâna, wamba ne: ‘Witabuje bua meme nsabuke, ntangile buloba buimpe budi dishiya dia Yadene.’ Kadi bu muvua Mose muenze bubi, Nzambi wakamuambila ne: kavua ne bua kubuela mu buloba abu to. Mpindieu, pamutu pa kuandamuna disambila dia Mose, Yehowa wakamuambila ne: ‘Kuakujika, kungambidi bualu ebu kabidi.’​—Dutelonome 3:25, 26; 32:51.

Mupostolo Paulo wakasambila bua kupeta disulakana ku tshivuaye ubikila bu “dieba mu mubidi.” (2 Kolinto 12:7) “Dieba” adi divua mua kuikala disama dia mêsu anyi baluishi bavua bamutondesha nsombelu ne ‘bantu bakadinga ne: bavua bana babu.’ (2 Kolinto 11:26; Galatia 4:14, 15) Paulo wakafunda ne: ‘Ngakalomba Mukalenge misangu isatu ne: Diumbuke kundi.’ Kadi Nzambi uvua mumanye ne: bu Paulo mua kutungunuka ne kuyisha ne lutatu lua “dieba mu mubidi” alu, bukole bua Nzambi ne dimueyemena dia Paulo bivua mua kumueneka patoke. Nunku, pamutu pa kuandamuna dilomba dia Paulo, Nzambi wakamuambila ne: ‘Bukole buanyi budi bukumbajibua tshishiki mu butekete buebe.’​—2 Kolinto 12:8, 9.

Bushuwa, Nzambi mmumanye bimpe kutupita padibi bikengela kuandamuna amue masambila anyi kubenga kuandamuna bua diakalenga dietu. Yehowa utu misangu yonso wandamuna masambila etu bua kutufikisha ku diakalenga, biumvuangane ne disua diende dia dinanga didiye mufundishe mu Bible.